Sabe Ba Tu?
Cosa ya sucede na Nineve despues el tiempo de Jonas?
DEL maga año 670 B.C.E., el Asiria amo el de con todo grande imperio na entero mundo “que ya principia na Cyprus na oeste para na Iran na este (east) y por cuanto año ya inclui pa gane este con el Egypt,” ya habla el The British Museum Blog. El centro de este, el Nineve, amo el de con todo grande ciudad na entero mundo. Tiene este manada bale monumento, bonito jardin, grande palacio y ancho library. El maga escribida na pader na Nineve de antes ta dale mira que si Rey Ashurbanipal, igual na otro maga rey de Asiria, ya llama con el de suyu mismo cuerpo como el “rey del mundo.” Na aquel tiempo, dol imposible hace perde con el Asiria y Nineve.
El Imperio de Asiria amo el de con todo grande imperio na mundo na aquel tiempo
Maskin pa ansina, cuando el Asiria ya queda el de con todo poderoso imperio, el profeta de Jehova que si Sofonias ya predicta: “Hay istira [si Jehova] el de suyu mano . . . y destroza con el Asiria, y hay hace le abandonao con el Nineve, igual de seco na desierto.” Mas pa, el profeta de Jehova que si Nahum ya predicta: “Saca con el plata, saca con el oro! . . . El ciudad nuay laman, abandonao, destrozao! . . . El todo quien ta mira contigo hay desaleja contigo y habla, ‘Destrozao ya el Nineve!’” (Sof. 2:13; Nah. 2:9, 10; 3:7) Cuando ya oi el maga gente con ese maga profecia, posible ya pensa sila: ‘Puede ba gayot se sucede? Posible ba gayot hace perde con el poderoso Asiria?’ Dol imposible gayot se.
El Nineve ya queda abandonao!
Maskin pa ansina, ya sucede el imposible! Corto tiempo antes el 600 B.C.E., el Babilonia y Media ya hace perde con el Asiria. Nuay tarda, ya abandona con el Nineve y ya ulvida con este el maga gente! “Pagka-Middle Ages,” ya habla el un publicacion del The Metropolitan Museum of Art in New York, “ya abandona y ya entera con el lugar, y el maga gente ya acorda ya lang con el Nineve por causa na Biblia.” Asegun na Biblical Archaeology Society Online Archive, na principio del 1800, “nuay ni uno el sabe si ya existi ba gayot este poderoso ciudad de Asiria.” Pero del 1845, si Austen Henry Layard que un archaeologist ya principia man cali na lugar de Nineve. El cosa leya discubri ya dale mira que el Nineve un bonito ciudad de antes.
El cumplimiento del maga profecia acerca na Nineve ta hace fuerte con el diaton confianza que el maga profecia del Biblia acerca na fin del maga lider de politica hay cumpli tambien.—Dan. 2:44; Rev. 19:15, 19-21.
