Ya nace yo del 1983. Del una, enbuenamente el de mio salud, pero cuando diez año yo, ya principia yo sinti grabe dolencia na entero cuerpo de mio. Maga dos año despues, ya dispierta yo un aga y no puede mas yo move. Maskin paquemodo yo move con el de mio pies, no puede mas este move. Desde aquel dia, nuay mas yo puede camina. Por causa na de mio enfermedad, nuay mas yo engranda. Ahora, el de mio grandor igual lang na un bata.

Na casa lang yo por cuanto meses cuando ya visita el dos maga Testigo de Jehova. Ta esconde yo si tiene maga visita, pero de aquel dia, yan cuento yo con el maga mujer. Cuando tan cuento sila acerca na Paraiso, ya puede yo acorda con el cosa yo ya oi cuando maga cinco año pa lang yo. De aquel tiempo, tiene un misionario que el nombre Jethro, quien ta queda na Suriname, ya visita na diamon barrio una vez na un mes y ta estudia con el Biblia junto con el de mio tata. Ta trata enbuenamente conmigo si Jethro. Ta gusta gayot yo con ele. Ta lleva tambien conmigo el de mio aguelo y aguela na maga miting del maga Witness que ta hace na diamon barrio. Poreso, cuando ya pregunta si Florence, uno del maga mujer quien ya visita conmigo aquel dia, si quierre ba yo aprende mas, ya habla yo oo.

Ya bira si Florence junto con el de suyu marido, si Justus, y ya principia sila man Bible study conmigo. Cuando ya nota sila que no sabe yo le, ya enseña sila conmigo. Despues del cuanto tiempo, sabe ya yo le. Un dia, ya habla conmigo el man maridable que yan assign kanila para sirvi na Suriname. Maka-triste que nuay mas ya otro na Orealla quien continua man Bible study conmigo. Pero, si Jehova ya continua acorda conmigo.

Nuay dura, un pioneer que el nombre Floyd, el ya llega na Orealla y ya conoce le conmigo cuando ta predica le na casa en casa. Cuando yan cuento le acerca na estudiada del Biblia, yan smile yo. “Porque tu tan smile?” ya pregunta le. Ya habla yo con ele que ya acaba ya yo estudia con el brosyur What Does God Require of Us? y ya principia ya estudia con el libro Knowledge That Leads to Everlasting Life. * Ya habla yo si porque ya descanza diamon estudiada. Ya acaba kame estudia de Floyd con el libro Knowledge pero yan assign tambien con ele para sirvi na otro lugar. Nuay mas ya tambien quien enseña conmigo.

 Pero del 2004, dos special pioneer que si Granville y Joshua, el yan assign na Orealla. Ta predica sila na casa en casa y ya puede incuntra conmigo. Cuando ya pregunta sila si quierre yo estudia, yan smile yo. Ya pidi yo kanila que estudia con el libro Knowledge junto conmigo. Quierre yo mira si igual lang ba el cosa sila enseña conmigo y con el cosa conmigo ya enseña del una. Ya habla si Granville conmigo que tiene maga miting ta hace na diamon barrio. Maskin pa cerca diez año ya yo nuay sale na casa, quierre yo atende. Poreso, ya anda conmigo incuntra si Granville y ya pone conmigo na wheelchair y ya lleva na Kingdom Hall.

Nuay dura, ya anima conmigo si Granville que man enroll na Theocratic Ministry School. Ele ya habla: “Gendeh tu puede camina, pero puede tu converza. Un dia hay dale tu public talk. Hay sucede gayot se.” Ya dale conmigo confianza el cosa le ya habla.

Ya principia yo participa na predicacion junto con Granville. Pero, manada na maga camino na barrio el bien mabagsak y dificil pasa el wheelchair. Poreso, ya pidi yo con Granville que pone conmigo na cariton y ele el rimpuja. Bien efectivo gayot se cosa kame ya hace. Del Abril 2005 ya bautiza yo. Nuay dura, yan train conmigo el maga hermano para mira con el maga literatura na congregacion y con el sound system na Kingdom Hall.

Maka-triste que del 2007 ya muri el de mio tata por causa na accidente na bangca. Bien triste gayot el diamon familia. Si Granville ya reza junto kanamon y ya le maga texto na Biblia que ta dale comforta. Dos año despues, ya queda ya tambien kame bien triste por causa na otro tragedia. Ya muri si Granville por causa na accidente na bangca.

El diamon diutay congregacion nuay mas ya anciano y un siervo ministerial ya lang el ya queda. Bien duele gayot el muerte de Granville. Un buen amigo gayot le. Ta ayuda gayot le pirmi conmigo na de mio espiritual y fisical necesidad. Na miting despues del de suyu muerte, yan assign conmigo para le con el maga parapo del Estudiada del El Torre de Guardia. Ya puede yo hace acaba con el dos parapo, pero despues de aquel, ya principia yo llura y gendeh mas ta descanza el de mio luha. Necesita yo abaja na stage.

Ya sinti yo alivio cuando el maga hermano na otro congregacion ya anda na Orealla para ayuda kanamon. Ya imbia tambien el branch office con Kojo que un special pioneer. Alegre gayot yo cuando el de mio nana y de mio menor hermano yan Bible study y ya bautiza tambien. Despues, del Marzo 2015, yan appoint conmigo sirvi como un siervo ministerial. Despues del cuanto tiempo, ya dale yo con el de mio primer public talk. De aquel dia, yan smile yo y ya llura mientras ta acorda con el cosa ya habla si Granville conmigo cuanto año ya el ya pasa: “Un dia hay dale tu public talk. Hay sucede gayot se.”

Por medio na maga programa na JW Broadcasting^®, ya puede yo aprende que tiene tambien maga Witness el igual de mio situacion. Pero maskin pa na diila fisical limitacion, tiene sila productivo y alegre vida. Puede siempre yo hace cuanto cosas. El de mio deseo que dale con Jehova el todo fuerza que tiene yo, ya manda move conmigo que sirvi como un regular pioneer. Nuay gayot yo expecta con el noticia que ya ricibi yo del Septiembre 2019! De aquel mes, yan appoint conmigo para sirvi como un anciano na diamon congregacion que tiene maga 40 publisher.

Ta rindi gayot yo gracias con el maga amable hermano y hermana quien yan Bible study conmigo y ya ayuda conmigo para sirvi con Jehova. Mas pa na todo, ta rindi gayot yo gracias cay si Jehova ya continua acorda conmigo.