1. Na cosa tan dificil el manada kanaton?

 TIENE ya ba tu un espiritual goal pero tan dificil tu alcanza con ese? b Si ansina, gendeh tu solo. Por ejemplo, quierre si Philip que hace mas bonito con el calidad del de suyu rezo y mas pirmi reza. Pero, tan dificil le busca tiempo para reza. Goal de Erika que llega temprano na miting para na predicacion; pero atrasao le siempre halos na todo miting. Manada beses si Tomáš ya pricura le con el entero Biblia. Ele ya habla: “Gendeh lang gayot yo tan enjoy le con el Biblia. Tres beses yo ya pricura hace con ese pero hasta Levitico lang yo pirmi.”

2. Porque kita debe gendeh man luya si tiene kita un espiritual goal que nuay pa kita puede alcanza?

² Si tiene tu un goal que nuay pa tu puede alcanza, no man luya. Mas mucho, necesita tiempo y esfuerzo para alcanza maskin con el un simple goal. Gane, ciendo quierre siempre tu alcanza con el de tuyu goal, ta dale se mira que importante para contigo el de tuyu relacion con Jehova y quierre tu dale con ele el de tuyu de con todo bueno. Ta aprecia si Jehova con el de tuyu maga esfuerzo. Siempre, gendeh le ta expecta mas pa na cosa tu puede dale. (Sal. 103:14; Miq. 6:8) Poreso, queda razonable y hace maga goal asegun na cosa ta permiti el de tuyu circumstancia. Si ya hace ya tu se, cosa tu puede hace  para alcanza con ese? Discuti kita cuanto maga sugestion.

3. Porque importante que tiene tu gana alcanza con el de tuyu maga goal?

³ Bien importante que tiene tu gana alcanza con el de tuyu maga espiritual goal. Si tiene tu gana, ta hace tu esfuerzo cay quierre gayot tu alcanza con ese. Puede kita compara con ese na viento que ta rimpuja con el un bangca para na de este destinacion. Si tiene viento, hay llega gayot el bangca na de este destinacion. Y si fuerte el viento, mas pronto este llega. Na igual manera, si mas con gana kita, mas grande el posibilidad que puede kita alcanza con el diaton maga goal. “Si con gana tu, mas ta hace gayot tu esfuerzo,” ya habla si David, un hermano na El Salvador. “Gendeh tu ta permiti con el maskin cosa que sangga contigo para alcanza con el de tuyu goal.” Entonces, cosa tu puede hace para queda mas con gana?

4. Acerca na cosa kita puede reza? (Filipo 2:13) (Mira tambien con el letrato.)

⁴ Reza para mas tene tu gana. Por medio na de suyu espiritu, si Jehova puede motiva contigo para alcanza con el de tuyu goal. (Le con el Filipo 2:13.) Tiene vez, ta hace kita un goal cay sabe kita que debe kita se hace; y bueno se. Pero, posible que nuay kita el deseo para pricura alcanza con ese. Amo se el experiencia del un hermana na Uganda que si Norina. Goal de suyu que conduci un Bible study pero nuay le tanto gana hace con ese cay ta sinti le que gendeh le bueno enseña. Cosa ya ayuda con ele? Ele ya habla: “Ya principia yo pidi con Jehova cada dia que ayuda omenta con el de mio deseo para conduci un Bible study. Acabar, ya hace yo esfuerzo para mejora el de mio enseñada. Despues del cuanto meses, ya puede yo nota que ya queda yo mas con gana. Na aquel mismo año, ya puede yo principia dos Bible study.”

5. Na cosa kita puede medita para queda kita mas con gana alcanza con el diaton goal?

⁵ Medita con el maga cosas que ya hace si Jehova para contigo. (Sal. 143:5) Si apostol Pablo ya medita con el incomparable pagka-bueno de Jehova con ele y ya motiva este con ele para hace esfuerzo na servicio con Jehova. (1 Cor. 15:9, 10; 1 Tim. 1:12-14) Na igual manera, si mas medita tu con el maga cosas que ya hace si Jehova para contigo, hay mas motiva este contigo para alcanza con el de tuyu goal. (Sal. 116:12) Considera si cosa ya ayuda con el un hermana na Honduras para alcanza con el de suyu goal que queda un regular pioneer. Ele ya habla: “Ya medita yo si paquemodo de grande el amor de Jehova para conmigo. Ya guia le conmigo para na de suyu maga siervo. Ta cuida le y ta protege conmigo. El meditacion na este maga cosas ya ayuda para queda hondo el de mio amor con ele y omenta el de mio deseo para man pioneer.”

6. Cosa pa puede ayuda kanaton para queda mas con gana?

⁶ Man focus na maga bendicion que ricibi tu si alcanza tu de tuyu goal. Nota si cosa ya ayuda  con Erika que ya menciona enante para llega mas temprano na miting para na predicacion. Ele ya habla: “Ya realiza yo que manada yo cosa gendeh ta puede beneficia cay atrasao yo na ministerio. Pero si llega yo temprano, puede yo man quetal con el maga hermano y hermana y man cuento kanila. Puede tambien yo oi maga practical sugestion que puede ayuda conmigo para man enjoy y queda mas efectivo na ministerio.” Yan focus si Erika con el maga beneficio poreso ya puede le alcanza con el de suyu goal. Na cosa maga bendicion tu puede man focus? Si el de tuyu goal tiene que hace na lehida de Biblia o rezo, pensa si paquemodo se hay hace fuerte con el de tuyu relacion con Jehova. (Sal. 145:18, 19) Si el de tuyu goal amo que cultiva un calidad, man focus si paquemodo se puede ayuda para tene tu buen relacion con otro. (Col. 3:14) Puede tu lista con el todo razon si porque tu quierre alcanza con el de tuyu goal. Regular chequia con ese lista. Si Tomáš que ya menciona enante ya habla: “Si mas manada yo razon para alcanza con el un goal, mas ta continua yo pricura alcanza con ese.”

7. Cosa ya ayuda con Julio y de suyu mujer para alcanza con el diila goal?

⁷ Man junto con aquellos quien motiva contigo. (Prov. 13:20) Nota si cosa ya ayuda con Julio y de suyu mujer para alcanza con el diila goal que hace pa mas na ministerio. Si Julio ya habla: “Ya iscuji kame maga amigo quien ya anima kanamon para alcanza con el diamon goal y ya discuti kame kanila acerca con ese. Manada kanila ya puede ya alcanza semejante maga goal poreso ya puede sila dale kanamon maga buen sugestion. Ta pregunta tambien sila kanamon si quetal el diamon goal y ta anima sila kanamon si necesita kame.”

8. Cosa posible sucede si hace kita esfuerzo si tiene lang kita gana? (Mira tambien con el letrato.)

⁸ Pero deverasan, tiene maga dia que nuay kita gana. Este ba quierre decir que gendeh mas kita hace esfuerzo para alcanza con el diaton goal? Gendeh. Para ilustra: Si fuerte el viento, puede este rimpuja con el bangca para na destinacion de este. Pero gendeh pirmi fuerte el viento y gane tiene vez, nuay viento. Este ba quierre decir que gendeh mas puede move el bangca? Gendeh. Por ejemplo, el cuanto maga bangca tiene maquina y el otro tiene saguan. Puede se usa el un persona para puede siempre move el bangca para na destinacion de este. El diaton gana puede compara na viento; tiene vez, con gana kita y tiene vez, gendeh. Poreso si hace kita esfuerzo si tiene lang kita gana, baka gendeh kita puede alcanza con el diaton goal. Pero igual con el persona quien ta busca otro manera para llega le siempre na de suyu destinacion, puede kita hace esfuerzo para pricura alcanza con el diaton goal maskin nuay kita tanto gana. Siempre, gendeh este facil pero gendeh gayot man sayang el diaton esfuerzo. Antes discuti si cosa kita puede hace, considera anay kita con el un pregunta.

9. Debe ba kita continua pricura alcanza con el un goal maskin nuay kita gana hace con ese? Explica.

 ⁹ Quierre si Jehova que alegre kita y con todo corazon ta sirvi con ele. (Sal. 100:2; 2 Cor. 9:7) Si ansina, debe ba siempre kita pricura alcanza con el un espiritual goal maskin dol no quierre kita hace con ese? Considera con el ejemplo de apostol Pablo. Ele ya habla: “Ta castiga gayot yo con el dimio cuerpo y ta manda con ese obedece conmigo.” (1 Cor. 9:25-27, study note na versiculo 27) Ya forza si Pablo con el de suyu mismo cuerpo que hace si cosa el justo maskin dol no quierre le hace con ese. Alegre ba si Jehova na servicio de Pablo? Si! Ya bendici con ele si Jehova por causa na de suyu maga esfuerzo.—2 Tim. 4:7, 8.

10. Cosa el maga beneficio si pricura kita alcanza con el un goal maskin nuay kita tanto gana hace con ese?

¹⁰ Na igual manera, alegre si Jehova mira que ta pricura kita alcanza con el diaton goal maskin nuay kita tanto gana para hace con ese. Sabe le que maskin gendeh kita pirmi tan enjoy con ese actividad, ta hace siempre kita con ese cay ta ama kita con ele. Igual si paquemodo si Jehova ya bendici con Pablo, hay bendici tambien Le con el diaton maga esfuerzo. (Sal. 126:5) Y mientras ta experiencia kita el bendicion de Jehova, hay motiva se kanaton para tene gana. El un hermana na Poland que si Lucyna ya habla: “Tiene vez, no quierre yo anda na ministerio especialmente si cansao yo. Pero, ta anda siempre yo y para conmigo, un bonito regalo gayot el alegria que ta sinti yo despues.” Mira kita si cosa kita puede hace si nuay kita tanto gana.

11. Paquemodo puede ayuda kanaton si Jehova para tene control na cuerpo?

¹¹ Reza para pidi que tene tu control na cuerpo. Si tiene kita ese calidad, ta puede kita controla el diaton sentido y accion. Mas mucho, ta controla kita con el diaton mismo cuerpo para gendeh kita hace mal cosas. Pero, necesita tambien kita control na cuerpo para hace maga buen cosas, especialmente si dificil para hace con el un cosa o si nuay kita tanto gana. Acorda, el control na cuerpo amo un aspeto del fruta del espiritu. Poreso pidi con Jehova sagrao espiritu para ayuda contigo cultiva con ese importante calidad. (Luc. 11:13; Gal. 5:22, 23) Si David que ya menciona enante ya explica si paquemodo el rezo ya ayuda con ele. Quierre le queda mas regular na de suyu personal estudiada. Ele ya habla: “Ya pidi yo con Jehova que ayuda conmigo que cultiva control na cuerpo. Na de suyu ayuda, ya puede yo principia un buen rutina de personal estudiada y regular ya yo ta hace con ese ahora.”

12. Paquemodo el Eclesiastes 11:4 puede ayuda kanaton para alcanza con el diaton maga espiritual goal?

¹² No espera que queda mas enbuenamente el de tuyu situacion. Na este mundo, posible gendeh kita puede tene perfecto circumstancia. Si espera kita con ese, baka gendeh kita puede alcanza con el diaton goal. (Le con el Eclesiastes 11:4.) El un hermano que si Dayniel ya habla: “Nuay perfecto circumstancia. Poreso gendeh kita debe espera sino necesita lang kita principia.” El un hermano na Uganda que si Paul ya menciona otro pa razon si porque gendeh kita debe man dulug: “Si principia kita maskin dificil el diaton circumstancia, ta dale kita razon con Jehova para bendici kanaton.”—Mal. 3:10.

13. Cosa el ventaja si principia tu na maga diutay goal?

¹³ Principia na maga diutay goal. Posible nuay kita gana alcanza con el diaton goal cay tormento gayot con ese hace. Si ansina el cosa tu ta sinti, baka puede tu principia anay hace maga diutay goal. Si goal de tuyu que cultiva un calidad, puede tu anay demonstra con ese na maga simple manera. Si el de tuyu goal amo que le con el entero Biblia, puede tu man  schedule maskin corto tiempo lang anay para le. Si Tomáš que ya menciona na introduccion tan dificil na de suyu goal que le con el Biblia na un año. Ele ya habla: “Ya realiza yo que el de mio plano de antes sobra gayot na cosa lang yo puede hace. Poreso, ya decidi yo principia otravez. Pero este tiempo, ya principia yo le cuanto parapo lang cada dia y medita con ese. Como resulta, tan enjoy ya yo le con el Biblia.” Mientras mas tan enjoy si Tomáš, mas largo tiempo ya le ta le con el Biblia. Na uliji, ya puede ele le con el entero Biblia. c

14. Cosa maga dificultad kita posible enfrenta?

¹⁴ Pero maskin paquemodo pa kita de con gana o disciplinao, posible siempre kita experiencia dificultad. Por ejemplo, por causa na “maga suceso que gendeh [kita] ta expecta,” posible menora el tiempo que tiene kita para alcanza con el diaton goal. (Ecl. 9:11) Posible kita experiencia problema que causa kanaton para man luya. (Prov. 24:10) Por causa tambien na diaton imperfeccion, baka hace kita kamali que puede sangga kanaton para alcanza con el diaton goal. (Roma 7:23) O baka sinti kita cansao. (Mat. 26:43) Cosa puede ayuda kanaton si ya enfrenta kita maga dificultad?

15. Si tiene kita maga dificultad, este ba quierre decir que ya falla ya kita? Explica. (Salmo 145:14)

¹⁵ Acorda que si tiene tu maga dificultad, gendeh se quierre decir que ya falla ya tu. Ya habla el Biblia que manada beses kita posible experiencia maga problema o dificultad. Pero, ta hace tambien este claro que puede kita pricura otravez alcanza con el diaton goal, especialmente na ayuda de Jehova. (Le con el Salmo 145:14.) El hermano que si Philip que ya menciona enante ya habla: “Gendeh yo tan focus si cuanto beses yo ya falla sino si cuanto beses yo ya principia otravez para pricura alcanza con el de mio goal.” Si David que ya menciona enante ya habla: “Si ta enfrenta yo maga dificultad,  ta pricura yo mira con ese gendeh como sanggadura sino como maga oportunidad para dale mira con Jehova si paquemodo de grande el de mio amor con ele.” Si continua tu pricura alcanza con el de tuyu goal maskin tiene maga dificultad, ta dale tu prueba que quierre gayot tu hace alegre con Jehova. Imagina si paquemodo de alegre si Jehova si ta mira le que ta continua tu pricura alcanza con el de tuyu goal!

16. Si ta enfrenta kita maga dificultad, cosa se puede enseña kanaton?

¹⁶ Mira con el maga dificultad como oportunidad para aprende. Pensa acerca si cosa ya causa con el dificultad y pregunta con el de tuyu mismo cuerpo, ‘Cosa yo puede hace para gendeh este sucede otravez?’ (Prov. 27:12) Pero tiene vez, si bien dificil alcanza con el de tuyu goal, baka ta dale se mira que gendeh practical ese goal para contigo. Si ansina tu ta experiencia ahora, examina otravez con el de tuyu goal para mira si practical pa ba siempre se para contigo. d Gendeh hay pensa si Jehova que ya falla tu si nuay tu puede alcanza con el un goal que imposible para contigo que alcanza.—2 Cor. 8:12.

17. Porque kita debe acorda con el cosa ya kita ya puede hace?

¹⁷ Acorda con el cosa ya tu ya puede alcanza. El Biblia ta habla que “gendeh gayot [el Dios] ay olvida el de ustedes maga trabajo.” (Heb. 6:10) Poreso, gendeh tambien tu debe ulvida con el cosa tu ya puede hace. Posible ya puede ya tu cultiva amistad con Jehova, man cuento con otro acerca con ele o bautiza. Igual si paquemodo tu ya progresa que alcanza con el de tuyu maga goal de antes, puede tambien tu continua progresa para pricura alcanza con el de tuyu maga goal ahora.—Fil. 3:16.

18. Cosa kita debe acorda que hace mientras ta pricura alcanza con el diaton goal? (Mira tambien con el letrato.)

¹⁸ Na ayuda de Jehova, puede tu alcanza con el de tuyu goal igual si paquemodo el un persona quien ta munta na bangca alegre ta llega na de este destinacion. Pero acorda, ese persona tan enjoy tambien con el viaje. Na igual manera, pirmi pricura mira si paquemodo si Jehova ta ayuda contigo y puede se ayuda para queda tu alegre mientras ta pricura alcanza con el de tuyu goal. (2 Cor. 4:7) Si gendeh tu descanza, hay ricibi tu mas manada bendicion.—Gal. 6:9.