1-2. Cosa debe considera el maga single Cristiano antes busca un novio o novia? (b) Cosa tiempo na vida del maga single Cristiano el discuti kita na este articulo y na sunod? (Mira con el footnote.)

 QUIERRE ba tu casa? Deverasan, gendeh necesita casa el un persona para queda alegre. Pero manada single Cristiano, joven man o de edad, el quierre tene marido o mujer. Siempre, antes tu busca un novio o novia, debe preparao ya tu na financial, espiritual y emocional. a (1 Cor. 7:36) Cay si ansina, mas grande el posibilidad que hay tene tu alegre matrimonio.

² Pero, gendeh facil incuntra un persona con quien tu casa. (Prov. 31:10) Y maskin ya incuntra ya tu con quien tu quierre conoce pa mas, posible gendeh facil que queda le de tuyu novio o novia. b Na este articulo, hay discuti kita si cosa puede ayuda con el maga single Cristiano para incuntra si con quien casa. Aprende tambien kita si paquemodo el otro na congregacion puede suporta con aquellos quien quierre casa.

 SI TA BUSCA CON QUIEN CASA

3. Cosa debe considera el un single Cristiano si ta busca con quien casa?

³ Si quierre tu casa, mas bueno si sabe ya tu si cosa tu quierre na un mujer antes pa tu busca un novia. c Si gendeh tu se hace, posible enamora tu con el un persona que gendeh justo para contigo o gendeh tu puede nota con el un persona que bueno era para queda de tuyu mujer. Siempre, si busca tu novia, debe un bautizao Cristiano le. (1 Cor. 7:39) Pero gendeh quierre decir que si bautizao le, hay queda ya le un buen mujer para contigo. Poreso, pregunta na de tuyu mismo cuerpo: ‘Cosa el de mio maga goal? Cosa maga calidad yo ta busca na un mujer? Razonable ba el cosa yo ta expecta?’

4. Cosa el cuanto ya inclui na diila maga rezo?

⁴ Si quierre tu casa, asigurao ya reza ya tu acerca con ese. (Fil. 4:6) Siempre, nuay promete si Jehova que dale le kanaton un marido o un mujer. Pero, interesao le na de tuyu maga necesidad y sentido, y puede le ayuda contigo mientras ta busca tu novia. Poreso, continua habla con Jehova si cosa tu quierre y cosa tu ta sinti. (Sal. 62:8) Reza que dale contigo paciencia y sabeduria. (Sant. 1:5) Si John, d un single hermano de United States, ya habla si cosa le ta inclui na de suyu rezo: “Ta habla yo con Jehova si cosa maga calidad yo quierre na un mujer. Ta pidi yo que dale conmigo maga oportunidad para conoce un hermana quien tiene ese maga calidad. Ta pidi tambien yo con Jehova que ayuda conmigo que cultiva maga calidad para queda un buen marido.” Si Tanya, un hermana de Sri Lanka,  ya habla: “Mientras ta busca yo si con quien casa, ta pidi yo con Jehova que ayuda conmigo para esta fiel, positivo y alegre.” Maskin nuay pa tu dayun puede incuntra novio o novia, ta promete si Jehova que hay continua le cuida contigo.—Sal. 55:22.

5. Na cosa maga situacion el un single Cristiano puede conoce un persona quien ta ama tambien con Jehova? (1 Corinto 15:58) (Mira tambien con el letrato.)

⁵ El Biblia ta anima kanaton que “continua hace mucho buen trabajo para con el Señor.” (Le con el 1 Corinto 15:58, El Nuevo Testamento.) Mientras ta esta tu ocupao na servicio con Jehova y tan junto na diferente maga hermano y hermana, puera que puede sila anima contigo, hay tene tambien tu el oportunidad para conoce otro maga single Cristiano que prioridad tambien el servicio con Jehova. Y cay ta dale tu el todo na servicio con Jehova, hay queda gayot tu alegre.

6. Mientras ta busca con quien casa, cosa debe acorda el maga single Cristiano?

⁶ Pero, debe tu queda con cuidao: No permiti que pirmi ya lang tu tan focus que busca con quien casa. (Fil. 1:10) El deverasan alegria gendeh ta depende si casao tu o single sino na de tuyu relacion con Jehova. (Mat. 5:3) Y mientras single tu, posible mas manada tu oportunidad para hace pa mas na ministerio. (1 Cor. 7:32, 33) Usa enbuenamente con este tiempo. Si Jessica, un hermana na United States quien ya casa cuando cerca ya le 40 año, ya habla, “Ya esta yo ocupao na ministerio y ya ayuda se conmigo para queda contento maskin quierre ya era yo casa.”

DALE TIEMPO PARA OBSERVA

7. Porque mas bueno que observa anay antes habla el de tuyu sentido na un persona? (Proverbio 13:16)

⁷ Paquemodo si tiene tu ya conoce que dol puede queda un buen mujer para contigo? Habla ba tu dayun que quierre tu con ele? El Biblia ta habla que sabio el un persona si sabe anay le el maga informacion antes actua. (Le con el Proverbio 13:16.) Poreso, mas bueno si observa anay tu con ele por cuanto tiempo antes habla si cosa tu ta sinti. “Pronto lang man develop el diaton sentido para con otro pero unrato lang tambien se ta perde,” ya habla si Aschwin de Netherlands. “Poreso si dale anay tu tiempo para observa, puede tu asigura que gendeh tu enamora con el un persona base lang na de tuyu emocion que posible pa cambia.” Mas pa, si observa anay tu, baka puede tu realiza que gendeh ele el persona que justo para contigo.

8. Paquemodo el un single Cristiano puede observa con el un persona? (Mira tambien con el letrato.)

⁸ Paquemodo tu puede observa con el un persona? Na maga miting o si tan junto como grupo, puede tu observa con el de suyu espiritualidad, personalidad y conducta. Quien el de suyu maga amiga? Acerca na cosa le tan cuento? (Luc. 6:45) Semejante ba el de suyu maga goal na de tuyu maga goal? Puede tu man cuento con el maga anciano na diila congregacion o con el otro maga mature Cristiano quien bien conoce con ele. (Prov. 20:18) Puede tu pregunta acerca na de suyu reputacion y maga calidad. (Rut 2:11) Mientras ta observa tu con ele, evita que queda le gendeh comfortable. Asigura que ta respeta tu con el de suyu sentido y privacia.

9. Antes habla con el un persona el de tuyu sentido, cosa tu debe asigura?

⁹ Paquemodo de tarda tu necesita observa con el un persona antes habla con ele el de tuyu sentido? Si man cuento dayun tu con ele, posible le pensa que nuay tu pensa  enbuenamente con el de tuyu decision. (Prov. 29:20) Pero si dol tiene ya idea el persona que quierre tu con ele pero gendeh pa tu ta habla maskin bien tarda ya, baka pensa le que gendeh tu ta puede hace decision. (Ecl. 11:4) Acorda que si habla tu con el un persona el cosa tu ta sinti, gendeh quel quierre decir que con ele ya tu casa. Pero debe asigurao tu que preparao ya tu para na matrimonio y aquel persona posible queda un buen mujer para contigo.

10. Cosa tu debe hace si ta sinti tu que quierre contigo el un persona pero gendeh tu interesao con ele?

¹⁰ Pero, quetal si ta sinti tu que quierre contigo el un persona? Si gendeh tu interesao, hace con ese claro na de tuyu maga accion. Gendeh amable que manda pensa con el un persona que posible ustedes queda man novio y novia si gendeh se amo el de tuyu plano.—1 Cor. 10:24; Ef. 4:25.

11. Si ya pidi contigo ayuda para busca con quien casa, cosa tu debe acorda?

¹¹ Na cuanto maga cultura, el maga mayores o otro maga adulto el ta iscuji si con quien casa el miembro del diila familia. Na otro maga lugar, el maga familia o amigo el ta hace manera para man conocijan el un hombre y mujer para mira si gusta ba sila con uno y otro. Si ya pidi contigo ayuda que hace se, considera si cosa quierre y necesita el single hermano y hermana. Si ya mira tu que dol bueno el un persona para na un hermano o hermana, sabe pa mas acerca na de suyu personalidad, maga calidad y el mas importante, el de suyu espiritualidad. Mas importante que tiene le cerca relacion con Jehova contra manada le sen, tiene alto educacion o buen estado na vida. Acorda tambien que el single hermano y hermana el decidi si casa ba sila o gendeh.—Gal. 6:5.

SI TA PLAÑA ENAMORA

12. Si ta plaña tu enamora con el un persona, paquemodo tu se habla con ele?

¹² Si ta plaña tu enamora con el un persona, paquemodo tu se habla con ele? e Puede tu man cuento con ele na cellphone o na personal, na un lugar donde tiene otro maga gente. Habla claro si cosa el de tuyu intencion. (1 Cor. 14:9) Si necesita, dale con  ele tiempo para pensa si cosa el de suyu decision. (Prov. 15:28) Y si gendeh le interesao entra na un relacion, respeta con el de suyu decision.

13. Cosa tu puede hace si tiene quien quierre enamora contigo? (Colosa 4:6)

¹³ Paquemodo si tiene quien quierre enamora contigo? Posible que ya pricura le tene animo para puede man cuento contigo poreso queda amable y dale mira respeto. (Le con el Colosa 4:6.) Si necesita tu tiempo para pensa, habla se con ele. Pero, pricura dale dayun el de tuyu contestacion. (Prov. 13:12) Si gendeh tu interesao, debe tu se hace claro con ele na amable manera. Nota si cosa ya hace si Hans, un hermano de Austria, cuando ya habla el un hermana el de suyu sentido para con ele: “Con respeto yo con ele ya habla claro el de mio decision. Ya hace yo quel dayun cay no quierre yo que tiene le cosa expecta. Mas pa, con cuidao tambien yo na de mio maga accion y palabra con ele despues quel.” Pero si interesao tu con el persona, habla si cosa tu ta sinti y despues, man cuento ustedes acerca si cosa ustedes ta expecta que sucede. Posible que gendeh igual el cosa ustedes ta expecta por causa na de ustedes cultura o na otro pa maga razon.

PAQUEMODO EL OTRO PUEDE SUPORTA CON EL MAGA SINGLE?

14. Paquemodo kita puede suporta con el maga single por medio na diaton maga palabra?

¹⁴ Paquemodo kita todo puede suporta con el maga single Cristiano quien quierre casa? Una, necesita kita queda con cuidao na cosa kita ta habla. (Ef. 4:29) Puede kita pregunta con el diaton mismo cuerpo: ‘Ta tenta ba yo con aquellos quien quierre casa? Si ta mira yo tan cuento el un single hermano y hermana, ta pensa ba yo dayun que quierre sila con uno y otro?’ (1 Tim. 5:13) Omento pa, gendeh tambien kita debe manda sinti con el maga single que tiene cosa falta kanila por causa lang cay gendeh sila casao. Si Hans que ya menciona enante ya habla: “El cuanto na congregacion ta habla, ‘Gendeh mas tu joven! Gendeh pa tu casa?’ Si ta puede se oi el maga single, ta sinti sila que gendeh kanila ta aprecia y mas ta sinti lang sila el pressure que casa.” Mas bueno si busca kita maga oportunidad para comenda con el maga single!—1 Tes. 5:11.

15. (a) Base na principio na Roma 15:2, cosa kita debe considera antes ayuda con el un persona para busca con quien casa? (Mira tambien con el letrato.) (b) Cosa maga importante leccion tu ya aprende na video?

 ¹⁵ Paquemodo si ta sinti kita que tupao gayot para con uno y otro el un hermano y hermana? El Biblia ta habla kanaton que considera con el sentido del otro. (Le con el Roma 15:2.) Manada na maga single el no quierre que introduci kanila na un persona para queda este diila novio o novia. Debe kita respeta con el diila decision. (2 Tes. 3:11) El cuanto posible quierre que ayuda kita kanila. Pero gendeh se kita debe hace si nuay kanaton pidi. f (Prov. 3:27) El cuanto single mas quierre que gendeh kanila directa introduci na un persona. Si Lydia, un single hermana de Germany, ya habla: “Puede tu invita con el un hermano y hermana na un gathering. Busca lang manera para puede sila man conocijan y deja kanila decidi si cosa sila hace.”

16. Cosa debe acorda el maga single Cristiano?

¹⁶ Todo kita—single man o casao—puede queda alegre! (Sal. 128:1) Poreso si quierre tu casa pero nuay pa tu incuntra con el justo persona, continua man focus na de tuyu servicio con Jehova. El un hermana de Macao que si Sin Yi ya habla: “Corto lang este tiempo que single tu si compara na tiempo que tiene tu junto con el de tuyu marido o mujer na Paraiso. Man enjoy y usa enbuenamente con ese tiempo.” Pero paquemodo si ya incuntra ya tu con quien tu posible casa, y man novio y novia ya ustedes? Na sunod articulo, hay discuti kita si cosa tu puede hace na ese tiempo para puede hace un buen decision.