1-2. Cosa ya habla el un escritor y cosa kita discuti na este articulo?

MILLONES del maga gente ahora ta clama que ta creé con Jesus pero gendeh sila ta acepta con el cosa le ya enseña. (2 Tim. 4:3, 4) Gane, el un escritor ya habla: “Si tiene otro ‘Jesus’ na diaton tiempo ahora quien habla igual na cosa ya habla si Jesus de antes . . . , gendeh ba tambien kita acepta con ele igual na cosa ya hace el maga gente dos mil año ya el ya pasa? . . . El contestacion: Si, gendeh siempre kita con ele acepta.”

² Del primer siglo, manada el quien ya oi con el cosa ya enseña si Jesus y ya mira con el maga milagro que ya hace le pero nuay sila demonstra fe con ele. Porque? Del ya pasa articulo, ya considera kita con el cuatro razon si porque el maga gente nuay acepta con el cosa ya habla y ya hace si Jesus. Ahora, discuti kita con el cuatro omento razon. Considera tambien kita si porque el maga gente gendeh ta acepta con el maga siguidores de Jesus ahora y si paquemodo kita puede evita que man tisut.

3. Cosa ya hace si Jesus que ya causa para man tisut con ele el cuanto maga gente?

³ Mientras taqui le na tierra, yan junto si Jesus con el todo clase de gente. Ya come le junto con el maga rico y con el maga tiene autoridad. Pero, ya usa tambien le con el de suyu tiempo para man junto con el maga pobre y con aquellos con quien ya maltrata. Omento pa, lastimoso le con aquellos con quien  ta considera el maga gente que “maga pecador.” El cuanto orgulloso gente yan tisut na cosa ya hace si Jesus. Ya pregunta sila con el de suyu maga dicipulo: “Porque man ustedes ta come junto y ta toma junto con el maga colector de impuesto y maga pecador?” Si Jesus ya contesta: “Gendeh el maga gente bueno el cuerpo el quien necesita doctor, sino el maga emfermo. Noay Yo vene para llama con el maga gente noay culpa para arripinti, sino con el maga pecador.”—Luc. 5:29-32.

4. Asegun con profeta Isaias, cosa era debe expecta el maga Judio acerca con el Mesias?

⁴ Cosa el Escritura ta habla? Antes llega el Mesias, si profeta Isaias ya habla que gendeh con ele acepta el mundo. El profecia ta habla: “Ya desprecia y ya evita con ele el maga gente . . . Y dol ya esconde el de suyu cara desde kanamon. Ya desprecia con ele y ya trata kame con ele como nuay valor.” (Isa. 53:3) El profecia ya habla que evita el “maga gente” con el Mesias poreso expecta ya era el maga Judio del primer siglo que gendeh acepta con Jesus.

5. Cosa el mirada del manada ahora na maga siguidores de Jesus?

⁵ Ansina ba tambien el maga gente ahora? Si. Manada maga clero el alegre acepta como maga miembro del diila congregacion aquellos quien prominente, rico y sabio na mirada del mundo. Ta hace se sila maskin pa el moral y manera de vida de aquellos maga nuevo miembro gendeh harmonia na maga principio del Dios. Ese maga clero ta hace de menos con el maga siervo de Jehova quien tiene limpio moral cay gendeh sila prominente na mirada de este mundo. Como cosa ya habla si Pablo, ta iscuji el Dios con aquellos “con quien el maga otros ta desprecia.” (1 Cor. 1:26-29, El Nuevo Testamento) Pero para con Jehova, precioso el todo quien fiel ta sirvi con ele.

6. Paquemodo kita puede imita con el custumbre de Jesus, como cosa ya habla na Mateo 11:25, 26?

⁶ Paquemodo kita puede evita man tisut? (Le con el Mateo 11:25, 26.) No queda influenciao na mirada del mundo na maga siervo del Dios. Acorda que maga humilde persona lang ta usa si Jehova para hace con el de suyu voluntad. (Sal. 138:6) Y pensa si paquemodo de manada cosas le ya puede hace cuando ya usa le con el maga gendeh sabio na mirada del mundo.

7. Porque ya habla si Jesus que hipocrito el maga Fariseo y cosa el diila reaccion?

⁷ Con coraje ya condena si Jesus con el maga religioso practica na de suyu tiempo. Por ejemplo, ya dale le mira que hipocrito el maga Fariseo cay mas ta pensa sila si paquemodo laba con el diila maga mano contra si paquemodo cuida con el diila maga mayores. (Mat. 15:1-11) Posible, ya espanta el maga dicipulo de Jesus na cosa le ya habla. Gane, ya pregunta sila con ele: “Noay ba Uste sabe que el maga Fariseo ya sinti [“yan tisut,” NWT] el cosa uste ya habla?” Si Jesus ya contesta: “Todo el maga siembra que mi Tata na cielo noay siembra ay arranca hasta el raiz. Deja lang canila solo. Sila maga bulag que ta [guia] con otro maga bulag. Y cuando un bulag ta guia con otro bulag, sila dos ay cai na canal.” (Mat. 15:12-14) Nuay permiti si Jesus con el maga negativo reaccion del maga religioso lider para hace con ele descanza que habla el verdad.

8. Paquemodo ya dale mira si Jesus que gendeh todo religioso creencia aceptable con Dios?

⁸ Ya dale tambien mira si Jesus que falso el cuanto religioso enseñanza. Nuay le habla que el todo religioso creencia aceptable con Dios. Sino, ya explica le que manada el  quien anda na ancho camino que ta guia na destrozo pero poco lang anda na diutay camino para na vida. (Mat. 7:13, 14) Ya hace le claro que el cuanto gente hay habla que ta sirvi sila con Dios pero el deverasan gendeh sila ta sirvi con ele. Ya dale le aviso: “Tene ustedes cuidao con el maga profeta falso. Ta anda sila con ustedes na ichura de carnero, pero adentro na diila corazon igual sila como maga perro de monte. Ay conoce ustedes canila na diila maga fruta.”—Mat. 7:15-20.

9. Cosa el cuanto maga falso religioso enseñanza que ya condena si Jesus?

⁹ Cosa el Escritura ta habla? El profecia na Biblia ta habla que el Mesias hay queda activo para na casa de Jehova. (Sal. 69:9; Juan 2:14-17) El pagka-activo de Jesus ya guia con ele para condena con el maga falso religioso creencia y practica. Por ejemplo, el maga Fariseo ta creé que imortal el alma pero si Jesus ta enseña que ta durmi el maga muerto. (Juan 11:11) Gendeh ta creé el maga Saduceo na resureccion pero si Jesus ya resucita con el de suyu amigo, si Lazaro. (Juan 11:43, 44; Act. 23:8) El maga Fariseo ta creé que el todo cosas destinao ya y controlao del Dios pero si Jesus ta enseña que el maga gente puede iscuji que sirvi con Dios o gendeh.—Mat. 11:28.

10. Porque manada el yan tisut na diaton maga enseñanza?

¹⁰ Ansina ba tambien el maga gente ahora? Si. Manada gente yan tisut cay ta usa kita con el Biblia para dale mira que falso el cuanto religioso enseñanza. El maga clero ta enseña con el diila maga siguidores que el Dios ta castiga con el maga malo na infierno. Ta usa sila con ese falso enseñanza para puede controla con el maga gente. Como maga siervo de Jehova quien ta adora con el Dios de amor, ta ayuda kita con el maga gente entende que falso ese enseñanza. El maga clero ta enseña tambien que imortal el alma. Si justo ese enseñanza, nuay era con quien necesita resucita. Ta dale kita prueba que ese enseñanza nuay na Biblia. Y maskin pa manada religion ta enseña que el todo cosa kita ta hace ya decidi ya daan el Dios o plañao ya daan, ta  enseña kita que el maga gente tiene el libertad para decidi y puede iscuji sirvi con Dios. Cosa el reaccion del maga religioso lider? Bien rabiao sila!

11. Asegun na palabra de Jesus na Juan 8:45-47, cosa quierre el Dios que hace el de suyu maga siervo?

¹¹ Paquemodo kita puede evita man tisut? Si ta ama kita con el verdad, debe kita acepta con el Palabra del Dios. (Le con el Juan 8:45-47.) Gendeh igual con Satanas Diablo, nunca kita deja con el verdad. Gendeh kita tan compromiso con el cosa kita ta creé. (Juan 8:44) Quierre el Dios que el de suyu maga siervo “odia el maga cosa-cosa malo” y “sigui na maga cosa-cosa bueno,” igual na cosa ya hace si Jesus.—Roma 12:9; Heb. 1:9.

12. Porque el manera del muerte de Jesus ya causa para man tisut el manada maga Judio?

¹² Cosa el otro razon si porque yan tisut el cuanto maga Judio na tiempo de Jesus? Si Pablo ya habla: “Ta predica kita que ya clava con el Cristo na estaca, un razon para man tisut el maga Judio.” (1 Cor. 1:23, NWT) Porque gendeh aceptable na manada maga Judio el manera si paquemodo ya muri si Jesus? Para kanila, el muerte de Jesus na estaca ta dale mira que ele un criminal y pecador—gendeh el Mesias.—Deut. 21:22, 23.

13. Cosa no quierre creé aquellos quien yan tisut con Jesus?

¹³ Aquellos maga Judio quien yan tisut con Jesus nuay creé que ele inocente, que falso ya acusa con ele y nuay con ele trata enbuenamente. Aquellos ya juzga con Jesus na corte nuay hace con este con justicia. El maga juez na corte suprema del maga Judio enseguidas yan junto para juzga con Jesus y nuay sila sigui con el maga ley na corte. (Luc. 22:54; Juan 18:24) En vez oi con el maga acusacion y evidencia contra con Jesus, mismo el maga juez “ta busca un falso evidencia contra con Jesus, para puede sila sentencia con Ele de muerte.” Cuando nuay se sila puede hace, el maga alto sacerdote ya pricura busca manera para man kamali si Jesus na de suyu palabra. Y contra gayot se na ley del corte. (Mat. 26:59; Mar. 14:55-64) Y despues resucita con  Jesus, aquellos maga juez ya paga “un grande cantidad de sen” con el maga Romano soldao quien ta guarda con el de suyu tumba para hace calayat falso istoria si porque nuay laman el tumba.—Mat. 28:11-15.

14. Cosa el Escritura ta habla acerca na muerte del Mesias?

¹⁴ Cosa el Escritura ta habla? Maskin pa manada maga Judio na tiempo de Jesus el nuay expecta que el Mesias necesita muri, nota con el profecia na Escritura: “Ya dale le con el de suyu vida hasta na muerte y ya considera con ele como un pecador; ya carga le con el pecado del manada gente, y ya entrevini le para con el maga pecador.” (Isa. 53:12) Entonces, nuay razon el maga Judio para man tisut cuando ya mata con Jesus como un pecador.

15. Cosa maga acusacion contra na maga Testigo de Jehova el ya causa con el cuanto para man tisut?

¹⁵ Ansina ba tambien el maga gente ahora? Si! Falso ya acusa con Jesus y ya declara con ele culpable y ansina tambien el cosa ta hace con el maga Testigo de Jehova ahora. Nota con el cuanto maga ejemplo. Durante del maga 1930 y 1940 na United States, manada caso na corte el ya hace contra na diaton libertad para adora con Dios. Bien claro el discriminacion del cuanto juez contra kanaton. Na Quebec, Canada, el Iglesia y el Estado yan junto para hace descanza con el diaton trabajo. Manada maga publisher el yan preso maskin yan cuento lang sila na diila maga vecinos acerca na Reino del Dios. El gobierno de Nazi Germany ya mata con el manada fiel joven hermano. Y na reciente maga año, manada maga hermano na Russia ya declara culpable y yan preso cay yan cuento sila acerca na Biblia, un trabajo que ta considera como “extremista.” Maskin con el New World Translation of the Holy Scriptures na Russian lengguaje ya prohibi y ya considera que tiene maga “extremista informacion” cay ta usa este con el nombre de Jehova.

16. Como cosa ta dale mira na 1 San Juan 4:1, porque gendeh kita debe creé con el maga falso istoria acerca con el maga siervo de Jehova?

¹⁶ Paquemodo kita puede evita man tisut? Sabe si cosa el deverasan. Na de suyu Sermon na Monte, si Jesus ya dale aviso con aquellos quien ta oi con ele que el cuanto hay “habla todo clase de chismis contra” kanila. (Mat. 5:11) Ese maga chismis o imbusterias estaba con Satanas. Ya influencia le con el maga gente quien tan contra que hace calayat maga imbusterias acerca con aquellos quien ta ama con el verdad. (Rev. 12:9, 10) Gendeh kita debe creé con ese maga imbusterias. Gendeh tambien kita debe permiti que ese maga imbusterias hace kanaton miedo o hace luya con el diaton fe.—Le con el 1 San Juan 4:1.

17. Na cosa manera el maga suceso antes muri si Jesus posible ya causa para man tisut el cuanto?

¹⁷ Antes muri si Jesus, ya traiciona con ele el uno del de suyu 12 apostoles. El un apostol ya desconoce con ele tres beses y todo de suyu apostoles ya abandona con ele na noche antes con ele mata. (Mat. 26:14-16, 47, 56, 75) Nuay mas estraña si Jesus y ya habla ya le que hay sucede este. (Juan 6:64; 13:21, 26, 38; 16:32) Cuando ya sucede este, posible manada yan tisut y ya habla, ‘Si ansina el manera ta actua el maga apostoles de Jesus, no quierre yo queda parte de ese grupo!’

18. Cosa maga profecia el ya cumpli na maga suceso antes el muerte de Jesus?

¹⁸ Cosa el Escritura ta habla? Cuanto siglo antes vene si Jesus na tierra, si Jehova ya revela na de suyu Palabra que hay traiciona con el Mesias por 30 pedazo de plata. (Zac. 11: 12, 13) El traidor amo uno na maga cerca amigo de Jesus. (Sal. 41:9) Ya escribi tambien si profeta Zacarias: “Mata con el pastor y deja man calayat con el maga carnero.” (Zac. 13:7) En vez man tisut na este maga suceso, ya queda era fuerte el fe del maga sincero persona cuando ya mira sila que ya cumpli ese maga profecia con Jesus.

19. Cosa sabe el maga sincero persona?

¹⁹ Ansina ba tambien el maga gente ahora? Si. Na diaton moderno tiempo, cuanto maga conocido Testigo de Jehova el ya deja con el verdad, ya queda apostata y ya pricura influencia con otro que hace tambien ansina. Ya hace sila calayat maga negativo noticia, maga istoria que ta engaña con otro y maga imbusterias acerca na maga Testigo de Jehova por medio na media y na Internet. Pero, el maga sincero persona nuay man tisut con ese. Sino, sabe sila que hay sucede gayot ese maga cosas asegun na Biblia.—Mat. 24:24; 2 Ped. 2:18-22.

20. Paquemodo kita evita man tisut con aquellos quien ya deja con el verdad? (2 Timoteo 4:4, 5)

²⁰ Paquemodo kita puede evita man tisut? Necesita kita continua hace fuerte con el diaton fe. Puede kita se hace si regular kita estudia, continua reza y esta ocupao na trabajo que ya dale kanaton si Jehova. (Le con el 2 Timoteo 4:4, 5.) Si tiene kita fe, gendeh kita man lingasa si oi kita maga negativo istoria. (Isa. 28:16) El diaton amor con Jehova, na de suyu Palabra, con el diaton maga hermano hay ayuda kanaton evita man tisut con aquellos quien ya deja con el verdad.

21. Maskin pa mayoria del maga gente nuay acepta con el diaton mensaje, na cosa kita asigurao?

²¹ Del primer siglo, manada el yan tisut y nuay acepta con Jesus. Pero, manada siempre el ya acepta con ele. Incluido aqui el miembro del Sanhedrin del maga Judio y “mucho tamen el maga padre quien ya cree.” (Act. 6:7; Mat. 27:57-60; Mar. 15:43) Ahora tambien, millones el nuay man tisut. Porque? Cay sabe y ta ama sila con el verdad que puede incuntra na Escritura. El Palabra del Dios ya habla: “El abundancia de paz amo para de aquellos quien ta ama con el de tuyu ley; nuay maskin cosa el puede kanila hace tisut.”—Sal. 119:165.