1-2. Cosa el un razon si porque kita debe queda interesao na libro de Revelacion?

 YA MIRA ya ba tu un photo album del otro persona? Mientras ta mira tu con el maga letrato, ya mira tu manada gente que no conoce tu. Pero, tiene un letrato que ya saca de tuyu atencion. Porque? Cay talla tu na aquel letrato. Mientras ta mira tu con aquel, ta pricura tu acorda si cuando con aquel ya saca y si onde. Ta pricura tambien tu mira si quien-quien pa el talli na letrato. Bien especial ese letrato para contigo.

² Igual na ese letrato el libro de Revelacion. Porque? Por causa na dos razon. Una, ya escribi con ese libro na Biblia para kanaton. Na de este primer versiculo, puede kita le: “Este amo el Revelacion que el Dios ya dale con Jesucristo para puede Le manda sabe con el disuyo maga muchacho [“esclavo,” NWT] el maga cosa-cosa que gendeh tarda ay sucede ya.” (Rev. 1:1) Entonces, el cosa ya escribi na ese libro gendeh para na todo maga gente sino para kanaton, maga dedicao siervo del Dios. Como maga siervo del Dios, gendeh kita debe estraña que ta participa kita na cumplimiento del maga profecia que puede incuntra na ese libro. Quierre decir, dol talli kita “na ese letrato.”

3-4. Asegun na libro de Revelacion, cuando cumpli el maga profecia de este y cosa debe el efecto de este con el cada uno kanaton?

³ El ika-dos razon amo por causa na tiempo si cuando cumpli este maga profecia. Ya identifica si apostol Juan con ese tiempo cuando ya habla le: “Por medio del sagrao espiritu, ya llega yo na dia del Señor.” (Rev. 1:10, NWT) Cuando ya escribi  si Juan con aquel maga palabra del maga 96 C.E., lejos pa el “dia del Señor.” (Mat. 25:14, 19; Luc. 19:12) Pero asegun na profecia del Biblia, ese dia ya principia del 1914 cuando si Jesus ya queda Rey na cielo. Desde aquel año, el maga profecia na Revelacion, donde envuelto el maga siervo del Dios, ya principia ya cumpli. Ta vivi ya gayot kita ahora na “dia del Señor”!

⁴ Cay ta vivi kita na este especial tiempo, necesita kita pone atencion con el amable consejo que ya escribi na Revelacion 1:3: “Alegre el gente quien ta [le], ta oi [ele] y despues ta obedece este mensaje, cay el Hora cerca ya gayot.” Necesita gayot kita le, “oi” y “obedece este mensaje.” Cosa el cuanto de este maga mensaje que necesita kita obedece?

5. Paquemodo el libro de Revelacion ta hace claro que necesita kita asigura que el diaton adoranza aceptable con Jehova?

⁵ Principia na primer capitulo del Revelacion, puede kita aprende que bien sabe si Jesus si cosa ta sucede na maga congregacion. (Rev. 1:12-16, 20; 2:1) Puede se mira na maga mensaje que ya imbia le na siete congregacion na Asia Minor. Na aquel maga mensaje, ya dale le especifico direccion para ayuda con el maga Cristiano del primer siglo para puede sila asigura que aceptable con Jehova el diila adoranza. Mas pa, el cosa ya habla na aquel maga mensaje aplicable tambien con todo maga siervo del Dios ahora. Cosa el leccion para kanaton? El diaton Lider, si Cristo Jesus, bien sabe si cosa el diaton espiritual condicion. Ta guia le y ta protege kanaton; nuay cosa puede esconde con ele. Sabe le si cosa kita necesita hace para continua tene el favor de Jehova. Cosa direccion le ya dale que necesita kita obedece ahora?

6. (a) Asegun na maga palabra de Jesus na Revelacion 2:3, 4, cosa el problema del congregacion de Efeso? (b) Cosa leccion kita puede aprende con este?

⁶ Le con el Revelacion 2:3, 4. Gendeh kita debe hace perde con el diaton amor con Jehova. El mensaje de Jesus para con aquellos na congregacion de Efeso ta indica que ya aguanta sila y ya continua sila sirvi con Jehova maskin pa na diferente maga dificultad. Maskin pa ansina, ya hace sila perde el amor que tiene sila de antes. Necesita sila hace bira con ese amor cay si gendeh, el diila adoranza gendeh queda aceptable. Na igual manera, gendeh bastante ahora que aguanta lang kita. Necesita justo el razon si porque kita ta aguanta. El diaton Dios interesao gendeh lang na cosa kita ta hace sino si porque tambien kita ta hace con ese. Importante con ele el diaton motivo cay ta expecta le que el diaton adoranza base na diaton hondo amor y apresacion para con ele.​—Prov. 16:2; Mar. 12:29, 30.

7. (a) Como cosa ta habla na Revelacion 3:1-3, cosa el problema que ya mira si Jesus na congregacion de Sardis? (b) Cosa kita necesita hace?

⁷ Le con el Revelacion 3:1-3. Debe kita continua esta dispierto y alerto. Tiene diferente problema el maga hermano y hermana na congregacion de Sardis. Maskin pa activo sila na espiritual de antes, ya queda sila campante na diila servicio con Dios. Poreso, ya manda kanila si Jesus que “esta alerto.” Cosa el leccion para kanaton? Siempre, gendeh ulvida si Jehova con el maga cosa kita ya puede hace. (Heb. 6:10) Maskin pa ansina, gendeh kita debe pensa que bastante ya el cosa kita ya hace na servicio con Jehova. Mas manada ya man kita limitacion ahora contra de antes, necesita siempre kita esta ocupao na  ‘trabajo del Señor,’ esta dispierto y alerto hasta na fin.​—1 Cor. 15:58; Mat. 24:13; Mar. 13:33.

8. Cosa leccion kita puede aprende na maga palabra de Jesus para na maga hermano na Laodicea na Revelacion 3:15-17?

⁸ Le con el Revelacion 3:15-17. Debe kita queda activo y con todo corazon na diaton adoranza. El mensaje de Jesus para con aquellos na Laodicea ta dale mira si cosa el diila problema. “Tibio” sila na diila adoranza. Cay nuay sila gana na diila servicio, ya habla kanila si Jesus que “noay [sila] por donde y maca-lastima [kanila].” Necesita sila queda bien activo na diila adoranza con Jehova. (Rev. 3:19) Cosa el leccion para kanaton? Si ya menora el diaton gana na servicio, debe kita hace hondo con el diaton apresacion na maga espiritual cosas que tiene kita. (Rev. 3:18) Gendeh kita debe pricura tene un comfortable vida ahora que gendeh mas queda diaton prioridad el maga espiritual actividad.

9. Como cosa ya indica na maga mensaje de Jesus na maga Cristiano na Pergamo y Tiatira, cosa peligro kita necesita evita?

⁹ Debe kita evita con el maga enseñanza del maga apostata. Ya regaña si Jesus con el cuanto na Pergamo cay ta causa sila division entre na maga hermano. (Rev. 2:14-16) Ya comenda le con aquellos na Tiatira cay ya evita sila con el maga cosas de Satanas y ya anima le kanila que “guarda . . . embuenamente” con el verdad. (Rev. 2:24-26) Necesita arripinti el maga Cristiano quien ya principia sigui con el maga falso enseñanza. Quetal kita ahora? Debe kita evita con el maskin cosa enseñanza que contra na pensamiento de Jehova. El maga apostata ta “pretende . . . como religioso” pero ta “nega sila el poder del religion.” (2 Tim. 3:5) Mas facil identifica y evita con ese maga falso enseñanza si ta estudia gayot kita con el Palabra del Dios.​—2 Tim. 3:14-17; Jud. 3, 4.

10. Cosa leccion pa kita puede aprende na cosa ya habla si Jesus na congregacion de Pergamo y Tiatira?

¹⁰ Gendeh kita debe comete, permiti o consinti con el maskin cosa clase de imoralidad. Tiene pa otro problema el Pergamo y Tiatira. Ya condena si Jesus con el cuanto na ese maga congregacion cay ya consinti sila con el imoralidad. (Rev. 2:14, 20) Cosa el leccion para kanaton? Gendeh kita puede expecta que hay permiti si Jehova con el maskin cosa imoralidad que hay hace kita, maskin pa ya sirvi kita con ele por manada  año y tiene maga presente privilegio. (1 Sam. 15:22; 1 Ped. 2:16) Ta expecta le que hay mentena kita con el de suyu alto principio na moral maskin pa bien bajo el principio del mundo.​—Ef. 6:11-13.

11. Cosa kita ya puede aprende? (Mira tambien con el cajon “ Maga Leccion Para Kanaton Ahora.”)

¹¹ Cosa kita ya puede aprende? Ya puede kita mira que necesita kita asigura que aceptable con Jehova el diaton adoranza. Si tiene kita cosa ta hace que puede causa para gendeh queda aceptable el diaton adoranza, necesita kita dayun hace maga cambio. (Rev. 2:5, 16; 3:3, 16) Pero, tiene pa cosa ya menciona si Jesus na de suyu maga mensaje para na maga congregacion. Cosa este?

12. Cosa kita puede aprende na maga mensaje de Jesus para na maga hermano na Esmirna y Filadelfia? (Revelacion 2:10)

¹² Considera kita ahora con el maga mensaje de Jesus para na congregacion de Esmirna y Filadelfia. Ya habla le con el maga Cristiano alla que no tene miedo que enfrenta maga persecucion, ciendo hay bendici kanila si esta sila fiel. (Le con el Revelacion 2:10; 3:10) Cosa el leccion para kanaton ahora? Debe kita expecta persecucion y queda preparao que aguanta con ese. (Mat. 24:9, 13; 2 Cor. 12:10) Porque se importante?

13-14. Paquemodo ya afecta con el maga siervo del Dios el maga suceso na Revelacion capitulo 12?

¹³ El libro de Revelacion ta habla kanaton que hay persigui con el maga siervo del Dios na diaton tiempo​—“na dia del Señor.” El Revelacion capitulo 12 ta menciona que ya tiene dayun guerra na cielo cuando ya queda Rey si Jesus na Reino del Dios. Si Miguel​—que amo si Jesucristo despues le bira na cielo—​y el de suyu maga angel yan contra con Satanas y con el maga demonio. (Rev. 12:7, 8) Ya perde aquel maga enemigo del Dios y ya buta kanila para aqui na tierra donde ya causa sila grabe sufrimiento na maga gente. (Rev. 12:9, 12) Pero, paquemodo este ya afecta con el maga siervo del Dios?

¹⁴ El Revelacion ta habla kanaton si cosa sunod ya hace si Satanas. Gendeh mas le puede bira na cielo poreso ya ataca le con el maga iscujido siervo del Dios na tierra que amo el maga representante del Reino del Dios y quien “ta man testigo por causa di Jesus.” (Rev. 12:17; 2 Cor. 5:20; Ef. 6:19, 20) Paquemodo ya cumpli este profecia?

15. Con quien ta representa el “dos testigo” na Revelacion capitulo 11 y cosa ya sucede kanila?

¹⁵ Ya causa si Satanas con el maga enemigo del Dios para ataca con el maga iscujido hermano quien ta guia na trabajo predicacion. Ese maga hombre amo el figurativo “dos  testigo” na libro de Revelacion con quien ya mata. * (Rev. 11:3, 7-11) Del 1918, falso ya acusa con el ocho responsable hermano y ya sentencia con el cada uno kanila que man preso por largo tiempo. Na mirada del maga gente, dol ya puede mata o ya puede hace descanza con el trabajo de este maga iscujido.

16. Cosa ya sucede del 1919 pero cosa ta continua hace si Satanas desde aquel tiempo?

¹⁶ Ya habla tambien el profecia na Revelacion capitulo 11 que hay vivi otravez el “dos testigo” despues de corto tiempo. Ya cumpli ese profecia nuay pa un año despues sila man preso. Del Marzo 1919, ya libra na preso con aquel maga iscujido hermano y nuay mas porsigui el caso contra kanila. Ya bira dayun el maga hermano na diila trabajoque guia na predicacion y enseñada. Pero, nuay siempre descanza el ataque de Satanas contra na maga siervo del Dios. Desde aquel tiempo, si Satanas ya causa “un rio” de persecucion contra con el todo maga siervo del Dios. (Rev. 12:15) Deverasan gayot que el cada uno kanaton “necesita tene paciencia y fe.”​—Rev. 13:10.

17. Cosa el ayuda que ya ricibi el maga siervo del Dios, maskin pa ta ataca kanila si Satanas?

¹⁷ El Revelacion capitulo 12 ya indica que el maga siervo del Dios hay ricibi ayuda que gendeh sila ta expecta. Dol aquel “el tierra” hay traga con el “rio” de persecucion. (Rev. 12:16) Amo gayot este el cosa ya sucede. Tiene maga situacion donde el cuanto elemento del mundo de Satanas, igual con el cuanto maga corte, ya puede ayuda con el maga siervo del Dios. Manada beses ya ganá maga caso na corte el maga siervo de Jehova que ya dale kanila libertad. Paquemodo sila ya usa con este libertad? Ya usa sila con el maskin cosa oportunidad que tiene sila para hace el trabajo que ya dale kanila si Jehova. (1 Cor. 16:9) Cosa el incluido na ese trabajo?

18. Cosa el diaton de con todo importante trabajo durante este ultimo maga dia?

¹⁸ Ya habla si Jesus que el maga siervo del Dios hay declara con el “Buen Noticia acerca del Reino” na entero tierra antes llega el fin. (Mat. 24:14) Si ta predica sila, ta beneficia sila na suporta del un angel o un grupo de maga angel. El Biblia ya habla que imbiao el maga angel “para anuncia un buen noticia  que gendeh ta acaba con todo el maga viviente na mundo: con todo nacion, raza, lenguaje y pais.”​—Rev. 14:6.

19. Cosa pa el otro mensaje que debe predica aquellos quien ta ama con Jehova?

¹⁹ Gendeh lang el buen noticia acerca del Reino el debe declara el maga siervo del Dios. Necesita tambien sila suporta con el trabajo del maga angel que ya menciona na Revelacion capitulo 8 hasta 10. Este maga angel ta anuncia maga grabe dificultad para con aquellos gendeh ta acepta con el Reino del Dios. Poreso, el maga Testigo de Jehova ta declara un mensaje de juzgamiento que ya compara na “ulan de hielo y fuego.” Y ese mensaje ta explica con el maga juzgamiento del Dios contra na diferente elemento del mundo de Satanas. (Rev. 8:7, 13) Necesita sabe el maga gente que cerca ya el fin para puede sila hace maga grande cambio na diila vida y salva na dia del rabia de Jehova. (Sof. 2:2, 3) Pero, manada gente el gendeh ta acepta con este mensaje. Necesita kita coraje para declara con este. Durante el grande tribulacion, hay queda mas pesao el ultimo mensaje de juzgamiento.​—Rev. 16:21.

20. Cosa kita considera na siguiente dos articulo?

²⁰ Necesita gayot kita obedece con el maga palabra del profecia cay incluido kita na cumplimiento del cosa kita ta le na libro de Revelacion. (Rev. 1:3) Pero, paquemodo kita puede aguanta na maga persecucion y continua predica con coraje con este maga mensaje? Puede kanaton ayuda este dos cosas: una, el cosa ta revela el libro de Revelacion acerca na maga enemigo del Dios y ika-dos, el maga bendicion na futuro que hay ricibi kita si esta kita fiel. Hay considera kita con este maga topico na siguiente dos articulo.