1. Cosa el ejemplo ya dale mira si Jesus con el de suyu maga siguidores y cosa sila ya hace? (Mira con el letrato na cover.)

SI Jesus ya mentena con el de suyu positivo mirada durante el de suyu ministerio na tierra y quierre le que esta tambien positivo na ministerio el de suyu maga siguidores. (Juan 4:35, 36) Cuando junto si Jesus con el de suyu maga dicipulo, bien con gana sila na trabajo predicacion. (Luc. 10:1, 5-11, 17) Pero cuando ya arresta y ya mata con Jesus, temporario ya perde el deseo del maga dicipulo que predica. (Juan 16:32) Despues del de suyu resureccion, ya anima kanila si Jesus que man focus na predicacion. Y despues le subi na cielo, bien activo sila ya predica y gane, ya reclama el diila maga enemigo: “Ya hace ustedes calayat el de ustedes maga insiñanza na entero Jerusalem.”—Act. 5:28.

2. Paquemodo si Jehova ya bendici con el trabajo predicacion?

² Ya guia si Jesus con el trabajo que ya hace el maga Cristiano del primer siglo y ya bendici kanila si Jehova poreso manada el quien ya acepta con el diila mensaje. Por ejemplo del Pentecostes 33 C.E., maga 3,000 el ya bautiza. (Act. 2:41) Y ya continua queda manada el maga dicipulo. (Act. 6:7) Ya habla tambien daan si Jesus que hay tene buen exito el trabajo predicacion na ultimo maga dia.—Juan 14:12; Act. 1:8.

3-4. Porque tan dificil el cuanto na trabajo predicacion y cosa kita considera na este articulo?

³ Todo kita ta pricura mentena positivo mirada na ministerio. Na cuanto maga nacion, facil lang con este hace. Porque? Cay na diila lugar, bien manada el quien quierre man Bible study y gane necesita espera el cuanto si cuando vacante el un Testigo de Jehova. Pero na otro parte del mundo, el maga publisher tan dificil na trabajo predicacion. El maga gente  ralo lang na casa y aquellos na casa posible gendeh interesao na Biblia.

⁴ Si ta queda tu na un lugar donde dificil el trabajo predicacion, posible que puede contigo ayuda el maga sugestion na este articulo. Hay considera kita si cosa ya hace el cuanto para mas manada gente sila puede man cuento na diila teritorio. Y examina kita si porque kita puede esta positivo, oi man o gendeh el maga gente con el diaton mensaje.

5. Cosa el maga dificultad que ta enfrenta el manada Testigo de Jehova?

⁵ Manada Testigo el mas tan dificil ya ahora que man cuento con el maga gente na diila casa. El cuanto maga publisher ta queda na maga lugar donde tiene manada maga apartment que guardiao o na maga casa que tiene gate. Posible que tiene security guard na ese maga lugar y gendeh ta manda entra si nuay permiso del dueño del casa. El otro maga publisher ta puede lang predica na casa en casa pero bien poco gente lang sila ta incuntra na casa. El otro ta predica na maga lejos lugar donde poco gente lang el ta queda. El maga publisher posible viaja bien largo distancia para anda na un casa que posible nuay gente. Si experiencia kita este maga dificultad, gendeh kita debe descanza predica. Cosa kita puede hace para puede enfrenta con este y tene productivo ministerio?

6. Na cosa manera el maga predicador igual na maga pescador?

⁶ Ya compara si Jesus con el trabajo predicacion na trabajo del un pescador. (Mar. 1:17) El cuanto pescador posible pesca por cuanto dia pero nuay cujida. Pero, gendeh sila ta descanza pesca sino tan adjust sila. Ta cambia sila el hora, lugar o manera si paquemodo pesca. Puede tambien kita hace igual ansina na diaton ministerio. Considera con este maga sugestion.

7. Cosa posible el resulta si predica kita na diferente tiempo?

⁷ Pruba predica na diferente tiempo. Puede kita man cuento mas manada gente si predica kita na hora que posible na casa sila. Cay asigurao, ta bolbe man gayot el maga gente na casa! Practical para na manada hermano y hermana que predica tarde o denoche cay mas manada gente sila ta puede man cuento. Mas pa, posible que mas relax el maga gente y quierre man cuento na ese maga tiempo. O baka puede ayuda contigo el sugestion que ya dale el un anciano que si David. Ya habla le que despues predica na un teritorio, ele y el de suyu uban ya bira otravez na maga casa donde nuay quien ya sale cuando ya predica sila del primero. Ele ya habla, “Nuay yo expecta que manada maga householder el na casa cuando ya visita kame otravez.” *

8. Paquemodo kita puede aplica con el Eclesiastes 11:6 na diaton ministerio?

⁸ Gendeh kita debe descanza predica. El texto onde yan base este articulo ta hace acorda kanaton si cosa custumbre kita necesita tene. (Le con el Eclesiastes 11:6.) Si David que ya menciona enante nuay descanza predica. Despues cuanto beses bira na un casa, na uliji, ya puede le man cuento con el householder. Interesao este gente que discuti con el Biblia y ya habla le, “Maga ocho año ya yo qui ta queda pero nuay pa gayot yo puede man cuento un Testigo de Jehova na de mio casa.” Si David ya habla, “Ya puede yo discubri que si puede kita man cuento con el maga  gente quien ralo lang na casa, mas mucho kanila el ta oi con el diaton mensaje.”

9. Cosa ya hace el cuanto publisher para predica con el maga gente quien ralo lang na casa?

⁹ Pruba predica na diferente lugar. Para puede predica con el maga gente quien ralo lang na casa, el cuanto publisher ya cambia lugar onde sila predica. Por ejemplo, efectivo el predicacion na calle y el usada del maga cart para predica con el maga gente quien ta queda na maga grande apartment donde gendeh puede predica. Por causa con ese, el maga publisher ya puede man cuento con el maga gente quien ta queda na ese maga lugar. Mas pa, manada publisher el ya puede discubri que mas quierre el maga gente que man cuento o acepta literatura si talli sila na parque, tianggue y na lugar de negocio. Si Floiran, un circuit overseer na Bolivia, ya habla: “Ta anda kame na maga tianggue y lugar de negocio maga ala-una hasta alas tres de tarde donde gendeh tanto ocupao el maga tendero. Ta puede kame man cuento con el maga gente y ta puede pa gane principia man Bible study.”

10. Cosa maga manera tu puede hace para predica con el maga gente?

¹⁰ Pruba predica na diferente manera. Pone kita que cuanto beses ya tu ya pricura predica con el un persona. Cuanto beses ya tu ya anda na de suyu casa na otro-otro tiempo pero nuay siempre le. Tiene pa ba otro manera para puede tu predica con ese persona? Si Katarína ya habla, “Ta escribi yo carta con aquellos gendeh yo ta puede incuntra na casa y ta escribi yo si cosa era yo quierre habla kanila.” Cosa el punto? Pricura busca manera para puede predica con todo na de ustedes teritorio.

11. Porque el cuanto maga gente gendeh interesao na diaton mensaje?

¹¹ El cuanto maga gente gendeh interesao na diaton mensaje. Ta pensa sila que gendeh sila necesita con Dios o con el Biblia. Gendeh sila ta creé con Dios por causa na bien manada sufrimiento que ta mira sila na mundo. Gendeh sila ta acepta con el Biblia cay ta mira sila con el maga religioso lider quien ta clama que ta obedece con el Biblia pero gendeh ta sigui con ese. El otro bien ocupao na diila trabajo, familia o personal problema y gendeh sila ta puede mira si paquemodo kanila puede ayuda el Biblia. Paquemodo kita puede mentena con el diaton alegria si aquellos con quien kita ta predica gendeh ta aprecia con el diaton mensaje?

12. Na cosa manera puede kanaton ayuda na ministerio si aplica kita con el Filipo 2:4?

¹² Dale mira personal interes. Manada de aquellos quien gendeh interesao del primero el ya oi con el diaton mensaje cuando ya sinti sila que el publisher deverasan interesao kanila. (Le con el Filipo 2:4.) Por ejemplo, si David que ya menciona enante ya habla, “Si tiene kanamon quien ta habla que gendeh le interesao, ta esconde kame con el diamon Biblia o diamon literatura y ta habla: ‘Interesao kame sabe si porque tu ta sinti ansina.’” Ta puede sinti el maga gente si deverasan kanila interesao el un persona. Posible que ulvida sila si cosa kita exacto ya habla pero grande el posibilidad que acorda sila si cosa sila ya sinti na cosa kita ya hace. Maskin pa gendeh kanaton permiti man cuento el householder, puede siempre kita dale mira por medio na diaton custumbre y reaccion na cara que deverasan kita interesao kanila.

13. Cosa kita hace para queda mas interesao el maga householder na diaton mensaje?

¹³ Ta dale kita mira personal interes si tan adjust kita con el diaton mensaje base na necesidad y na cosa interesao el householder. Por ejemplo, tiene ba kita cosa ya puede nota que ta dale mira que tiene maga bata na casa? Posible, hay queda interesao el mayores na consejo del Biblia acerca si paquemodo hace engranda maga anak o na maga practical sugestion de este si paquemodo puede tene mas alegre familia. Ta mira ba kita manada candao na puerta? Puede kita man cuento kanila acerca na crimen y na miedo que ta causa este na maga gente. Y posible, aprecia el householder si sabe le que hay termina con este maga crimen. Cada vez tu puede man cuento con el maga gente quien quierre oi, pricura ayuda kanila para entende si paquemodo el consejo na Biblia puede ayuda  kanila. Si Katarína que ya menciona enante ya habla, “Ta hace yo acorda con el de mio mismo cuerpo si paquemodo ya queda mas enbuenamente el de mio vida por causa na verdad.” Como resulta, con conviccion tan cuento si Katarína y asigurao ta puede se nota el maga gente.

14. Base na Proverbio 27:17, paquemodo kita puede ayuda con uno y otro na ministerio?

¹⁴ Beneficia na ayuda del otro. Del primer siglo, si Pablo ya enseña con Timoteo si paquemodo predica y enseña, y ya anima le con Timoteo que enseña tambien se con otro. (1 Cor. 4:17) Igual con Timoteo, puede tambien kita aprende na maga experienciao hermano y hermana na diaton congregacion. (Le con el Proverbio 27:17.) Considera con el ejemplo del un hermano que si Shawn. Yan pioneer le por cuanto tiempo na un lugar donde mayoria del maga gente contento ya na diila religion. Paquemodo le ya mentena con el de suyu alegria? “Si posible, ta lleva yo uban si ta anda yo na ministerio,” ya habla le. “Mientras ta viaja para na otro casa, ta usa kame con el tiempo para discuti si paquemodo kame mejora con el diamon abilidad de enseñada. Por ejemplo, tan cuento kame si paquemodo kame ya predica con el un householder. Despues, ta discuti kame si cosa kame habla si enfrenta kame semejante situacion.”

15. Porque importante el rezo na diaton ministerio?

¹⁵ Pidi ayuda con Jehova na rezo. Pidi con Jehova que guia contigo cada vez tu participa na ministerio. Si nuay el ayuda del de suyu poderoso sagrao espiritu, ni uno kanaton gendeh puede tene buen exito na ministerio. (Sal. 127:1; Luc. 11:13) Queda especifico si ta pidi tu con el ayuda de Jehova na rezo. Por ejemplo, pidi con ele que guia contigo na maga gente quien tiene justo condicion de corazon y preparao oi. Y despues harmonia na de tuyu rezo, predica con todo con quien tu incuntra.

16. Porque importante el personal estudiada na diaton ministerio?

¹⁶ Dale tiempo para na personal estudiada. El Palabra del Dios ya habla: “Discubri el voluntad del Dios y sabe si cosa el bueno, cosa el ta gusta Le, cosa el perfecto.” (Roma 12:2) Si convincido kita que sabe kita el verdad acerca con Dios, hay queda mas fuerte el diaton conviccion si man cuento kita con otro na ministerio. Si Katarína que ya menciona enante ya habla: “Nuay pa tarda, ya realiza yo que necesita yo hace fuerte con el de mio fe na cuanto maga enseñanza na Biblia. Poreso, ya estudia yo enbuenamente con el maga evidencia que tiene un Creador, que el Biblia amo gayot el Palabra del Dios y que el Dios tiene un organizacion que ta representa con ele ahora.” Si Katarína ya habla que el de suyu personal estudiada ya hace fuerte con el de suyu fe y ya omenta con el de suyu alegria na ministerio.

17. Porque ya esta positivo si Jesus na de suyu ministerio?

¹⁷ Si Jesus ya esta positivo y ya continua predica maskin pa el cuanto gendeh interesao na de suyu mensaje. Porque? Sabe le que bien necesita el maga gente que sabe el verdad y quierre le dale oportunidad con el mas manada gente para acepta con el mensaje del Reino. Sabe tambien le que el cuanto quien gendeh interesao na primero posible acepta con el verdad. Considera con el cosa ya sucede na de suyu mismo familia. Durante el ministerio de Jesus por tres año y media, ni uno del de suyu maga hermano el ya queda de suyu dicipulo. (Juan 7:5) Pero despues del de suyu resureccion, ya queda sila maga Cristiano.—Act. 1:14.

18. Porque kita ta continua predica?

 ¹⁸ No sabe kita si quien hay acepta con el maga verdad na Biblia que ta enseña kita. El cuanto mas ta necesita pa largo tiempo compara con otro para acepta con el diaton mensaje. Maskin aquellos quien no quierre oi kanaton ta puede mira con el diaton buen conducta y pagka-positivo, y posible “ay dale sila gloria con Dios” na uliji.—1 Ped. 2:12.

19. Asegun na 1 Corinto 3:6, 7, cosa kita debe acorda?

¹⁹ Maskin pa kita el ta siembra y ta rega, debe kita acorda que el Dios el quien ta hace crici con este. (Le con el 1 Corinto 3:6, 7.) Si Getahun, un hermano quien ta sirvi na Ethiopia, ya habla: “Por mas de 20 año, iyo lang el Testigo na diamon lugar. Pero ahora, tiene ya 14 publisher aqui. Trece kanila el ya bautiza, incluido ya el de mio mujer y tres anak. Maga 32 el ta atende na diamon miting.” Alegre si Getahun que ya continua le predica mientras con paciencia ta espera con Jehova que ayuda con el maga gente queda De Suyu maga siervo.—Juan 6:44.

20. Na cosa manera igual kita na rescue team?

²⁰ Para con Jehova, precioso el vida del todo maga gente. Ya dale le kanaton el privilegio que trabaja junto con el de suyu Anak para ajunta con el maga gente estaba na todo nacion antes el fin de este sistema. (Hag. 2:7) El diaton trabajo predicacion puede compara na un rescue operation. Y igual kita na maga miembro del rescue team quien ta ayuda con el maga gente quien yan bakul adentro del minajan. Maskin pa posible que poco minero ya lang el vivo, bien importante siempre el trabajo que ta hace el rescue team. Ansina tambien el trabajo que ta hace kita na ministerio. No sabe kita si cuanto gente pa kita puede ayuda estaba na sistema de Satanas. Pero, puede usa si Jehova con el maskin quien kanaton para ayuda kanila. Si Andreas, un hermano quien ta queda na Bolivia, ya habla, “Sabe yo que si el un persona ya aprende el verdad y ya bautiza, por causa se cay manada el quien ya ayuda con ele.” Ojala, mentena kita ansina clase de mirada na diaton ministerio. Si hace kita se, hay bendici kanaton si Jehova y el diaton ministerio hay dale kanaton deverasan alegria.