1-2. Cosa maga buen razon kita tiene para dale mira amor leal con uno y otro?

TIENE kita maga buen razon para dale mira amor leal con uno y otro. Cosa el cuanto de ese? Nota si paquemodo este maga inspirao proverbio ta contesta con ese pregunta: “No abandona con el amor leal y pagka-fiel. . . . Entonces, hay tene tu favor y hondo entendimiento na ojos del Dios y del maga gente.” “Si tiene amor leal el un gente, ele mismo el ta beneficia.” “El quien ta busca con el pagka-recto y amor leal hay incuntra vida.”—Prov. 3:3, 4; 11:17, ftn.; 21:21.

² Este maga proverbio ta menciona tres razon si porque kita debe dale mira amor leal. Una, si ta dale kita mira amor leal, ta queda kita precioso na ojos del Dios. Ika-dos, si ta dale kita mira amor leal, kita mismo ta beneficia. Por ejemplo, ta puede kita hace fuerte con el diaton amistad con otro. Ika-tres, si ta dale kita mira amor leal, hay obtene kita maga bendicion na futuro, incluido el vida hasta para cuando. Claro, tiene kita maga buen razon para obedece con el maga palabra de Jehova: “Trata con uno y otro con amor leal y lastima.”—Zac. 7:9.

3. Cosa maga pregunta kita hay considera na este articulo?

³ Na este articulo, hay considera kita con el maga contestacion na cuatro pregunta. Con quien kita debe dale mira amor leal? Cosa kita puede aprende na libro de Rut acerca si paquemodo dale mira amor leal? Paquemodo kita dale mira amor leal ahora? Cosa maga beneficio el ta ricibi aquellos quien ta dale mira amor leal?

4. Paquemodo kita puede imita con el amor leal de Jehova? (Marcos 10:29, 30)

⁴ El ya pasa articulo ya ayuda kanaton para entende que si Jehova ta dale mira el de suyu amor leal solamente con aquellos quien ta ama y ta sirvi con ele. (Dan. 9:4) Quierre kita “imita con el Dios, como maga anak disuyo con quien Ele ta ama.” (Ef. 5:1) Poreso, quierre kita dale mira amor leal na diaton maga espiritual hermano y hermana.—Le con el Marcos 10:29, 30.

5-6. Cosa quierre decir del palabra “lealtad” para na manada?

⁵ Asigurao que man uyun tu que si mas entende kita si cosa quierre decir del amor leal, mas puede kita con este dale mira na diaton maga hermano y hermana. Para hace mas hondo el diaton entendimiento na amor leal, mira kita si paquemodo con este ya compara na lealtad, como cosa el mas manada ta entende con ese palabra. Considera un ejemplo.

 ⁶ Ahora, puede kita habla que el un persona quien ta trabaja por manada año na un compania como un leal empleado. Maskin pa por cuanto año ya le na compania, posible nuay gayot le conoce con el dueño. Posible, gendeh le pirmi tan uyun na maga palicia de ese compania. Gendeh le ta ama con el compania pero ta trabaja le alla para tene sen. Hay continua le trabaja alla hasta man retiro le o hasta puede le incuntra mas bonito trabajo na otro.

7-8. (a) Cosa ta motiva con el un persona para dale mira amor leal? (b) Porque kita considera con el cuanto texto na libro de Rut?

⁷ El diferencia del lealtad que ya discuti na  parapo 6 y el amor leal amo el motivo del un persona. Porque el maga siervo del Dios ya dale mira amor leal na tiempo del Biblia? Aquellos quien ya dale mira amor leal ya hace con ese gendeh cay necesita sila sino cay quierre sila. Considera el ejemplo de David. El de suyu corazon amo el ya manda move con ele para dale mira amor leal con el de suyu amigo, si Jonatan, maskin pa el tata de Jonatan quierre mata con David. Cuanto año despues del muerte de Jonatan, ya continua dale mira amor leal si David con el anak de Jonatan, si Mepiboset.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Puede kita aprende mas acerca na amor leal si considera kita con el cuanto texto estaba na libro de Rut na Biblia. Cosa maga leccion acerca na amor leal el puede kita aprende na maga persona que ya menciona na ese libro? Paquemodo kita puede aplica con ese maga leccion na diaton congregacion? *

9. Porque ya pensa si Noemi que si Jehova tan contra con ele?

⁹ Na libro de Rut, puede kita le acerca na istoria de Noemi, el de suyu hierna que si Rut y el hombre que si Boaz quien ta ama con Dios y pariente del marido de Noemi. Por causa na escasez na Israel, si Noemi, el de suyu marido y dos anak hombre ya cambia para na Moab. Mientras talla, ya muri el marido de Noemi. El de suyu dos anak ya casa pero na uliji, ya muri tambien sila. (Rut 1:3-5; 2:1) Este maga tragedia ya hace gayot luya con Noemi. Ya queda le bien dolorido y ya pensa le que si Jehova tan contra con ele. Nota si cosa ele ya habla acerca na cosa ele ta sinti con Dios: “Ta castiga conmigo si Jehova.” “Ya permiti el Todopoderoso que queda mapait el de mio vida.” Ya habla tambien  le: “Si Jehova el quien yan contra conmigo y el Todopoderoso el ya causa conmigo maga calamidad.”—Rut 1:13, 20, 21.

10. Cosa el reaccion de Jehova na maga palabra de Noemi?

¹⁰ Cosa el reaccion de Jehova na maga palabra de Noemi? Nuay le abandona con el de suyu dolorido siervo. Gane, ya dale le mira empatia con ele. Ta entende si Jehova que “el maltratamiento puede causa con el un sabio persona para queda loco.” (Ecl. 7:7) Maskin pa ansina, ta necesita ayuda si Noemi para mira que junto con ele si Jehova. Cosa ayuda el ya dale el Dios? (1 Sam. 2:8) Ya manda le move con Rut para dale mira amor leal con Noemi. Ya ayuda si Rut con el de suyu suegra para queda este otravez balance na emocional y na espiritual. Cosa kita puede aprende na ejemplo de Rut?

11. Porque el maga buen hermano y hermana ta pricura ayuda con el maga tan triste o tan luya?

¹¹ El amor leal hay manda move kanaton para ayuda con aquellos tan triste o tan luya. Igual si paquemodo si Rut ya esta junto con Noemi, el maga buen hermano y hermana ahora ta continua ayuda con aquellos na congregacion quien tan triste o depress. Ta ama sila con el diila maga hermano y hermana, y bien quierre sila hace el maskin cosa que puede sila hace para ayuda kanila. (Prov. 12:25, ftn.; 24:10) Harmonia este na consejo de apostol Pablo: “Dale animo con el maga maluya na fe, y dale mira el de ustedes paciencia con todo el maga gente.”—1 Tes. 5:14.

12. Cosa el de con todo efectivo manera para ayuda con el un hermano o hermana que yan luya?

¹² Mas mucho, el de con todo efectivo manera para ayuda con el un hermano o hermana quien yan luya amo si oi con ele y asigura que ta ama tu con ele. Ta aprecia gayot si Jehova con el cosa tu ta hace para ayuda con el de suyu maga precioso siervo. (Sal. 41:1) El Proverbio 19:17 ta habla: “El quien ta ayuda na maga pobre ta dale presta con Jehova, y hay paga Le con ele na cosa le ya hace.”

13. Na cosa manera diferente si Rut con Orpa y porque el decision de Rut ta dale mira que tiene le amor leal? (Mira con el letrato na cover.)

¹³ Mas puede kita entende si cosa el amor leal si considera kita si cosa ya sucede con Noemi despues muri el de suyu marido y dos anak. Cuando ya sabe si Noemi que “ya bendici otravez si Jehova con el de suyu maga siervo y ya dale kanila comida,” ya decidi le que bira na de suyu casa. (Rut 1:6) El de suyu dos hierna ya principia viaja junto con ele. Pero mientras na camino, tres beses si Noemi ya habla con este maga mujer que bira na Moab. Cosa ya sucede? Puede kita le: “Ya besa si Orpa con el de suyu suegra y ya sale. Pero si Rut ya esta junto con ele.” (Rut 1:7-14) Cuando ya bira si Orpa, ya sigui le con el instruccion de Noemi y ya hace el cosa ya pidi con ele. Pero, mas pa con ese el cosa ya hace si Rut. Puede era le bira kanila pero por causa  na de suyu amor leal, ya decidi le esta para ayuda con Noemi. (Rut 1:16, 17) Si Rut ya iscuji esta junto con Noemi gendeh cay necesita le sino cay quierre le. El decision de Rut ya dale mira que tiene le amor leal. Cosa kita puede aprende na este istoria?

14. (a) Cosa decision ta hace el maga amable hermano y hermana ahora? (b) Asegun na Maga Hebreo 13:16, cosa maga sacrificio el ta hace alegre con Dios?

¹⁴ Si tiene kita amor leal, ta hace kita maga especial esfuerzo para ayuda con otro. Igual de antes, manada del diaton maga hermano y hermana ahora el ya iscuji dale mira amor leal para con otro maga hermano, maskin con aquellos gendeh sila personal conoce. Por ejemplo, si ya sabe sila que tiene ya sucede natural calamidad, quierre dayun sila sabe si paquemodo sila puede ayuda. Si tiene hermano na congregacion quien ya tiene problema na financial, gendeh sila tan alang-alang extende practical ayuda con ese persona. Igual na maga de Macedonia del primer siglo, ta hace sila maga especial esfuerzo. Ta hace sila maga personal sacrificio y ta dale “gendeh lang asegun del que puede sila” para ayuda con el diila maga hermano y hermana. (2 Cor. 8:3) Asigurao, bien alegre si Jehova mientras ta mira le que ta dale sila mira ese clase de amor.—Le con el Maga Hebreo 13:16.

15-16. Paquemodo ya dale mira si Rut que quierre gayot le ayuda?

¹⁵ Manada kita cosa puede aprende si examina kita si paquemodo ya ayuda si Rut con Noemi. Considera kita con el cuanto de este.

¹⁶ Continua pricura ayuda. Cuando ya habla si Rut que sigui le con el de suyu suegra para na Juda, nuay conforma si Noemi del primero. Pero, nuay descanza si Rut. Cosa el resulta? “Cuando ya mira si Noemi que quierre gayot sigui si Rut, nuay mas le con este forza manda bolbe.”—Rut 1:15-18.

17. Cosa ayuda kanaton para gendeh descanza pricura ayuda?

¹⁷ Leccion para kanaton: Necesita paciencia para ayuda con aquellos maga depress poreso gendeh kita debe descanza pricura ayuda kanila. El un hermana quien ta necesita asistencia posible gendeh acepta con el diaton ayuda na primero. * Maskin pa ansina, el amor leal hay manda move kanaton para hace el todo para gendeh abandona con ele. (Gal. 6:2) Ta esperanza kita que hay acepta le con el diaton ayuda na uliji y permiti kanaton para dale comforta con ele.

18. Cosa posible ya hace sinti duele con Rut?

¹⁸ No man sentimiento. Cuando ya llega na Betlehem si Noemi y Rut, ya mira si Noemi con el de suyu maga vecinos de antes. Ya habla le kanila: “Abundancia yo cuando ya sale pero ya manda conmigo bolbe si Jehova limpio mano.” (Rut 1:21) Imagina si cosa ya sinti si Rut cuando ya oi le con ese maga palabra de Noemi! Ya hace si Rut el todo cosa le puede hace para ayuda con Noemi. Si Rut ya llura junto con ele, ya dale con ele comforta y ya camina junto con ele por cuanto dia. Pero maskin pa con ese todo, si Noemi ya habla: “Ya manda conmigo bolbe si Jehova limpio mano.” Maskin pa junto con ele parao si Rut na aquel tiempo, el maga palabra de Noemi ya hace sale que dol gendeh le ta aprecia con el ayuda que ya dale si Rut. Posible, ya hace gayot este sinti duele con Rut. Maskin pa ansina, ya esta le junto con Noemi.

19. Cosa ayuda kanaton para gendeh abandona con el un persona quien tan luya?

 ¹⁹ Leccion para kanaton: Ahora, el un hermana que tan luya posible tiene cosa habla que puede hace sinti duele kanaton—maskin pa na diaton maga esfuerzo que ayuda con ele. Pero, ta pricura kita gendeh man sentimiento. Gendeh kita abandona con el diaton hermana y pidi kita con Jehova que ayuda kanaton puede busca manera para dale con ele comforta.—Prov. 17:17.

20. Cosa el ya dale fuerza con Rut para continua?

²⁰ Anima si ta mira tu que necesita se el un persona. Ya dale mira amor leal si Rut con Noemi pero ahora, si Rut mismo el necesita que tiene quien anima con ele. Y ya manda move si Jehova con Boaz para anima con ele. Si Boaz ya habla con Rut: “Ojala premia contigo si Jehova na cosa tu ya hace y ojala hay tene perfecto pago para contigo estaba con Jehova el Dios de Israel, cay ya busca tu refugio bajo na de suyu maga alas.” Ese maga bonito palabra ya puede gayot dale comforta con Rut. Ya contesta le con Boaz: “Ya dale tu conmigo comforta y asiguranza.” (Rut 2:12, 13) Ya anima si Boaz con Rut na tiempo que necesita le con este y ya dale este con ele fuerza para continua.

21. Como cosa ya habla na Isaias 32:1, 2, cosa ta dale el maga amable anciano?

²¹ Leccion para kanaton: Tiene vez, aquellos quien ta dale mira amor leal con otro necesita tambien que tiene quien anima kanila. Ya comenda si Boaz con Rut cuando ya nota le si paquemodo este de bueno con Noemi. Ahora tambien, ta comenda el maga anciano con el maga amable hermano y hermana si ta nota sila con el ayuda que ta dale sila con otro. Este maga bonito comendacion hay dale con el maga hermano y hermana el fuerza que necesita sila para continua.—Le con el Isaias 32:1, 2.

22-23. Paquemodo ya cambia el sentido de Noemi y porque? (Sal. 136:23, 26)

²² Despues del cuanto tiempo, ya dale manada comida si Boaz con Rut y Noemi como regalo. (Rut 2:14-18) Cosa el reaccion de Noemi na pagka-bondadoso de Boaz? Ele ya habla: “Ojala bendici con ele si Jehova, quien pirmi ta dale mira amor leal na maga vivo y na maga muerto.” (Rut 2:20a) Ya cambia gayot el sentido de Noemi! Del primero, dolorido le ya habla: “Si Jehova . . . yan contra conmigo” pero ahora con alegria le ya habla: “Si Jehova . . . pirmi ta dale mira amor leal.” Cosa posible ya ayuda para cambia el sentido de Noemi?

²³ Ya puede mira si Noemi con el mano de Jehova na de suyu vida. Ya usa si Jehova con Rut para dale suporta con Noemi cuando pabolbida este na Juda. (Rut 1:16) Ya mira tambien si Noemi con el mano de Jehova cuando si Boaz, el uno del diila maga “rescatador,” ya hace manera para ayuda con este dos mujer. * (Rut 2:19, 20b) Posible, ya puede le pensa: ‘Ahora sabe ya yo, nuay gayot deja conmigo si Jehova. Junto le conmigo pirmi!’ (Le con el Salmo 136:23, 26.) Asigurao que bien alegre si Noemi cay nuay con ele descanza pricura ayuda kanda Rut y Boaz! Todo sila ya queda alegre cay si Noemi ya tiene otravez el alegria y fuerza para sirvi con Jehova.

24. Porque kita quierre continua dale mira amor leal con el diaton maga hermano y hermana?

²⁴ Cosa kita ya aprende na libro de Rut acerca na amor leal? El amor leal hay manda move kanaton para gendeh kita descanza pricura ayuda con el maga hermano y hermana quien tan luya. Hay manda tambien este move kanaton para hace maga sacrificio para ayuda kanila. El maga anciano necesita anima con aquellos quien ta dale mira amor leal con otro. Si observa kita si paquemodo ya bira el alegria y fuerza del diaton maga hermano na servicio con Jehova, hay queda kita alegre. (Act. 20:35) Pero, cosa el de con todo importante razon si porque kita ta continua dale mira amor leal? Cay quierre kita imita y hace alegre con Jehova, quien “abundancia de amor leal.”—Ex. 34:6; Sal. 33:22.