1. Cosa el libro de Revelacion ta revela acerca na maga siervo del Dios?

 EL LIBRO de Revelacion ta revela que ya establicia ya con el Reino del Dios na cielo y ya arria alla con Satanas. (Rev. 12:1-9) Por causa con ese, tiene ya paz na cielo pero ya causa ese maga problema para kanaton. Porque? Cay rabiao si Satanas y ta ataca con el maga fiel siervo de Jehova aqui na tierra.​—Rev. 12:12, 15, 17.

2. Cosa puede ayuda kanaton para esta fiel con Jehova?

² Paquemodo kita puede esta fiel maskin ta ataca kanaton si Satanas? (Rev. 13:10) Puede ayuda kanaton si sabe kita si cosa sucede na futuro. Por ejemplo, na Revelacion, ya menciona si apostol Juan con el cuanto maga bendicion que gendeh dura hay experiencia kita. Uno de ese amo que quita ya con el maga enemigo del Dios. Examina kita ahora si cosa ta habla el Revelacion acerca na ese maga enemigo y si cosa hay sucede kanila.

3. Cosa el cuanto maga señal que ya menciona na Revelacion?

³ Na de este primer versiculo, el Revelacion ta habla kanaton que ya presenta con el maga informacion na este libro por medio na “maga señal” o na simbolico manera. (Rev. 1:1, NWT) Na ansina manera ya identifica con el maga enemigo del Dios. Ya menciona na este libro cuanto bilug maga grande animal. Por ejemplo, tiene “un Grande Animal ta sale na mar.” Tiene este “siete cabeza y dies maga cuerno.” (Rev. 13:1) Sunod con ese, tiene “otro Grande Animal ta sale na tierra.” Ese grande animal ta converza como un dragon y ta “hace abaja  na tierra fuego del cielo.” (Rev. 13:11-13) Despues, tiene pa “un Grande Animal colorao brillante,” donde ta munta el un mala mujer. Este tres grande animal ta representa con el maga ya dura ya enemigo de Dios Jehova y del de suyu Reino. Poreso, importante que identifica kita kanila.​—Rev. 17:1, 3.

4-5. Paquemodo el Daniel 7:15-17 ta ayuda kanaton para entende si cosa quierre decir de ese maga señal?

⁴ Antes kita puede conoce si quien este maga enemigo, necesita kita entende si cosa quierre decir del maga señal. Para puede se kita entende, necesita kita mira el explanacion mismo del Biblia acerca con ese. Manada na maga señal na Revelacion el ya explica ya na otro maga libro del Biblia. Por ejemplo, si profeta Daniel ya tiene sueño donde “tiene ya sale cuatro grande animal na mar.” (Dan. 7:1-3) Ya menciona si Daniel que ese maga grande animal ta representa con el cuatro “rey” o gobierno. (Le con el Daniel 7:15-17.) Ese claro explanacion ta ayuda kanaton para entende que el maga grande animal que ya menciona na Revelacion ta refiri tambien na maga gobierno.

⁵ Examina kita ahora el cuanto maga señal que ya menciona na Revelacion. Mientras ta hace se, hay mira kita si paquemodo el Biblia puede ayuda kanaton para entende si cosa se quierre decir. Principia kita na maga grande animal. Una, identifica kita si con quien este ta representa. Despues, hay mira kita si cosa sucede con este maga grande animal. Na uliji, hay considera kita si cosa quierre decir de este para kanaton.

6. Cosa ta representa el grande animal que tiene siete cabeza que ya menciona na Revelacion 13:1-4?

⁶ Cosa el grande animal que tiene siete cabeza? (Le con el Revelacion 13:1-4.) Puede kita nota que igual na leopardo el ichura de este grande animal pero tiene este pies de oso, boca de leon y diez cuerno. Ese tambien el cosa ya menciona acerca na cuatro grande animal na Daniel capitulo 7. Pero aqui na libro de Revelacion, ta refiri ese todo na un grande animal lang, gendeh na cuatro diferente maga animal. Poreso, este grande animal gendeh ta representa un gobierno o un imperio lang. Ya menciona que ta rula este “con todo el maga raza, maga pais, maga lenguaje y maga nacion.” Poreso, gendeh este gobierno del un nacion lang. (Rev. 13:7) Claro que este grande animal ta representa con el todo maga gobierno que ta rula na maga gente desde antes hasta ahora. *​—Ecl. 8:9.

7. Cosa ta representa el cada uno na siete cabeza del grande animal?

⁷ Cosa ta representa el cada uno na siete cabeza? Puede kanaton ayuda el Revelacion capitulo 17, donde tiene ta menciona acerca na un imagen del grande animal na Revelacion capitulo 13. El Revelacion 17:10 ta habla: “Ta representa tamen el siete cabeza con maga siete rey. Cinco diila ya muri ya. Tiene uno ta reina pa y el uno noay pa vene. Pero cuando ay vene [le], gendeh ele ay dura.” Na todo maga gobierno que ya usa si Satanas, tiene siete que ya compara na “cabeza” cay tiene sila bien grande poder. Tiene sila grande efecto na maga siervo del Dios. Na tiempo de apostol Juan, ya puede ya rula el cinco de ese maga gobierno: el Egipto, Asiria, Babilonia, Medo-Persia y Grecia. El ika-seis gobierno, el Roma, ta rula pa cuando ya ricibi si Juan con el revelacion. Cosa el ika-siete y ultimo gobierno o cabeza?

8. Con quien ta representa el ika-siete cabeza del grande animal?

 ⁸ Puede kita mira ahora que el maga profecia na libro de Daniel puede ayuda kanaton para conoce si quien el ika-siete y ultimo cabeza del grande animal. Cosa gobierno el ta rula durante este tiempo del fin o “dia del Señor”? (Rev. 1:10, NWT) Dos gobierno el junto ta rula​—el United Kingdom y United States of America que ta llama Anglo-American World Power. Poreso, puede kita habla que ese el ika-siete cabeza del grande animal na Revelacion 13:1-4.

9. Cosa ta representa el grande animal que tiene “dos cuerno igual como del carnero”?

⁹ Na Revelacion capitulo 13, ya refiri tambien con el ika-siete cabeza, el Anglo-American World Power, como un grande animal que tiene “dos cuerno igual como del carnero, pero su voz igual como del dragon.” Ya menciona que “ya puede le hace maga grande milagro, como hace abaja na tierra fuego del cielo, y ya hace le se na presencia de todo el maga gente.” (Rev. 13:11-15) Na Revelacion capitulo 16 y 19, ya refiri con este grande animal como el “Falso Profeta.” (Rev. 16:13; 19:20) Semejante tambien con ese el cosa ya habla si Daniel que el Anglo-American World Power ‘hay lleva destrozo.’ (Dan. 8:19, 23, 24) Amo gayot se el cosa ya sucede del Guerra Mundial II. El dos atomic bomb que ya puede causa para termina el guerra amo un proyecto que junto ya hace el maga cientista de Britain y America. Na ese manera, el Anglo-American World Power dol ya “hace abaja na tierra fuego del cielo.”

10. Cosa ta representa el imagen del grande animal? (Revelacion 13:14, 15; 17:3, 8, 11)

¹⁰ Tiene pa otro grande animal. Ta semeja el ichura de este na grande animal que tiene siete cabeza pero el color de este amo colorao brillante. Ya llama con este, “el rebulto [“imagen,” NWT] del Grande Animal” y ya refiri con este na Revelacion 17:11 como “el ica-ocho rey.” * (Le con el Revelacion 13:14, 15; 17:3, 8.) Ya menciona que este “rey” hay existi, hay perde y despues, abuya otravez. Amo gayot este el ya sucede na organizacion del United Nations que ta suporta con el maga gobierno del mundo! Ya existi este del primero como el League of Nations. Despues, ya perde este durante el Guerra Mundial II. Na uliji, ya abuya este otravez como el United Nations.

11. Cosa ta hace el maga gobierno y porque kita gendeh debe tene miedo kanila?

¹¹ Por medio na diila propaganda, el maga gobierno ta anima con el maga gente que man contra con Jehova y con el de suyu maga siervo. Na simbolico manera, ta ajunta sila con “el maga rey na mundo” para na guerra de Armagedon que amo el “Grande Dia del Dios todopoderoso.” (Rev. 16:13, 14, 16) Pero, gendeh kita debe tene miedo. El diaton Dios, si Jehova, hay actua dayun para salva con el todo quien ta suporta con el de suyu rulanza.​—Eze. 38:21-23.

12. Cosa hay sucede con el todo maga grande animal?

¹² Cosa hay sucede con el todo maga grande animal? El Revelacion 19:20 ta habla: “Ya hace sila preso con el Grande Animal y con el Falso Profeta, aquel quien ya hace maga milagro para del Animal para, por medio de esos, engaña le con aquellos quien ya manda pone na diila cuerpo el marca del Animal y ya adora el disuyo rebulto [“imagen,” NWT]. Vivo pa sila ya buta canila dos adentro na tanque de  fuego y azufre bien arde.” Entonces, mientras ta rula pa este maga gobierno que maga enemigo del Dios, hay destroza kanila hasta para cuando.

13. Cosa maga probanza ta enfrenta el maga Cristiano por causa na maga gobierno del mundo?

¹³ Cosa este quierre decir para kanaton? Como maga Cristiano, debe kita queda leal con Dios y na de suyu Reino. (Juan 18:36) Para hace se, necesita kita esta neutral na maga issue de politica. Pero, posible que bien dificil con ese hace cay quierre el maga gobierno que dale kita mira el diaton suporta kanila na palabra y accion. Aquellos quien ta sigui na diila pressure ta ricibi el marca del grande animal. (Rev. 13:16, 17) Pero, aquellos quien ya ricibi con ese marca gendeh hay tene el favor de Jehova y gendeh tambien ricibi vida eterna. (Rev. 14:9, 10; 20:4) Poreso, bien importante que esta kita neutral maskin tan pressure kanaton el maga gobierno que suporta kanila!

14. Cosa sunod ya mira si apostol Juan, como ya menciona na Revelacion 17:3-5?

¹⁴ Ya menciona si apostol Juan que “ya espanta” le na un cosa que ya puede le mira. Cosa quel? Un mujer que ta munta na uno de este maga grande animal. (Rev. 17:1, 2, 6) Ya refiri con ele como un “Famoso Mala Mujer” y ya llama con ele como el “Grande Babilonia.” Ta comete le “immoralidad” na “maga rey del mundo.”​—Le con el Revelacion 17:3-5.

15-16. Quien el “Grande Babilonia” y porque kita se sabe?

¹⁵ Quien el “Grande Babilonia”? Este mujer gendeh puede representa con el maga gobierno cay ya menciona que ta comete le imoralidad na maga lider de politica. (Rev. 18:9) Gane, ta munta le con el grande animal que ta dale mira que ta pricura le controla con este maga lider. Mas pa, gendeh le puede representa con el maga comercio na mundo de Satanas. Separtao kanila ya menciona na Revelacion y ya llama kanila, “el maga negociante del mundo.”​—Rev. 18:11, 15, 16.

¹⁶ Na Biblia, el palabra “mala mujer” puede refiri con aquellos quien ta clama que ta sirvi con Dios pero ta comete idolatria o ta actua como maga amigo del mundo. (1 Cron. 5:25; Sant. 4:4) Gendeh igual kanila, ta refiri con aquellos quien fiel ta adora con Dios como maga “virgen.” (2 Cor. 11:2; Rev. 14:4) De antes, el Babilonia el centro del falso adoranza. Entonces, el Grande Babilonia ta representa con el todo clase de falso adoranza. Gane, amo este el imperio del falso religion na entero mundo.​—Rev. 17:5, 18; mira con articulo na jw.org “What Is Babylon the Great?”

17. Cosa hay sucede na Grande Babilonia?

¹⁷ Cosa hay sucede na Grande Babilonia? Este el contestacion na Revelacion 17:16, 17: “El dies cuerno pati el Grande Animal ay odia con el Mala Mujer. Ay deja sila con ele solo y ay quita sila el disuyo camisa. Despues, ay come sila el disuyo cuerpo y ay quema pa sila el disuyo maga bukug na fuego. El Dios amo ya pone ese na diila pensamiento para cumpli sila el disuyo mismo plano.” Hay manda move si Jehova con el maga nacion para usa con el grande animal colorao brillante que amo el United Nations para ataca y completamente destroza con el imperio del falso religion.​—Rev. 18:21-24.

18. Paquemodo kita puede asigura que gendeh kita ta suporta con el Grande Babilonia na maskin cosa manera?

¹⁸ Cosa este quierre decir para kanaton? Necesita kita mentena con “el deverasan y perfecto religion [o adoranza] na ojos del Dios.”  (Sant. 1:27) Gendeh gayot kita debe permiti que queda kita influenciao na maga falso enseñanza, maga pagano celebracion, bajo principio na moral y maga practica de espiritismo del Grande Babilonia! Y hay continua kita anima con el maga gente que “sale” alli para gendeh sila queda envuelto na maga culpa del Grande Babilonia.​—Rev. 18:4.

19. Quien el “Dragon colorao bien grande”?

¹⁹ El libro de Revelacion ta menciona tambien acerca na “un Dragon colorao bien grande.” (Rev. 12:3) Este dragon tan contra con Jesus y con el de suyu maga angel. (Rev. 12:7-9) Ta ataca este con el maga siervo del Dios y ta dale poder con el maga grande animal o maga gobierno del gente. (Rev. 12:17; 13:4) Quien este dragon? Este “el daan Culebra, el Demonio o Satanas.” (Rev. 12:9; 20:2) Ele el ta controla con el todo otro maga enemigo de Jehova.

20. Cosa hay sucede con el dragon?

²⁰ Cosa hay sucede con el dragon? El Revelacion 20:1-3 ta explica que el un angel hay buta con Satanas na hondura y queda este como un preso. Mientras talli le na hondura, “gendeh mas ele ay engaña otra vez con el maga nacion hasta ay pasa el un mil año.” Na uliji, hay buta con Satanas y con el de suyu maga demonio na “tanque de fuego y azufre”​—quierre decir completamente hay destroza kanila. (Rev. 20:10) Pruba imagina con el un mundo que nuay mas si Satanas y el de suyu maga demonio. Gendeh ba bien bonito ese?

21. Porque kita puede queda alegre acerca na cosa kita ya le na libro de Revelacion?

²¹ Bien bonito cay ya puede kita entende si cosa quierre decir del maga señal na libro de Revelacion! Nuay lang kita basta puede identifica con el maga enemigo de Jehova sino ya puede tambien kita mira si cosa hay sucede kanila. Deverasan gayot que “alegre el gente quien ta [le], ta oi [ele] y despues ta obedece este mensaje”! (Rev. 1:3) Pero si ya destroza ya con el maga enemigo del Dios, cosa maga bendicion hay experiencia el maga fiel gente? Hay discuti kita con ese na ultimo articulo de este serie.