1-2. Cosa el importante decision que necesita hace el maga Judio quien ta queda na Babilonia? (Esdras 1:2-4)

 YA ANUNCIA ya el rey! El maga Judio, quien ya queda cautivo na Babilonia por maga 70 año, puede ya bira na diila lugar na Israel. (Le con el Esdras 1:2-4.) Solamente si Jehova el puede hace con ese. Porque se kita puede habla? Cay gendeh custumbre del maga de Babilonia que libra con el diila maga cautivo. (Isa. 14:4, 17) Pero, el nuevo rey quien ya puede hace perde con el Babilonia ya habla que puede ya sale el maga Judio na aquel nacion. Como resulta, el cada Judio, especialmente el maga cabeza de familia, necesita hace un decision—si sale ba sila na Babilonia o esta alla. Posible gendeh facil hace con ese decision. Porque?

² Manada el de edad ya y dificil ya para kanila que viaja para na Israel. Y ciendo mayoria del maga Judio ya nace na Babilonia, ese lang el lugar que familiar sila. Para kanila, el Israel amo lugar del diila maga tatarabuelo y gendeh diila. El cuanto maga Judio tiene buen vida na Babilonia poreso posible dificil para kanila que deja con el diila comfortable casa o negocio y esta na un lugar que gendeh sila familiar.

3. Cosa el bendicion para con el maga Judio quien bira na Israel?

³ Para na maga fiel Judio, mas grande el beneficio que puede sila ricibi si bira sila na Israel contra na maga sacrificio que hay hace sila. El de con todo grande beneficio amo tiene que hace na diila adoranza. Tiene mas de 50 pagano templo na Babilonia pero nuay ni un templo de Jehova na ese ciudad. Nuay altar alla onde puede hace ofrecimiento el maga Israelita asegun na Ley de Moises y nuay tambien maga sacerdote quien puede ofrece con ese. Mas pa, compara kanila, mas manada el pagano alla que nuay queber con Jehova o con el de suyu  maga principio. Poreso, el miles de maga Judio quien ta ama con Jehova bien quierre bira na diila lugar para puede sila restora con el puro adoranza.

4. Cosa ayuda si Jehova ya promete que dale con el maga Judio quien bira na Israel?

⁴ El literal viaje sale na Babilonia para na Israel ta alcanza maga cuatro meses pero ya promete si Jehova que hay perde el maskin cosa sanggadura na diila birada. Si Isaias ya escribi: “Quita con el maga sanggadura na camino de Jehova! Hace un patag camino na desierto para na diaton Dios. . . . El tierra que lubak-lubak debe queda patag, y el quebrao camino debe queda un patag lugar.” (Isa. 40:3, 4) Imagina con este: un patag camino na desierto entre medio del maga monte. Un bendicion gayot este para con el maga quien ta viaja! Mas facil para kanila que viaja na un derecho camino contra subi’y abaja na maga monte, gulud o valle. Mas pronto tambien sila llega na diila destinacion.

5. Cosa nombre ya dale con el figurativo camino estaba na Babilonia para na Israel?

⁵ Ahora, manada na maga literal camino el tiene nombre. Tiene tambien nombre el figurativo camino que ya menciona si Isaias. Puede kita le: “Hay tene un grande camino alla, un camino que ta llama Camino de Pagka-sagrao. El maga mabuling gendeh hay pasa alla.” (Isa. 35:8) Cosa quierre decir de este promesa para con el maga Israelita de antes? Y cosa quierre decir de este para kanaton ahora?

6. Porque ya llama sagrao con este camino?

⁶ “Camino de Pagka-sagrao”—un bonito nombre gayot este para na un camino! Porque ya llama con este sagrao? Cay gendeh permiti esta na Israel con “el maga mabuling”—el maskin quien Judio quien ta practica imoralidad, idolatria o otro pa maga serioso culpa. El maga Judio quien ya bira hay queda “un sagrao nacion” para con el diila Dios. (Deut. 7:6) Pero, gendeh este quierre decir que aquellos quien ya sale na Babilonia gendeh mas necesita hace maga cambio para queda aceptable con Jehova.

7. Cosa maga cambio necesita hace el cuanto Judio? Dale un ejemplo.

⁷ Como cosa ya menciona enante, mayoria del maga Judio ya nace na Babilonia y posible que manada kanila el yan anad ya na custumbre y principio del maga de Babilonia. Cuanto decada despues bira el primer grupo de maga Judio na Israel, ya sabe si Esdras que el cuanto maga Judio ya casa na maga pagano mujer. (Ex. 34:15, 16; Esd. 9:1, 2) Y na uliji, ya espanta si Gobernador Nehemias cuando ya sabe le que el maga bata quien ya nace na Israel no sabe el lengguaje del maga Judio. (Deut. 6:6, 7; Neh. 13:23, 24) Paquemodo aquel maga bata puede aprende ama y adora con Jehova si gendeh sila ta entende Hebreo—el lengguaje que ya usa para escribi con el mayoria del Palabra del Dios? (Esd. 10:3, 44) Poreso, aquel maga Judio necesita hace maga grande cambio. Pero mas facil para kanila que hace aquel maga cambio na Israel donde hinay-hinay ya ta hace bira con el puro adoranza.—Neh. 8:8, 9.

8. Porque kita debe queda interesao ahora na maga suceso de antes? (Mira con el letrato na cover.)

⁸ El cuanto posible pensa, ‘Maka-interes se informacion pero tiene ba importancia para kanaton ahora el cosa ya sucede na maga Judio de antes?’ Si, cay dol ta viaja tambien kita ahora na “Camino de Pagka-sagrao.” Iscujido man kita o parte del “otro maga carnero,”  necesita kita esta na “Camino de Pagka-sagrao.” Ayuda este kanaton para esta na espiritual paraiso ahora y para puede kita ricibi con el maga bendicion del Reino na futuro. b (Juan 10:16) Desde 1919 C.E., millones de maga hombre, mujer y bata el ya sale na Grande Babilonia—el imperio del falso religion na entero mundo—y ya principia viaja na ese figurativo camino. Posible uno tu kanila. Maskin pa ese camino ya abri maga 100 año ya el ya pasa, el trabajo para prepara con ese camino ya principia cuanto siglo pa antes de ese.

9. Harmonia na Isaias 57:14, paquemodo ya prepara con el “Camino de Pagka-sagrao”?

⁹ Para na maga Judio quien ya sale na Babilonia, ya asigura si Jehova que hay perde el maga sanggadura y queda preparao el camino. (Le con el Isaias 57:14.) Quetal si acerca na “Camino de Pagka-sagrao” na moderno tiempo? Por manada siglo antes el año 1919, ya usa si Jehova maga hombre quien tiene hondo respeto con ele para prepara con el camino. (Compara na Isaias 40:3.) Ya hace sila el maga cosas que necesita para na uliji, el maga sincero gente hay puede sale na Grande Babilonia y entra na espiritual paraiso donde ya restora con el puro adoranza de Jehova. Cosa el incluido na este trabajo? Considera kita con el cuanto de ese.

10-11. Paquemodo el printing y translation ya puede ayuda para man calayat el saber acerca na Biblia? (Mira tambien con el letrato.)

¹⁰ Yan print maga copia de Biblia. Hasta na maga año 1450, mano-mano ta copia con el Biblia. Bien tarda ta acaba este trabajo, y poco lang y bien caro el maga copia que tiene. Pero cuando tiene ya maquina que ta usa para man print, mas manada ya copia de Biblia el ya puede produci y distribui na maga gente.

¹¹ Yan translate con el Biblia. Por cuanto siglo, mas mucho del maga Biblia el escribido na Latin, un lengguaje que el maga educao lang el ta puede entende. Pero cuando mas facil ya puede man print, el maga individual quien tiene hondo respeto con Dios mas ya hace grande esfuerzo para man translate con el Biblia na maga lengguaje que ta usa el maga ordinario gente. Poreso, el maga gente puede ya compara con el cosa kanila ta enseña el maga lider del religion na cosa gayot ta enseña el Biblia.

12-13. Dale un ejemplo si paquemodo el maga sincero estudiante del Biblia del ika-19 siglo ya principia revela con el maga falso enseñanza.

¹² Maga publicacion que base na Biblia. El maga estudiante del Biblia manada gayot cosa ya aprende cuando ya le sila con el Palabra del Dios. Y bien rabiao el maga lider del religion cuando este maga estudiante ya principia habla con otro acerca na cosa sila ya discubri. Por ejemplo, del ika-19 siglo, el cuanto maga sincero hombre ya principia produci maga tract que ta revela con el maga falso enseñanza del maga iglesia.

¹³ Del maga 1835, si Henry Grew ya produci un tract que ta discuti acerca na condicion del maga muerto. Na este publicacion, ya usa le con el Escritura para dale prueba que el imortalidad amo un regalo estaba con Dios y gendeh este un cosa que tiene ya daan el un gente cuando ya nace le, como cosa ta enseña el mayoria del maga iglesia. Del 1837, el un ministro que si George Storrs ya incuntra un copia de ese tract cuando ta munta le train. Ya queda le convincido que verdad el cosa ele ya le. Poreso, ya habla le con otro acerca con  este. Del 1842, ya dale le discurso que tiene tema “An Inquiry—Are the Wicked Immortal?” El maga cosas que ya escribi si George Storrs ya puede ayuda con el un joven hombre que Charles Taze Russell.

14. Na cosa manera ya beneficia si Hermano Russell y el de suyu maga uban na cosa ya hace el cuanto maga individual de antes? (Mira tambien con el letrato.)

¹⁴ Na cosa manera ya beneficia si Hermano Russell y el de suyu maga uban na cosa ya hace el cuanto maga individual de antes para prepara con el camino? Na diila estudiada, ya examina sila maga diccionario, concordance y otro-otro translation del Biblia que ya hace antes pa el diila tiempo. Ya beneficia tambien sila na maga research acerca na Biblia que ya hace kanda Henry Grew, George Storrs y otro pa. Si Hermano Russell y el de suyu maga uban ya ayuda tambien prepara con el camino cay ya puede sila produci manada maga libro y tract que ta discuti acerca na maga topico na Biblia.

15. Cosa maga importante suceso el ya sucede del 1919?

¹⁵ Del 1919, el maga siervo del Dios gendeh mas bajo na control del Grande Babilonia. Na ese año, ya principia trabaja el “fiel y sabio esclavo” para el maga sincero persona puede ya principia viaja na “Camino de Pagka-sagrao” que nuevo lang ya abri. (Mat. 24:45-47, NWT) El cosa ya hace el cuanto maga hombre de antes para prepara con este camino ya puede ayuda con el maga persona quien ya principia viaja na este camino para aprende mas acerca na maga proposito de Jehova. (Prov. 4:18) Ya puede tambien este ayuda kanila para vivi harmonia na maga principio de Jehova. Gendeh ta expecta si Jehova que puede sila dayun hace con este maga cambio. Sino, hinay-hinay le ya ayuda kanila para hace este. (Mira con el cajon “ Si Jehova Hinay-Hinay Ya Ayuda Kanaton Para Hace Cambio.”) Hay queda gayot kita todo alegre si llega ya el tiempo donde hay puede ya kita hace alegre con Jehova na todo cosa kita ta hace!—Col. 1:10.

16. Desde 1919, cosa ya hace para mentena con el “Camino de Pagka-sagrao”? (Isaias 48:17; 60:17)

¹⁶ Necesita regular mentena con el cada camino para asigura que na buen condicion este. Desde 1919, ya continua mentena con el “Camino de Pagka-sagrao” para mas manada gente el quien puede sale na Grande Babilonia. Del 1921, el fiel y sabio esclavo ya produci un publicacion que base na Biblia para ayuda con el maga interesao que aprende el maga verdad na Biblia. Ese publicacion, el The Harp of God, ya tiene cerca seis millon copia na 36 lengguaje y manada el ya puede aprende con el verdad por causa con ese. Y na reciente, tiene kita un nuevo publicacion que ta usa para man Bible study, el Queda Alegre Hasta Para Cuando! Durante na este ultimo maga dia, si Jehova ta usa con el de suyu organizacion para continua dale espiritual comida para ayuda kanaton todo que continua viaja na “Camino de Pagka-sagrao.”—Le con el Isaias 48:17; 60:17.

17-18. Para onde ta guia el “Camino de Pagka-sagrao”?

¹⁷ Puede kita habla que cada vez tiene quien ta acepta Bible study, tiene le oportunidad para principia viaja na “Camino de Pagka-sagrao.” El cuanto corto distancia lang ya viaja; acabar, ya sale ya na ese camino. Pero, el otro determinao continua viaja alli hasta llega sila na diila destinacion. Onde man se?

¹⁸ Para con aquellos quien tiene esperanza na cielo, el “Camino de Pagka-sagrao” hay guia kanila para na “Paraiso del Dios” na cielo. (Rev. 2:7) Para con aquellos quien tiene esperanza aqui na tierra, ese camino hay guia kanila para na un perfecto vida na fin del 1,000 año. Si ta viaja ya tu na ese camino ahora, no mas ya bira cara. Y no sale alli para puede tu llega na nuevo mundo. Cuidao na viaje!