1. Cosa leccion ya enseña si Jehova con Abraham?

 UNO quel na maga suceso que nunca ulvida si Abraham. Por medio na un angel, ya habla el Dios con Abraham que destroza Le con el ciudad de Sodoma y Gomorra. Yan lingasa ese fiel hombre. Ya pregunta le: “Hay destroza ba gayot tu con el maga recto junto con el maga mal gente? . . . El Juez del entero tierra ba gendeh hace si cosa el justo?” Paciencioso si Jehova y ya enseña le con el de suyu amigo un leccion que puede dale comforta kanaton y puede kita beneficia: Nunca el Dios destroza con el maga recto gente.—Gen. 18:23-33.

2. Porque kita puede asigura que ta juzga si Jehova con justicia y lastima?

² Porque kita puede asigura que ta juzga si Jehova con justicia y lastima? Cay sabe kita que “si Jehova ta mira con el corazon” del maga gente. (1 Sam. 16:7) Gane, sabe le “si cosa el na corazon del cada gente.” (1 Rey 8:39; 1 Cron. 28:9) Maka-bilib gayot se. Deverasan, gendeh gayot kita puede entende con el maga juzgamiento de Jehova. Poreso, justo gayot si apostol Pablo cuando ya habla le acerca con Dios Jehova: “No puede kita entende el maga decision ta hace le.”—Roma 11:33, El Nuevo Testamento.

3-4. Cosa kita posible pensa y cosa kita hay considera na este articulo? (Juan 5:28, 29)

³ Maskin pa ansina, posible tiene siempre kita maga pregunta que semejante na cosa ya pregunta si Abraham. Gane, posible kita pensa: ‘Tiene ba esperanza el maga gente que ya muri na Sodoma y Gomorra? Posible gaha que incluido el  cuanto kanila si “hay resucita . . . con el maga gendeh recto”?’—Act. 24:15, NWT.

⁴ Considera kita si cosa kita ya aprende acerca na resureccion. Nuevo lang, ya ricibi kita aclaramiento acerca con aquellos quien “hay resucita para na vida” y con aquellos quien “hay resucita para na juzgamiento.” a (Le con el Juan 5:28, 29, NWT.) Por causa con ese, tiene kita maga cambio na diaton entendimiento que hay discuti na este articulo y na sunod. Si acerca na juzgamiento de Jehova, hay considera kita una si cosa kita no sabe y despues, si cosa kita sabe.

SI COSA KITA NO SABE

5. Cosa ya discuti na diaton maga publicacion de antes acerca con aquellos ya muri na Sodoma y Gomorra?

⁵ Del antes, ya discuti na diaton maga publicacion acerca si cosa sucede con aquellos con quien juzga si Jehova como gendeh recto. Ya habla kita que nuay esperanza de resureccion el maga individual igual con aquellos na Sodoma y Gomorra. Pero despues del mas estudiada y rezo acerca con este, tiene kita pregunta que necesita considera, Puede ba gayot kita habla que nuay mas sila esperanza?

6. Cosa el cuanto ejemplo del juzgamiento de Jehova na maga gendeh recto gente y cosa kita no sabe?

⁶ Considera con el cuanto ejemplo. Ya menciona na Biblia con el cuanto juzgamiento de Jehova na maga gendeh recto gente, igual con aquellos quien ya muri na Avenida, aquel siete nacion que ya manda mata si Jehova na de suyu maga siervo na Tierra Prometido o el 185,000 Asiriano soldao que ya mata el angel de Jehova na un noche. (Gen. 7:23; Deut. 7:1-3; Isa. 37:36, 37) Na este maga suceso, ya dale ba bastante informacion el Biblia para habla que nuay mas esperanza de resureccion el todo individual con quien ya destroza si Jehova? Nuay. Porque se kita puede habla?

7. Cosa kita no sabe acerca na maga gente quien ya muri na Avenida o aquellos ya destroza na Canaan? (Mira con el letrato.)

⁷ No sabe kita si cosa el juzgamiento de Jehova con el cada individual y no sabe kita si ya tiene ba oportunidad aquellos ya muri para aprende acerca con Jehova y arripinti. Si acerca na tiempo del Avenida, ya menciona el Biblia que “ya predica” si Noe. (2 Ped. 2:5, El Nuevo Testamento) Pero nuay este habla que mientras ta construi con el grande arca, ya hace le esfuerzo para predica con el cada individual na tierra. Na igual manera, no sabe kita si ya tiene ba oportunidad el todo maga mal gente na maga nacion de Canaan para aprende acerca con Jehova y hace maga cambio.

8. Cosa kita no sabe acerca na maga gente na Sodoma y Gomorra?

⁸ Quetal el maga gente que ya muri na Sodoma y Gomorra? El un recto gente que si Lot ya queda junto kanila. Pero ya predica ba si Lot kanila todo? No sabe kita. Deverasan, malo gayot sila pero sabe ba sila si cosa el justo y malo? Si acorda kita, tiene un grupo de maga hombre na aquel ciudad quien quierre man rape con el maga visita de Lot. El Biblia ta habla que “principia bata hasta na de edad” el incluido na ese grupo. (Gen. 19:4; 2 Ped. 2:7) Asigurao ba kita que ya decidi el diaton lastimoso Dios, si Jehova, que gendeh resucita con el cada uno de este maga gente? Deverasan, ya habla si Jehova con Abraham que nuay maskin diez recto gente na ese ciudad. (Gen. 18:32) Gendeh sila recto poreso justo lang que ya destroza kanila. Pero, puede ba kita habla que nuay ni uno kanila el incluido na “maga gendeh recto” que hay resucita? Gendeh kita puede asigura!

9. Cosa kita no sabe acerca con Solomon?

 ⁹ Puede tambien kita le na Biblia acerca con el maga recto gente quien ya queda gendeh recto na uliji. Uno ya alli si Rey Solomon. Sabe le si quien si Jehova y si paquemodo debe adora con Ele poreso ya bendici con ele si Dios Jehova. Pero na uliji, ya adora le na maga falso dios. Por causa con ese, ya rabia gayot si Jehova y ya tiene se mal consequencia na nacion de Israel que ya dura por manada siglo. Deverasan, ya habla el Escritura que si Solomon “ya descanza junto con el de suyu maga tatarabuelo,” incluido el fiel hombre que si Rey David. (1 Rey 11:5-9, 43; 2 Rey 23:13) Ciendo ya entera con ele junto kanila, un garantia ba quel que hay resucita con ele? Nuay menciona el Biblia. Pero posible pensa el cuanto que “si el gente muerto ya, libre ya le del pecado.” (Roma 6:7) Deverasan se pero gendeh se quierre decir que hay resucita con el todo muerto que dol tiene sila derecho para tene un nuevo vida. Un regalo el resureccion estaba na diaton amable Dios. Ta dale le se con aquellos con quien le quierre dale oportunidad para sirvi con ele hasta para cuando. (Job 14:13, 14; Juan 6:44) Hay ricibi ba si Solomon con ese regalo? Sabe si Jehova el contestacion de ese; kita gendeh. Pero, sabe kita que hay hace si Jehova si cosa el justo.

SI COSA KITA SABE

10. Cosa ta sinti si Jehova acerca na destrozo del maga gente? (Ezequiel 33:11) (Mira tambien con el letrato.)

¹⁰ Le con el Ezequiel 33:11. Si acerca na manera si paquemodo ta juzga con el maga gente, ya revela si Jehova kanaton si cosa le ta sinti. Semejante na cosa ya escribi si Ezequiel, si apostol Pedro ya habla: “Quiere [si Jehova] que noay ni uno quien ay perde” o sale destrozao. (2 Ped. 3:9) Uyun con ese verdad, sabe kita que gendeh dayun ta decidi si Jehova que destroza con el maga gente hasta para cuando. Lastimoso gayot le y ta dale le mira lastima si posible.

11. Con quien gendeh resucita y porque se kita sabe?

¹¹ Cosa kita sabe acerca na maga gente quien gendeh resucita? Ya menciona el Biblia cuanto ejemplo. b Si Jesus ya indica que gendeh resucita con Judas Iscariote. (Mar. 14:21; mira tambien con el Juan 17:12 y study note.) Intencional si Judas yan contra con Dios Jehova y con el De Suyu Anak. (Mira con el Marcos 3:29 y maga study note.) Ya habla tambien si Jesus que nuay esperanza de resureccion el cuanto religioso lider quien yan contra con ele. (Mat. 23:33; mira con el Juan 19:11 y el study note “the man.”) Y ya dale aviso si apostol Pablo que gendeh resucita con el maga apostata quien gendeh arripinti.—Heb. 6:4-8; 10:29.

12. Cosa kita sabe acerca na lastima de Jehova? Dale maga ejemplo.

¹² Cosa kita sabe acerca na lastima de Jehova? Paquemodo le ya dale mira que “quiere Le que noay ni uno quien ay perde”? Considera si paquemodo le ya dale mira lastima con el cuanto quien ya comete serioso culpa. Ya comete grabe pecado si Rey David, igual na adulterio y matanza. Pero, ya arripinti si David poreso ya perdona con ele si Jehova. (2 Sam. 12:1-13) Ya hace manada mal cosas si Rey Manases na de suyu vida. Pero maskin pa ansina, ya mira si Jehova el de suyu arripintimiento poreso ya extende con ele lastima y ya perdona con ele. (2 Cron. 33:9-16) Este maga ejemplo ta hace acorda kanaton que ta extende lastima si Jehova si tiene le razon para hace con ese. Hay resucita si Jehova con este  maga individual cay sabe sila que ya comete sila grabe culpa y ya arripinti.

13. (a) Porque ya dale mira lastima si Jehova con el maga de Nineve? (b) Cosa ya habla si Jesus na uliji acerca na maga de Nineve?

¹³ Sabe tambien kita acerca na lastima que ya dale mira si Jehova na maga de Nineve. El Dios ya habla con Jonas: “Ya mira yo que sobra ya el diila maldad.” Pero cuando ya arripinti sila na diila maga culpa, ya perdona kanila si Jehova. Mas lastimoso pa le contra con Jonas. Ya hace acorda el Dios con el de suyu profeta que aquellos maga de Nineve “no sabe si cosa el justo y mali.” (Jon. 1:1, 2; 3:10; 4:9-11) Na uliji, ya usa si Jesus con ese ejemplo para enseña acerca na justicia y lastima de Jehova. Si Jesus ya habla que “na Dia de Juzgada, . . . ay levanta” aquellos de Nineve quien ya arripinti.—Mat. 12:41.

14. Cosa quierre decir que “resucita para na juzgamiento” con el maga de Nineve?

¹⁴ Pero cosa quierre decir que “ay levanta” el maga de Nineve na “Dia de Juzgada”? Ya enseña si Jesus que tiene maga gente “hay resucita para na juzgamiento” na futuro. (Juan 5:29, NWT) Hay sucede se durante el de suyu Un Mil Año Rulanza donde hay resucita “con el maga recto y con el maga gendeh recto.” (Act. 24:15, NWT) Para na maga gendeh recto, hay resucita kanila “para na juzgamiento.” Quierre decir de ese, hay observa kanila si Jehova y si Jesus y mira si obedece ba sila y aplica con el maga cosas que aprende sila. Si el un persona de Nineve con quien ya resucita no quierre sigui na puro adoranza, gendeh con ele permiti si Jehova que continua vivi. (Isa. 65:20) Pero para con aquellos ya iscuji que fiel sirvi con Jehova, hay tene sila el oportunidad para vivi hasta para cuando!—Dan. 12:2.

15. (a) Porque kita debe evita habla que nuay gente de Sodoma y Gomorra el quien hay resucita? (b) Cosa quierre decir del maga palabra que escribido na San Judas 7? (Mira con el cajon “ Cosa Quierre Decir de Judas?”)

¹⁵ Cuando ta converza acerca na maga gente de Sodoma y Gomorra, ya habla si Jesus que “na dia del juzgada,” mas bueno pa el diila situacion contra na maga gente quien nuay acepta con ele y con el de suyu enseñanza. (Mat. 10:14, 15; 11:23, 24; Luc. 10:12) Cosa le quierre decir? Posible kita pensa que gendeh literal el maga palabra de Jesus. Pero  acorda que literal el cosa quierre decir de Jesus cuando ya menciona le acerca na maga de Nineve. Poreso, ta sale que literal tambien el cosa quierre decir de Jesus cuando ya menciona le acerca na maga gente de Sodoma y Gomorra. Asigurao, el “dia del juzgada” que ya menciona le na este dos ocasion, ta refiri na igual tiempo. Igual con el maga de Nineve, el maga gente na Sodoma y Gomorra ya hace maga mal cosas. Pero el maga de Nineve ya tiene el oportunidad para arripinti. Mas pa, acorda que ya menciona si Jesus que tiene quien “hay resucita para na juzgamiento.” Incluido alli “aquellos quien ya hace maga mal cosas.” (Juan 5:29, NWT) Poreso, ta sale que tiene esperanza el maga gente de Sodoma y Gomorra. Posible que el cuanto kanila hay resucita y tiene kita el oportunidad para enseña kanila acerca con Jehova y con Jesucristo.

16. Cosa ta examina si Jehova para determina si con quien resucita? (Jeremias 17:10)

¹⁶ Le con el Jeremias 17:10. Este versiculo ya ayuda kanaton para acorda si cosa kita sabe: Si Jehova lang gayot “el quien ta examina con el corazon y con el de con todo hondo pensamiento.” Si acerca na resureccion na futuro, hay “premia [si Jehova] con el cada uno asegun na de suyu conducta” como cosa Le pirmi ta hace. Pirmi le hace si cosa el justo pero ta dale le mira lastima si posible. Poreso, gendeh kita debe pensa que nuay esperanza de resureccion el un persona puera lang si ya asigura se kanaton el Biblia!

“EL JUEZ DEL ENTERO TIERRA” HAY “HACE SI COSA EL JUSTO”

17. Cosa pasa con el maga gente quien ya muri?

¹⁷ Desde cuando ya sigui kanda Adan y Eva con Satanas y yan rebelde contra con Dios Jehova, billones de gente ya el ya muri. Un “contrario” gayot el muerte! (1 Cor. 15:26) Cosa sucede con ese maga gente? El cuanto del maga fiel siguidores del Cristo, que 144,000 todo, hay resucita para na imortal vida na cielo. (Rev. 14:1) El manada del maga fiel hombre y mujer quien ta ama con Jehova hay resucita como “maga recto” y hay vivi sila hasta para cuando na tierra si esta sila fiel durante el Un Mil Año Rulanza del Cristo y durante el ultimo probanza. (Dan. 12:13;  Heb. 12:1) Y durante el Milenio, el “maga gendeh recto”—incluido aquellos quien nuay pa sirvi con Jehova o aquellos “ya hace maga mal cosas”—hay tene el oportunidad para hace maga cambio y queda maga fiel siervo del Dios. (Luc. 23:42, 43) Pero, el cuanto gente bien malo y bien determinao que man contra con Jehova y na de suyu proposito poreso ya decidi le que gendeh mas resucita kanila.—Luc. 12:4, 5.

18-19. (a) Porque kita puede confia con el juzgamiento de Jehova para con aquellos quien ya muri? (Isaias 55:8, 9) (b) Cosa kita considera na sunod articulo?

¹⁸ Puede ba kita asigura que si juzga si Jehova con el maga gente, hay hace le pirmi justo decision? Si! Como cosa sabe si Abraham, perfecto, sabio y lastimoso si Jehova, “el Juez del entero tierra.” Yan train le con el de suyu Anak y ya dale con este el responsibilidad para juzga con todo. (Juan 5:22) Sabe si Jehova y si Jesus si cosa el talli na corazon del cada gente. (Mat. 9:4) Puede kita asigura que hay hace sila “si cosa el justo”!

¹⁹ Ojala queda kita determinao que confia que mas sabe si Jehova que kanaton. Sabe kita que gendeh kita cualificao para juzga—solamente si Jehova! (Le con el Isaias 55:8, 9.) Poreso, ta confia kita na juzgamiento de Jehova y del de suyu Anak, el Rey quien ta puede gayot imita con el justicia y lastima del de suyu Tata. (Isa. 11:3, 4) Pero, quetal el diila juzgamiento na maga gente na tiempo del grande tribulacion? Cosa kita no sabe? Y cosa kita sabe? El sunod articulo hay contesta con ese maga pregunta.