1. Cosa importante decision el necesita hace el todo maga gente?

 EL MAGA gente ahora tiene un importante decision que necesita hace. Hay suporta ba sila con Dios Jehova, el solamente tiene derecho para rula na universo, o hay suporta sila con el de suyu brutal enemigo, si Satanas Diablo? El cada uno debe iscuji si onde sila lao. El diila decision hay determina si vivi ba sila hasta para cuando o gendeh. (Mat. 25:31-33, 46) Durante el “grande persecucion” o tribulacion, hay marca con el maga fiel siervo de Jehova para sobrevivi. (Rev. 7:14; Eze. 9:4, 6) Pero hay destroza con aquellos quien tiene el marca del grande animal.​—Rev. 14:9-11.

2. (a) Cosa ta anima kanaton que hace el Maga Hebreo 10:35-39? (b) Paquemodo puede ayuda kanaton el libro de Revelacion?

² Le con el Maga Hebreo 10:35-39. Si ya iscuji tu que suporta con el rulanza de Jehova, ya hace tu el justo decision. Ahora, quierre tu ayuda con otro que hace tambien con ese. Puede tu usa con el informacion na libro de Revelacion para ayuda kanila. Este bonito libro ta revela si cosa hay sucede con aquellos quien tan contra con Jehova. Pero, ta dale tambien este mira con el maga bendicion que ricibi aquellos quien leal ta suporta con el de suyu rulanza. Debe kita estudia con este maga importante verdad. Si hace kita este, ayuda este kanaton para queda mas determinao que continua sirvi con Jehova. Omento pa, puede kita usa el cosa kita ya puede aprende para ayuda con otro hace el justo decision y continua hace con ese.

3. Cosa kita hay considera na este articulo?

³ Na este articulo, hay considera kita con este maga pregunta: Cosa hay sucede con aquellos quien ta suporta con  el rulanza del Dios? Pero, cosa tambien hay sucede con aquellos quien ta iscuji suporta con el grande animal colorao brillante que ya menciona na libro de Revelacion?

4. Cosa grupo el ya mira si apostol Juan junto con Jesus na cielo?

⁴ Na un vision, ya mira si apostol Juan dos grupo quien ta suporta con el rulanza de Jehova y ta ricibi el bendicion de vida eterna. Tiene 144,000 na primer grupo. (Rev. 7:4) Estaba sila na tierra para forma un gobierno o Reino na cielo junto con Jesus. Junto con ele, ta rula sila na entero tierra. (Rev. 5:9, 10; 14:3, 4) Na vision, ya mira si Juan kanila parao junto con Jesus na Monte de Sion na cielo.​—Rev. 14:1.

5. Cosa cerca ya hay sucede con el maga iscujido quien taqui pa na tierra?

⁵ Desde na tiempo del maga apostoles hasta ahora, ya iscuji con el miles de maga gente para queda parte del 144,000. (Luc. 12:32; Roma 8:17) Pero, ya habla con Juan que diutay numero lang diila el vivo na tierra durante el ultimo maga dia. Antes principia el grande tribulacion, este maga iscujido hay ricibi con el diila ultimo “marca” que ta dale mira que ta aproba kanila si Jehova. (Rev. 7:2, 3; 12:17) Despues, durante el grande tribulacion, este maga iscujido hay anda na cielo para man junto con el otro miembro del 144,000 quien ya muri ya. Hay rula sila junto con Jesus na Reino del Dios.​—Mat. 24:31; Rev. 5:9, 10.

6-7. (a) Cosa grupo sunod ya mira si Juan y cosa kita puede aprende acerca kanila? (b) Porque debe queda interesao el maga iscujido y el grande grupo na Revelacion capitulo 7?

⁶ Despues mira con el grupo na cielo, ya mira si Juan con el “bien mucho maga gente.” Gendeh igual na 144,000, no puede cunta con este grupo. (Rev. 7:9, 10) Cosa kita puede aprende acerca kanila? Ya habla con Juan: “Sila amo el quien ya sale victorioso na grande persecucion [o tribulacion] y ya lava el diila camisa y ya hace blanco con ese na sangre del Carnero.” (Rev. 7:14) Despues sobrevivi na grande tribulacion, este grande grupo hay vivi aqui na tierra y ricibi bonito maga bendicion.​—Sal. 37:9-11, 27-29; Prov. 2:21, 22; Rev. 7:16, 17.

⁷ Ya iscuji man kanaton para anda na cielo o esta aqui na tierra, ta mira ba kita con el diaton mismo cuerpo que parte na cosa ya menciona na Revelacion capitulo 7? Debe lang. Un bonito tiempo gayot se para na dos grupo del maga siervo del Dios! Hay queda gayot kita alegre cay ya iscuji kita que suporta con el rulanza de Jehova. Cosa pa el libro de Revelacion ta habla kanaton acerca na grande tribulacion?​—Mat. 24:21.

8. Paquemodo hay principia el grande tribulacion y paquemodo este afecta con el mayoria del maga gente?

⁸ Como cosa ya menciona del ya pasa articulo, el maga gobierno de este mundo hay ataca con el Grande Babilonia, el imperio del falso religion na entero mundo. (Rev. 17:16, 17) Ese el principio del grande tribulacion. Na ese tiempo, manada ba gente hay principia sirvi con Dios Jehova? Gendeh. Sino, el Revelacion capitulo 6 ta dale mira que na ese critical tiempo, el maga gente quien gendeh ta sirvi con Jehova hay busca proteccion na gobierno y na comercio de este mundo, que ya compara na maga monte. Ciendo gendeh sila ta suporta con el Reino del Dios, hay considera kanila si Jehova como enemigo.​—Luc. 11:23; Rev. 6:15-17.

9. Na cosa manera diferente el maga siervo del Dios durante el grande tribulacion y cosa el resulta?

 ⁹ Claro gayot puede mira que diferente el maga fiel siervo de Jehova durante ese bien dificil tiempo de tribulacion. Sila siempre el solamente grupo de maga gente na tierra quien ta sirvi con Dios Jehova y gendeh ta suporta na “Grande Animal.” (Rev. 13:14-17) Por causa con ese, hay rabia gayot kanila aquellos quien tan contra con Jehova. Como resulta, el alianza de maga nacion hay ataca con el maga siervo del Dios na entero mundo. El Biblia ya llama con este como el ataque del Gog de Magog.​—Eze. 38:14-16.

10. Como cosa ya menciona na Revelacion 19:19-21, cosa el reaccion de Jehova na ataque na de suyu maga siervo?

¹⁰ Cosa el reaccion de Jehova na este ataque? Ele ya habla kanaton: “Hay sale el de mio grande rabia.” (Eze. 38:18, 21-23) El Revelacion capitulo 19 ta menciona si cosa sunod sucede. Imbia si Jehova con el De Suyu Anak para protege con el De Suyu maga siervo y para destroza con el diila maga enemigo. Man junto con Jesus na este ataque “el maga soldao del cielo”​—el maga fiel angel junto na 144,000. (Rev. 17:14; 19:11-15) Cosa el resulta de este guerra? Completamente destroza con el todo maga gente y organizacion quien tan contra con Jehova!​—Le con el Revelacion 19:19-21.

11. Cosa el un bien importante suceso na libro de Revelacion?

¹¹ Pricura imagina si cosa hay sinti el maga fiel gente aqui na tierra despues destroza con el maga enemigo del Dios. Un bien maka-alegre tiempo gayot se! Maskin tiene grande alegria na cielo si ya destroza ya con el Grande Babilonia, tiene pa otro cosa que hay lleva mas grande alegria. (Rev. 19:1-3) Gane, este amo un bien importante suceso na libro de Revelacion​—el “casamiento del Carnero.”​—Rev. 19:6-9.

12. Como cosa ya indica na Revelacion 21:1, 2, cuando hay sucede el casamiento del Carnero?

¹² Cuando hay sucede el casamiento? Na cielo ya el 144,000 antes principia el guerra del Armagedon. Pero, gendeh pa se el tiempo del casamiento del Carnero. (Le con el Revelacion 21:1, 2.) Hay sucede el casamiento del Carnero despues el guerra del Armagedon y si ya destroza ya con el todo maga enemigo del Dios.​—Sal. 45:3, 4, 13-17.

13. Cosa hay sucede na casamiento del Carnero?

¹³ Cosa hay sucede na casamiento del Carnero? Igual si paquemodo ta queda uno el hombre y mujer na casamiento, el casamiento del Carnero ta hace tambien unido con el Rey, si Jesucristo, y con el de suyu “novia,” el 144,000. Este importante suceso amo el principio del nuevo gobierno que hay rula na tierra por 1,000 año.​—Rev. 20:6.

14-15. Na cosa ta compara el Revelacion capitulo 21 con el 144,000? (Mira con el letrato na cover.)

¹⁴ El Revelacion capitulo 21 ya compara con el 144,000 na un bien bonito ciudad que ya llama “Nuevo Jerusalem.” (Rev. 21:2, 9) Este ciudad tiene 12 piedra de fundacion donde escribido con este “el maga nombre del maga Doce Apostol del Carnero.” Porque ya queda interesao si Juan con este? Cay ya mira le el de suyu nombre escribido na uno de aquel maga piedra. Un grande privilegio gayot quel!​—Rev. 21:10-14; Ef. 2:20.

¹⁵ Nuay maskin cosa el igual na este simbolico ciudad. Tiene este camino que hacido de  puro oro, 12 grande puerta que hacido de perlas, maga pader y fundacion que tiene maga precioso piedra​—y perfecto el maga medida de este. (Rev. 21:15-21) Pero, dol tiene siempre cosa falta! Nota si cosa el sunod ya habla si Juan: “Noay yo puede mira Templo alla cay el Señor, el Dios todopoderoso, y el Carnero amo el disuyo Templo. Gendeh necesita el ciudad con el sol o el luna para dale luz, cay el gloria del Dios amo el ta dale luz con ese y el disuyo lampara amo el Carnero.” (Rev. 21:22, 23) Aquellos quien queda parte del Nuevo Jerusalem hay man junto con Jehova. (Heb. 7:27; Rev. 22:3, 4) Entonces, si Jehova y si Jesus el templo de ese ciudad.

16. Cosa hay experiencia el maga gente durante el Un Mil Año Rulanza del Reino del Dios?

¹⁶ Bonito gayot para con el maga iscujido que pensa acerca con este ciudad. Pero, aquellos quien vivi aqui na tierra tiene tambien razon para queda interesao con este. Durante el Un Mil Año Rulanza del Reino del Dios, el Nuevo Jerusalem hay lleva bien manada bendicion. Ya mira si Juan con este maga bendicion que ta corre igual na “rio del agua del Vida.” Y na ambuslao de este rio, tiene maga “Pono de Vida” que ta produci maga hojas para “cura con el maga pagano” o maga nacion. (Rev. 22:1, 2) El todo maga gente hay tene el oportunidad para beneficia con este maga provision. Hinay-hinay, el todo maga obediente gente hay queda ya perfecto. Nuay mas enfermedad, dolor y luha de tristeza.​—Rev. 21:3-5.

17. Como cosa ta dale mira na Revelacion 20:11-13, quien hay beneficia na Un Mil Año Rulanza?

¹⁷ Quien hay beneficia na este maga bonito provision? El primero amo el grande grupo quien ya sobrevivi na Armagedon y diila maga anak que posible nace na nuevo mundo. Pero, el Revelacion capitulo 20 ta promete tambien que el maga muerto hay resucita. (Le con el Revelacion 20:11-13.) El maga fiel “recto” quien ya muri de antes junto con el maga “gendeh recto”​—quien nuay tene el oportunidad para aprende acerca con Jehova—​hay vivi otravez aqui na tierra. (Act. 24:15, NWT; Juan 5:28, 29) Quierre decir ba de este que el todo gente hay vivi otravez aqui na tierra durante el Un Mil Año Rulanza? Gendeh. Gendeh resucita con aquellos nuay  acepta el oportunidad para sirvi con Jehova antes el diila muerte. Ya dale sila mira que gendeh sila conviene ricibi el vida na Paraiso tierra.​—Mat. 25:46; 2 Tes. 1:9; Rev. 17:8; 20:15.

18. Cosa el situacion na tierra na fin del 1,000 año?

¹⁸ Na fin del 1,000 año, el todo quien ta vivi na tierra hay tene perfecto vida. Nuay mas quien hay queda afectao na pecado que ya hereda con Adan. (Roma 5:12) Hay quita ya con este completamente. Como resulta, aquellos na tierra hay vivi como maga perfecto gente na fin del 1,000 año.​—Rev. 20:5.

19. Porque necesita un ultimo probanza?

¹⁹ Sabe kita que ya esta fiel si Jesus con Dios maskin ya pruba con ele si Satanas. Pero, hay esta ba fiel con Jehova el todo maga perfecto gente si pruba kanila si Satanas? El cada uno puede contesta con ese si libra ya con Satanas na hondura na fin del 1,000 año. (Rev. 20:7) Aquellos quien esta fiel durante na este ultimo probanza hay ricibi vida eterna y hay tene deverasan libertad. (Roma 8:21) Pero, hay destroza hasta para cuando con aquellos quien man rebelde, junto con el Diablo y de suyu maga demonio.​—Rev. 20:8-10.

20. Cosa tu ta sinti acerca na maga bonito profecia que puede incuntra na libro de Revelacion?

²⁰ Cosa tu ta sinti despues kita considera con este corto discusion acerca na libro de Revelacion? Excited ba tu mira con el de tuyu mismo cuerpo na este maga bonito profecia? Gendeh ba se ta manda move contigo que invita con otro que man junto kanaton na puro adoranza na diaton Dios? (Rev. 22:17) Ahora cay ya discuti kita con este maga cosas que hay sucede na futuro, excited kita y igual con apostol Juan, quierre kita habla: “Amen. Vene Señor Jesus.”​—Rev. 22:20.