1-2. Cosa kita posible pensa si acerca na diaton maga rezo?

 YA PENSA ya ba tu si ta contesta ba si Jehova con el de tuyu maga rezo? Si ansina, gendeh tu solo. Manada tambien maga hermano y hermana el ya habla que ta pensa sila igual ansina especialmente si ta experiencia sila maga problema. Si ta sufri kita, posible tormento tambien para kanaton que mira si paquemodo si Jehova ta contesta con el diaton maga rezo.

² Man repaso kita si porque kita puede confia que ta contesta si Jehova con el maga rezo del de suyu maga siervo. (1 Juan 5:15) Hay considera tambien kita con este maga pregunta: Porque tiene vez ta sinti kita que dol gendeh ta contesta si Jehova con el diaton maga rezo? Na cosa manera ta contesta si Jehova con el diaton maga rezo ahora?

3. Porque quierre si Jehova que reza kita con ele?

³ El Escritura ta asigura que ta ama gayot kanaton si Jehova y precioso kita para con ele. (Hag. 2:7; 1 Juan 4:10) Amo se el razon si porque le ta invita kanaton que pidi el de suyu ayuda por medio na rezo. (1 Ped. 5:6, 7) Quierre le ayuda kanaton para esta cerca con ele y para puede kita aguanta con el diaton maga dificultad.

4. Porque kita sabe que ta contesta si Jehova con el maga rezo del de suyu maga siervo? (Mira tambien con el letrato.)

⁴ Na Biblia, manada beses kita puede le que ya contesta si Jehova con el maga rezo del de suyu maga siervo. Ta puede ba tu  pensa un ejemplo? Baka ta pensa tu con Rey David. Ya tiene le manada peligroso enemigo na de suyu entero vida y pirmi le ta pidi el ayuda de Jehova na rezo. Na un ocasion, ya reza le: “O Jehova, oi con el de mio rezo; oi con el de mio peticion para pidi ayuda. Por el de tuyu pagka-fiel y pagka-recto, oi conmigo.” (Sal. 143:1) Ya contesta si Jehova el rezo de David. (1 Sam. 19:10, 18-20; 2 Sam. 5:17-25) Poreso, con confianza ya habla si David: “Si Jehova cerca con aquellos quien ta llama con ele.” Puede tambien kita tene ansina asiguranza.—Sal. 145:18.

5. Pirmi ba ta contesta si Jehova con el maga rezo del de suyu maga siervo de antes na manera que ta expecta sila? Dale un ejemplo. (Mira tambien con el letrato.)

⁵ Posible, gendeh contesta si Jehova con el diaton maga rezo na manera que ta expecta kita. Ansina el cosa ya sucede con apostol Pablo. Ya pidi le con Dios que quita con el de suyu “tunuk na pellejo.” Tres beses especifico ya reza si Pablo acerca na este dificil problema. Ya contesta ba si Jehova con aquel maga rezo? Si, pero gendeh na manera que ta expecta si Pablo. En vez de quita con el problema, ya dale con ele si Jehova el fuerza que necesita le para continua sirvi fiel con Ele.—2 Cor. 12:7-10, El Nuevo Testamento.

6. Porque posible que tiene vez, dol gendeh ta contesta si Jehova con el diaton maga rezo?

⁶ Posible tambien kita ricibi contestacion na diaton maga rezo que diferente na cosa kita ta expecta. Puede kita asigura que sabe gayot si Jehova el de con todo buen manera para ayuda kanaton. Gane, ta puede le “hace todo maga cosa-cosa na un manera [que] alto pa gayot con el ta puede kita mira o pensa.” (Ef. 3:20) Por causa con ese, el de suyu contestacion na diaton maga rezo posible llega na tiempo o na manera que gendeh gayot kita ta expecta.

7. Porque posible necesita kita cambia el cosa kita ta reza? Dale un ejemplo.

⁷ Posible necesita kita cambia si cosa kita ta reza mientras mas claro kita ta puede mira si cosa el voluntad de Jehova. Considera el ejemplo de Martin Poetzinger. Nuay dura despues le casa, si Hermano Poetzinger yan preso na un Nazi concentration camp. Del primero, ya pidi le con Jehova que era puede le sale alla para puede le cuida con el de suyu mujer y predica otravez. Pero despues del dos semana, nuay le puede mira indicacion que libra con ele si Jehova. Poreso, ya reza le: “Jehova, pabor dale mira conmigo si cosa tu quierre que hace yo.” Despues, ya principia le pensa acerca  si cosa ta enfrenta el otro maga hermano na concentration camp. Manada kanila tan lingasa gayot acerca na diila mujer y maga anak. Despues quel, ya reza si Hermano Poetzinger: “Gracias Jehova na de mio nuevo assignment. Pabor ayuda conmigo para anima y hace fuerte con el de mio maga hermano.” Amo se el cosa le ya hace na sunod nueve año!

8. Cosa kita debe acorda si ta reza?

⁸ Debe kita acorda que tiene proposito si Jehova y hay cumpli le con ese na tiempo que ya iscuji le. Incluido na ese proposito amo que completamente y permanente quita con el todo problema que ta causa sufrimiento ahora—maga problema igual na natural calamidad, enfermedad y muerte. Hay cumpli si Jehova con el de suyu proposito por medio na de suyu Reino. (Dan. 2:44; Rev. 21:3, 4) Pero mientras nuay pa se llega, ta permiti si Jehova con Satanas que rula con el mundo. b (Juan 12:31; Rev. 12:9) Si solva si Jehova ahora con el todo problema del maga gente, baka hay sale que dol tiene buen exito el rulanza de Satanas. Poreso, debe kita espera con Jehova que cumpli con el de suyu maga promesa. Maskin pa ansina, gendeh se quierre decir que gendeh le ta ayuda kanaton. Considera kita cuanto maga manera que ta ayuda kanaton si Jehova.

9. Paquemodo puede ayuda kanaton si Jehova si necesita kita hace maga decision? Ilustra.

⁹ Ta dale le kanaton sabeduria. Ta promete si Jehova que hay dale le kanaton el sabeduria que necesita kita para hace maga buen decision. Necesita kita sabeduria estaba con Dios especialmente si ta hace kita maga decision que puede afecta con el diaton entero vida, igual si esta ba kita single o casa. (Sant. 1:5) Considera con el experiencia del un single hermana que si Maria. c Alegre le ta sirvi como un regular pioneer cuando ya puede le conoce con el un hermano. Ele ya habla: “Cuando ya queda kame mas cerca como man amigo, ya principia kame quierre con uno y otro. Sabe yo que necesita yo hace un decision. Manada beses yo ya reza acerca con ese. Necesita yo el guia de Jehova pero sabe tambien yo que gendeh le hace el decision para conmigo.” Ya mira le que ya contesta si Jehova con el de suyu maga rezo. Paquemodo? Mientras tan research le na diaton maga publicacion, ya puede le incuntra maga especifico articulo que ya ayuda con ele para contesta con el de suyu maga pregunta. Ya oi tambien le con el buen consejo del de suyu nana. Aquel consejo ya ayuda con Maria para examina con el de suyu sentido. Na uliji, ya puede le hace un buen decision.

10. Asegun na 2 Corinto 4:7, cosa hay hace si Jehova para ayuda con el de suyu maga siervo? Dale un ejemplo. (Mira tambien con el letrato.)

 ¹⁰ Ta dale le kanaton fuerza para aguanta. Igual na cosa ya hace si Jehova con apostol Pablo, hay dale tambien le kanaton el fuerza que necesita kita para aguanta con el diaton maga probanza. (Le con el 2 Corinto 4:7.) Considera si paquemodo ya ayuda si Jehova con el un hermano que si Benjamin para aguanta con el de suyu dificil situacion. Cuando joven le, si Benjamin y el de suyu familia largo tiempo ya queda na maga refugee camp na Africa. Ele ya habla: “Pirmi yo ta reza con Jehova y ta pidi con ele que dale conmigo el fuerza para hace si cosa ta hace alegre con ele. Ya contesta si Jehova con el de mio maga rezo cay ya dale le conmigo paz na pensamiento, el coraje para continua predica y maga publicacion para esta yo fuerte na espiritual.” Ele ya omenta: “Cay ya le yo con el maga experiencia del maga hermano y hermana y ya aprende si paquemodo kanila ya ayuda si Jehova para aguanta, ya queda yo mas determinao que esta fiel.”

11-12. Na cosa manera posible usa si Jehova con el diaton espiritual familia para contesta con el diaton maga rezo? (Mira tambien con el letrato.)

¹¹ Ta usa le con el diaton espiritual familia. Na noche antes le sacrificia con el de suyu vida, con todo corazon gayot ya reza si Jesus. Ya pidi le con Jehova que era gendeh con ele acusa el otro como un persona quien ya comete blasfemia. Pero nuay se hace si Jehova. Sino, ya imbia le un angel para anima con Jesus. (Luc. 22:42, 43) Puede tambien kanaton ayuda si Jehova por medio na un llamada o visitada del uno del diaton maga hermano o hermana. Todo kita puede busca maga oportunidad para habla “buen palabra” na diaton maga hermano y hermana.—Prov. 12:25.

¹² Considera el experiencia del un hermana que si Miriam. Cuanto semana despues muri el de suyu marido, ya sinti le solo, triste y depress. Ta llura que llura le y necesita le que tiene con quien man cuento. Ele ya habla: “Nuay mas yo fuerza para llama con maskin quien poreso ya reza yo con Jehova. Mientras ta llura yo y ta reza, ya suena el de mio cellphone. Ya llama conmigo el un anciano que uno na  maga close amigo diamon.” Ya ricibi comforta si Miriam estaba na aquel anciano y na de este mujer. Convincido le que ya manda move si Jehova con este hermano para llama con ele.

13. Relata un ejemplo si paquemodo si Jehova puede usa con aquellos gendeh ta adora con ele para contesta con el diaton maga rezo.

¹³ Posible le usa con el maga gente quien gendeh ta adora con ele. (Prov. 21:1) Tiene vez, ta manda kanila move si Jehova para ayuda con el de suyu maga siervo. Por ejemplo, ya usa le con Rey Artajerjes para permiti con Nehemias que bira na Jerusalem para puede este ayuda construi otravez con el ciudad. (Neh. 2:3-6) Ahora, puede tambien usa si Jehova maskin con aquellos gendeh ta adora con ele para ayuda kanaton si necesita kita.

14. Cosa tu ya aprecia na experiencia de Soo Hing? (Mira tambien con el letrato.)

¹⁴ El un hermana que si Soo Hing ya sinti que ya ayuda con ele si Jehova por medio na de suyu doctor. Tiene enfermedad na pensamiento el de suyu anak hombre. Cuando ya accidenta este, si Soo Hing y el de suyu marido yan resign na diila trabajo para cuida con el diila anak. Como resulta, ya tiene sila problema na financial. Ya sinti si Soo Hing que gendeh mas le puede aguanta otro pa problema. Poreso, ya reza le con todo corazon con Jehova y ya pidi ayuda con ele. Despues, el diila doctor ya busca manera para ayuda kanila. Por causa con ese, ya ricibi sila ayuda na gobierno y ya puede sila incuntra lugar onde esta que gendeh gayot bien caro. Despues, si Soo Hing ya habla: “Ya puede kame mira el ayuda de Jehova kanamon. Ele gayot ‘el quien ta oi con el rezo.’”—Sal. 65:2.

15. Cosa ya ayuda con el un hermana para realiza que ya contesta con el de suyu maga rezo?

¹⁵ Mas mucho, gendeh ta contesta con el diaton maga rezo na extraordinario manera. Pero, el contestacion que ta ricibi kita justo lang na cosa kita necesita para esta leal na diaton Tata na cielo. Poreso, queda alerto si paquemodo ta contesta si Jehova con el de tuyu maga rezo. El un hermana que si Yoko ya sinti que gendeh ta contesta si Jehova con el de suyu maga rezo. Poreso ya principia le escribi na un notebook el cosa le ta pidi con Jehova. Despues del cuanto tiempo, ya mira le oleh con el cosa le ya escribi na de suyu notebook y ya realiza que ya contesta si Jehova con el mayoria del de suyu maga rezo, incluido el  cuanto que ya ulvida ya le. Necesita kita dale tiempo para pensa acerca si paquemodo si Jehova ta contesta con el diaton maga rezo.—Sal. 66:19, 20.

16. Paquemodo kita dale mira que tiene kita fe si acerca na rezo? (Maga Hebreo 11:6)

¹⁶ Ta dale kita mira que tiene kita fe gendeh lang si ta reza kita con Jehova sino si ta acepta tambien kita con el de suyu contestacion na diaton maga rezo—maskin cosa pa se. (Le con el Maga Hebreo 11:6.) Considera con el ejemplo de Mike y el de suyu mujer, si Chrissy. Goal diila que sirvi na Bethel. Ya habla si Mike: “Yan apply kame manada beses y ya reza con Jehova acerca con ese goal pero nuay kanamon acepta.” Maskin pa ansina, convincido siempre si Mike y Chrissy que sabe gayot si Jehova si onde kanila mas puede usa na servicio con ele. Ya continua sila hace el cosa sila puede hace. Ya sirvi sila como maga regular pioneer onde tiene mas grande necesidad y ya participa na maga proyecto de construida del organizacion. Ahora, ta sirvi sila na traveling work. “Gendeh pirmi ta contesta si Jehova con el diamon maga rezo na manera que ta expecta kame,” ya habla si Mike, “pero ta contesta le con ese y gane, na manera que mas bueno pa na cosa kame ta imagina.”

17-18. Asegun na Salmo 86:6, 7, na cosa kita puede confia?

¹⁷ Le con el Salmo 86:6, 7. Asigurao si salmista David que ta oi si Jehova y ta contesta con el de suyu maga rezo. Puede tambien tu confia con ese. El maga ejemplo que ya discuti na este articulo ta asigura kanaton que si Jehova puede dale kanaton el sabeduria y el fuerza que necesita kita para aguanta. Posible le usa con el diaton espiritual familia o maskin con aquellos quien gendeh ta adora con ele para ayuda kanaton.

¹⁸ Maskin gendeh pirmi ta contesta si Jehova con el diaton maga rezo na manera que ta expecta kita, sabe kita que hay contesta le con ese. Hay dale le el cosa kita necesita na exacto tiempo que necesita kita con ese. Poreso continua reza y creé que hay oi contigo si Jehova. Confia que hay cuida le contigo ahora y que hay “satisfecha [le] el deseo del todo vivo” na nuevo mundo que hay llega.—Sal. 145:16.