1. Cosa kanaton ta permiti hace si Jehova?

TA PERMITI kanaton si Jehova que iscuji si paquemodo kita vivi con el diaton vida. Ta enseña le kanaton si paquemodo hace buen decision. Y si hace kita decision que ta hace alegre con ele, ta ayuda le kanaton. (Sal. 119:173) Si mas ta aplica kita con el sabeduria na Palabra del Dios, mas puede kita hace maga buen decision.​—Heb. 5:14.

2. Cosa dificultad kita posible enfrenta despues hace decision?

² Maskin pa ya hace kita un buen decision pero posible, tan dificil kita hace acaba el cosa kita ya principia. Considera con el cuanto ejemplo: El un joven hermano ya decidi que le con el entero Biblia. Ya principia ele le por cuanto semana pero ya descanza por causa na cuanto razon. El un hermana ya decidi sirvi como un regular pioneer pero gendeh ta puede decidi si cuando le principia. El un grupo del maga anciano ya decidi que pirmi sila man shepherding con el maga hermano y hermana pero despues de cuanto mes, nuay siempre sila principia hace con ese. Otro-otro este maga situacion pero tiene un cosa que semejante kanila. Este maga hermano y hermana ya hace decision pero nuay sila hace el cosa sila ya decidi. El maga Cristiano na Corinto del primer siglo ya enfrenta dificultad igual ansina. Discuti kita si cosa kita puede aprende kanila.

3. Cosa decision ya hace el maga de Corinto pero cosa ya sucede?

³ Maga 55 C.E., ya hace importante decision el maga de Corinto. Ya sabe sila que el maga hermano y hermana na Jerusalem y Judea ta experiencia dificultad y pobreza y el otro maga congregacion ya colecta sen para ayuda kanila. Por causa na  pagka-bueno y pagka-bondadoso del maga hermano de Corinto, ya decidi sila dona y ya pregunta sila con apostol Pablo si paquemodo sila puede ayuda. Ya dale le instruccion con el congregacion y ya iscuji con Tito para colecta con el sen. (1 Cor. 16:1; 2 Cor. 8:6) Pero despues del cuanto meses, ya sabe si Pablo que nuay hace el maga de Corinto el cosa sila ya plaña hace. Como resulta, gendeh pa preparao el diila maga donacion cuando necesita ya con este lleva na Jerusalem junto con el contribucion del otro maga congregacion.​—2 Cor. 9:4, 5.

4. Como cosa ya dale mira na 2 Corinto 8:7, 10, 11, cosa ya anima si Pablo que hace el maga de Corinto?

⁴ Ya hace buen decision el maga de Corinto y ya dale kanila comendacion si Pablo por causa na diila fuerte fe y el diila deseo queda bondadoso. Pero, necesita tambien le kanila anima que hace el cosa sila ya principia. (Le con el 2 Corinto 8:7, 10, 11.) El diila experiencia ta enseña kanaton que maskin el maga fiel Cristiano posible tan dificil tambien hace si cosa sila ya decidi.

5. Cosa maga pregunta kita contesta?

⁵ Igual con el maga de Corinto, posible tan dificil kita hace con el diaton decision. Porque? Por causa na imperfeccion, baka gendeh dayun kita hace el cosa kita ya decidi. O baka sucede el un cosa que nuay kita expecta que puede hace dificil para hace con ese. (Ecl. 9:11; Roma 7:18) Paquemodo kita examina con el un decision y decidi si debe ba kita cambia con ese? Y paquemodo kita puede asigura que puede kita hace acaba el cosa kita ya principia?

6. Cuando kita posible necesita cambia con el un decision?

⁶ Tiene cuanto maga decision que nunca kita cambia. Por ejemplo, gendeh kita cambia con el diaton decision que sirvi con Jehova y determinao kita esta fiel na diaton marido o mujer. (Mat. 16:24; 19:6) Pero, el otro maga decision posible necesita kita cambia. Porque? Cay ta cambia el diaton circumstancia. Cosa kanaton puede ayuda para hace justo decision?

7. Cosa kita debe reza y porque?

⁷ Reza para na sabeduria. Ya manda escribi si Jehova con Santiago: “Si tiene de ustedes quien falta el saber, pidi se con el Dios y ay dale se con ustedes.” (Sant. 1:5) Deverasan, todo kita ‘falta saber.’ Poreso, necesita kita depende con Jehova si ta hace kita decision y si necesita kita cambia con el diaton decision. Ayuda gayot contigo si Jehova hace justo decision.

8. Cosa clase de research kita debe hace antes de hace decision?

⁸ Man research enbuenamente. Consulta na Palabra del Dios, le maga publicacion que estaba na organizacion de Jehova y man cuento con aquellos con quien tu puede confia. (Prov. 20:18) Importante hace ansina clase de research antes decidi si cambia trabajo, cambia na otro lugar y si iscuji educacion que puede contigo ayuda suporta de tuyu ministerio.

9. Cosa el beneficio si honesto kita na diaton mismo cuerpo?

⁹ Examina de tuyu motivo. Importante con Jehova el diaton motivo. (Prov. 16:2) Quierre le que queda kita honesto na todo cosas. Poreso si ta hace kita decision, quierre tambien kita queda honesto na diaton mismo cuerpo y con otro acerca na diaton motivo. Si gendeh kita honesto, posible man dificil kita hace el cosa kita ya decidi. Por ejemplo, posible decidi el un joven hermano que  queda un regular pioneer. Pero despues del cuanto tiempo, tan dificil le saca con el hora que necesita y gendeh le tanto alegre na de suyu ministerio. Posible, ya pensa le que el de suyu motivo para man pioneer amo cay quierre le hace alegre con Jehova. Pero, posible gaha que el de suyu primer razon amo que hace alegre con el de suyu mayores o con otro?

10. Cosa el necesita para puede hace cambio?

¹⁰ Considera con el situacion del un Bible study quien ya decidi que descanza puma. Del primero, yan dificil le pero ya puede le descanza puma por uno o dos semana. Despues de ese, ya puma le otravez. Pero na uliji, ya puede le hace el cosa le ya decidi. El de suyu amor para con Jehova y el de suyu querrer que hace alegre con Ele amo el ya ayuda para puede le quita con el de suyu vicio.​—Col. 1:10; 3:23.

11. Porque debe tu tiene especifico goal?

¹¹ Queda especifico. Si mas especifico tu, mas puede tu hace acaba el cosa tu ya principia. Por ejemplo, posible ya decidi tu que pirmi le con el Biblia. Pero si nuay tu especifico schedule, baka gendeh tu puede hace el cosa tu ya plaña. * O posible ya decidi el maga anciano que man shepherding pirmi con el maga hermano pero despues de cuanto tiempo, nuay sila puede hace con ese. Para puede con ese hace, puede sila pregunta: “Ya hace ba kita lista si quien maga hermano y hermana kita man shepherding? Ya hace ba kita especifico schedule para visita kanila?”

12. Cosa kita posible necesita hace y porque?

¹² Queda realistico. Nuay ni uno kanaton el tiene tiempo, sen o fuerza para hace todo cosas que quierre kita hace. Poreso, queda realistico y razonable. Posible, necesita tu cambia con el decision que gendeh tu puede hace. (Ecl. 3:6) Pero, pone kita que ya hace tu cambio na de tuyu decision y ya sinti que puede tu hace con este. Considera con el cinco cosas que puede contigo ayuda hace acaba el cosa tu ya principia.

13. Cosa tu hace para tiene el fuerza que necesita tu para hace con el un decision?

¹³ Reza que tiene tu fuerza para actua. El Dios puede contigo dale “el fuerza para hace” con el de tuyu decision. (Fil. 2:13) Poreso, pidi con el sagrao espiritu de Jehova para dale contigo el fuerza que necesita tu. Continua reza maskin pa dol gendeh dayun ta contesta con el de tuyu rezo. Como cosa ya habla si Jesus: “Pidi ustedes y ay recivi.”​—Luc. 11:9, 13.

14. Na cosa manera el principio na Proverbio 21:5 puede contigo ayuda hace con el de tuyu decision?

¹⁴ Hace plano. (Le con el Proverbio 21:5.) Necesita tu hace plano para puede tu hace con el cosa tu ya principia. Despues, sigui el cosa tu ya plaña. Na igual manera, si hace tu un decision, hace lista de todo cosas que necesita tu hace. Si grande el trabajo que ta plaña tu hace, dividi con ese na maga diutay-diutay trabajo para facil tu mira si cosa progreso ya tu ya hace. Ya anima si Pablo con el maga de Corinto que prepara contribucion “todo el Domingo” en vez de espera y colecta si llega ya le. (1 Cor. 16:2) Si dividi tu con el grande trabajo, puede este ayuda contigo para gendeh sinti que gendeh tu con ese puede hace.

15. Despues hace plano, cosa tu puede hace?

¹⁵ Si escribi tu con el cosa tu ta plaña, puede se ayuda contigo hace el de tuyu decision.  (1 Cor. 14:40) Por ejemplo, tiene direccion na maga grupo del maga anciano que iscuji un anciano para escribi el todo cosas que ya decidi sila, incluido ya si quien con ese hace y si cuando con ese hace acaba. Si hace este el maga anciano, mas facil para kanila hace si cosa sila ya decidi. (1 Cor. 9:26) Puede tambien tu hace igual ansina. Por ejemplo, puede tu hace lista si cosa tu necesita hace cada dia y escribi una na lista el primer cosas que necesita tu hace. Puede este ayuda contigo para mas facil tu hace acaba el cosa tu ya principia y mas manada pa tu cosa puede hace.

16. Cosa necesita para puede tu hace con el cosa tu ya decidi y paquemodo ta suporta con ese el Roma 12:11?

¹⁶ Hace esfuerzo. Necesita esfuerzo para puede hace el cosa tu ya plaña y hace acaba con ese. (Le con el Roma 12:11.) Ya habla si Pablo con Timoteo que continua hace esfuerzo para queda buen maestro. Puede kita aplica con el consejo de Pablo na otro espiritual goal.​—1 Tim. 4:13, 16.

17. Paquemodo el Efeso 5:15, 16 puede ayuda contigo hace si cosa tu ya plaña?

¹⁷ Usa enbuenamente con el de tuyu tiempo. (Le con el Efeso 5:15, 16.) Iscuji si cuando tu hace el cosa tu ya decidi y no cambia con ese tiempo. No espera que queda enbuenamente el situacion antes tu principia cay baka gendeh ya se llega. (Ecl. 11:4) No deja que el gendeh importante cosas hay hace acaba con el de tuyu tiempo y fuerza que necesita para na mas importante cosas. (Fil. 1:10) Si posible, iscuji tiempo que nuay quien hay destorba contigo. Manda sabe con otro que necesita tu concentra. Puede tu apaga con el de tuyu cellphone y evita chequia con el de tuyu e-mail o social media. *

18-19. Cosa puede ayuda contigo para pricura hace el cosa tu ya decidi maskin pa gendeh se facil hace?

¹⁸ Man focus na resulta. El resulta del de tuyu decision puede compara na un destinacion. Si quierre gayot tu llega na de tuyu destinacion, continua tu con el de tuyu viaje maskin pa cerrao el camino y necesita tu cambia de tuyu ruta. Na igual manera, si man focus kita na resulta del diaton decision, gendeh dayun kita descanza maskin pa tiene dificultad.​—Gal. 6:9.

¹⁹ Dificil hace buen decision y hace el cosa kita ya decidi. Pero na ayuda de Jehova, puede tu tiene sabeduria y fuerza para hace acaba el cosa tu ya principia.