NA TIEMPO del Biblia, el un encargao amo el ta cuida con el casa o propiedad del otro persona. El Hebreo y Griego palabra que yan translate “encargao” puede refiri con el quien ta mira o ta cuida con el casa.

Cuando si Jose, el anak del patriarca que si Jacob, ya queda esclavo na Egipto, ele el quien ya mira con el casa del de suyu amo. Gane, el de suyu Egipcio amo ya deja “na cuidada de Jose el todo cosa le tiene.” (Gen. 39:2-6) Y na uliji, cuando ya queda un poderoso lider na Egipto si Jose, ya iscuji le un persona con quien le ya encarga con el de suyu mismo casa.​—Gen. 44:4.

Na tiempo de Jesus, el maga dueño del tierra ta queda na maga ciudad que lejos na diila maga sementera. Poreso, ya iscuji sila maga encargao quien puede mira con el todo’l dia trabajo del maga quien ta trabaja na sementera.

Quien el cualificao sirvi na este posicion? El un Romano escritor del primer siglo, si Columella, ya habla que el esclavo quien queda encargao debe “experienciao na trabajo.” Debe un persona le que “ta trabaja enbuenamente y gendeh violente.” Ele ya omenta: “Mas pa na todo, gendeh le debe pensa que sabe ya le todo y debe interesao le aprende maga nuevo cosas.”

El Palabra del Dios ya usa el ejemplo del un encargao para ilustra con el cuanto trabajo na Cristiano congregacion. Por ejemplo, ya anima si apostol Pedro con el maga Cristiano que usa con el diila maga abilidad que ya dale el Dios “para el provecho de los demas” como maga buen esclavo del incomparable pagka-bueno del Dios.​—1 Ped. 4:10.

Ya usa tambien si Jesus el ejemplo del un encargao na de suyu ilustracion na Lucas 16:1-8. Omento pa, na profecia acerca na de suyu presencia como Rey, ya asigura si Jesus con el de suyu maga siguidores que iscuji le “fiel y sabio esclavo” o “encargao.” El primer assignment de este esclavo amo dale espiritual comida na maga siguidores del Cristo durante del ultimo maga dia. (Mat. 24:45-47, NWT; Luc. 12:42) Ta aprecia gayot kita que uno kita de aquellos quien ta beneficia na maga publicacion que ta prepara este fiel esclavo y ta distribui na entero mundo.