1. Cosa kanaton hay dale comforta si ta sinti kita solo o si gendeh mas kita puede enfrenta con el diaton maga problema? (Salmo 118:5-7)

YA SINTI ba tu que solo lang tu y dol nuay quien puede ayuda contigo enfrenta con el de tuyu maga problema? Manada el quien ya sinti ansina incluido ya el maga fiel siervo de Jehova. (1 Rey 19:14) Si sucede se contigo, acorda con el promesa de Jehova: “Gendeh yo contigo ay deja ni gendeh yo ay abandona contigo.” Poreso, con confianza kita puede habla: “[Si Jehova] amo el quien ta ayuda conmigo. Gendeh yo ay tene miedo.” (Heb. 13:5, 6) Ya escribi si apostol Pablo con ese maga palabra para na maga hermano y hermana na Judea del maga 61 C.E. El de suyu maga palabra ta hace acorda kanaton con el cosa ya escribi el salmista na Salmo 118:5-7.​—Le.

2. Cosa kita considera na este articulo y porque?

² Igual con el salmista, sabe si Pablo que hay ayuda con ele si Jehova cay ya experiencia ya le se manada beses. Por ejemplo, mas de dos año antes le escribi con el de suyu carta para na maga Hebreo, ya salva si Pablo desde na fuerte tifun que ya enfrenta le mientras tan viaje na mar. (Act. 27:4, 15, 20) Durante ese viaje y na maga año antes con ese, ya ayuda si Jehova con Pablo na diferente manera. Considera kita con el tres manera. Ya ayuda si Jehova con ele por medio de Jesus y del maga angel, maga persona quien tiene autoridad y maga hermano y hermana. Si acorda kita con este maga suceso na vida de Pablo, hay hace este hondo con el diaton confianza na promesa del Dios que hay contesta tambien Le con el diaton maga rezo.

3. Cosa posible ya pensa si Pablo y porque?

³ Necesita ayuda si Pablo. Del maga 56 C.E., el maga gente ya hace guyud con ele pa-apuera del templo na Jerusalem y ya pricura mata con ele. Pagka-alamañana, pamurida ya si Pablo cuando ya lleva con ele na Sanhedrin. (Act. 21:30-32; 22:30; 23:6-10) Na ese tiempo, posible ya pensa si Pablo, ‘Hasta cuando pa yo aguanta con este abuso?’

4. Paquemodo ya usa si Jehova con Jesus para ayuda con Pablo?

⁴ Cosa ayuda ya ricibi si Pablo? Na noche despues arresta con Pablo, “el Señor” Jesus ya aparece con ele y ya habla: “Tene animo! Ya queda tu mi testigo na Jerusalem. Ahora necesita tu hace ansina tamen na Roma.” (Act. 23:11) Ese promesa ya puede gayot anima con Pablo! Ya dale con ele comendacion si Jesus na trabajo predicacion que ya hace le na Jerusalem. Y ya promete con ele si Jesus que hay llega le na Roma, donde hay predica tambien le. Despues ricibi con ese asiguranza, asigurao que ya sinti protegido si Pablo igual na un bata na brazo del de suyu tata.

5. Paquemodo ya usa si Jehova con el un angel para ayuda con Pablo? (Mira con el letrato na cover.)

⁵ Cosa otro dificultad ya enfrenta si Pablo? Maga dos año despues de aquel maga suceso na Jerusalem, ya munta barco si Pablo pa-andada na Italy cuando ya tiene fuerte tifun. Pensaba el maga tripulante y pasajero que hay muri ya sila. Pero nuay tiene miedo si Pablo. Porque? Ya habla le con el maga gente na barco: “Anoche ya aparece conmigo un Angel del Dios con quien yo . . . ta adora, y ya habla le conmigo: ‘No tene miedo, Pablo, cay necesita pa tu man atubang con Cesar. Poreso, el Dios ya dale contigo el vida de todo aquellos quien ta man viaje junto contigo.’” Ya usa si Jehova con el un angel para repiti con el asiguranza que ya dale Le con Pablo por medio con Jesus. Y deverasan, ya llega si Pablo na Roma.​—Act. 27:20-25; 28:16.

6. Cosa promesa de Jesus el puede kanaton hace fuerte y porque?

⁶ Cosa maga ayuda kita ta ricibi? Hay suporta kanaton si Jesus, igual na cosa le ya hace con Pablo. Por ejemplo, ya promete si Jesus con el de suyu maga siguidores: “Ay esta yo junto con ustedes todo el dia hasta na fin del mundo.” (Mat. 28:20) El maga palabra de Jesus puede hace fuerte kanaton. Porque? Cay tiene maga tiempo que dificil kanaton para enfrenta. Por ejemplo, si tiene miembro na familia el ya muri, necesita kita enfrenta con el dolor gendeh lang por cuanto dia sino posible por cuanto año. El cuanto tan dificil por causa cay de edad ya sila. Y el otro ta enfrenta dificultad cay depress sila. Maskin pa ansina,  tiene kita el fuerza para aguanta cay sabe kita que si Jesus junto kanaton “todo el dia,” incluido ya el maga dificil tiempo na diaton vida.​—Mat. 11:28-30.

7. Asegun na Revelacion 14:6, paquemodo si Jehova ta ayuda kanaton ahora?

⁷ Ya asigura kanaton el Palabra del Dios que ayuda kanaton si Jehova por medio na de suyu maga angel. (Heb. 1:7, 14) Por ejemplo, ta suporta y ta guia kanaton el maga angel mientras ta predica kita con el “Buen Noticia acerca del Reino” na maga gente “con todo nacion, raza, lenguaje y paiz.”​—Mat. 24:13, 14; le con el Revelacion 14:6.

8. Paquemodo si Jehova ya usa con el un comandante para ayuda con Pablo?

⁸ Cosa ayuda ya ricibi si Pablo? Del 56 C.E., ya asigura si Jesus con Pablo que hay llega le na Roma. Pero el cuanto Judio na Jerusalem ya plaña ataca con Pablo y mata con ele. Cuando el Romano comandante que si Claudio Lisias ya sabe acerca con ese plano, ya ayuda le con Pablo. Ya manda dayun si Claudio con el un grande grupo de maga soldao para protege con Pablo y lleva con ele na Cesarea, maga 105 kilometro estaba na Jerusalem. Na Cesarea, ya manda si Gobernador Felix que “pone con Pablo na [palacio] de Herodes, con guardia.” El maga enemigo de Pablo gendeh mas con ele puede mata.​—Act. 23:12-35.

9. Paquemodo si Gobernador Festo ya ayuda con Pablo?

⁹ Dos año despues, preso siempre si Pablo na Cesarea. Ya cambia con Felix si Festo como el nuevo gobernador. Ya pidi el maga Judio con Festo que lleva con Pablo na Jerusalem para alla juzga, pero nuay conforma si Festo. Posible, sabe el gobernador que “ta plania [el maga Judio] ataja y mata con [Pablo] na camino.”​—Act. 24:27–25:5.

10. Cosa ya hace si Gobernador Festo cuando ya pidi si Pablo que juzga con ele si Cesar?

¹⁰ Despues, ya juzga con Pablo na Cesarea. Ciendo si Festo “quiere hace favor con el maga Judio,” ya pregunta le con Pablo: “Quiere ba tu anda na Jerusalem para juzga contigo alla na dimio presencia?” Sabe si Pablo que posible con ele mata na Jerusalem y sabe tambien le si cosa hace para salva con el de suyu vida, llega na Roma y continua hace con el de suyu ministerio. Ele ya habla: “Ta pidi yo que si Cesar amo ay juzga conmigo!” Despues le man cuento con el maga quien ta dale con ele consejo, si Festo ya habla con Pablo: “Ya pidi tu que si Cesar ay juzga contigo. Entonces ay anda tu con Cesar!” El favorable decision de Festo ya salva con Pablo na de suyu maga enemigo. Gendeh dura, hay llega si Pablo na Roma​—lejos na maga Judio quien quierre con ele mata.​—Act. 25:6-12.

11. Cosa maga palabra de Isaias el posible ya pensa si Pablo?

¹¹ Mientras ta espera si Pablo que principia el de suyu viaje para na Italy, posible ya pensa le acerca el aviso de profeta Isaias que ya dale na maga gente quien tan contra con Jehova: “Plaña ustedes pero gendeh se sucede! Habla si cosa ustedes quierre pero gendeh se tiene buen exito, cay el Dios junto kanamon!” (Isa. 8:10) Sabe si Pablo que ayuda con ele el Dios y amo este el cosa ya hace con ele fuerte para enfrenta con el maga probanza na futuro.

12. Paquemodo ya trata si Julio con Pablo y cosa posible ya realiza si Pablo?

¹² Del 58 C.E., ya principia si Pablo man viaje para na Italy. Como un preso, ya pone con ele bajo na autoridad del un Romano oficial que si Julio. Principia na ese tiempo, si Julio puede maltrata con Pablo y puede tambien con ele trata enbuenamente. Paquemodo le ya usa con el de suyu autoridad?  Pagka-alamañana, cuando ya llega el barco na primer destinacion de este, “si Julio ya trata embuenamente con Pablo y ya permiti con ele anda visita con su maga amigo.” Despues, ya salva pa gane si Julio con el vida de Pablo. Paquemodo? El maga soldao quierre mata con el todo preso que talla na barco, pero ya sangga kanila si Julio. Porque? Cay “el oficial quiere salva con Pablo.” Posible, ya realiza si Pablo que ta usa si Jehova con el buen oficial para ayuda y protege con ele.​—Act. 27:1-3, 42-44.

13. Paquemodo si Jehova posible usa con el maga gente quien tiene autoridad?

¹³ Cosa ayuda kita puede ricibi? Posible usa si Jehova con el de suyu poderoso sagrao espiritu para causa con el maga persona quien tiene autoridad que hace el cosa le quierre si harmonia este na de suyu proposito. Si Rey Solomon ya escribi: “El corazon del rey igual na agua que ta corre na mano de Jehova. Ta guia Le con este maskin onde Le quierre.” (Prov. 21:1) Cosa este quierre decir? El maga gente puede hace canal para hace desvia con el agua na rio para na direccion que quierre sila. Na igual manera, puede tambien usa si Jehova con el de suyu espiritu para hace desvia con el pensamiento del maga quien ta rula para na direccion que harmonia na de suyu proposito. Si sucede se, hay manda este move con el maga gente quien tiene autoridad para hace maga decision que hay beneficia el maga siervo del Dios.​—Compara na Esdras 7:21, 25, 26.

14. Uyun na Maga Actividad 12:5, acerca con quien kita puede reza?

¹⁴ Cosa kita puede hace? Puede kita reza acerca na “maga rey y maga autoridad” si este maga individual hay hace maga decision que puede afecta con el diaton vida y ministerio. (1 Tim. 2:1, 2; Neh. 1:11) Como cosa ya hace el maga Cristiano del primer siglo, puede tambien kita reza con Dios para na diaton maga hermano y hermana quien talli na preso. (Le con el Maga Actividad 12:5; Heb. 13:3) Puede tambien kita reza acerca na maga guardia na preso quien ta vicia con el diaton maga hermano y hermana. Puede kita pidi con Jehova que influencia con el diila pensamiento para actua sila igual con Julio y “trata enbuenamente” con el diaton maga hermano y hermana na preso.​—Act. 27:3.

15-16. Paquemodo si Jehova ya usa con Aristarco y Lucas para ayuda con Pablo?

¹⁵ Cosa ayuda ya ricibi si Pablo? Cuando yan viaje si Pablo para na Roma, ya usa si Jehova con el maga hermano y hermana para  ayuda con ele. Considera kita con el cuanto ejemplo.

¹⁶ El dos fiel amigo de Pablo, si Aristarco y Lucas, ya decidi que man viaje junto con ele para na Roma. * Preparao sila pone na peligro con el diila vida para man junto con Pablo maskin pa nuay habla na Biblia que personal sila ya ricibi con el asiguranza estaba con Jesus que hay llega sila na Roma. Ya sabe lang sila que hay salva el diila vida cuando tan viaje ya sila. Poreso cuando si Aristarco y Lucas ya munta na barco na Cesarea, asigurao que sincero ya reza si Pablo con Jehova y ya rindi gracias na ayuda que ya dale le por medio na ese dos animoso hermano.​—Act. 27:1, 2, 20-25.

17. Paquemodo si Jehova ya usa con el maga hermano y hermana para ayuda con Pablo?

¹⁷ Durante el de suyu viaje, cuanto beses ya ayuda el maga hermano y hermana con Pablo. Por ejemplo, cuando ya llega sila na ciudad de Sidon, ya permiti si Julio con Pablo que “anda visita con su maga amigo para puede sila dale el disuyo maga necesidad.” Despues, cuando talla sila na ciudad de Puteoli, si Pablo y el de suyu maga uban ‘ya incuntra maga hermano quien ya invita kanila queda junto kanila por siete dia.’ Mientras el maga hermano ta dale el maga necesidad de Pablo y del de suyu maga uban, asigurao ya dale gayot alegria si Pablo kanila cuando ya habla le maga bonito experiencia. (Compara na Maga Actividad 15:2, 3.) Despues de ese visitada, si Pablo y el de suyu maga uban ya continua man viaje.​—Act. 27:3; 28:13, 14.

18. Cosa ya manda move con Pablo para rindi gracias con Dios y tiene animo?

¹⁸ Mientras ta camina si Pablo para na Roma, asigurao ya pensa le acerca con el cosa le ya escribi tres año ya el ya pasa para na congregacion na ese lugar: “Por muchos años ya desea gayot yo visita con ustedes.” (Roma 15:23) Pero, nuay le expecta que hay llega le alla como un preso. Asigurao ya anima gayot con ele cuando ya puede le mira con el maga  hermano y hermana de Roma que ta espera na camino para man greet con ele. “Cuando si Pablo ya mira canila, ya dale le gracias con Dios y ya tene le animo.” (Act. 28:15) Nota que ya rindi gracias si Pablo con Dios cay talla el maga hermano y hermana. Porque? Cay ya realiza si Pablo que ta ayuda con ele si Jehova por medio na maga hermano y hermana.

19. Base na 1 Pedro 4:10, paquemodo si Jehova posible usa kanaton para ayuda con otro?

¹⁹ Cosa kita puede hace? Tiene ba maga hermano o hermana na de ustedes congregacion quien ta sufri por causa na enfermedad o tiene otro maga problema? O posible tiene miembro na diila familia el ya muri. Si ya sabe kita que tiene quien necesita ayuda, puede kita pidi con Jehova que ayuda kanaton habla o hace buen cosas para con ese persona. El diaton maga palabra y accion posible amo gayot el cosa necesita el diaton maga hermano y hermana. (Le con el 1 Pedro 4:10.) * Si ayuda kita kanila, hay bira el diila confianza que aplicable kanila el promesa de Jehova, “gendeh yo contigo ay deja ni gendeh yo ay abandona contigo.” Asigurao, hay hace gayot se contigo alegre.

20. Porque kita con confianza puede habla: “[Si Jehova] amo el quien ta ayuda conmigo”?

²⁰ Igual con Pablo y de suyu maga amigo, kita tambien tiene maga problema. Pero con coraje kita puede enfrenta con ese cay si Jehova ta ayuda kanaton. Ta ayuda le kanaton por medio con Jesus y de suyu maga angel. Y si harmonia este na de suyu proposito, puede kanaton ayuda si Jehova por medio na maga gente quien tiene autoridad. Y como cosa el manada diaton ya puede experiencia, puede usa si Jehova con el de suyu sagrao espiritu para manda move con el maga hermano y hermana para ayuda kanaton. Poreso igual con Pablo, con confianza kita puede habla: “[Si Jehova] amo el quien ta ayuda conmigo. Gendeh yo ay tene miedo. Cosa man puede hace el gente conmigo?”​—Heb. 13:6.