1-2. (a) Cosa ta ayuda kanaton para puede continua cada dia maskin pa ta enfrenta probanza? Explica. (b) Cosa kita considera na este articulo?

“SI TA acorda yo con el maga probanza que ya experiencia yo, sabe yo que gendeh yo quel puede enfrenta si solo-solo lang.” Manada kanaton el ya puede ya habla igual ansina. Posible, ya puede tu se habla despues tu pensa si paquemodo tu ya puede enfrenta con el un grabe enfermedad o muerte na familia. Si ta pensa tu con ese, ta sinti tu que puede lang tu continua cada dia por causa na “grande poder” que ta dale el sagrao espiritu de Jehova.​—2 Cor. 4:7-9.

² Necesita tambien kita con el sagrao espiritu para ayuda kanaton resisti con el influencia de este mal mundo. (1 Juan 5:19) Mas pa, necesita kita fuerza para man contra na “maga espiritu malo.” (Ef. 6:12) Discuti kita ahora con el dos manera que el sagrao espiritu ta ayuda kanaton enfrenta con este maga problema. Despues, discuti kita si cosa kita puede hace para mas beneficia na sagrao espiritu del Dios.

3. Cosa el un manera que ta ayuda kanaton si Jehova enfrenta con el maga probanza?

³ El sagrao espiritu de Jehova ta dale kanaton poder o fuerza para cumpli con el diaton maga responsibilidad, maskin pa na maga probanza. Sabe si apostol Pablo que ya puede lang le continua sirvi con Jehova cay ya confia le con “el poder de Cristo.” (2 Cor. 12:9) Durante del de suyu segundo viaje como misionario, nuay lang le predica sino ya trabaja tambien le para puede suporta con el de suyu mismo cuerpo. Ya esta le na Corinto na casa de Aquila y Priscila quien ta hace maga tolda. Ciendo sabe tambien si Pablo hace tolda, ya trabaja le junto kanila por cuanto dia. (Act. 18:1-4) El sagrao espiritu ya dale con Pablo el fuerza para  puede hace con el de suyu secular trabajo y cumpli con el de suyu ministerio.

4. Asegun na 2 Corinto 12:7-9, cosa probanza ya enfrenta si Pablo?

⁴ Le con el 2 Corinto 12:7-9, El Nuevo Testamento. Cosa quierre decir de Pablo cuando ya habla le que tiene le “tunuk na pellejo”? Si tiene tu tunuk na cuerpo, asigurao sinti tu duele. Poreso na este texto, ta habla si Pablo que ta enfrenta le un probanza que ta causa con ele dolor. Ya llama le con este probanza “como mensajero di Satanas” que ta “hace sufri” con ele. Posible, gendeh si Satanas o el de suyu maga demonio el ya pone con ese tunuk na pellejo o ya causa con el probanza de Pablo. Pero cuando ya puede nota el maga mal espiritu con ese “tunuk,” posible ya pichi pa sila con ese o ya hace agraba el dolor de Pablo. Cosa ya hace si Pablo?

5. Paquemodo ya contesta si Jehova con el rezo de Pablo?

⁵ Del primero, quierre si Pablo que quita si Jehova con ese “tunuk.” Ele ya habla: “Ya pidi yo favor con Dios na mi rezo tres veces, para quita ese dolencia na mi cuerpo.” Pero, maskin pa ya reza si Pablo, nuay siempre perde el tunuk na de suyu pellejo. Quierre decir ba de este que nuay contesta si Jehova con el de suyu rezo? Gendeh. Ya contesta si Jehova con el de suyu rezo. Nuay quita si Jehova con el problema pero ya dale le fuerza con Pablo para aguanta con ese. Si Jehova ya habla: “Si nuay mas tu poder y fuerza, bien claro ya gayot puede tu mira el di mio poder para sostene contigo.” (2 Cor. 12:8, 9, El Nuevo Testamento) Y na ayuda del Dios, ya puede mentena si Pablo con el de suyu alegria y ya esta calmao!​—Fil. 4:4-7.

6. (a) Paquemodo posible contesta si Jehova con el diaton rezo? (b) Cosa promesa estaba na maga texto na este parapo el ta dale contigo fuerza?

⁶ Igual con Pablo, ya reza ya ba tu con Jehova que quita con el de tuyu probanza? Posible, cuanto beses tu ya reza con Jehova pero nuay siempre se perde o mas ya queda pa gane grabe. Ya puede ba tu pensa que baka rabiao contigo si Jehova? Si ansina, acorda con el ejemplo de Pablo. Igual si paquemodo ya contesta si Jehova con el rezo de Pablo, hay contesta tambien Le con el de tuyu rezo! Posible que gendeh quita si Jehova con el problema. Pero por medio del sagrao espiritu, hay dale le contigo el fuerza que necesita tu para puede aguanta con el de tuyu probanza. (Sal. 61:3, 4) Maskin pa “gulpiao y tumbao” tu, si Jehova gendeh gayot deja contigo.​—2 Cor. 4:8, 9; Fil. 4:13, NWT.

7-8. (a) Na cosa manera el sagrao espiritu igual na viento? (b) Cosa expresion ya usa si Pedro cuando ya habla le si paquemodo ta move el sagrao espiritu?

⁷ Cosa el otro manera que ta ayuda kanaton el sagrao espiritu? Igual si paquemodo el viento que ta supla na justo direccion ta puede move con el barco para llega na destinacion maskin pa malo el tiempo, el sagrao espiritu ta ayuda kanaton para puede kita continua sirvi con Jehova maskin pa na maga probanza hasta llega kita na de suyu nuevo mundo.

⁸ Como un pescador, manada cosa sabe si apostol Pedro acerca na viaje na mar. Poreso, ya usa le un expresion que conectao con ese cuando ya habla le si paquemodo ta move el sagrao espiritu. Ele ya escribi: “Noay ni un palabra del maga profeta que ya sale na querer del gente. El Espiritu Santo [“sagrao espiritu,” NWT] amo el ya manda canila conversa por parte de Dios.” El Griego palabra que yan translate “ya manda” literal quierre decir “ya lleva.”​—2 Ped. 1:21.

9. Cosa quierre manda pensa si Pedro cuando ya escribi le que el sagrao espiritu “ya manda” con el maga escritor del Biblia?

⁹ Cosa quierre manda pensa si Pedro cuando  ya usa le el expresion “ya lleva”? El quien ya escribi con el Maga Actividad, si Lucas, ya usa tambien con ese Griego palabra cuando ya habla le que el barco ‘yan anud’ por causa na viento. (Act. 27:15) El un scholar del Biblia ya habla que cuando ya escribi si Pedro que el sagrao espiritu “ya manda” con el maga escritor del Biblia, ya usa le un expresion que manda pensa con el maga gente acerca na viaje na mar. Si Pedro dol ta habla que igual si paquemodo el barco ta sigui na viento para llega na destinacion, el maga profeta y escritor del Biblia ta sigui tambien con el sagrao espiritu para cumpli con el diila trabajo. Ese scholar ya habla tambien que el maga escritor del Biblia dol maga barco que “abierto el telon.” Preparao sila hace con el trabajo que ya manda kanila el sagrao espiritu. Ya hace si Jehova el de suyu parte. Ya dale le “el viento” o el sagrao espiritu. Ya hace tambien el maga escritor del Biblia el diila parte. Ya sigui sila na direccion del sagrao espiritu.

10-11. Cosa el dos cosas que necesita kita hace para asigura que guia kanaton el sagrao espiritu? Dale ejemplo.

¹⁰ Siempre, gendeh ya ta usa si Jehova con el maga gente ahora para escribi con el Biblia. Pero, ta usa siempre si Jehova con el de suyu sagrao espiritu para guia con el de suyu maga siervo. Ta hace lang siempre si Jehova con el de suyu parte. Cosa kita hace para beneficia na sagrao espiritu del Dios? Debe kita asigura que ta hace kita el diaton parte. Paquemodo kita hace con ese?

¹¹ Considera con este ejemplo. Para beneficia na viento, el un persona debe hace dos cosas. Una, debe le pone con el de suyu bangca onde ta supla el viento cay gendeh move el bangca si esta lang este na aplaya donde nuay viento. Ika-dos, necesita le abri con el de suyu telon. Siempre, maskin pa tiene viento, move lang el bangca si tupa el viento na entero telon. Na igual manera, puede lang kita continua sirvi con Jehova na ayuda del sagrao espiritu. Para puede kanaton ayuda ese espiritu, necesita  kita hace dos cosas. Una, debe kita hace el maga cosas que ya manda el espiritu del Dios que hace kita. Ika-dos, debe kita hace el todo para puede hace con este maga cosas. (Sal. 119:32) Si hace kita con este, el sagrao espiritu hay dale kanaton el fuerza para continua sirvi con Jehova maskin pa na maga probanza hasta llega kita na nuevo mundo del Dios.

12. Cosa kita discuti ahora?

¹² Ya discuti kita con el dos manera si paquemodo ta ayuda kanaton el sagrao espiritu. El sagrao espiritu ta dale kanaton fuerza y ta ayuda kanaton esta fiel maskin pa na maga probanza. Ta guia y ta ayuda tambien este kanaton para puede kita hace con el trabajo que ya manda kanaton si Jehova que hay resulta na vida hasta para cuando. Ahora, discuti kita con el cuatro cosas que debe kita hace para mas beneficia na sagrao espiritu.

13. Asegun na 2 Timoteo 3:16, 17, cosa puede hace el Escritura para kanaton pero cosa kita debe hace?

¹³ Una, estudia con el Palabra del Dios. (Le con el 2 Timoteo 3:16, 17.) Ya usa el Dios con el de suyu espiritu para pone con el de suyu pensamiento na pensamiento del maga escritor del Biblia. Si le kita con el Biblia y medita con ese, hay entra na diaton pensamiento y corazon el maga instruccion del Dios. Como resulta, manda este move kanaton para hace maga cambio que uyun na voluntad del Dios. (Heb. 4:12) Pero para mas beneficia na sagrao espiritu, debe kita dale tiempo para regular estudia con el Biblia y medita con el cosa kita ya le. Y despues, el Palabra del Dios hay influencia na cosa kita ta habla y ta hace.

14. (a) Porque kita puede habla que el sagrao espiritu presente na diaton maga miting? (b) Cosa kita hace para mas beneficia na sagrao espiritu na maga miting?

¹⁴ Ika-dos, junto adora con Dios. (Sal. 22:22) El espiritu de Jehova presente na diaton maga miting. (Rev. 2:29) Porque kita se puede habla? Cay si tan junto-junto kita con el diaton maga hermano y hermana, ta reza kita para na sagrao espiritu, ta canta kita maga cancion que base na Palabra del Dios y ta oi kita con el instruccion que base na Biblia del maga hermano con quien ya iscuji el sagrao espiritu. El sagrao espiritu ta ayuda tambien con el maga hermana para prepara y dale con el diila maga parte na congregacion. Pero para mas beneficia kita na sagrao espiritu, necesita kita prepara para puede participa na maga miting. Si hace kita se, preparao kita ricibi sagrao espiritu na maga miting igual con el un bangca que abierto el telon.

15. Paquemodo kanaton ayuda el sagrao espiritu na trabajo predicacion?

¹⁵ Ika-tres, predica. Si ta usa kita con el Biblia na trabajo predicacion y enseñada, ta permiti kita que ayuda kanaton el sagrao espiritu na ministerio. (Roma 15:18, 19) Pero para mas beneficia na sagrao espiritu del Dios, debe tu queda regular na trabajo predicacion y usa pirmi con el Biblia si posible. Un manera que queda tu mas efectivo na ministerio amo si sigui tu con el maga sampol discusion na Vida y Ministerio Workbook.

16. Cosa el de con todo directa manera para puede obtene sagrao espiritu?

¹⁶ Ika-cuatro, reza con Jehova. (Mat. 7:7-11; Luc. 11:13) El de con todo directa manera para puede obtene sagrao espiritu amo que pidi este con Jehova por medio na rezo. Nuay cosa puede sangga con el diaton rezo o con el sagrao espiritu para llega kanaton. Ayuda kanaton el sagrao espiritu maskin pa na preso kita y nuay cosa puede hace maskin si Satanas. (Sant. 1:17) Paquemodo kita reza para mas beneficia na sagrao espiritu? Para contesta se, aprende kita acerca na rezo  estaba na ilustracion que ya menciona lang na Evangelio de Lucas. *

17. Cosa leccion acerca na rezo el puede kita aprende na ilustracion de Jesus na Lucas 11:5-9, 13?

¹⁷ Le con el Lucas 11:5-9, 13. Ta dale mira na ilustracion de Jesus si paquemodo kita debe reza para na sagrao espiritu. Na ilustracion, ya ricibi el gente el cosa le necesita “cay azarante” le. Nuay le tiene miedo pidi ayuda con el de suyu amigo maskin pa bien denoche ya. * Cosa ya enseña si Jesus acerca na rezo base na ese ilustracion? Ele ya habla: “Pidi ustedes y ay recivi; busca y ay encontra; hace tuk-tuk y ay abri con ustedes.” Cosa leccion kita puede saca? Para ricibi el ayuda del sagrao espiritu, debe kita continua reza para con ese.

18. Base na ilustracion de Jesus, porque kita puede asigura que dale kanaton sagrao espiritu si Jehova?

¹⁸ El ilustracion de Jesus ta ayuda tambien kanaton mira si porque dale kanaton sagrao espiritu si Jehova. El gente na ilustracion quierre gayot sirvi con el de suyu visita. Ya sinti le que necesita le dale comida con el de suyu visita pero nuay le cosa puede dale con ele. Si Jesus ya habla que el vecinos ya dale pan con el gente cay pidi que pidi este. Cosa ta enseña si Jesus? Si el un imperfecto gente gane conforme ayuda con el de suyu vecinos quien ta continua pidi, puede kita asigura que el diaton amable Tata na cielo hay ayuda con aquellos quien ta continua pidi con ele sagrao espiritu! Poreso, puede kita asigura que dale kanaton sagrao espiritu si Jehova si pidi kita con ele na rezo.​—Sal. 10:17; 66:19.

19. Porque kita puede asigura que puede kita aguanta na maga probanza?

¹⁹ Puede kita asigura que maskin pa na ataque de Satanas, puede siempre kita aguanta na maga probanza. Porque? Cay el sagrao espiritu ta ayuda kanaton na dos manera. Una, ta dale este fuerza kanaton para puede kita enfrenta con el maga probanza. Ika-dos, ta ayuda este kanaton para puede kita continua sirvi con Jehova hasta llega kita na nuevo mundo. Ojala determinao kita hace el todo para mas beneficia na sagrao espiritu del Dios!