1. Cosa tu nuay expecta cuando primer vez tu ya habla con otro acerca na mensaje del Biblia?

TA ACORDA ba tu el tiempo cuando ya puede tu realiza que ya incuntra tu el verdad? Bien facil lang para entende el todo cosa tu ta aprende estaba na Biblia! Ya sinti tu que todo gente hay acepta con el cosas que ya aprende tu. Convincido tu que el mensaje na Biblia hay dale kanila mas alegre vida ahora y un bonito esperanza na futuro. (Sal. 119:105) Poreso, con gana tu ya habla el cosa tu ya aprende na de tuyu maga amigo y pariente. Pero, nuay tu expecta que manada el gendeh acepta con el cosa tu ya habla kanila.

2-3. Na tiempo de Jesus, cosa el reaccion del mayoria del maga gente con ele y na de suyu mensaje?

² Gendeh kita debe espanta si el otro gendeh ta acepta con el mensaje que ta predica kita. Na tiempo de Jesus, el mayoria nuay acepta con ele maskin pa ya hace le maga milagro que ta dale prueba que el Dios ta suporta con ele. Por ejemplo, si Jesus ya hace resucita con Lazaro—un milagro que gendeh puede nega aquellos quien tan contra con ele. Maskin pa ansina, el maga Judio lider nuay acepta con Jesus como el Mesias. Gane, ya pricura sila mata con Jesus y con Lazaro!—Juan 11:47, 48, 53; 12:9-11.

³ Sabe si Jesus que mayoria del maga gente gendeh acepta con ele como el Mesias. (Juan 5:39-44) Ya habla le con el maga dicipulo de Juan Bautista: “Alegre aquel quien gendeh ta perde el fe conmigo.” (Mat. 11:2, 3, 6) Porque bien manada el nuay acepta con Jesus?

4. Cosa kita hay considera na este articulo?

⁴ Na este articulo y na sunod con este, hay examina kita con el cuanto razon si porque manada del primer siglo el nuay demonstra fe con Jesus. Hay aprende tambien kita si porque manada ahora el ta permiti con el diila mismo cuerpo que man  tisut. El mas importante, hay aprende kita si porque kita puede tiene fuerte fe con Jesus para gendeh kita man tisut.

5. Porque el cuanto posible ya pensa que gendeh si Jesus el Mesias?

⁵ Manada el yan tisut por causa na lugar onde ya engranda si Jesus. Ta acepta sila que un buen maestro si Jesus y ta hace le maga milagro. Pero para kanila, anak lang le del un ordinario carpintero. Y ya engranda le na Nazaret, un ciudad que gendeh importante para na manada gente. Gane maskin si Natanael, quien ya queda un dicipulo de Jesus, ya puede habla del primero: “Tiene ba cosa bueno ta puede sale na Nazaret?” (Juan 1:46) Posible, no quierre si Natanael con el ciudad onde ya engranda si Jesus. O baka ya pensa le con el profecia na Miqueas 5:2 donde ya predicta que el Mesias hay nace na Betlehem y gendeh na Nazaret.

6. Cosa era ya puede ayuda con el maga gente na tiempo de Jesus para identifica con ele como el Mesias?

⁶ Cosa el Escritura ta habla? Si profeta Isaias ya predicta que el maga enemigo de Jesus gendeh hay pone atencion “na maga detalle del de suyu [del Mesias] generacion.” (Isa. 53:8) Ya predicta con el manada de ese maga detalle. Si aquellos maga gente ya dale tiempo para examina con el maga justo informacion, ya sabe era sila que si Jesus ya nace na Betlehem y ele un descendiente de Rey David. (Luc. 2:4-7) Poreso, el lugar onde ya nace si Jesus harmonia na profecia que puede le na Miqueas 5:2. Entonces, cosa el problema? El maga gente dayun-dayun lang ya hace conclusion maskin nuay sila el todo detalle. Por causa con este, yan tisut sila.

7. Porque manada ahora el no quierre acepta con el maga siervo de Jehova?

⁷ Ansina ba tambien el maga gente ahora? Si. Mayoria del maga Testigo de Jehova maga ordinario gente lang. Para con el manada, “gendeh sila estudiao.” (Act. 4:13) El cuanto ta sinti que el maga siervo del Dios gendeh puede enseña acerca na Biblia cay nuay sila gradua na maga conocido escuela de religion. El otro ta habla que el maga Testigo de Jehova amo “un religion del maga Americano,” maskin pa el deverasan, 1 lang na 7 Testigo de Jehova el ta queda na United States. Ya habla tambien con otro que el maga Testigo gendeh ta creé con Jesus. Adentro de manada año, ya llama con el maga siervo de Jehova como “maga Comunista,” “espia del maga Americano” y “extremista.” Ciendo aquellos quien ya oi con ese maga istoria nuay el todo detalle o gendeh ta acepta con el maga justo informacion, yan tisut sila con el maga Testigo de Jehova.

8. Asegun na Maga Actividad 17:11, cosa debe hace el maga gente para puede identifica si quien el maga siervo del Dios ahora?

⁸ Paquemodo el maga gente puede evita man tisut? El maga gente necesita examina con el maga detalle. Ese el cosa determinao hace si Lucas, un escritor de Evangelio. Ya hace le esfuerzo para “estudia embuenamente todo este desde el principio.” Quierre le que aquellos quien le con el Evangelio hay “sabe si paquemodo de bien fundao el maga insiñanza” que ya oi sila acerca con Jesus. (Luc. 1:1-4) El maga Judio na Berea de antes igual con Lucas. Cuando ya puede sila oi con el buen noticia acerca con Jesus del primero, ya consulta sila con el Hebreo Escritura para confirma si justo ba el cosa kanila ta enseña. (Le con el Maga Actividad 17:11.) Na igual manera, necesita tambien el maga gente ahora examina con el todo detalle. Debe sila compara con el cosa kanila ta enseña el maga siervo del Dios na cosa el Escritura ta habla. Necesita tambien  sila estudia si cosa ya hace el maga siervo de Jehova na diaton moderno tiempo. Si hace sila se, hay evita sila que el discriminacion o falso istoria hay causa kanila para gendeh acepta con el maga Testigo de Jehova.

9. Cosa ya sucede cuando nuay conforma si Jesus que dale mira un señal estaba na cielo?

⁹ El cuanto na tiempo de Jesus nuay queda contento na de suyu maga bonito enseñanza. Mas pa el cosa sila quierre. Ya pidi sila que dale le prueba que ele el Mesias por medio de “un señal del cielo.” (Mat. 16:1) Posible, nuay sila entende con el Daniel 7:13, 14 poreso ya pidi sila con ese. Pero, gendeh pa se el tiempo de Jehova para cumpli con ese profecia. El cosa ya enseña si Jesus bastante ya era para convinci kanila que ele el Mesias. Pero cuando nuay le conforma que dale kanila mira el señal que ta pidi sila, yan tisut sila.—Mat. 16:4.

10. Paquemodo ya cumpli si Jesus con el cosa ya escribi si Isaias acerca con el Mesias?

¹⁰ Cosa el Escritura ta habla? Acerca con el Mesias, si profeta Isaias ya escribi: “Gendeh le grita o hace subi de suyu voz, y gendeh le manda oi con el de suyu voz na camino.” (Isa. 42:1, 2) Ya hace si Jesus con el de suyu ministerio na manera que gendeh ta saca el atencion del otro. Nuay le planta maga grande templo, nuay le usa maga especial camisa o conforma que llama con ele usando el maga importante religioso titulo. Cuando ya hace con ele llamada, nuay conforma si Jesus que dale mira el de suyu abilidad con Rey Herodes y hace un señal para con ele, maskin pa na peligro el vida de Jesus. (Luc. 23:8-11) Ya hace maga milagro si Jesus pero el predicacion del buen noticia amo el de con todo importante trabajo para con ele. “Ese amo el razon por que ya vene Yo,” ya habla le con el de suyu maga dicipulo.—Mar. 1:38.

11. Cosa el cuanto del maga gendeh justo idea del cuanto ahora?

¹¹ Ansina ba tambien el maga gente ahora? Si. Na diaton tiempo ahora, manada el tan bilib na maga grande iglesia que tiene maga decoracion que bien caro, na maga religioso  lider que tiene maga importante titulo y na maga ceremonia que donde el mayoria del maga gente ya ulvida si onde ese estaba o si cosa este quierre decir. Pero, cosa ta aprende el maga gente acerca con Dios y na de suyu maga proposito si ta atende sila na maga misa? Aquellos quien ta atende na diaton maga miting ta aprende acerca si cosa quierre si Jehova que hace kita. Limpio el diaton maga Kingdom Hall y gendeh bien decorao. Aquellos quien ta guia gendeh ta usa maga especial camisa o titulo. Base na Biblia el cosa kita ta enseña y ta creé. Maskin pa ansina, manada ahora el tan tisut cay ta pensa sila que bien simple el diaton manera de adoranza. Y el cosa kita ta enseña otro na cosa sila quierre oi.

12. Como cosa ta explica na Maga Hebreo 11:1, 6, onde debe base el diaton fe?

¹² Paquemodo kita puede evita man tisut? Si apostol Pablo ya habla con el maga Cristiano quien ta queda na Roma: “El fe ta vene por medio del maga cosa-cosa ta predica. Y el maga cosa-cosa ta predica ta vene por medio del Palabra de Cristo.” (Roma 10:17) Poreso, ta hace kita fuerte con el diaton fe si ta estudia kita con el Escritura y gendeh si ta participa na maga religioso ceremonia que gendeh base na Biblia, maskin paquemodo pa este de bonito. Debe kita tene fuerte fe base na justo saber cay “si noay fe, noay quien ya puede hace el cosa quiere el Dios.” (Le con el Maga Hebreo 11:1, 6.) Poreso, gendeh mas kita necesita mira un señal estaba na cielo para dale prueba que ya puede kita incuntra el verdad. Si examina kita enbuenamente si cosa ta enseña el Biblia, bastante ya se para convinci kanaton y quita con el maskin cosa duda.

13. Cosa el razon si porque manada el nuay acepta con Jesus?

¹³ Na tiempo de Jesus, ya estraña el maga dicipulo de Juan Bautista cay el maga dicipulo de Jesus gendeh ta ayuna. Si Jesus ya explica que nuay sila razon para ayuna mientras vivo pa le. (Mat. 9:14-17) Maskin pa ansina, el maga Fariseo y otro maga contrario de Jesus  ya condena con ele cay nuay le sigui con el diila maga tradicion. Ya rabia sila cuando ya cura le con el maga enfermo na dia de Sabbath. (Mar. 3:1-6; Juan 9:16) Ta clama sila que ta sigui sila con el Ley de Sabbath. Pero, ta permiti lang sila con el maga gente que man negocio na templo. Bien rabiao sila cuando ya condena kanila si Jesus por causa con ese. (Mat. 21:12, 13, 15) Y bien rabiao aquellos con quien ya predica si Jesus na sinagoga na Nazaret cuando ya usa le maga ejemplo na historia del Israel para dale mira que ta hace lang sila una con el diila mismo cuerpo y nuay sila fe. (Luc. 4:16, 25-30) Yan tisut sila con Jesus cay nuay le hace con el cosa sila ta pensa que hay hace le.—Mat. 11:16-19.

14. Porque ya condena si Jesus con el maga tradicion del gente que gendeh uyun na Escritura?

¹⁴ Cosa el Escritura ta habla? Si Jehova ya habla por medio con profeta Isaias: “Este maga gente ta atraca conmigo por medio na diila maga boca y ta honra sila conmigo por medio na diila maga labio, pero el diila corazon lejos conmigo; y el diila miedo conmigo base na maga mandamiento del maga gente que ya enseña kanila.” (Isa. 29:13) Justo el cosa ya hace si Jesus que condena con el maga tradicion del maga gente que gendeh uyun na Escritura. Aquellos quien ya pone una con el maga ley y tradicion del gente que con el Escritura nuay acepta con Jehova y con el quien ya imbia le como el Mesias.

15. Porque manada del maga gente ahora el no quierre con el maga Testigo de Jehova?

¹⁵ Ansina ba tambien el maga gente ahora? Si. Manada el gendeh ta gusta con el maga Testigo de Jehova cay gendeh sila ta sigui kanila na maga celebracion que gendeh uyun na Biblia, igual na cumpliaño y Pascua. El otro ta rabia si el maga Testigo de Jehova gendeh ta sigui na maga celebracion del diila nacion o na maga tradicion durante el intierro que gendeh harmonia na Palabra del Dios. Aquellos quien ta hace con ese posible ta creé que ta adora sila con Dios na aceptable manera. Pero, gendeh sila puede hace alegre con ele si iscuji sila con el maga tradicion del mundo en vez con el maga claro enseñanza que puede incuntra na Biblia.—Mar. 7:7-9.

16. Asegun na Salmo 119:97, 113, 163-165, cosa kita debe hace y cosa kita debe evita?

¹⁶ Paquemodo kita puede evita man tisut? Necesita kita hace hondo el diaton amor na maga ley y principio de Jehova. (Le con el Salmo 119:97, 113, 163-165.) Si ta ama kita con Jehova, hay evita kita maskin cosa tradicion que gendeh ta hace alegre con ele. Gendeh kita permiti con el maskin cosa que queda mas importante contra na diaton amor para con Jehova.

17. Na tiempo de Jesus, cosa ta expecta el manada que hace el Mesias?

¹⁷ El cuanto na tiempo de Jesus quierre cambio na gobierno. Ta expecta sila con el Mesias que libra kanila desde na rulanza del maga Romano quien ta maltrata kanila. Pero cuando ya pricura sila hace rey con Jesus, nuay le conforma. (Juan 6:14, 15) El otro—incluido el maga sacerdote—malingasa cay baka cambia si Jesus con el gobierno y causa para rabia el maga Romano y quita con el autoridad que ya dale kanila. Cay malingasa sila acerca na politica, manada Judio el yan tisut.

18. Cosa maga profecia acerca na Mesias el ya ignora el manada?

¹⁸ Cosa el Escritura ta habla? Maskin pa manada profecia ya predicta que el Mesias hay queda un victorioso Guerrero, el otro maga  profecia ta dale mira que necesita le una muri para na diaton maga pecado. (Isa. 53:9, 12) Pero, porque el maga Judio tiene gendeh justo idea acerca con el Mesias? Cay manada na tiempo de Jesus el ya ignora con el maga profecia que gendeh dayun ta dale solucion na diila maga problema.—Juan 6:26, 27.

19. Cosa el maga gendeh justo idea que ya causa con el manada para man tisut kanaton?

¹⁹ Ansina ba tambien el maga gente ahora? Si. Manada ahora el tan tisut kanaton por causa na diaton neutralidad na politica. Ta expecta sila kanaton que vota na maga eleccion. Pero sabe kita que si iscuji kita con el rulanza del gente, gendeh kita ta suporta con Jehova. (1 Sam. 8:4-7) Posible, ta pensa tambien el maga gente que debe kita planta maga escuela y hospital, y hace otro maga cosas que puede ayuda con el comunidad. Tan tisut sila kanaton cay tan focus kita na trabajo predicacion y gendeh si paquemodo solva con el maga problema del mundo.

20. Como cosa ya habla si Jesus na Mateo 7:21-23, cosa debe el diaton primer prioridad?

²⁰ Paquemodo kita puede evita man tisut? (Le con el Mateo 7:21-23.) El hacida del trabajo que ya manda si Jesus kanaton amo debe el diaton primer prioridad. (Mat. 28:19, 20) Gendeh kita debe pricura solva con el maga problema na politica y na diaton comunidad. Ta ama kita con el maga gente y quierre ayuda na diila maga problema. Pero, sabe kita que el de con todo buen manera para asisti con el diaton maga projimo amo que enseña kanila acerca na Reino del Dios y ayuda kanila tene buen relacion con Jehova.

21. Cosa debe el diaton determinacion?

²¹ Na este articulo, ya considera kita con el cuatro razon que ya causa con el manada para gendeh acepta con Jesus del primer siglo y posible causa con el cuanto para gendeh acepta con el maga siguidores de Jesus ahora. Pero, ese lang ba el maga cosas que necesita kita evita? Gendeh. Na siguiente articulo, hay examina kita cuatro pa razon. Ojala, queda kita determinao que evita man tisut y continua hace fuerte con el diaton fe!