1. Porque kita todo necesita sabeduria estaba con Dios? (Proverbio 4:7)

 SI NECESITA tu hace un importante decision, asigurao ta reza gayot tu para na sabeduria cay sabe tu que necesita tu con ese. (Sant. 1:5) Ya escribi si Rey Solomon: “El sabeduria amo el de con todo importante cosa.” (Le con el Proverbio 4:7.) Siempre, gendeh tan cuento si Solomon acerca na maskin cosa clase de sabeduria lang. Ta refiri le con el sabeduria que estaba con Dios Jehova. (Prov. 2:6) Pero, puede ba ayuda kanaton el sabeduria estaba con Dios para enfrenta con el maga problema ahora? Puede, como cosa kita puede mira na este articulo.

2. Cosa el un manera que puede kita queda deverasan sabio?

² El un manera que puede kita queda deverasan sabio amo si estudia y aplica kita con el maga enseñanza del dos gente quien bien sabio gayot. Una, hay considera kita con Solomon. El Biblia ta habla que “el Dios ya dale con Solomon bien grande sabeduria y entendimiento.” (1 Rey 4:29) Ika-dos, hay considera kita con Jesus, el de con todo sabio persona quien ya vivi aqui na tierra. (Mat. 12:42) Acerca con Jesus, el Biblia ya predicta: “El espiritu de Jehova hay esta con ele, el espiritu de sabeduria y de entendimiento.”​—Isa. 11:2.

3. Cosa kita discuti na este articulo?

³ Por medio del sabeduria que estaba con Dios, si Solomon y si Jesus ya dale maga practical consejo na maga cosas que importante kanaton todo. Na este articulo, hay considera kita con el tres ejemplo: El balance mirada na sen, trabajo y diaton mismo cuerpo.

4. Na cosa manera diferente el estado de vida de Solomon y de Jesus?

⁴ Bien rico si Solomon y tiene le comfortable vida. (1 Rey 10: 7, 14, 15) Pero, si Jesus nuay tanto material cosas y nuay le de suyu mismo casa. (Mat. 8:20) Maskin pa ansina, igual sila tiene balance mirada na material cosas cay el diila sabeduria estaba con Dios Jehova.

5. Paquemodo ya dale mira si Solomon que tiene le balance mirada na sen?

⁵ Ya habla si Solomon que el sen amo “un proteccion.” (Ecl. 7:12) Si tiene kita sen, puede kita obtene con el maga cosas que necesita kita y el cuanto cosas que quierre kita. Pero maskin pa bien rico si Solomon, ya realiza le que tiene maga cosas que mas importante pa na sen. Por ejemplo, ya escribi le: “Mas bueno pa iscuji con el un buen nombre [o “un buen reputacion,” ftn.] contra na manada riqueza.” (Prov. 22:1) Ya puede tambien observa si Solomon que el maga gente quien ta ama con el sen gendeh tanto alegre na cosa sila tiene. (Ecl. 5:10, 12) Y ya habla le que no kita pone con el diaton confianza na sen cay puede lang dayun perde el maskin cosa cantidad de sen que tiene kita.​—Prov. 23:4, 5.

6. Paquemodo ya dale mira si Jesus que tiene le balance mirada na maga material cosas? (Mateo 6:31-33)

⁶ Tiene balance mirada si Jesus na maga material cosas. Alegre le come y toma. (Luc. 19:2, 6, 7) Na un ocasion, ya hace le vino que de con todo buen clase​—el primero na de suyu maga milagro. (Juan 2:10, 11) Y na dia del de suyu muerte, ta visti le de caro ropa. (Juan 19:23, 24) Pero, nuay permiti si Jesus que el maga material cosas amo queda el de con todo importante cosa na de suyu vida. Ya habla le con el de suyu maga siguidores: “Noay gente quien puede sirvi con dos amo . . . No puede ustedes sirvi con el Dios y con el sen.” (Mat. 6:24) Ya enseña si Jesus que si busca kita una con el Reino, hay asigura si Jehova que hay tene kita el cosa kita necesita.​—Le con el Mateo 6:31-33.

7. Paquemodo ya beneficia el un hermano cay tiene le balance mirada na sen?

⁷ Manada del diaton maga hermano y hermana el ya beneficia cay ya aplica sila con el consejo de Jehova acerca na sen. Considera con el ejemplo del un single hermano que si  Daniel. Ele ya habla: “Cuando teenager yo, ya decidi yo que el maga espiritual actividad amo queda el de con todo importante cosa na de mio vida.” Cay ya hace le simple con el de suyu vida, si Daniel ya puede usa con el de suyu tiempo y abilidad na manada proyecto del organizacion. Ele ya omenta: “Puede yo habla que nuay gayot yo arripinti con el decision que ya hace yo. Deveras, puede era yo tene bien manada sen si hace yo con ese el de con todo importante cosa na de mio vida. Pero si ya hace yo con aquel, nuay era yo puede tene el maga amigo y amiga que tiene yo ahora. Y gendeh tambien era yo queda alegre igual ahora si nuay yo hace una con el trabajo del Reino. Nuay maskin cosa cantidad de sen el puede compara con el maga bendicion que ya dale conmigo si Jehova.” Claro gayot que hay beneficia kita si man focus kita, gendeh na sen, sino na maga espiritual cosas.

8. Porque kita puede habla que si Solomon tiene balance mirada na trabajo? (Eclesiastes 5:18, 19)

⁸ Ya habla si Solomon que el trabajo puede hace alegre con el un persona y para con ele, “regalo este del Dios.” (Le con el Eclesiastes 5:18, 19.) Ele ya escribi: “Tiene beneficio na todo clase de esfuerzo.” (Prov. 14:23) Ya puede se mismo experiencia si Solomon. Un buen trabajador le! Ya planta le casa, ya siembra uvasan y ya hace maga jardin y tanque de agua. Ya planta tambien le maga ciudad. (1 Rey 9:19; Ecl. 2:4-6) Maga pesao trabajo gayot quel y asigurao que ya hace quel con ele alegre. Pero sabe si Solomon que para queda le deverasan alegre, mas pa el cosa le necesita hace. Necesita le participa na maga espiritual actividad. Por ejemplo, ele el quien ya mira na construida del glorioso templo para na adoranza con Jehova​—un proyecto que ya alcanza siete año! (1 Rey 6:38; 9:1) Despues hace si Solomon con este maga cosas, ya puede le realiza que mas importante el maga espiritual actividad contra con el maga secular trabajo. Ya escribi le: “Despues yo habla este todo, este el conclusion: Tene miedo na verdadero Dios y sigui con el de suyu maga mandamiento.”​—Ecl. 12:13.

9. Cosa ya hace si Jesus para pone na justo lugar con el de suyu trabajo?

⁹ Un buen trabajador si Jesus. Cuando joven le, ya trabaja le como un carpintero. (Mar. 6:3) Asigurao que el de suyu mayores ya aprecia gayot con el de suyu ayuda mientras ta pricura sila dale con el necesidad del diila grande familia. Perfecto si Jesus y como un carpintero, manada gente el ya gusta con el cosa le ya hace! Posible, quierre-quierre gayot si Jesus con el de suyu trabajo. Pero maskin pa tiene secular trabajo si Jesus, ya dale le tiempo para na maga espiritual actividad. (Juan 7:15) Na uliji, cuando full-time le na ministerio, ya habla le con el maga gente: “No ustedes trabaja para gana el comida que gendeh ta dura, sino trabaja para gana el comida que ta dura hasta na Vida Eterno.” (Juan 6:27) Y na de suyu Sermon na Monte, si Jesus ya habla: “Ajunta ustedes maga riqueza na cielo.”​—Mat. 6:20.

10. Cosa dificultad posible ta enfrenta el cuanto na diila secular trabajo?

¹⁰ El sabeduria estaba con Jehova ta ayuda kanaton para tene balance mirada na diaton secular trabajo. Como maga Cristiano, ya enseña kanaton que “precura trabaja para busca la vida.” (Ef. 4:28) Mas mucho, ta nota el diaton maga amo que honesto kita y trabajador, y posible habla sila kanaton que ta aprecia sila con el manera si paquemodo kita ta  trabaja. Por causa con ese, posible hay principia kita trabaja largo hora cay quierre kita que el diaton amo hay tene buen impresion con el maga Testigo de Jehova. Pero, baka hay principia kita deja con el diaton maga responsibilidad na familia y maga teocratico actividad. Necesita kita hace cambio para queda balance.

11. Cosa ya aprende el un hermano acerca si porque importante tene un balance mirada na trabajo?

¹¹ El un joven hermano que si William ya puede aprende si porque importante que pone con el secular trabajo na justo lugar. Acerca con el un anciano con quien le ta trabaja de antes, si William ya habla: “[Este hermano] un buen ejemplo gayot si paquemodo queda balance na secular trabajo. Ta trabaja le enbuenamente y tiene le buen relacion con el de suyu maga customer por causa na calidad del de suyu trabajo. Pero si ya acaba ya el hora del trabajo, ta descanza le y ta usa con el de suyu tiempo y fuerza para na de suyu familia y para na maga espiritual actividad. Y gane, uno le del maga de con todo alegre persona que ya conoce yo!” *

12. Paquemodo ya dale mira si Solomon que tiene le balance mirada na de suyu mismo cuerpo pero paquemodo se ya perde?

¹² Cuando si Solomon fiel pa ta sirvi con Jehova, tiene le balance mirada na de suyu mismo cuerpo. Como un joven, ya admiti le que tiene le maga limitacion y ya pidi con el guia de Jehova. (1 Rey 3:7-9) Cuando ya principia le rula, sabe tambien si Solomon que peligroso si queda orgulloso el un persona. Ele ya escribi: “El orgullo ta resulta na destrozo, y el pagka-arogante ta resulta na tisut.” (Prov. 16:18) Pero maka-triste cay na uliji, nuay puede aplica si Solomon con el de suyu mismo consejo. Cuanto tiempo despues le principia rula, ya queda le orgulloso y ya principia desobedece con el maga mandamiento del  Dios. Por ejemplo, el uno del maga ley ya habla que el un Hebreo rey gendeh “debe tene manada mujer para gendeh disvia el de suyu corazon.” (Deut. 17:17) Ya ignora si Solomon con ese ley y ya tene 700 mujer y 300 concubina, donde el manada kanila maga pagano! (1 Rey 11:1-3) Posible, ya sinti si Solomon que gendeh este puede tene mal efecto con ele. Pero na uliji, ya experiencia si Solomon con el maga mal consequencia cay ya desobedece le con Jehova.​—1 Rey 11:9-13.

13. Cosa kita puede aprende si medita kita con el humildad de Jesus?

¹³ Si Jesus ya esta humilde y ya mentena un balance mirada na de suyu mismo cuerpo. Antes le vene na tierra, manada le cosa ya puede hace na servicio con Jehova. Por medio con Jesus, “ya hace todo el maga cosa-cosa na cielo y na mundo.” (Col. 1:16) Na de suyu bautismo, ta sale que ya acorda si Jesus con el maga cosas que ya cumpli le cuando junto le con el de suyu Tata. (Mat. 3:16; Juan 17:5) Pero, ese saber nuay causa con Jesus para queda orgulloso. Gane, nuay le dale mira que mas bueno le que con otro. Ya habla le con el de suyu maga dicipulo que ele “noay vene para manda con otros servi con Ele, sino ya vene Le para sirvi y entrega su vida para rescata con mucho maga gente.” (Mat. 20:28) Ya admiti tambien le que gendeh le puede hace con el maskin un cosa na de suyu lang mismo querrer. (Juan 5:19) Bien humilde gayot si Jesus! Ya dale le mira un buen ejemplo que puede kita imita.

14. Cosa kita puede aprende con Jesus acerca na justo mirada na diaton mismo cuerpo?

¹⁴ Ya enseña si Jesus con el de suyu maga siguidores que tene justo mirada na diila mismo cuerpo. Na un ocasion, ya asigura le kanila: “El maga pelo na de ustedes maga cabeza contao ya todo.” (Mat. 10:30) Ese maga palabra ta dale mira que el diaton Tata na cielo bien interesao kanaton y valoroso kita na de suyu ojos. Puede gayot se anima kanaton especialmente si negativo el diaton mirada na diaton mismo cuerpo. Poreso, gendeh gayot kita debe cuestiona con el decision de Jehova y pensa que gendeh kita conviene queda de suyu maga siervo y ricibi vida na nuevo mundo.

15. (a) Cosa mirada el ya anima kanaton el The Watchtower que tene na diaton mismo cuerpo? (b) Como cosa ta dale mira na maga letrato na pagina 24, si tan focus lang kita na diaton mismo cuerpo, cosa maga bendicion el gendeh kita puede tene?

 ¹⁵ Maga 15 año ya el ya pasa, el The Watchtower ya anima kanaton que tene este balance mirada na diaton mismo cuerpo: “Asigurao, no quierre gayot kita pensa por demas acerca na diaton mismo cuerpo que causa kanaton para queda orgulloso. Pero, no quierre tambien kita hace bien de menos con el diaton mismo cuerpo que puede causa kanaton para sinti que nuay kita valor. Sino, debe kita pricura tene justo mirada na diaton mismo cuerpo​—que na cuanto cosas bueno kita mientras na otro gendeh. El un Cristiano mujer ya habla: ‘Gendeh yo el personificacion del maldad; ni un regalo del Dios con otro. Tiene cosa bonito conmigo y tiene umalin, y ansina tambien el otro.’” * Ta puede ba tu mira si porque bueno que tene kita un balance mirada na diaton mismo cuerpo?

16. Porque kanaton ta dale justo guia si Jehova?

¹⁶ Por medio na de suyu Palabra, si Jehova ta dale kanaton justo guia. Ta ama le kanaton y quierre le que queda kita alegre. (Isa. 48:17, 18) El de con todo buen decision que puede kita hace que hay lleva kanaton deverasan alegria amo que hace una na diaton vida el maga cosas que ta hace alegre con Jehova. Si hace kita con ese, hay evita kita con el manada maga problema que ta experiencia aquellos quien tan focus lang na sen, secular trabajo o na diila mismo cuerpo. Ojala, el cada uno kanaton hay queda determinao que queda sabio y hace alegre con el corazon de Jehova!​—Prov. 23:15.