1-2. (a) Asegun na Efeso 6:16, porque kita necesita fe que igual na un grande defensa? (b) Cosa maga pregunta kita considera?

TIENE ba tu fe que igual na un grande defensa o shield? (Le con el Efeso 6:16, El Nuevo Testamento.) Asigurao, tiene tu. Igual na un grande defensa que ta protege con el cuerpo, el de tuyu fe ta protege contigo na imoral, violente y bien malo influencia de este sistema de maga cosas.

² Pero, ta vivi kita na “ultimo maga dia” y pirmi ta pone na probanza con el diaton fe. (2 Tim. 3:1) Paquemodo tu chequia con el de tuyu fe para asigura que fuerte este? Y cosa tu hace para esta se fuerte? Considera kita el contestacion na ese maga pregunta.

3. Cosa ta hace el maga soldao con el diila maga defensa y porque?

³ Na tiempo del Biblia, mas mucho del defensa del maga soldao envolvido de cuero. Ta aceita sila con el diila defensa para preserva con el cuero y para gendeh man calawang el parte que tiene metal. Si ya puede mira el un soldao que tiene defecto el de suyu defensa, asigura le que compone con este para pirmi le preparao na guerra. Na cosa manera se puede aplica na de tuyu fe?

4. Porque tu debe chequia con el de tuyu fe y paquemodo tu se puede hace?

⁴ Igual na maga soldao de antes, debe tu regular chequia y mentena con el de tuyu fe para pirmi tu preparao na guerra. Como maga Cristiano, envuelto kita na un espiritual guerra  y contrario diaton el maga mal espiritu. (Ef. 6:10-12) Nuay otro quien puede mentena con el de tuyu fe para contigo. Paquemodo tu puede asigura que preparao tu enfrenta maga probanza? Una, debe tu reza para na ayuda del Dios. Despues, necesita tu usa con el Palabra del Dios para mira con el de tuyu cuerpo igual si paquemodo ta mira contigo el Dios. (Heb. 4:12) El Biblia ta habla: “Confia con Jehova con todo de tuyu corazon y no depende na de tuyu mismo entendimiento.” (Prov. 3:5, 6) Ahora, pensa con el maga reciente decision que ya hace tu. Por ejemplo, ya tiene ba tu grande problema na financial? Ya acorda ba tu con el promesa de Jehova na Maga Hebreo 13:5: “Gendeh yo contigo ay deja ni gendeh yo ay abandona contigo”? Ya dale ba se confianza contigo que ayuda contigo si Jehova? Si positivo de tuyu contestacion, ta dale se mira que na buen condicion el de tuyu fe.

5. Cosa tu posible puede discubri si chequia tu con el de tuyu fe?

⁵ Baka espanta tu na cosa tu puede discubri si chequia tu enbuenamente con el de tuyu fe. Siguro, puede tu realiza que tiene tu maga mal inclinacion que nuay tu puede nota por cuanto tiempo ya. Por ejemplo, posible puede tu discubri que tiene defecto el de tuyu fe por causa na sobra lingasa, imbusterias y maga cosas que ta causa luya. Si ya sucede este contigo, paquemodo tu protege con el de tuyu fe para gendeh este mas man luya?

6. Cosa el cuanto buen ejemplo de lingasa?

⁶ Tiene maga lingasa que bueno para kanaton. Por ejemplo, tan lingasa kita si paquemodo puede hace alegre con Jehova y con Jesus. (1 Cor. 7:32) Si ya comete kita serioso pecado, tan lingasa y quierre kita hace bira el diaton buen amistad con Dios. (Sal. 38:18) Malingasa tambien kita si paquemodo hace alegre con el diaton marido o mujer y si paquemodo cuida con el diaton familia y maga hermano y hermana na fe.​—1 Cor. 7:33; 2 Cor. 11:28.

7. Asegun na Proverbio 29:25, porque gendeh kita debe tiene miedo na maga gente?

⁷ Pero, el sobra lingasa puede hace luya con el diaton fe. Por ejemplo, baka pirmi kita malingasa cay nuay kita bastante comida y ropa. (Mat. 6:31, 32) Poreso, baka man focus kita na maga material cosas. Baka principia pa gane kita tiene amor na sen. Si permiti kita que sucede se kanaton, man luya el diaton fe con Jehova y hay queda malo el diaton relacion con ele. (Mar. 4:19; 1 Tim. 6:10) O baka bien malingasa kita si cosa ta pensa el otro acerca kanaton y quierre kita ganá con el diila favor. Poreso, baka mas tiene kita miedo que gangguia y persigui kanaton el maga gente contra hace maga cosas que gendeh ta hace alegre con Jehova. Para protege con el diaton cuerpo na este peligro, debe kita pidi con Jehova que dale kanaton fe y coraje para puede enfrenta con este dificultad.​—Le con el Proverbio 29:25; Luc. 17:5.

8. Cosa kita debe hace si ta habla kanaton imbusterias?

⁸ Si Satanas, el “tata del imbusterias,” ta usa con aquellos quien bajo na de suyu control para hace calayat maga imbusterias acerca con Jehova y con el diaton maga hermano y hermana na fe. (Juan 8:44) Por ejemplo, el maga apostata ta hace calayat imbusterias y falso informacion acerca na organizacion de Jehova na website, TV y otro media. Ese maga imbusterias incluido na maga “pana de fuego” de Satanas. (Ef. 6:16, El Nuevo Testamento) Cosa kita debe hace si ta habla kanaton ansina clase de imbusterias? Gendeh gayot kita oi  con ese! Porque? Cay tiene kita fe con Jehova y ta confia kita con el diaton maga hermano. Gane, ta evita kita con el todo clase de comunicacion na maga apostata. Gendeh gayot kita man debate kanila acerca na maskin cosa, maskin pa quierre lang kita sabe si cosa sila habla.

9. Cosa el resulta si man luya kita por causa na maga problema?

⁹ Si tiene kita problema, ta sinti kita luya. Como resulta, man luya tambien el diaton fe. El deverasan, gendeh kita puede ignora con el diaton maga problema. Gane, gendeh bueno que hace kita se. Pero, gendeh kita debe pensa pirmi con el diaton problema cay baka ulvida kita con el bonito esperanza que ya promete kanaton si Jehova. (Rev. 21:3, 4) Si sinti kita luya, posible que gendeh mas kita continua sirvi con Jehova. (Prov. 24:10) Pero, no kita permiti que sucede se kanaton.

10. Cosa tu ya aprende na carta que ya escribi el un hermana?

¹⁰ Considera si paquemodo el un hermana na United States ya puede mentena con el de suyu fe mientras ta cuida con el de suyu marido que bien enfermo. Na de suyu carta na headquarters, ya escribi le: “Bien maka-stress el diamon situacion y tan luya kame tiene vez. Pero, claro kanamon el diamon esperanza. Ta rindi gayot yo gracias con el todo que ta dale si Jehova para hace fuerte con el diamon fe y para anima kanamon. Necesita gayot kame este consejo. Ta ayuda este kanamon para continua sirvi con Jehova y aguanta maskin cosa probanza estaba con Satanas.” Ya aprende kita na comento de este hermana que puede siempre kita continua sirvi maskin pa tan luya kita. Paquemodo? Mira con el de tuyu problema como probanza estaba con Satanas. Confia que dale contigo comforta si Jehova y aprecia con el espiritual comida que ta dale le.

11. Para sabe si na buen condicion el diaton fe, cosa kita debe pregunta na diaton mismo cuerpo?

¹¹ Ta mira ba tu que necesita tu hace fuerte con el de tuyu fe na cuanto aspeto? Na reciente maga mes, ya puede ba tu evita sobra lingasa? Ya puede ba tu evita oi y man debate con  el maga apostata acerca na diila maga imbusterias? Y ya puede ba tu evita man luya maskin pa na maga problema? Si ya puede tu se hace, bueno el condicion del de tuyu fe. Pero, debe kita continua queda alerto cay ta usa si Satanas otro manera para hace luya kanaton. Considera kita con el uno de este.

12. Cosa sucede kanaton por causa na materialismo?

¹² El materialismo puede causa que perde el diaton focus y man luya el diaton fe. Si apostol Pablo ya habla: “El un gente ta queda un soldao, gendeh le ta man negocio, como un civilian, si quiere le hace alegre con aquel quien ya saca con ele.” (2 Tim. 2:4) Gane, nuay permiti con el maga soldao de Roma que hace otro trabajo. Cosa posible sucede si el un soldao ya ignora con ese direccion?

13. Porque gendeh debe man negocio el un soldao?

¹³ Imagina el ecsena. Un grupo de maga soldao el tan training entero aga para na guerra pero nuay el diila uno uban. Ese soldao ya anda na pueblo para vende comida. Ya llega el noche, el maga soldao ta chequia con el diila armadura y ta amula con el diila espada. Pero aquel un soldao, ocupao prepara comida para vende pagka-alamañana. Cuando ya llega el aga, ya ataca kanila el maga contrario. Quien soldao el mas preparao na guerra y ganá el favor del diila comandante? Y si talla tu na guerra, con quien tu quierre man junto​—con el soldao que preparao o con el uno quien ocupao na otro cosas?

14. Como maga soldao del Cristo, cosa el importante kanaton?

¹⁴ Igual kita con aquel maga buen soldao. El de con todo importante kanaton amo que ganá con el favor del diaton maga Comandante, si Jehova y el Cristo. Para kanaton, mas importante este si compara na maskin cosa que talli na mundo de Satanas. Ta asigura kita que tiene kita tiempo y fuerza para sirvi con Jehova y mentena con el buen condicion del diaton fe y el otro parte del diaton espiritual armadura.

15. Cosa aviso ya dale si Pablo y porque?

¹⁵ Debe kita pirmi esta alerto! Porque man?  Si apostol Pablo ya dale aviso que “aquellos quien quiere queda rico” hay “desaleja na fe.” (1 Tim. 6:9, 10) El palabra “desaleja” quierre decir que posible kita queda bien focus obtene el maga cosas que gendeh kita necesita. Como resulta, posible crici na diaton corazon el “todo clase de deseo loco y peligroso.” En vez de permiti que crici este maga deseo na diaton corazon, debe kita mira con este como maga cosas que ta hace luya con el diaton fe.

16. Cosa maga pregunta kita debe pensa si medita kita con el Marcos 10:17-22?

¹⁶ Pone kita que tiene kita sen para cumpra manada material cosas. Malo ba que cumpra kita maga cosas que quierre kita pero gendeh kita necesita? Gendeh man. Pero, pensa con este maga pregunta: Maskin pa puede kita cumpra con el un cosa, tiene ba kita el tiempo y fuerza para usa y mentena con ese? Posible ba que principia kita tiene grande amor con ese? Posible ba que el diaton amor na maga material cosas hay manda move kanaton para queda igual con el un jovencito quien nuay acepta con el invitacion de Jesus que hace mas na servicio con Dios? (Le con el Marcos 10:17-22.) Mas bueno para kanaton que vivi un simple vida y usa con el diaton tiempo y fuerza para hace con el voluntad del Dios.

17. Cosa kita gendeh debe ulvida?

¹⁷ Gendeh kita debe ulvida que entrao kita na un espiritual guerra y debe kita queda preparao cada dia. (Rev. 12:17) El diaton maga hermano y hermana gendeh puede carga con el diaton defensa para kanaton. Cada uno kanaton debe asigura que fuerte el diaton fe.

18. Porque el maga soldao de antes ta asigura que pirmi sila ta carga con el diila defensa?

¹⁸ Del antes, ta alaba con el un soldao si animoso le na guerra. Pero, maka-huya si bolbe le que nuay el de suyu defensa. El un Romano historiador, si Tacitus, ya escribi: “Bien maka-huya para na un soldao si ya deja le con el de suyu defensa.” Un razon se si porque debe asigura el maga soldao que ta carga sila con el diila defensa.

19. Paquemodo kita puede asigura que tiene kita fuerte fe?

¹⁹ Puede kita asigura que tiene kita fuerte fe si regular kita atende miting y si habla kita con otro acerca na nombre de Jehova y acerca na de suyu Reino. (Heb. 10:23-25) Mas pa, le kita con el Palabra del Dios cada dia y reza que ayuda kanaton si Jehova aplica el de suyu consejo y direccion na todo cosa kita hace. (2 Tim. 3:16, 17) Como resulta, gendeh gayot kanaton puede causa si Satanas permanente peligro maskin cosa armas pa le usa. (Isa. 54:17) El diaton fuerte fe hay protege kanaton. Con coraje kita hace el diaton trabajo junto con el diaton maga hermano y hermana. Gendeh lang kita ganá con el guerra que tiene kita cada dia. Sino, hay tiene kita el privilegio que esta na lao de Jesus mientras ta ganá le na guerra contra con Satanas y na de suyu maga siguidores.​—Rev. 17:14; 20:10.