1-2. Paquemodo kita aplica con el consejo na Proverbio 4:25? Dale ejemplo.

IMAGINA con este maga situacion. El un de edad hermana ta pensa con el maga buen cosas que ya pasa de antes. Maskin pa mas dificil ya el de suyu vida ahora, ta continua le hace con el todo le cosa puede hace para con Jehova. (1 Cor. 15:58) Todo el dia ta imagina le con el de suyu mismo cuerpo junto con el de suyu familia y maga amigo que ta vivi na nuevo mundo. El otro hermana ya acorda que ya sinti le duele na cosa ya hace el otro na congregacion pero nuay mas le man sentimiento. (Col. 3:13) El un hermano ya acorda con el maga kamali ya hace le del antes pero ahora tan focus le si paquemodo esta fiel con Jehova.—Sal. 51:10.

² Cosa semejante na este tres Cristiano? Todo sila ta acorda con el cosa ya sucede del antes pero gendeh sila pirmi ta pensa con ese. En vez, ‘ta mira sila adelante’ na futuro.—Le con el Proverbio 4:25.

3. Porque necesita kita “mira adelante” na futuro?

³ Porque importante que ‘mira kita adelante’ na futuro? Igual si paquemodo el un persona gendeh puede camina derecho si pirmi le ta bira cara, gendeh tambien kita puede hace el todo na servicio con Jehova si pirmi kita ta pensa con el cosa ya sucede del antes.—Luc. 9:62.

4. Cosa kita discuti na este articulo?

⁴ Na este articulo, hay discuti kita con el tres trampa que puede causa kanaton para pirmi pensa con el cosa ya pasa del antes. Este amo: (1) el sentido que mas bueno el de antes, (2) sentimiento y (3) sentido que sobra de culpable. Na cada situacion, hay mira kita si paquemodo el maga principio na Biblia puede ayuda kanaton para gendeh man focus na “maga cosas que ya pasa ya antes,” sino na “maga cosas que nuay pa pasa.”—Fil. 3:13, El Nuevo Testamento.

5. Cosa ya habla el Eclesiastes 7:10 que gendeh kita debe hace?

⁵ Le con el Eclesiastes 7:10. Nota que nuay habla este texto que gendeh justo pregunta: “Porque bueno el de antes?” Regalo estaba con Jehova que ta puede kita acorda con el maga buen cosas que ya sucede del antes. Sino, asegun na texto: “No habla, ‘Porque mas bueno pa de antes contra ahora?’” Poreso, gendeh kita debe compara con el diaton vida de antes na diaton vida ahora y pensa que bien umalin el diaton presente situacion ahora.

6. Porque gendeh justo que pirmi pensa que mas bueno el diaton vida de antes? Dale ejemplo.

⁶ Porque gendeh justo que pirmi pensa que mas bueno el diaton vida del antes? Cay posible este causa kanaton para acorda con el maga buen cosas lang que ya sucede del antes y ulvida con el maga dificultad que ya enfrenta kita. Considera por ejemplo con el maga Israelita del antes. Despues sale na Egipto, ya ulvida dayun sila si paquemodo de dificil el diila vida alla. En vez, yan focus sila na maga sabroso comida que ya come sila. Ya habla sila: “Fresco pa na diamon pensamiento el maga pescao que libre kame ta come na Egipto, pati el maga pipino, pakwan, cebollas, cebollon y ajos!” (Num. 11:5) Pero, “libre” lang ba gayot el maga comida alla? Gendeh. Ya sufri gayot el maga Israelita cuando talla sila. Ya queda sila maga esclavo na Egipto. (Ex. 1:13, 14; 3:6-9) Pero ya ulvida lang dayun sila con ese maga sufrimiento y quierre bira con el cosa ya sucede del antes. Ya iscuji sila man focus na maga buen cosas que ya sucede del antes en vez de man focus na maga bonito cosas que ya hace si Jehova para kanila. Si Jehova nuay gayot queda alegre na cosa sila ya hace.—Num. 11:10.

7. Cosa ya puede ayuda con el un hermana que evita pensa que mas bueno el de suyu vida de antes?

⁷ Paquemodo kita evita pensa que mas bueno el diaton vida de antes? Considera con el ejemplo del un hermana quien ya principia sirvi na Brooklyn Bethel del 1945. Cuanto año despues, ya casa le na un Bethelite y junto sila  ya sirvi alla por cuanto año. Pero del 1976, ya enferma el de suyu marido. Ele ya habla que cuando ya realiza el de suyu marido que cerca ya este muri ya dale este con ele maga buen consejo que puede ayuda con ele si queda le viuda. El de suyu marido ya habla con ele: “Tiene kita alegre matrimonio. Manada gente el nuay experiencia con ese.” Pero, ya habla tambien el de suyu marido: “Gendeh tu ulvida con el maga buen cosas que ya hace kita junto pero no man focus alli. Hay menora el de tuyu tristeza mientras ta pasa el tiempo. No man luya y queda bien triste na cosa ya sucede contigo. Queda alegre na maga buen cosas que ya hace kita junto mientras ta sirvi con Jehova. . . . Regalo estaba con Dios que puede kita acorda con ese maga cosas.” Gendeh ba tu man uyun que un buen consejo este?

8. Paquemodo ya beneficia el hermana cay ya sigui le con el consejo del de suyu marido?

⁸ Ya sigui el hermana con el consejo del de suyu marido. Fiel le ya sirvi con Jehova hasta ya muri le na edad de 92. Cuanto año antes del de suyu muerte, ele ya habla: “Si ta acorda yo con el mas de 63 año que ya sirvi yo full-time con Jehova, puede yo habla que ya tiene yo un bien alegre vida.” Porque? Ele ya explica: “Puede kita tiene un alegre vida cay parte kita del un bien bonito familia del maga hermano y hermana y tiene kita el esperanza que vivi junto kanila na paraiso tierra que ta sirvi con el diaton Creador, el unico verdadero Dios, si Jehova, hasta para cuando.” * Un bonito ejemplo gayot este hermana quien ya mira adelante na futuro.

9. Como cosa ta habla na Levitico 19:18, cuando posible bien dificil para kanaton que perdona con el un persona quien ya hace sinti duele kanaton?

⁹ Le con el Levitico 19:18. Posible que tan dificil kita quita con el diaton sentimiento si el persona quien ya puede hace sinti duele kanaton amo un hermano o hermana na congregacion, un amigo o un pariente. Por ejemplo,  ya acusa con el un hermana el otro hermana que ya ruba este sen con ele. Na uliji, ya pidi despensa el hermana quien ya acusa pero el hermana con quien ya acusa, ya continua man focus na cosa ya sucede. Ya sinti ya ba tu igual ansina? Maskin pa nuay kita enfrenta igual ansina situacion, mayoria kanaton posible ya tiene sentimiento y ya sinti que gendeh kita puede perdona con el quien ya hace sinti duele kanaton.

10. Cosa puede ayuda kanaton si tan sentimiento kita?

¹⁰ Cosa puede ayuda kanaton si tan sentimiento kita? Debe kita acorda que ta mira si Jehova el todo. Sabe le con el todo cosa ta sucede kanaton incluido ya el maga injusticia que ya experiencia kita. (Heb. 4:13) Ta sinti le duele si ta sufri kita. (Isa. 63:9) Y ya promete le que hay quita le con el maskin cosa efecto del injusticia que ya experiencia kita.—Rev. 21:3, 4.

11. Cosa el beneficio kanaton si quita kita con el diaton sentimiento?

¹¹ Debe tambien kita acorda que hay beneficia kita si quita kita con el diaton sentimiento. Amo se el cosa ya realiza el diaton hermana con quien ya acusa. Despues del cuanto tiempo, ya puede le quita con el de suyu sentimiento. Sabe le que si perdona kita con otro, hay perdona tambien kanaton si Jehova. (Mat. 6:14) Sabe le que gendeh justo el cosa ya hace el hermana con ele pero nuay mas le man sentimiento. Como resulta, mas alegre ya este hermana y ta puede le man focus na de suyu servicio con Jehova.

12. Cosa kita puede aprende na 1 San Juan 3:19, 20?

¹² Le con el 1 San Juan 3:19, 20. Normal lang que sinti kita culpable. Por ejemplo, el cuanto ta sinti culpable por causa na maga cosas ya hace sila antes sila aprende el verdad. El otro ta sinti culpable por causa na maga kamali que ya hace sila despues del diila bautismo. (Roma 3:23) Siempre, todo kita quierre hace si cosa el justo. Pero, “todo kita ta comete culpa muchas veces.” (Sant. 3:2; Roma 7:21-23) Maskin pa gendeh kita ta gusta que sinti culpable, tiene este beneficio kanaton. Porque? Cay si ta sinti kita culpable, puede este manda move kanaton para hace cambio na diaton vida y queda determinao que gendeh mas repiti con el diaton maga kamali.—Heb. 12:12, 13.

13. Porque kita necesita queda con cuidao que gendeh sinti sobra de culpable?

¹³ Pero, posible tambien que sinti kita sobra de culpable—continua sinti culpable maskin pa ya arripinti ya kita y ya dale mira si Jehova que ya perdona le kanaton. Peligroso ese clase de sentido. (Sal. 31:10; 38:3, 4) Na cosa manera? Considera con el ejemplo del un hermana quien ya sinti culpable por causa na maga pecado que ya hace le de antes. Ele ya habla: “Ya sinti yo que mas bueno pa gendeh mas hace esfuerzo na servicio con Jehova cay posible gendeh siempre yo salva.” Manada kanaton el ya sinti igual con este hermana. Poreso, debe kita queda con cuidao para gendeh sinti sobra de culpable. Porque? Cay hay queda gayot alegre si Satanas que hay descanza kita sirvi con Jehova— maskin pa ya perdona ya kanaton si Jehova.—Compara na 2 Corinto 2:5-7, 11.

14. Paquemodo kita asigura que quierre kanaton perdona si Jehova?

¹⁴ Maskin pa ansina, posible pensa kita, ‘Paquemodo yo puede asigura que ya perdona ya conmigo si Jehova?’ Si ya puede tu se pregunta, ta dale lang se mira que puede contigo perdona si Jehova. Cuanto decada ya el ya pasa, el The Watchtower ya habla: “Posible sinti kita que pirmi lang kita ta repiti con el diaton  maga kamali. Posible que nuay pa kita puede quita con el cuanto mal practica antes kita principia sirvi con Dios. . . . No perde el esperanza. No pensa que gendeh ya gayot perdona si Jehova con el de tuyu pecado. Amo se el cosa quierre si Satanas que pensa tu. Si ta sinti tu triste y malingasa si ta hace tu con este kamali ta dale lang este mira que gendeh tu un mal persona y puede contigo perdona si Jehova. Esta humilde y continua reza con Dios que perdona contigo, dale contigo limpio conciencia y ayuda contigo. Anda con ele igual si paquemodo el un bata ta anda con el de suyu tata maskin pa na igual siempre problema y si Jehova hay ayuda gayot contigo por causa na de suyu incomparable pagka-bueno.” *

15-16. Cosa ya sinti el cuanto cuando ya realiza sila que quierre kanila perdona si Jehova?

¹⁵ Ya tiene comforta el manada siervo de Jehova cuando ya realiza sila que quierre kanila perdona si Jehova. Por ejemplo, maga cuanto año ya el ya pasa, ya puede ayuda con el un hermano el un experiencia na serie “The Bible Changes Lives.” Na aquel articulo, ya admiti el un hermana que por causa na de suyu experiencia de antes, dificil para con ele creé que puede con ele ama si Jehova. Ya sinti siempre se ele maskin cuanto año despues del de suyu bautismo. Pero, cuando ya medita le acerca na rescate, ya principia cambia el de suyu mirada. *

¹⁶ Paquemodo el de suyu experiencia ya puede ayuda con el hermano? El hermano ya escribi: “Cuando joven pa yo, ya queda yo addict na pornografia. De este nuevo lang, ya hace ya tambien yo con aquel. Ya pidi yo ayuda na maga anciano y ya hace yo cuanto cambio para quita con este. Ya asigura conmigo el maga anciano que ta ama conmigo el Dios y quierre le que perdona conmigo. Pero, tiene vez, ta sinti siempre yo nuay valor, que dol gendeh conmigo puede ama si Jehova. Ya puede gayot ayuda conmigo cuando ya le yo con el experiencia de [este hermana]. Ya realiza yo ahora que si ta pensa yo que gendeh conmigo puede perdona el Dios, dol ta habla yo que gendeh bastante el sacrificio del de  suyu Anak para tapa con el de mio maga pecado. Ya curta yo con este articulo para puede yo le y medita cada vez yo sinti que nuay yo valor.”

17. Cosa ya hace si apostol Pablo para evita sinti sobra de culpable?

¹⁷ Este maga experiencia ta hace acorda kanaton con apostol Pablo. Antes le queda un Cristiano, ya comete le manada serioso pecado. Ya acorda si Pablo con el cosa le ya hace pero nuay le pirmi pensa con ese. (1 Tim. 1:12-15) Ya mira le con el rescate como un personal regalo con ele. (Gal. 2:20) Poreso, ya puede evita si Pablo que sinti sobra de culpable y yan focus na cosa le puede hace na servicio con Jehova.

18. Cosa kita ya aprende na este articulo?

¹⁸ Cosa kita ya puede aprende cuando ya examina kita con el maga trampa na este articulo? (1) Un bendicion estaba con Jehova que ta puede kita acorda con el cosa ya sucede de antes. Pero, maskin paquemodo pa de bonito el diaton vida de antes, mas bonito siempre el diaton vida na nuevo mundo. (2) Puede kanaton hace sinti duele el otro pero si iscuji kita perdona, puede kita man focus na servicio con Jehova. (3) Gendeh kita puede sirvi con Jehova con alegria si ta sinti kita sobra de culpable. Poreso, igual con Pablo, necesita kita creé que ya perdona kanaton si Jehova.

19. Porque kita puede asigura que na nuevo mundo gendeh mas kita acorda con el maskin cosa que ya hace kanaton triste de antes?

¹⁹ Tiene kita el esperanza que vivi hasta para cuando. Y na nuevo mundo del Dios, gendeh mas kita acorda con el maskin cosa que ya hace kanaton triste de antes. Acerca na ese tiempo, el Biblia ya habla: “El maga cosas de antes gendeh mas acorda.” (Isa. 65:17) Pensa este: El cuanto kanaton ya queda ya de edad na servicio con Jehova, pero na nuevo mundo hay queda kita otravez joven. (Job 33:25) Poreso, ojala queda kita determinao que gendeh pirmi pensa con el cosa ya pasa de antes. Sino, man focus kita na nuevo mundo y hace el todo para puede kita vivi alla.