1-2. Cosa maga dificultad ta enfrenta el manada Testigo de Jehova?

SI APOSTOL Pablo ya anima con Timoteo y kanaton todo maga Cristiano que hace el todo para cumpli con el diaton ministerio. (2 Tim. 4:5) Todo kita ta sigui con el consejo de Pablo. Pero, tiene maga dificultad. Manada del diaton maga hermano y hermana el ta necesita coraje para puede participa na trabajo predicacion. (2 Tim. 4:2) Pensa por ejemplo con el diaton maga hermano quien ta queda na maga lugar donde tiene restriccion o ya prohibi pa gane con el diaton trabajo. Ta participa sila na ministerio maskin pa sabe sila que posible kanila hace preso.

² El maga siervo de Jehova ta experiencia manada problema que posible hace luya kanila. Por ejemplo, manada el necesita trabaja por largo hora para dale el necesidad del diila familia. Posible, quierre sila hace mas na ministerio pero cansao ya sila na fin del semana. El otro bien limitao el cosa ta puede hace por causa na diila grabe enfermedad o cay de edad ya sila y el cuanto gendeh pa gane ta puede sale na diila casa. El otro ta sinti que gendeh sila valoroso con Jehova. Si Mary, * un hermana quien ta queda na Middle East, ya habla: “Necesita yo hace grande esfuerzo para controla con el de mio negativo sentido poreso ta queda yo maluya. Como resulta, tan conciencia yo cay nuay mas ya yo tiempo y fuerza para na ministerio.”

3. Cosa kita considera na este articulo?

³ Maskin cosa pa el diaton circumstancia, puede kanaton si Jehova dale el fuerza para enfrenta con el diaton maga personal problema y hace el todo para continua sirvi con ele. Antes kita considera si paquemodo si Jehova puede ayuda kanaton, discuti kita si paquemodo le ya hace fuerte con Pablo y Timoteo  para cumpli con el diila ministerio maskin pa na diila maga dificultad.

4. Cosa maga dificultad ya enfrenta si Pablo?

⁴ Si Pablo ya enfrenta manada dificultad. Necesita le fuerza especialmente cuando ya gulpia con ele, ya guerria piedra y ya hace preso. (2 Cor. 11:23-25) Ya admiti si Pablo que tiene tiempo, tiene le negativo sentido. (Roma 7:18, 19, 24) Ya tiene tambien le problema na salud que igual na “tunuk na pellejo” y bien quierre le que quita el Dios con ese.—2 Cor. 12:7, 8, El Nuevo Testamento.

5. Cosa ya puede cumpli si Pablo maskin pa na maga dificultad que ya enfrenta le?

⁵ Ya dale fuerza si Jehova con Pablo para puede hace con el de suyu ministerio maskin pa na todo dificultad que ya enfrenta le. Considera si cosa ya puede cumpli si Pablo. Por ejemplo cuando preso le na un casa na Roma, activo le ya defende con el buen noticia na maga Judio lider y posible maskin na maga oficial de gobierno. (Act. 28:17; Fil. 4:21,22) Ya predica tambien le na manada guardia y con el todo quien ya visita con ele. (Act. 28:30, 31; Fil. 1:13) Durante na ese tiempo, ya escribi si Pablo maga inspirao carta que ta beneficia el maga verdadero Cristiano hasta na diaton tiempo ahora. Y el ejemplo de Pablo ya puede hace fuerte con el congregacion na Roma. Como resulta, el de suyu maga hermano ya “queda mas valiente cada dia para anuncia sin miedo el Palabra del Dios.” (Fil. 1:14) Maskin pa tiene vez limitao el cosa ta puede hace si Pablo, ya hace le el todo cosa le puede hace y ya puede quel ayuda “para el progreso del Buen Noticia.”—Fil. 1:12.

6. Asegun na 2 Corinto 12:9, 10, cosa ya ayuda con Pablo para cumpli con el de suyu ministerio?

⁶ Ya realiza si Pablo que el todo cosa le ya puede hace na servicio con Jehova amo por causa na fuerza del Dios y gendeh na de suyu mismo fuerza. Ya habla le que el poder del Dios “ta trabaja mas embuenamente cuando maluya el gente.” (Le con el 2 Corinto 12:9, 10.) Por medio na De Suyu sagrao espiritu, si Jehova ya dale poder con Pablo para cumpli con el de suyu ministerio—maskin pa ya persigui con ele, ya hace preso y ya enfrenta otro maga dificultad.

7. Cosa maga dificultad el necesita enfrenta si Timoteo para cumpli con el de suyu ministerio?

⁷ Si Timoteo, el mas joven uban de Pablo, necesita tambien depende na poder del Dios  para puede hace con el de suyu ministerio. Ya sigui si Timoteo con Pablo na de suyu maga viaje como misionario. Ya imbia tambien con ele si Pablo para visita y anima con el maga congregacion. (1 Cor. 4:17) Posible, ya sinti si Timoteo que gendeh le cualificao. Amo se el posible razon si porque si Pablo ya habla con ele: “No tu deja ni maskin con quien desprecia contigo por causa cay joven pa tu.” (1 Tim. 4:12) Mas pa durante ese tiempo, tiene tambien tunuk na pellejo si Timoteo—el ‘maga enfermedad que pirmi le tiene.’ (1 Tim. 5:23) Pero, sabe si Timoteo que el poderoso sagrao espiritu de Jehova hay dale con ele el fuerza que necesita le para predica con el buen noticia y sirvi con el de suyu maga hermano.—2 Tim. 1:7.

8. Paquemodo si Jehova ta hace fuerte con el de suyu maga siervo ahora?

⁸ Ahora, si Jehova ta dale con el de suyu maga siervo el “grande poder” para puede sila continua sirvi fiel con ele. (2 Cor. 4:7) Considera kita con el cuatro cosas que puede kanaton hace fuerte si Jehova y ayuda kanaton para esta fiel con ele: el rezo, Biblia, asosacion na maga hermano y hermana, y el diaton ministerio.

9. Paquemodo kanaton puede ayuda el rezo?

⁹ Queda fuerte por medio na rezo. Como cosa ta habla na Efeso 6:18, si Pablo ya anima kanaton que reza con Dios “todo el tiempo.” Como resulta, el Dios hay hace fuerte kanaton. Si Jonnie, quien ta queda na Bolivia, ya experiencia el suporta del Dios cuando ya enfrenta le manada problema. Ya tiene grabe enfermedad el de suyu mujer y el de suyu mayores na igual tiempo. Yan dificil si Jonnie dale el diila necesidad. Ya muri el de suyu nana y ya alcanza largo tiempo antes queda bueno el de suyu mujer y de suyu tata. Cuando ya acorda le con ese dificil tiempo, si Jonnie ya habla, “Cuando bien malingasa yo, el especifico rezo amo el ya puede ayuda conmigo.” Si Jehova ya dale con Jonnie el fuerza que necesita le para aguanta. Si Ronald, un anciano na Bolivia, ya sabe que el de suyu nana tiene cancer. Ya muri este despues del un mes. Cosa ya puede ayuda con Ronald para enfrenta con ese? Ya habla le: “Si ta reza yo con Jehova, ta habla yo el todo cosa yo ta sinti. Sabe yo que mas ta entende le conmigo contra ta entende conmigo el otro. Gane, mas ta entende le conmigo contra na de mio mismo cuerpo.” Tiene vez, posible sinti kita que gendeh kita puede aguanta o no sabe kita si cosa kita reza. Pero ta invita kanaton si Jehova que reza con ele, maskin pa dificil para kanaton habla si cosa kita ta pensa y ta sinti.—Roma 8:26, 27.

10. Como cosa ya indica na Maga Hebreo 4:12, porque bien importante que le kita con el Biblia y medita con este?

¹⁰ Queda fuerte por medio del Biblia. Igual si paquemodo si Pablo ya depende na Escritura para na fuerza y comforta, necesita tambien kita hace ansina. (Roma 15:4) Mientras ta le kita con el Palabra del Dios y ta medita con ese, puede si Jehova usa con el de suyu espiritu para ayuda kanaton mas entende si paquemodo el Escritura puede aplica na diaton situacion. (Le con el Maga Hebreo 4:12.) Si Ronald, ya menciona enante, ya habla: “Alegre yo cay ya hace yo esfuerzo que le con el un porcion del Biblia cada noche. Ta medita yo acerca con el maga calidad de Jehova y si paquemodo le ta cuida con el de suyu maga siervo. Ta hace este fuerte conmigo.”

11. Paquemodo el Biblia ya hace fuerte con el un dolorido hermana?

¹¹ Si medita kita con el Palabra del Dios, puede este ayuda kanaton para tene justo mirada  acerca con el diaton situacion. Considera si paquemodo ya puede ayuda el Biblia con el un dolorido viuda. El un anciano ya habla que manada le cosa puede aprende si le ele con el libro de Job. Cuando ya hace se el hermana, ya sinti dayun le que gendeh justo el cosa ya sinti si Job. Na de suyu pensamiento, ya habla le: “Job! No queda bien negativo!” Pero, ya realiza le que el de suyu custumbre bien semejante con Job. Ya ayuda este con ele para cambia con el de suyu mirada y ya hace fuerte con ele para puede aguanta con el dolor que ta sinti le cuando ya muri el de suyu marido.

12. Paquemodo si Jehova ta hace fuerte kanaton por medio na maga hermano y hermana?

¹² Queda fuerte por medio na asosacion na maga hermano y hermana. El otro manera que ta hace fuerte si Jehova con el maga Cristiano amo por medio na maga hermano na congregacion. Si Pablo ya escribi que ta esperanza le que ele y el de suyu maga espiritual hermano y hermana puede “dale animo con uno y otro.” (Roma 1:11, 12, El Nuevo Testamento) Si Mary que ya menciona enante ta aprecia gayot ansina clase de asosacion. Ya habla le: “Ya usa si Jehova con el maga hermano y hermana, maskin pa no sabe sila acerca con el de mio maga problema. Ya habla sila maga cosas que ya puede anima conmigo o ya imbia card. Amo gayot se el cosa yo necesita. Ya puede tambien ayuda conmigo cuando yan cuento yo na maga hermana quien tiene semejante problema y aprende na cosa sila ya hace. Y el maga anciano pirmi ta manda sinti conmigo que valoroso yo na congregacion.”

13. Paquemodo kita puede anima con uno y otro na maga miting na congregacion?

¹³ Uno del maga bonito ocasion que puede kita anima con uno y otro amo na maga miting na congregacion. Si atende tu maga miting, puede tu hace fuerte con otro si habla tu que ta ama tu kanila y rindi gracias na cosa sila ya hace. Por ejemplo antes principia el un miting, el un anciano que el nombre Peter ya habla con el un hermana que gendeh Testigo el marido: “Ta puede gayot kanamon anima si puede kame mira contigo aqui. Pirmi tu ta lleva con el de tuyu seis anak quien preparao dale comento.” Ya puede gayot llura este hermana y ya habla: “No sabe tu si paquemodo de necesita yo oi con ese ahora.”

14. Paquemodo el ministerio puede ayuda kanaton?

¹⁴ Queda fuerte por medio na ministerio. Si ta predica kita el verdad na Biblia con otro, ta queda kita alegre, oi man kanaton o gendeh. (Prov. 11:25) El un hermana que el nombre Stacy ya experiencia si paquemodo el ministerio ya puede hace fuerte con ele. Ya queda le triste cuando el un miembro na familia yan disfellow. Pirmi le ta pregunta con el de suyu mismo cuerpo, ‘Tiene ba era yo cosa ya puede hace para mas ayuda con ele?’ Nuay mas otro cosa ta puede pensa si Stacy. Cosa ya puede ayuda con ele para aguanta con este dificil situacion? El ministerio! Mientras ta participa le na trabajo predicacion, ya principia le concentra na maga gente na teritorio quien ta necesita ayuda. Ya habla le: “Durante ese tiempo, ya dale conmigo Bible study si Jehova quien pronto ya progresa. Ya puede gayot se anima conmigo. El cosa gayot ya puede ayuda conmigo amo el de mio ministerio.”

15. Cosa tu ya puede aprende na comento de Mary?

¹⁵ Por causa na diila maga circumstancia, posible sinti el cuanto que diutay lang el cosa sila ta puede hace na ministerio. Si ese el cosa tu ta sinti, acorda que alegre si Jehova si ta hace tu el de tuyu de con todo bueno. Considera otravez con el ejemplo de Mary. Cuando ya cambia le na un lugar que diferente el lengguaje del maga gente, ya sinti le que bien diutay lang el cosa le ta puede hace. Ya habla le, “Por cuanto  tiempo, el cosa lang yo ta puede dale amo un simple comento, le con el un versiculo na Biblia o dale un tract na predicacion.” Ya manda este sinti con ele que gendeh bastante el cosa le ta puede hace compara con aquellos quien ta converza con ese lengguaje. Pero, ya cambia le con el de suyu mirada. Ya principia le realiza que puede con ele usa si Jehova, maskin pa limitao el de suyu abilidad. Ya habla le, “Simple lang el cosa ta habla el Biblia y ese el ta puede cambia con el vida del gente.”

16. Cosa puede ayuda para queda fuerte aquellos quien gendeh ta puede sale na casa?

¹⁶ Si Jehova ta puede mira y ta aprecia con el diaton deseo que participa na ministerio, maskin pa gendeh kita ta puede sale na casa. Puede le ayuda para puede kita predica con aquellos quien ta cuida kanaton o na maga doctor y nurse. Si compara kita con el cosa kita ta puede hace ahora na cosa kita ya puede hace de antes, posible kita man luya. Pero si realiza kita si paquemodo si Jehova ta ayuda kanaton ahora, hay tene kita el fuerza para aguanta con el maskin cosa probanza con alegria.

17. Asegun na Eclesiastes 11:6, porque kita debe continua na diaton ministerio maskin pa gendeh kita dayun ta puede mira con el maga resulta?

¹⁷ No sabe kita si onde del maga similla de verdad que ya siembra kita el principia crici. (Le con el Eclesiastes 11:6.) Por ejemplo, si Barbara, un hermana quien mas de 80 año ya, regular ta predica por medio de telefono y carta. Na uno del de suyu maga carta, ya pone le con el The Watchtower de Marzo 1, 2014 que tiene articulo “What God Has Done for You.” No sabe le que ya imbia le con el de suyu carta na un man maridable quien gendeh mas Testigo de Jehova. Ya le sila manada beses con este magasin. Ya sinti el marido que dol directa con ele tan cuento si Jehova. Ya principia atende miting el man maridable y na uliji, ya queda sila activo otravez despues del mas de 27 año. Imagina si paquemodo este ya anima y ya hace fuerte con Barbara cuando ya mira le el positivo resulta del de suyu carta!

18. Cosa kita puede hace para beneficia na poder del Dios?

¹⁸ Si Jehova ta dale kanaton manada oportunidad para ricibi el de suyu poder. Si ta usa kita con el de suyu maga provision—igual na rezo, Biblia, asosacion na maga hermano y hermana, y el ministerio—ta dale kita mira que ta confia kita con el abilidad y deseo de Jehova para ayuda kanaton. Ojala, pirmi kita depende con el diaton Tata na cielo quien quierre “dale mira el de suyu fuerza para con aquellos quien completo el corazon para con ele.”—2 Cron. 16:9.