1-2. Cosa ya sinti el cuanto cuando man novio y novia sila?

 SI TIENE tu novio o novia, asigurao que quierre ustedes queda alegre. Y ese el cosa ya experiencia el manada. Si Tsion, a un hermana de Ethiopia, ya habla: “Bien alegre gayot yo cuando man novio y novia pa kame del de mio marido. Ya discuti kame maga serioso cosas pero yan enjoy tambien kame. Alegre yo cay ya puede yo incuntra un persona con quien yo ta ama y ta ama tambien conmigo.”

² Pero, el un hermano de Netherlands que si Alessio ya habla, “Alegre gayot yo cuando man novio y novia pa kame y mas ta conoce yo con el de mio mujer. Pero ya enfrenta tambien kame maga dificultad.” Na este articulo, hay discuti kita con el cuanto problema que posible enfrenta el man novio y novia y el cuanto principio na Biblia que puede ayuda kanila para puede hace un buen decision. Hay considera tambien kita si paquemodo aquellos na congregacion puede ayuda kanila.

SI PORQUE TAN NOVIO Y NOVIA EL DOS PERSONA

3. Cosa el proposito del tiempo que man novio y novia el dos persona? (Proverbio 20:25)

³ Maskin pa maka-alegre el tiempo mientras man novio y novia el dos persona, debe sila hace serioso con este cay puede este resulta na matrimonio. Na dia del diila casamiento, hay promete sila con Jehova que hay ama y respeta sila con uno y otro mientras vivo sila dos. Antes hace maskin cosa promesa, debe kita considera con ese enbuenamente. (Le con el Proverbio 20:25.) Ansina tambien si acerca na promesa de  matrimonio. Mientras man novio y novia el dos persona, mas puede sila conoce con uno y otro, y puede se ayuda kanila para puede hace un buen decision. Posible decidi sila que casa o man separtajan. Si decidi sila man separtajan, gendeh se quierre decir que ya falla sila. El deverasan, ya ayuda se kanila para hace un buen decision.

4. Porque kita debe acorda el razon si porque tan novio y novia el dos persona?

⁴ Porque importante que acorda el razon si porque tan novio y novia el dos persona? Cay ayuda este con el maga single para gendeh basta entra lang na un relacion si nuay sila intencion para casa. Pero, gendeh lang el maga single el debe tene justo mirada acerca con este sino todo kita. Por ejemplo, ta pensa el cuanto que si man novio y novia el dos persona, debe casa gayot sila. Paquemodo este mirada ta afecta con el maga single Cristiano? Si Melissa, un single hermana de United States, ya habla: “Grande el pressure que ta sinti el maga Cristiano quien tiene novio o novia. Por causa con ese, el otro gendeh tan separtajan maskin pa gendeh sila justo para con uno y otro, y el otro tambien no quierre ya lang entra na un relacion. Ta causa gayot lingasa ese clase de pressure.”

CONOCE ENBUENAMENTE CON UNO Y OTRO

5-6. Cosa debe sabe el man novio y novia acerca con uno y otro? (1 Pedro 3:4)

⁵ Si tiene tu novio o novia, cosa puede ayuda con ustedes para decidi si casa ba ustedes o gendeh? Conoce gayot con uno y otro. Posible, tiene ya tu sabe cuanto cosas acerca con ele antes pa ustedes entra na un relacion. Pero ahora, tiene tu oportunidad para sabe si cosa gayot “talli adentro na [de suyu] corazon.” (Le con el 1 Pedro 3:4.) Quierre decir, mas puede tu sabe acerca na de suyu espiritualidad, personalidad y si paquemodo le ta pensa. Despues del cuanto tiempo, debe puede ya tu contesta con el maga pregunta igual na: ‘Hay queda ba le un buen marido o mujer para conmigo?’ (Prov. 31:26, 27, 30; Ef. 5:33; 1 Tim. 5:8) ‘Puede ba kame dale el emocional necesidad del uno y otro? Puede ba yo aguanta o ignora con el de suyu maga imperfeccion?’ b (Roma 3:23) Mientras ta conoce ustedes con uno y otro, acorda este: Gendeh importante si paquemodo ustedes de semejante sino si  paquemodo ustedes ta puede man adjust si gendeh ustedes tan uyun na cuanto cosas.

⁶ Cosa pa el otro cosas que debe tu sabe acerca con ele mientras man novio y novia pa ustedes? Antes pa queda mas hondo el de tuyu sentido para con ele, mas bueno si ta discuti ya ustedes acerca na cuanto importante cosas, igual si cosa el de ustedes maga goal. Pero quetal el otro importante cosas igual na salud, sen o duele experiencia de antes? Si nuevo pa lang ustedes man novio y novia, gendeh necesita que discuti acerca con ese todo cosas. (Compara na Juan 16:12.) Si ta sinti tu que gendeh pa tiempo para contesta con el cuanto personal pregunta, habla se con ele. Pero mientras ta pasa el tiempo, necesita le sabe acerca con este maga informacion para puede le hace un buen decision. Poreso, llega siempre el tiempo que necesita tu se habla con ele.

7. Paquemodo el man novio y novia mas puede conoce con uno y otro? (Mira tambien con el cajon “ Si Lejos el De Tuyu Novio o Novia.”) (Mira tambien con el maga letrato.)

⁷ Paquemodo tu sabe si cosa gayot le clase de persona? El uno na maga de con todo buen manera amo si man cuento ustedes y queda honesto, pregunta con uno y otro y oi enbuenamente. (Prov. 20:5; Sant. 1:19) Puede con ustedes ayuda si hace ustedes maga cosas donde puede ustedes man cuento, igual como come, pasea y predica junto. Mas puede tambien ustedes conoce con uno y otro si man junto ustedes con el de ustedes maga familia y amigo. Mas pa, participa na maga actividad donde puede tu mira si paquemodo le ta actua na diferente situacion o si paquemodo le ta trata con el diferente maga gente. Nota si cosa ya pruba hace si Aschwin de Netherlands y el de suyu novia que si Alicia. Si Aschwin ya habla: “Ya pensa kame maga actividad donde tiene kame cosa puede aprende acerca con uno y otro. Mas mucho, maga simple cosas lang este, igual como cuci junto o hace maga trabajo na casa. Durante ese maga tiempo, ya puede kame mira el maga buen calidad y imperfeccion del uno y otro.”

8. Cosa el beneficio si estudia junto el man novio y novia?

⁸ Puede tambien ustedes mas conoce con uno y otro si estudia ustedes junto. Si casao ya ustedes, necesita ustedes dale tiempo para na de familia adoranza para asigura que parte el Dios na de ustedes matrimonio. (Ecl. 4:12) Poreso mientras man novio y novia pa lang ustedes, mas bueno si ta dale ya ustedes tiempo  para estudia junto. Siempre, gendeh pa ustedes un familia y el hermano gendeh pa el cabeza del hermana. Maskin pa ansina, si regular ustedes ta estudia junto, puede ustedes mira con el espiritualidad del cada uno. Tiene pa otro beneficio ya puede discubri kanda Max y Laysa de United States. Ya habla si Max: “Cuando nuevo pa lang kame man novio y novia, ya estudia ya kame maga publicacion acerca na dating, matrimonio y vida de familia. Ese maga publicacion ya ayuda kanamon para puede man cuento acerca na maga importante cosas que posible dificil para discuti.”

OTRO COSAS QUE DEBE CONSIDERA

9. Cosa debe considera el man novio y novia si ta decidi si con quien habla acerca na diila relacion?

⁹ Con quien ustedes debe habla que man novio y novia ya ustedes? Ustedes se dos decidi. Si nuevo pa lang ustedes, baka con el cuanto persona lang ustedes habla. (Prov. 17:27) Si hace se ustedes, puede ustedes evita manada pregunta o el pressure del otro. Pero si nuay ustedes con quien habla, baka man date ustedes que ustedes lang para gendeh sabe el otro. Peligroso se. Poreso, mas bueno si habla ustedes con aquellos quien puede dale buen consejo y ayuda con ustedes. (Prov. 15:22) Por ejemplo, puede ustedes habla con el cuanto miembro de familia, maga mature amigo y amiga, o con el maga anciano.

10. Cosa puede hace el man novio y novia para esta limpio na moral? (Proverbio 22:3)

¹⁰ Paquemodo ustedes puede esta limpio na moral? Mientras ta queda mas hondo el de ustedes sentido, normal lang que mas ta quierre ya gayot ustedes con uno y otro. Cosa puede ayuda con ustedes para esta limpio na moral? (1 Cor. 6:18) Evita el maga imoral cuento, maga situacion que ustedes lang dos y el por demas tomada. (Ef. 5:3) Puede se hace mas fuerte con el de ustedes sexual deseo y mas man dificil ustedes hace si cosa el justo. Puede ayuda si regular ustedes man cuento si cosa ustedes puede hace para dale mira respeto con uno y otro y na maga principio de Jehova. (Le con el Proverbio 22:3.) Nota si cosa ya puede ayuda con Dawit y Almaz de Ethiopia. Sila ya habla: “Tan junto kame na maga lugar donde manada maga gente o si junto kanamon el diamon maga amigo. Gendeh kame tan junto na coche o na casa si kame-kame lang. Na ese manera, ta puede kame evita maga situacion que peligroso.”

11. Si acerca na maga expresion de amor entre del man novio y novia, cosa sila debe considera?

¹¹ Quetal el maga expresion de amor entre del man novio y novia? Gendeh malo el cuanto de ese especialmente cay ta queda mas hondo el de ustedes amor con uno y otro. Pero acorda que si mas ta queda fuerte el de tuyu sexual deseo, posible que man dificil tu pensa enbuenamente y hace justo decision acerca con ese persona. (Can. 1:2; 2:6) Mas pa, el maga expresion de amor facil lang resulta na gendeh buen conducta. (Prov. 6:27) Poreso na principio del de ustedes relacion, discuti ya si cosa maga limitacion ustedes sigui harmonia na maga principio na Biblia. c (1 Tes. 4:3-7) Puede ustedes discuti con este: ‘Cosa posible el impresion del maga gente na diaton lugar na este expresion de amor? Posible gaha queda fuerte el diaton sexual deseo por causa con este?’

12. Cosa debe acorda el man novio y novia si tiene sila maga problema na diila relacion?

¹² Paquemodo ustedes solva con el maga problema? Paquemodo si tiene maga tiempo que  gendeh ustedes tan uyun? Quierre decir ba de este que gendeh ustedes justo para con uno y otro? Gendeh; ta sucede se maskin na maga man maridable. Fuerte el matrimonio si el man maridable ta respeta con uno y otro y conforme man adjust para solva el diila maga problema. Poreso, el manera si paquemodo ustedes ta solva problema ahora puede dale idea con ustedes si tene ba ustedes un alegre matrimonio. Puede ustedes discuti con este: ‘Si tiene problema, calmao ba kita y ta puede man cuento con respeto? Ta admiti ba dayun kita con el diaton maga kamali y ta pricura hace cambio? Pronto lang ba kita ta puede man adjust, pidi despensa y perdona?’ (Ef. 4:31, 32) Pero, si pirmi ustedes tan purpiajan mientras man novio y novia pa lang, posible que gendeh se cambia si casa ya ustedes. Si ya puede tu realiza que gendeh justo ese persona para contigo, baka mas bueno para con ustedes dos que man separtajan. d

13. Cosa puede ayuda con el man novio y novia para decidi si cuando hace decision?

¹³ Hasta cuando ustedes esta man novio y novia antes hace decision? Mas mucho, malo el resulta si dayun-dayun ta hace decision. (Prov. 21:5) Poreso, necesita bastante tiempo para puede gayot tu conoce con el de tuyu novio o novia. Pero, gendeh tambien ustedes debe espera bien tarda. El Biblia ta habla: “El cosa ta expecta que nuay porsigui ta hace triste con el corazon.” (Prov. 13:12) Mas pa, mientras ta queda mas tarda el de ustedes relacion, posible que mas man dificil ustedes resisti maga tentacion. (1 Cor. 7:9) En vez de man focus si paquemodo de tarda ya el de ustedes relacion, puede tu pregunta con el de tuyu mismo cuerpo, ‘Cosa pa yo necesita sabe acerca con ese persona para puede yo hace un decision?’

PAQUEMODO EL OTRO PUEDE SUPORTA?

14. Paquemodo kita puede ayuda con el maga man novio y novia? (Mira tambien con el letrato.)

¹⁴ Si tiene kita conoce man novio y novia, paquemodo kita puede ayuda kanila? Puede kita convida kanila que come junto kanaton, na diaton de familia adoranza o na recreacion. (Roma 12:13) Ese maga oportunidad puede ayuda kanila para mas conoce pa con uno y otro. Necesita gaha sila chaperone o lugar onde sila dos puede man cuento? Puede gaha kita ayuda kanila? (Gal. 6:10) Si Alicia que ya menciona enante ya relata si cosa sila  ya aprecia de Aschwin. Ele ya habla, “Alegre gayot kame cuando el cuanto maga hermano y hermana ya habla que puede kame visita kanila si necesita kame lugar onde man cuento.” Si ya pidi contigo man chaperone, mira con ese como un oportunidad para puede ayuda kanila. Asigura que gendeh tu kanila deja solo pero observa si necesita sila tiempo para man cuento que sila lang dos.—Fil. 2:4.

15. Cosa pa puede hace el otro para ayuda con el man novio y novia? (Proverbio 12:18)

¹⁵ Puede tambien kita suporta con el maga man novio y novia na cosa kita ta habla. Tiene vez, necesita kita controla con el diaton mismo cuerpo. (Le con el Proverbio 12:18.) Por ejemplo, baka bien quierre kita habla con otro que man novio y novia ya sila pero baka quierre sila que sila se mismo habla. Gendeh kita debe man chismis acerca kanila o habla maga negativo cosas acerca na diila decision. (Prov. 20:19; Roma 14:10; 1 Tes. 4:11) Mas pa, gendeh tambien kita debe habla kanila que casa ya sila o pregunta kanila si cuando sila casa. El un hermana que si Elise y el de suyu marido ya habla, “Yan huya gayot kame cuando ya pregunta kanamon si cosa el diamon plano na casamiento cay nuay pa man kame man cuento acerca con aquel.”

16. Cosa kita debe hace si yan separtajan el man novio y novia?

¹⁶ Paquemodo si ya decidi el man novio y novia que man separtajan? Debe kita evita pregunta si cosa ya sucede o disculpa con el uno kanila. (1 Ped. 4:15) El un hermana que si Lea ya habla: “Ya sabe yo que tan cuento-cuento el otro acerca si porque kame yan separtajan del un hermano. Ya sinti gayot yo duele.” Como ya menciona enante, si yan separtajan el man novio y novia, gendeh se quierre decir que ya falla sila. Sino, ya puede ayuda kanila ese tiempo para puede hace un buen decision. Pero posible ta sinti siempre sila triste na cosa ya sucede. Poreso, puede kita busca manera para suporta kanila.—Prov. 17:17.

17. Cosa debe continua hace el man novio y novia?

¹⁷ Como cosa kita ya discuti, ta enfrenta dificultad el maga man novio y novia. Pero, puede tambien sila man enjoy durante ese tiempo. Si Jessica ya habla: “El deverasan, tiene kame maga dificultad cuando man novio y novia kame. Pero, gendeh gayot sayang el diamon tiempo y esfuerzo.” Si tiene ustedes novio o novia, continua conoce con uno y otro. Si hace se ustedes, asigurao que puede ustedes hace un justo decision na uliji.