1. Cosa el Biblia ta menciona acerca na deverasan amor?

 “BIEN arde el fuego [del amor], el fuego de Jah. El fuerte corentazo de agua gendeh puede apaga con el amor, ni el maga rio puede hace anud con ese.” b (Can. 8:6, 7) Bien bonito el cosa ya menciona el Biblia acerca na deverasan amor! Un asiguranza este para na maga casao: Puede ustedes tene el clase de amor que nunca ta falla.

2. Cosa debe hace el man maridable para asigura que gendeh queda frio el diila amor?

² Ta depende na man maridable si esta ba fuerte el diila amor con uno y otro o gendeh. Para ilustra, el un fuego hay continua lang arde si tiene quien ta continua pone leña con ese. Si nuay se quien hace, hay apaga el fuego. Na igual manera, el amor entre na man maridable puede esta fuerte si continua sila hace fuerte con el diila relacion. Tiene vez, puede queda frio el amor entre na man maridable especialmente si ta enfrenta sila dificultad na financial, problema na salud o pressure mientras ta hace engranda maga anak. Entonces si casao tu, cosa tu puede hace para esta arde “el fuego de Jah” na de ustedes matrimonio? Na este articulo, hay discuti kita tres cosas que puede ayuda para esta fuerte y alegre el de ustedes matrimonio. c

3. Paquemodo el fuerte relacion con Jehova puede ayuda con el man maridable para esta fuerte el diila amor? (Eclesiastes 4:12) (Mira tambien con el letrato.)

³ Para esta arde “el fuego de Jah,” el marido y mujer debe hace esfuerzo para tene fuerte relacion con Jehova. Paquemodo  este puede ayuda con el diila matrimonio? Si precioso para con el man maridable el diila relacion con el diila Tata na cielo, ta aplica sila con el de suyu maga consejo. Puede se ayuda kanila para evita y solva con el maga problema que puede causa para queda frio el diila amor. (Le con el Eclesiastes 4:12.) Si fuerte el diila relacion con Jehova, hay pricura tambien sila imita con ele y cultiva maga calidad que tiene le. Por ejemplo, hay pricura sila queda paciencioso, bueno y preparao perdona. (Ef. 4:32–5:1) Si ansina el man maridable, mas facil queda mas hondo el diila amor con uno y otro. El un hermana que si Lena, quien mas de 25 año ya casao, ya habla, “Facil ama y respeta con el un espiritual persona.”

4. Porque si Jehova ya iscuji con Jose y Maria para queda maga mayores del Mesias?

⁴ Considera un ejemplo na Biblia. Cuando ya iscuji si Jehova si quien queda maga mayores del Mesias estaba na maga descendiente de David, ya iscuji le con Jose y Maria. Porque? Cay igual sila tiene personal relacion con Jehova y sabe si Jehova que hace sila una con ele na diila matrimonio. Maga man maridable, cosa ustedes puede aprende con Jose y Maria?

5. Cosa el maga marido puede aprende con Jose?

⁵ Ya sigui si Jose con el direccion de Jehova y por causa con ese, ya queda le un buen marido. Por ejemplo, na tres ocasion, ya ricibi le maga instruccion estaba con Dios que tiene que hace na de suyu familia. Ya obedece dayun le con el todo maga instruccion maskin pa necesita le hace maga grande cambio. (Mat. 1:20, 24; 2:13-15, 19-21) Cay ya sigui le con el direccion del Dios, ya puede si Jose protege, suporta y dale el necesidad de Maria. Asigurao, ya queda mas hondo el amor y respeto de Maria con Jose por causa na cosa le ya hace! Maga marido, puede ustedes imita con Jose si sigui ustedes con el maga consejo que base na Biblia acerca si paquemodo cuida con el de ustedes familia. d Si aplica ustedes con este maskin pa necesita ustedes hace maga cambio, ta hace ustedes fuerte con el de ustedes matrimonio y ta dale mira amor con el de ustedes mujer. El un hermana na Vanuatu, quien casao ya por mas de 20 año, ya habla: “Mas ta respeta yo con el de mio marido si ta puede yo mira que ta busca le y ta aplica con el maga direccion de Jehova. Gendeh yo tan lingasa y ta confia yo na de suyu maga decision.”

6. Cosa puede aprende el maga mujer con Maria?

⁶ Tiene personal relacion si Maria con Jehova y nuay le depende el de suyu espiritualidad na de suyu marido. Bien familiar le con el Escritura. (Mira con el study note na Lucas 1:46.) Ta dale tambien le tiempo para medita. (Luc. 2:19, 51) Asigurao, ya queda le un buen mujer por causa na de suyu buen espiritualidad. Ahora, ta pricura tambien imita el maga mujer con  Maria. Por ejemplo, el un hermana, si Emiko, ya habla: “Cuando dalaga pa yo, tiene yo de mio espiritual rutina. Pero cuando ya casa yo, el de mio marido el quien ta reza y ta conduci con el diamon de familia adoranza. Por causa con ese, ya sinti yo que dol ta depende ya lang el de mio espiritualidad con ele. Ya realiza yo que iyo mismo el necesita hace esfuerzo para hace fuerte el de mio relacion con Jehova. Poreso ahora, ta dale yo tiempo para solo reza, le con el Biblia y medita con ese.” (Gal. 6:5) Maga mujer, mientras ta continua ustedes hace fuerte el de ustedes relacion con Jehova, asigurao el de ustedes marido hay tene mas razon para alaba y ama con ustedes.—Prov. 31:30.

7. Cosa puede aprende el maga man maridable con kanda Jose y Maria acerca na diila adoranza?

⁷ Ya dale tiempo kanda Jose y Maria para man junto na maga espiritual actividad para esta fuerte el diila relacion con Jehova. Sabe sila que importante adora con Jehova junto como un familia. (Luc. 2:22-24, 41; 4:16) Posible dificil quel para hace especialmente cay ya queda grande el diila familia pero ya puede sila se hace. Buen ejemplo gayot sila para na maga man maridable ahora! Igual con kanda Jose y Maria, si tiene ustedes maga anak, posible gendeh facil para atende na maga miting o dale tiempo para na de familia adoranza. Baka mas dificil pa gane para busca tiempo para estudia y reza junto como man maridable. Pero acorda que si junto ustedes ta adora con Jehova, hay queda ustedes mas cerca con ele y con uno y otro. Poreso, hace prioridad con el maga espiritual actividad.

8. Paquemodo el man maridable puede beneficia na de familia adoranza maskin tiene sila problema na diila matrimonio?

⁸ Paquemodo si tiene ustedes problema na de ustedes matrimonio? Si ansina, baka nuay ustedes gana que man junto na de familia adoranza. Pero, puede ustedes discuti un cosa que maka-interes para con ustedes dos maskin unrato lang. Puede este ayuda para queda mas fuerte el de ustedes relacion y mas tene ustedes gana que junto hace con el maga espiritual actividad.

9. Porque el marido y mujer debe dale tiempo para man junto con uno y otro?

⁹ Maga man maridable, puede tambien ustedes continua hace fuerte el de ustedes amor si dale ustedes tiempo para man junto con uno y otro. Puede se ayuda para gendeh ustedes queda lejos con uno y otro, y sabe ustedes si cosa ta pensa y ta sinti el cada uno. (Gen. 2:24) Nota si cosa si Lilia y Ruslan ya discubri nuay dura despues sila casa mas de 15 año ya el ya pasa. Si Lilia ya habla: “Pensaba kame tiene kame manada tiempo para man junto pero nuay gale tanto. Ocupao kame na diamon secular trabajo, maga trabajo na casa y na uliji, na diamon maga anak. Ya realiza kame que si gendeh kame dale tiempo para man junto como man maridable, posible kame queda lejos con uno y otro.”

10. Paquemodo el maga man maridable puede aplica con el principio na Efeso 5:15, 16?

¹⁰ Cosa el maga man maridable puede hace para asigura que tiene sila tiempo para man junto? Posible necesita sila man schedule tiempo para man junto con uno y otro. (Le con el Efeso 5:15, 16.) El un hermano na Nigeria que si Uzondu ya habla: “Si ta plaña yo con el de mio maga actividad, ta inclui yo alli con el tiempo que man junto kame man maridable y ta hace yo con ese prioridad.” (Fil. 1:10, NWT) Considera tambien si paquemodo si Anastasia, el mujer del un circuit overseer na Moldova, ta usa enbuenamente con el de suyu tiempo. Ya habla le: “Ta pricura yo hace con el maga cosas que necesita yo hace mientras ocupao  el de mio marido na de suyu maga responsibilidad. Na ese manera, si ya acaba ya le, tiene kame tiempo para man junto.” Pero, paquemodo si por causa na de ustedes schedule, tan dificil ustedes busca tiempo para man junto?

11. Na cosa maga actividad tan junto si Aquila y Priscila?

¹¹ El maga man maridable puede aprende na ejemplo de Aquila y Priscila, un man maridable que ta aprecia el manada maga Cristiano del primer siglo. (Roma 16:3, 4) Maskin nuay el Biblia menciona manada detalle acerca na diila matrimonio, ta dale este mira que junto sila ta trabaja, predica y ayuda con otro. (Act. 18:2, 3, 24-26) Gane, si ta menciona kanila na Biblia, pirmi ta menciona junto con el diila nombre.

12. Cosa puede hace el man maridable para tene mas manada tiempo para man junto? (Mira tambien con el letrato.)

¹² Paquemodo el maga man maridable puede imita con Aquila y Priscila? Pensa acerca na maga manada cosas que necesita ustedes hace. Puede ba ustedes junto hace con el cuanto de ese maga trabajo en vez de cada y cualan? Por ejemplo, junto ta predica kanda Aquila y Priscila. Regular ba ustedes ta plaña que hace igual ansina? Ya trabaja tambien junto kanda Aquila y Priscila. Posible gendeh igual el de ustedes trabajo del de tuyu marido o mujer. Pero baka puede ustedes junto hace con el maga trabajo na casa. (Ecl. 4:9) Si tan ayudajan ustedes hace con el un trabajo, mas puede ustedes sinti que un team ustedes y tiene ustedes el oportunidad para man cuento. Si Robert y Linda mas de 50 año ya casao. Si Robert ya habla: “El deverasan, nuay kame tanto tiempo para na recreacion. Pero si ta laba yo plato y ta ayuda conmigo el de mio mujer o si ta arranca yo zacate y ta trabaja le junto conmigo, ta sinti gayot yo alegre. Ta queda kame mas cerca con uno y otro cay ta trabaja kame junto. Mas pa, ta continua queda hondo el diamon amor con uno y otro.”

13. Para queda deverasan cerca con uno y otro, cosa debe hace el man maridable?

¹³ Pero, acorda que maskin junto ustedes gendeh se quierre decir que queda ya ustedes dayun cerca con uno y otro. El un mujer de Brazil ya habla: “Na diaton tiempo ahora, ocupao gayot el diaton vida y posible kita pensa que ta dale ya kita tiempo con uno y otro por causa lang cay ta queda kita na un casa. Ya realiza yo que gendeh bastante que man junto lang yo con el de mio marido. Necesita tambien yo dale el atencion que necesita le.” Nota tambien si paquemodo si Bruno y el de suyu mujer, si Tays, ta asigura que ta dale sila atencion con uno y otro. Si Bruno ya habla: “Si tiene kame vacante tiempo para man junto, gendeh kame ta usa con el diamon maga cellphone y tan enjoy kame con el tiempo que junto kame.”

14. Si gendeh tan enjoy man junto el man maridable, cosa sila puede hace?

¹⁴ Pero, paquemodo si gendeh ustedes tan enjoy man junto del de tuyu marido o mujer?  Baka otro el de ustedes hilig o ta consumi ustedes con uno y otro. Cosa ustedes puede hace? Acorda con el fuego que ya menciona enante. Gendeh quel basta ya lang queda bien arde. Necesita con ese hinay-hinay pone maga leña. Na igual manera, puede ustedes dale maskin diutay tiempo lang para man junto cada dia. Asigura que hace ustedes un cosa que dos ustedes alegre hace y aquel gendeh ta causa peleajan. (Sant. 3:18) Na ansina manera, posible que hinay-hinay otravez queda fuerte el de ustedes amor con uno y otro.

15. Porque importante el respeto para esta fuerte el amor na matrimonio?

¹⁵ Importante el respeto na matrimonio. Igual se na oxygen que ta puede causa para queda mas arde el fuego. Si nuay oxygen, hay apaga dayun el fuego. Na igual manera, si nuay respeto na matrimonio, pronto lang perde el amor entre na man maridable. Pero si ta pricura el marido y mujer dale mira respeto con uno y otro, ta dale sila mira que ta hace sila esfuerzo para esta fuerte el diila amor. Pero, acorda que gendeh bastante que ta sinti tu que ta dale tu mira respeto sino debe tambien sinti el de tuyu marido o mujer que ta respeta tu con ele. Si Penny y Aret mas de 25 año ya casao. Si Penny ya habla: “Cay ta respeta kame con uno y otro, lleno de amor el diamon matrimonio. Ta puede gayot kame habla si cosa kame ta sinti cay sabe kame que ta respeta kame el opinion del cada uno.” Entonces, cosa tu puede hace para ayuda con el de tuyu marido o mujer que sinti que ta respeta tu con ele? Considera con el ejemplo de Abraham y Sara.

16. Cosa puede aprende el maga marido na ejemplo de Abraham? (1 Pedro 3:7) (Mira tambien con el letrato.)

¹⁶ Ya trata si Abraham con Sara con respeto. Ya considera le con el opinion y sentido de Sara. Na un ocasion, ya tiene problema si Sara y ya habla le con Abraham el cosa le ta sinti. Gane, ya disculpa pa le con este. Ya rabia ba si Abraham y ya habla mal cosas con Sara? Nuay. Sabe le que ta somete si Sara con ele y ta suporta este con el de suyu maga decision. Ya oi si Abraham con Sara y ya pricura solva con el problema. (Gen. 16:5, 6) Cosa kita puede aprende? Maga marido, tiene ustedes autoridad para hace maga decision na de ustedes familia. (1 Cor. 11:3) Pero, puede ustedes dale mira amor si considera ustedes el opinion del de ustedes mujer antes decidi, especialmente si afecta se con ele. (1 Cor. 13:4, 5) Na cuanto tiempo, posible stress el de ustedes mujer y necesita le habla si cosa le ta sinti. Ta considera ba ustedes con el de suyu sentido y ta oi enbuenamente con ele? (Le con el 1 Pedro 3:7.) Si Angela y Dmitry cerca 30 año ya casao. Ya explica si Angela si paquemodo el de suyu marido ta dale mira respeto con ele: “Pirmi si Dmitry preparao para oi conmigo si triste yo o maskin si quierre lang yo man cuento. Paciencioso  le conmigo maskin na maga tiempo que bien emocional yo.”

17. Cosa el maga mujer puede aprende na ejemplo de Sara? (1 Pedro 3:5, 6)

¹⁷ Ya dale mira respeto si Sara con Abraham cay ta suporta le con el maga decision de este. (Gen. 12:5) Na un ocasion, ya decidi si Abraham que dale come con el diila maga visita que nuay sila expecta. Ya pidi le con Sara que descanza con el cosa este ta hace y prepara manada pan. (Gen. 18:6) Ya suporta si Sara con el decision de Abraham y ya hace dayun con ese. Maga mujer, puede ustedes imita con Sara si suporta ustedes con el maga decision del de ustedes marido. Si hace se ustedes, hay queda mas fuerte el de ustedes matrimonio. (Le con el 1 Pedro 3:5, 6.) Si Dmitry que ya menciona enante ya explica si paquemodo el de suyu mujer ta dale mira que ta respeta este con ele. Ele ya habla: “Ta aprecia yo con el esfuerzo que ta hace si Angela para suporta con el de mio maga decision maskin pa tiene vez, gendeh le uyun con ese. Si gendeh bueno el resulta del de mio decision, gendeh le ta habla negativo cosas conmigo.” Claro que facil gayot ama con el un persona quien ta dale mira respeto contigo!

18. Na cosa manera ta beneficia el maga man maridable si ta hace sila esfuerzo para mentena con el diila amor?

¹⁸ Ahora, quierre si Satanas que perde el amor entre na maga Cristiano man maridable. Sabe le que si perde el diila amor, posible sila principia queda lejos con Jehova. Pero, gendeh puede hace perde con el deverasan amor! Ojala el amor na de ustedes matrimonio hay queda igual na amor que ya menciona na Cancion de Solomon. Queda determinao que hace una con Jehova na de ustedes matrimonio, dale tiempo para na uno y otro, y considera con el sentido y necesidad del cada uno. Si hace se ustedes, el de ustedes matrimonio hay lleva honor con el Tuburan del deverasan amor, si Jehova, y igual na fuego, el de ustedes amor hay continua arde.