1-2. Asegun na Salmo 40:5, cosa maga regalo si Jehova ya dale kanaton y porque kita considera con ese?

UN BONDADOSO Dios si Jehova. Pensa con el cuanto regalo que ya dale le kanaton: el bonito tierra onde kita ta queda; el diaton utuk que maka-bilib el diseño; y el de suyu precioso Palabra, el Biblia. Por medio con ese tres regalo, ya dale si Jehova kanaton lugar onde queda, ya dale le kanaton abilidad para pensa y man cuento y ya dale le contestacion na diaton maga importante pregunta.​—Le con el Salmo 40:5.

² Na este articulo, hay discuti kita con el cuanto detalle acerca con ese tres regalo. Si medita kita con ese, mas aprecia kita con ese y queda mas fuerte el diaton deseo para hace alegre con el diaton amable Creador, si Jehova. (Rev. 4:11) Mas queda tambien kita preparao ayuda con aquellos quien ta creé con el falso doctrina de evolucion.

3. Porque diferente el tierra na otro planeta?

³ Claro puede mira con el sabeduria del Dios na manera si paquemodo le ya crea con el tierra. (Roma 1:20; Heb. 3:4) Gendeh lang el diaton planeta el ta bira alrededor del sol, pero diferente este cay este lang el ta puede sustene con el vida del gente.

4. Porque kita puede habla que mas bueno el tierra contra na maga barco?

⁴ Puede kita compara con el tierra na universo na un barco que tan lutao na mar. Pero, tiene grande diferencia entre na un barco que lleno de gente y na diaton tierra. Por ejemplo, paquemodo de tarda esta vivo el maga gente na un literal  barco si sila mismo produci con el diila mismo oxygen, comida y agua y si gendeh sila puede buta con el diila basura na mar? Gendeh tarda, hay muri el maga gente na ese barco. Pero, el tierra puede suporta con el billones de vivo creatura. Ta produci este con el oxygen, comida y agua que necesita kita y todo se gendeh ta acaba. Maskin pa esta el todo suciu aqui na tierra, ta esta siempre bonito el tierra y puede siempre kita queda aqui. Paquemodo se ya queda posible? Ya diseña si Jehova con el tierra que tiene abilidad man recycle con el maga basura de este para puede usa otravez. Discuti kita unrato con el dos bonito diseño de Jehova que amo el oxygen cycle y el water cycle.

5. Cosa el oxygen cycle y cosa este ta dale prueba?

⁵ El oxygen amo un gas que ta puede sustene con el maga vivo creatura, incluido ya kita. El maga vivo creatura ta resulla bien manada aire cada año. Este mismo maga creatura ta hace sale un clase de peligroso gas que ta llama carbon dioxide. Pero maskin pa ansina, gendeh ta acaba el oxygen y gendeh tambien ta llena de carbon dioxide el atmosfera. Porque? Cay ya crea tambien si Jehova diferente clase de siembra que tiene otro-otro grandor que ta saca carbon dioxide y ta hace sale oxygen. El oxygen cycle ta dale mira que deverasan el maga palabra na Maga Actividad 17:24, 25: “El Dios . . . ta dale el vida y el resuello.”

6. Cosa el water cycle y cosa este ta dale prueba? (Mira con el cajon “ Regalo Estaba con Jehova el Agua.”)

⁶ Tiene agua na tierra cay el diaton planeta tiene justo distancia na sol. Cay si move con este maskin un poco lang para na sol, hay seca el agua y el tierra hay queda caliente, seco y gendeh puede sustene vida. Si hace move con el tierra maskin un poco lejos lang na sol, todo el agua hay queda duro y llena el tierra de hielo. Cay ya pone si Jehova con el tierra na justo locacion, el water cycle puede sustene vida na tierra. Por causa na sol, ta calienta el agua na mar y na tierra y tan evaporate este para queda celaje. Cada año, tan evaporate el millones de litro de agua. Este agua ta esta na atmosfera maga diez dia antes este cae como ulan o nieve. Despues, este agua hay bira otravez na mar, na rio y otro pa y este cycle hay repiti otravez. Ya diseña si Jehova con este para pirmi tiene agua el tierra. Prueba este que si Jehova sabio y poderoso.​—Job 36:27, 28; Ecl. 1:7.

7. Cosa el cuanto manera que puede kita dale mira apresacion na regalo que ya menciona na Salmo 115:16?

⁷ Cosa kita hace para mas aprecia con el diaton bonito planeta y con el todo cosas que tiene este? (Le con el Salmo 115:16.) El un manera amo que medita con el maga cosas que ya hace si Jehova. Manda este move kanaton para rindi gracias con ele todo el dia na maga cosas que ta dale le. Y ta dale kita mira que ta aprecia kita con el tierra si ta limpia kita con el lugar onde kita ta queda.

8. Porque kita puede habla que maka-bilib el diseño del diaton utuk?

⁸ Maka-bilib el diseño del diaton utuk. Cuando na vientre tu del de tuyu nana, el de tuyu utuk ta forma na organizao manera y miles de maga nuevo brain cell el ta forma cada minuto. Asegun na maga researcher, el utuk del maga adulto ta contene cerca maga 100 billon celula que ta llama neuron. Este maga celula amo el ta forma con el diaton utuk que tiene pesades de maga 1.5 kilo. Considera con el cosa ta puede hace el diaton utuk.

9. Para contigo, cosa el prueba que el abilidad para converza amo un regalo estaba con Dios?

 ⁹ Un milagro el diaton abilidad para converza. Pensa si cosa ta sucede si ta converza kita. Na cada palabra que ta habla tu, el de tuyu utuk necesita controla con el maga 100 culado que puede incuntra na de tuyu lenggua, garganta, labio, sahgang y pecho. Este maga culado necesita move na justo timing para puede entende con el cosa tu ta habla. Asegun na un estudiada que yan imprenta del 2019, el maga nuevo nacido bata ta puede ya conoce maga individual palabra. Ta suporta este con el cosa ta creé el manada researcher​—que ya nace kita con abilidad para conoce y aprende maga lengguaje. Claro que el diaton abilidad para converza amo un regalo estaba con Dios.​—Ex. 4:11.

10. Paquemodo kita dale mira que ta aprecia kita con el regalo de converzada?

¹⁰ Puede kita dale mira que ta aprecia kita con el regalo de converzada si explica kita con el diaton creencia acerca na creacion con aquellos quien ta creé na evolucion. (Sal. 9:1; 1 Ped. 3:15) Aquellos quien ta creé con ese doctrina ta habla que nuay quien ya diseña con el tierra y con el vida que puede incuntra aqui. Usando el Biblia y el cuanto maga punto que ya discuti kita na este articulo, puede kita defende con el diaton Tata na cielo y explica con aquellos quien preparao oi si porque kita convincido que si Jehova el Creador del cielo y tierra.​—Sal. 102:25; Isa. 40:25, 26.

11. Cosa el un razon si porque maka-bilib el diaton utuk?

¹¹ Maka-bilib el diaton abilidad para acorda. Del antes, ya carcula el un autor que el diaton utuk tiene abilidad para acorda valor de 20 millon libro de informacion. Pero ahora, ta habla sila que mas grande pa el capacidad del diaton memoria. Cosa especial abilidad pa tiene el maga gente?

12. Na cosa manera el diaton abilidad para aprende maga leccion ta hace kanaton diferente na maga animal?

¹² Na todo creatura aqui na tierra, solamente kita maga gente el tiene abilidad para aprende maga leccion na cosa ya pasa kanaton de antes. Como resulta, puede kita cambia el manera si paquemodo kita ta pensa, ta vivi y puede kita queda mas buen gente. (1 Cor. 6:9-11; Col. 3:9, 10) Gane, puede kita man train con el diaton conciencia para determina si cosa el justo y si cosa el mali. (Heb. 5:14) Puede kita aprende dale mira amor, compasion y lastima. Y puede kita imita con el justicia de Jehova.

13. Asegun na Salmo 77:11, 12, paquemodo kita debe usa con el diaton abilidad para acorda?

¹³ El un manera que puede kita dale mira que ta aprecia kita con el abilidad para acorda amo si pricura kita acorda con el todo tiempo que si Jehova ya ayuda y ya dale kanaton comforta de antes. Dale este confianza kanaton que ayuda tambien le kanaton na  futuro. (Le con el Salmo 77:11, 12; 78:4, 7) El otro manera amo que acorda con el maga buen cosas que ya hace el otro gente para kanaton y aprecia con ese. Asegun na maga researcher, mas alegre el maga gente si sabe sila rindi gracias. Bueno tambien si imita kita con Jehova y iscuji ulvida con el cuanto cosas. Por ejemplo, perfecto el memoria de Jehova pero si arripinti kita, ta iscuji le perdona y ulvida con el maga kamali que ya hace kita. (Sal. 25:7; 130:3, 4) Y quierre tambien le que hace se kita con otro quien ya arripinti na maga kamali que ya hace sila kanaton.​—Mat. 6:14; Luc. 17:3, 4.

14. Paquemodo kita dale mira que ta aprecia kita con el abilidad del diaton utuk?

¹⁴ Puede kita dale mira que ta aprecia kita con el abilidad del diaton utuk si usa kita con este para honra con el quien ya dale este kanaton. El cuanto ya iscuji usa con el diila utuk para na diila mismo bien​—para sila mismo decidi si cosa el justo y si cosa el mali. Pero cay si Jehova el ya crea kanaton, razonable lang para pensa que mas bueno el de suyu principio contra na principio del gente. (Roma 12:1, 2) Tiene kita paz si obedece kita con Jehova. (Isa. 48:17, 18) Y sabe kita si cosa el proposito del diaton vida​—para dale honor con el diaton Creador y Tata y hace con ele alegre.​—Prov. 27:11.

15. Na cosa manera el regalo de Biblia ta dale mira que ta ama si Jehova con el maga gente?

¹⁵ El Biblia amo un amable regalo estaba con Dios. El diaton Tata na cielo ya guia con el maga gente para escribi con este cay ta ama gayot le kanaton. Por medio na Biblia, si Jehova ya contesta con el de con todo importante pregunta diaton igual na: Onde kita estaba? Cosa el proposito del vida? Y cosa sucede na futuro? Quierre si Jehova que sabe el todo de suyu maga anak con el maga contestacion de ese maga pregunta. Poreso, ya manda le move con el maga gente para man translate con el Biblia na manada lengguaje.  Ahora, puede ya le na mas de 3,000 lengguaje con el entero Biblia o con el cuanto parte de este. Desde antes, el Biblia amo el libro que tiene el de con todo manada translation y copia que ya distribui. Maskin onde man ta queda el maga gente o si cosa man el diila lengguaje, el todo tiene el oportunidad aprende con el mensaje del Biblia na diila mismo lengguaje.​—Mira con el cajon “ Translation de Biblia na Maga Lengguaje na Africa.”

16. Base na Mateo 28:19, 20, paquemodo kita dale mira que ta aprecia kita con el Biblia?

¹⁶ Puede kita dale prueba que ta aprecia kita con el Biblia si le kita con este cada dia, medita con el cosa este ta enseña y si hace kita el todo lo que puede para aplica con el cosa kita ya aprende. Omento pa, ta dale kita mira que ta rindi kita gracias con el Dios si hace kita con el todo para predica con el mensaje del Biblia na mas manada gente.​—Sal. 1:1-3; Mat. 24:14; le con el Mateo 28:19, 20.

17. Cosa clase de maga regalo kita ya considera na este articulo y cosa kita discuti na siguiente?

¹⁷ Na este articulo, ya considera kita con el maga regalo del Dios igual con el tierra onde kita ta queda; el maka-bilib diseño del diaton utuk; y el inspirao Palabra del Dios, el Biblia. Pero tiene pa otro maga regalo que ya dale si Jehova kanaton que gendeh kita ta puede mira. Discuti kita con este na siguiente articulo.