1. Asegun na Mateo 28:18-20, cosa ya manda si Jesus na de suyu maga dicipulo?

DESPUES con Jesus resucita, ya aparece le con el de suyu maga dicipulo quien yan junto-junto na Galilea. Tiene le importante cosa ya habla kanila. Cosa este? El de suyu maga palabra puede incuntra na Mateo 28:18-20.​—Le.

2. Cosa maga pregunta kita hay considera?

² El mandamiento de Jesus que hace maga dicipulo aplicable tambien na maga siervo del Dios ahora. Poreso, hay considera kita con el tres pregunta que tiene que hace con el assignment que ya dale si Jesus kanaton. Una, puera que enseña con el maga nuevo dicipulo el maga mandamiento del Dios, cosa pa kita debe hace? Ika-dos, paquemodo el todo publisher na congregacion puede ayuda con el maga Bible study progresa na espiritual? Ika-tres, paquemodo kita ayuda con el maga gendeh activo para hace otravez maga dicipulo?

3. Cosa maga especifico instruccion el incluido na cosa ya manda si Jesus?

³ Claro el maga instruccion de Jesus. Debe kita enseña na maga gente el maga cosa que ya manda le. Pero, gendeh kita debe ulvida con el un importante punto. Nuay habla si Jesus: ‘Enseña kanila el todo cosas que ya manda yo con ustedes.’ Sino, ele ya habla: Enseña kanila para “obedece todo el que ya manda yo con ustedes.” Para aplica con ese especifico instruccion si ta enseña con el un Bible study, gendeh lang kita enseña con ele, sino necesita tambien kita guia con ele. (Act. 8:31) Porque kita necesita hace con ese?

4. Ilustra si paquemodo kita puede enseña con el un Bible study para obedece con el mandamiento del Cristo.

 ⁴ Paquemodo kita ayuda con el un persona para obedece con el maga mandamiento del Cristo? El siguiente ejemplo puede ayuda kanaton entende si cosa kita necesita hace. Paquemodo el un instructor de manejada puede ayuda con el de suyu maga estudiante para obedece con el maga ley de trafico? Una, hay enseña el instructor con el de suyu estudiante el maga ley que debe le obedece na camino. Pero, para enseña con el de suyu estudiante si paquemodo obedece con ese maga ley, tiene pa le cosa necesita hace. Debe le sigui con el de suyu estudiante para guia con ele mientras ta maneja y pruba aplica con el maga cosas que ya aprende le. Cosa kita puede aprende na ese ejemplo?

5. (a) Asegun na Juan 14:15 y 1 San Juan 2:3, cosa kita necesita enseña con el diaton maga Bible study que hace? (b) Dale maga ejemplo si paquemodo kita guia con el diaton maga Bible study.

⁵ Si ta estudia kita con el Biblia junto con otro, ta enseña kita kanila si cosa el Dios quierre que hace kita. Pero mas pa con ese el debe kita hace. Debe kita enseña con el diaton maga Bible study que aplica con el cosa sila ya aprende na diila vida. (Le con el Juan 14:15; 1 San Juan 2:3.) Por ejemplo, puede kita enseña con el diaton maga Bible study si paquemodo sila aplica con el maga importante principio na Biblia na escuela, na trabajo o durante el recreacion. Puede kita relata diaton mismo experiencia si paquemodo kita ya aplica con el direccion na Biblia que ya protege kanaton desde na peligro o si paquemodo este ya ayuda kanaton para hace justo decision. Junto con el diaton Bible study, puede kita reza con Jehova y pidi que guia con ele el sagrao espiritu.​—Juan 16:13.

6. Cosa kita necesita hace si ta enseña con otro para obedece con el maga mandamiento de Jesus?

⁶ Cosa kita necesita hace si ta enseña con otro para obedece con el maga mandamiento de Jesus? Necesita kita ayuda con el diaton maga Bible study que tiene el deseo para hace maga dicipulo. Para na cuanto maga Bible study, posible tiene sila miedo predica. Necesita kita queda paciencioso si ta ayuda kanila hace entende con el maga verdad na Biblia para puede sila tiene fuerte fe. Si alcanza este na diila corazon, hay manda este move kanila para predica. Cosa kita puede hace para ayuda con el maga Bible study para tiene el deseo que predica con el buen noticia?

7. Paquemodo kita puede ayuda con el Bible study para tiene el deseo que predica con el buen noticia con otro?

⁷ Puede kita pregunta con el diaton maga Bible study igual como: “Paquemodo ya queda mas enbuenamente el de tuyu vida cay ya aplica tu con el cosa ta enseña el Biblia? Para contigo, necesita ba tambien este sabe el otro? Cosa tu puede hace para ayuda kanila?” (Prov. 3:27; Mat. 9:37, 38) Dale mira con el de tuyu Bible study con el maga tract na diaton Teaching Toolbox y manda con ele iscuji si onde el ta mira le que hay gusta el de suyu maga pariente, amigo o uban na trabajo. Dale con el Bible study con el cuanto de ese maga tract. Man practice junto con ele si paquemodo le puede dale con el tract na enbuenamente manera. Siempre si unbaptized publisher ya el diaton Bible study, necesita kita predica junto con ele para puede ayuda con ele.​—Ecl. 4:9, 10; Luc. 6:40.

8. Porque importante para na diaton Bible study que tiene hondo amor para con Dios y para na projimo? (Mira con el cajon “ Si Paquemodo Ayuda con el Bible Study Para Hace Hondo el Amor con Dios.”)

⁸ Acorda que si Jesus ya manda kanaton que enseña con otro para “obedece todo” el maga cosas que ya manda le. Incluido alli el dos de  con todo importante mandamiento​—el amor con Dios y el amor para na projimo. Este dos tiene coneccion na trabajo predicacion y hacida de maga dicipulo. (Mat. 22:37-39) Cosa el coneccion? El primer razon si porque kita ta predica amo el amor​—amor para con Dios y amor para na projimo. Posible, tiene miedo predica el cuanto Bible study. Pero puede kita asigura kanila que na ayuda de Jehova, puede sila hinay-hinay quita con el miedo na gente. (Sal. 18:1-3; Prov. 29:25) El cajon na este articulo ta habla si cosa kita necesita hace para ayuda con el diaton Bible study que tiene hondo amor con Dios. Omento pa, paquemodo puede ayuda el congregacion con el Bible study para dale mira amor?

9. Na ilustracion acerca na estudiante de manejada, paquemodo el estudiante puede aprende maga importante leccion?

⁹ Pensa otravez con el ilustracion acerca con el estudiante de manejada. Mientras ta maneja le junto con el de suyu instructor, paquemodo el estudiante ta aprende? Si oi le con el de suyu instructor y observa le con el otro quien ta maneja enbuenamente. Por ejemplo, posible el instructor hay insiña con el otro driver quien ta dale camino con otro para man una adelante con ele. O posible hay insiña le con el un driver quien ta menora con el de suyu luz para gendeh man silao el otro driver. Ese ejemplo puede enseña con el estudiante maga importante leccion que ayuda si ta maneja le.

10. Cosa puede ayuda con el maga Bible study para progresa na espiritual?

¹⁰ Na igual manera, el un Bible study quien ta principia viaja na camino para na vida, ta aprende gendeh lang con el quien con ele ta enseña, sino na maga buen ejemplo tambien del maga siervo de Jehova. Poreso, cosa puede ayuda con el maga Bible study para progresa na espiritual? El atendida na diaton maga miting. Porque? El cosa sila puede oi na maga miting hay ayuda kanila para aprende mas, hace fuerte el diila fe y ayuda kanila para queda hondo el diila amor para con Dios. (Act. 15:30-32) Mas pa, na maga miting, el quien ta enseña con el Bible study puede con ele manda conoce na maga hermano y hermana quien tiene cosa semejante con ele. Cosa maga buen ejemplo el puede mira el Bible study na maga hermano y hermana quien ta dale mira amor na congregacion? Considera con el siguiente ejemplo.

11. Cosa maga ejemplo posible nota el Bible study na congregacion y cosa posible el efecto de este kanila?

¹¹ El un Bible study quien solo ta hace engranda con el de suyu anak ya observa con el un hermana que semejante el situacion con ele. Ya puede gayot anima con el Bible study cuando ya puede le mira con el esfuerzo que ya hace el hermana para atende na maga miting junto con el de suyu maga diutay anak. El un Bible study quien ta pricura quita con el pumada ya puede conoce con el un publisher que ya enfrenta semejante dificultad pero ya puede quita con ese. El publisher ya habla con el Bible study si paquemodo el de suyu amor para con Jehova ya manda con ele move para obedece con el maga mandamiento del Dios. (2 Cor. 7:1; Fil. 4:13, NWT) Despues oi con el experiencia del publisher, mas ya tiene confianza el Bible study cuando ya habla el hermano con ele, “Puede tambien tu quita con el pumada.” El un joven mujer quien tan Bible study ya nota con el joven hermana quien alegre na de suyu vida como un Witness. Cuando ya mira el Bible study si paquemodo de alegre el joven hermana, ya manda este con ele move para sabe si porque pirmi alegre el hermana.

12. Porque kita puede habla que tiene papel el cada uno na congregacion para ayuda con el maga Bible study?

¹² Si el Bible study puede conoce con el otro-otro fiel publisher, puede sila aprende na diila  ejemplo si paquemodo obedece con el mandamiento del Cristo que ama con Dios y con el projimo. (Juan 13:35; 1 Tim. 4:12) Mas pa, como cosa ya kita ya discuti, el un Bible study puede aprende na maga publisher quien ta enfrenta maga dificultad que semejante na cosa le ta enfrenta. Puede aprende el Bible study na ese maga ejemplo que puede le hace maga necesita cambio para queda un dicipulo del Cristo. (Deut. 30:11) El cada uno na congregacion tiene cosa puede ayuda para progresa el Bible study na espiritual. (Mat. 5:16) Cosa maga esfuerzo tu ta hace para anima con el Bible study quien ta atende na maga miting?

13-14. Paquemodo ya trata si Jesus con el de suyu maga apostoles cuando ya queda sila maluya?

¹³ Quierre kita ayuda con el diaton maga hermano y hermana quien ya queda gendeh activo para predica y hace maga dicipulo otravez. El manera si paquemodo ya trata si Jesus con el de suyu maga apostoles quien ya queda maluya ta dale mira si cosa kita puede hace ahora.

¹⁴ Na fin del ministerio de Jesus cuando cerca ya con ele mata, el maga apostoles “ya abandona con ele y ya escapa.” (Mar. 14:50; Juan 16:32) Paquemodo ya trata si Jesus con el de suyu maga apostoles cuando temporario sila ya queda maluya? Cuanto dia despues con ele resucita, si Jesus ya habla con el cuanto del de suyu maga siguidores: “No tene miedo. Anda avisa con mi maga hermano [que ya resucita ya conmigo].” (Mat. 28:10a) Nuay abandona si Jesus con el de suyu maga apostoles. Maskin pa ya deja sila con ele, ya llama le siempre kanila “mi maga hermano.” Igual con Jehova, lastimoso si Jesus y ta perdona.​—2 Rey 13:23.

15. Cosa kita ta sinti con aquellos quien ya descanza participa na ministerio?

¹⁵ Na igual manera, ta ama gayot kita con el diaton maga hermano y hermana quien ya descanza participa na ministerio. Ta acorda kita siempre con el trabajo que ya hace este maga hermano y hermana para con Jehova​—el cuanto kanila ya sirvi por cuanto decada. (Heb. 6:10) Tan miss kita kanila! (Luc. 15:4-7) Igual con Jesus, na cosa manera kita puede dale mira que ta ama gayot kita kanila?

16. Paquemodo kita dale mira que ta ama kita con el diaton maga hermano y hermana quien ya queda gendeh activo?

¹⁶ Invita kanila na maga miting. El un manera que ya anima si Jesus con el de suyu maga apostoles amo cuando ya invita le kanila na un miting. (Mat. 28:10b; 1 Cor. 15:6) Na igual manera, puede kita anima con el maga gendeh activo que atende na maga miting na congregacion. Sabe kita que posible necesita kita invita kanila cuanto beses antes sila atende. Asigurao ya queda gayot alegre si Jesus cuando ya acepta el maga dicipulo con el de suyu invitacion.​—Compara na Mateo 28:16 y Lucas 15:6.

17. Cosa kita hace si tiene gendeh activo el ya anda na Kingdom Hall?

¹⁷ Sincero man welcome kanila. Ya manda sinti si Jesus con el de suyu maga dicipulo que alegre le mira kanila. Nuay le espera que atraca sila con ele, sino ya hace le manera para man cuento kanila. (Mat. 28:18) Cosa kita hace si tiene gendeh activo el ya anda na Kingdom Hall? Debe kita hace manera para man welcome con ele. Posible, tan lingasa kita cay no sabe kita cosa habla. Pero, puede kita habla con ele si paquemodo kita de alegre mira con ele na manera que gendeh le tiene huya.

18. Paquemodo kita puede anima con el maga gendeh activo?

¹⁸ Anima kanila. Posible ya sinti el maga dicipulo de Jesus que gendeh sila puede predica na entero mundo. Para anima con el de suyu maga siguidores, si Jesus ya habla: “Esta yo junto  con ustedes todo el dia.” (Mat. 28:20) Ya puede ba se ayuda con el de suyu maga dicipulo? Si. Despues de aquel, ya queda sila bien ocupao “insiña y anuncia . . . el Buen Noticia.” (Act. 5:42) Necesita tambien anima con el maga gendeh activo. Posible, tiene sila miedo predica otravez. Puede kita anima kanila que gendeh sila hay predica solo. Si preparao ya sila, puede kita sigui kanila na ministerio. Asigurao, hay aprecia gayot sila con el diaton suporta mientras ta principia sila otravez predica con el buen noticia. Si mira kita y trata con el maga gendeh activo como diaton maga hermano y hermana, puede kita mira maga buen resulta que ta hace alegre con el congregacion.

19. Cosa kita quierre y porque?

¹⁹ Hasta cuando kita debe continua hace maga dicipulo? Hasta na fin de este sistema de maga cosas. (Mat. 28:20; mira con el Glossary, “Conclusion of the system of things.”) Puede ba kita cumpli con el cosa ya manda si Jesus kanaton? Determinao kita hace con ese! Alegre kita dale con el diaton tiempo, fuerza y material cosas para busca con aquellos quien “tiene justo condicion de corazon para obtene vida eterna.” (Act. 13:48, NWT) Si ta hace kita se, ta sigui kita con el ejemplo de Jesus. Ele ya habla: “El dimio comida amo cumpli el voluntad de Aquel quien ya imvia conmigo y hace acaba el disuyo trabajo.” (Juan 4:34; 17:4) Amo tambien este el cosa kita quierre. Quierre kita hace acaba con el trabajo que ya dale kanaton. (Juan 20:21) Quierre kita que el todo, incluido el maga gendeh activo, hay aguanta na este trabajo junto kanaton.​—Mat. 24:13.

20. Asegun na Filipo 4:13, porque kita puede cumpli con el trabajo que ya manda si Jesus?

²⁰ Siempre, gendeh facil hace con el mandamiento de Jesus. Pero gendeh kita solo ta hace con este trabajo. Ya promete si Jesus que man junto le kanaton. Ta hace kita maga dicipulo como maga “trabajador de Dios” y “unido con Cristo.” (1 Cor. 3:9; 2 Cor. 2:17) Poreso, puede kita hace con ese. Un grande privilegio gayot que cumpli con ese assignment y ayuda tambien con otro para hace con ese!​—Le con el Filipo 4:13, NWT.