1-2. (a) Porque debe confia con Jehova el maga nuevo casao? (Salmo 37:3, 4) (b) Cosa kita considera na este articulo?

CERCA ya ba tu casa o nuevo lang ba tu ya casa? Si ansina, asigurao excited tu man junto con el persona con quien gayot tu ta ama. Siempre, tiene maga dificultad na matrimonio y tiene maga importante decision que necesita hace. El manera si paquemodo ustedes ta enfrenta con ese maga dificultad y el maga decision que ta hace ustedes hay afecta con el de ustedes alegria como un maridable adentro na manada año. Si confia ustedes con Jehova, puede ustedes hace maga buen decision, el de ustedes matrimonio hay queda mas fuerte y hay queda ustedes mas alegre. Si gendeh ustedes aplica con el maga consejo del Dios, posible ustedes enfrenta maga dificultad que hay causa maga problema na de ustedes matrimonio y gendeh ustedes queda alegre.—Le con el Salmo 37:3, 4.

² Maskin pa este articulo ya hace para na maga nuevo casao, hay discuti este maga dificultad que todo maridable posible enfrenta. Hay examina este si cosa kita puede aprende na maga ejemplo del cuanto fiel hombre y mujer na Biblia. Este maga ejemplo na Biblia ta enseña kanaton maga leccion que puede kita aplica na diferente aspeto del diaton vida, incluido ya el matrimonio. Hay examina tambien kita si cosa kita puede aprende na maga experiencia del cuanto maridable na moderno tiempo.

3-4. Cosa maga dificultad posible enfrenta el maga nuevo casao?

³ El cuanto maga gente posible anima con el maga nuevo casao que vivi un normal vida. Por ejemplo, el maga mayores y otro pariente posible man pressure con el un maridable para tiene dayun maga anak. O el maga amigo y otro miembro del familia posible anima con el nuevo casao para cumpra casa y llena con ese de maga bonito cosas.

⁴ Si gendeh con cuidao, el un maridable posible hace maga decision que causa kanila para tiene manada debe. Despues, el marido y mujer posible necesita trabaja por largo hora para paga con ese maga debe. El secular trabajo posible principia menora con el tiempo que debe era usa na personal estudiada del Biblia, de familia adoranza y ministerio. Posible pa gane sila gendeh puede atende na maga miting para trabaja overtime para tiene extra sen o para asigura que gendeh kanila quita na trabajo. Como resulta, nuay mas sila el bonito oportunidad para hace mas na diila servicio con Jehova.

5. Cosa tu ya aprende na ejemplo de Klaus y Marisa?

⁵ El maga experiencia ta dale mira que si ta pricura kita obtene manada material cosas, gendeh kita queda alegre. Considera si cosa ya puede aprende el un man maridable que si Klaus y Marisa acerca con este. * Na principio del diila vida como maridable, igual sila ta trabaja full-time para tiene sila comfortable vida. Pero, gendeh sila deverasan alegre. Si Klaus ya admiti: “Sobra-sobra el diamon material pero nuay kame maga espiritual goal. Gane, dificil el vida y maka-stress.” Posible ya puede tambien tu nota que si man focus tu obtene manada material cosas, gendeh este contigo ta hace alegre. Si ansina, no man luya. Si considera tu con el maga buen ejemplo del otro, puede se ayuda contigo para hace con el maga necesita cambio. Una, considera kita si cosa puede aprende el maga marido na ejemplo de Rey Josafat.

6. Harmonia na consejo que puede le na Proverbio 3:5, 6, paquemodo si Rey Josafat ya enfrenta con el un serioso problema?

⁶ Maga marido, ta sinti ba ustedes tiene vez que bien pesao el de ustedes maga responsibilidad? Si ansina, puede ustedes beneficia na ejemplo de Rey Josafat. Como un rey, responsable si Josafat na seguridad del entero nacion! Paquemodo le cumpli con ese bien serioso responsibilidad? Ya hace si Josafat el cosa le puede hace para protege con aquellos bajo na de suyu cuidada. Ya hace le fuerte con el maga ciudad del Juda y ya ajunta manada soldao que ya llega mas de 1,160,000. (2 Cron. 17:12-19) Nuay dura, ya enfrenta un serioso problema si Josafat. Un grande grupo de maga soldao Ammonita, Moabita y maga hombre estaba na monte region de Seir el ya  amenaza con ele, con el de suyu familia y maga gente. (2 Cron. 20:1, 2) Cosa ya hace si Josafat? Ya pidi le con Jehova que ayuda y dale con ele fuerza. Uyun este na buen consejo que puede incuntra na Proverbio 3:5, 6. (Le.) El humilde rezo de Josafat que puede le na 2 Cronicas 20:5-12 ta revela si paquemodo le ta confia con el de suyu amable Tata na cielo. Paquemodo si Jehova ya contesta con el rezo de Josafat?

7. Paquemodo ya contesta si Jehova con el rezo de Josafat?

⁷ Yan cuento si Jehova con Josafat por medio na un Levita que el nombre si Jahaziel. Si Jehova ya habla: “Anda ustedes na de ustedes puesto, esta parao y mira con el salvacion de Jehova para con ustedes.” (2 Cron. 20:13-17) Gendeh gayot se el normal manera si ta anda na guerra! Pero, este maga instruccion gendeh estaba na un gente sino estaba con Jehova. Con completo confianza na de suyu Dios, ya hace si Josafat con el cosa con ele ya manda. Cuando ele y el de suyu maga gente ya anda man encuentro con el maga enemigo, ya pone le adelante gendeh con el maga veterano soldao sino con el maga hombre quien ta canta que nuay armas. Ya cumpli si Jehova con el de suyu promesa con Josafat. Ya hace Le perde con el maga enemigo soldao.—2 Cron. 20:18-23.

8. Cosa puede aprende el maga marido na ejemplo de Josafat?

⁸ Maga marido, puede ustedes aprende na ejemplo de Josafat. Responsable ustedes cuida con el de ustedes familia poreso ta trabaja ustedes enbuenamente para protege y suporta kanila. Si ta enfrenta ustedes maga dificultad, posible ustedes sinti que tiene ustedes el manera para solva con ese. Pero, resisti con el inclinacion que confia na de ustedes mismo cuerpo. Sino, reza que ayuda con ustedes si Jehova. Omento pa, reza con todo corazon junto con el de ustedes mujer. Pidi el guia de Jehova por medio de estudia con el Biblia y maga publicacion que ya dale el de suyu organizacion y aplica con el consejo que ya puede ustedes incuntra. Posible, el otro gendeh man uyun na maga decision que ya hace ustedes que base na Biblia y posible pa gane sila habla con ustedes que de locuras se. Posible sila habla que el sen y maga cosas que puede este cumpra hay dale el de con todo buen proteccion na de ustedes familia. Pero, acorda con el ejemplo de Josafat. Ya confia le con Jehova y ya dale se mira por medio na de suyu maga accion. Nuay abandona si Jehova con ese leal hombre y gendeh tambien le abandona con ustedes. (Sal. 37:28; Heb. 13:5) Cosa puede hace el maga maridable para tene alegre vida?

9. Cosa kita puede habla acerca con profeta Isaias y de suyu mujer?

⁹ Si profeta Isaias y de suyu mujer ya hace centro el diila vida na servicio con Jehova. Un profeta si Isaias y posible un profeta tambien el de suyu mujer ciendo ya llama con ele “el profeta mujer.” (Isa. 8:1-4) Como un man maridable, claro que yan focus si Isaias y de suyu mujer na diila adoranza con Jehova. Ya dale gayot sila un buen ejemplo para na maga maridable ahora!

10. Paquemodo el estudiada na profecia na Biblia puede ayuda con el maga casao para queda determinao que hace el todo que posible para con Jehova?

¹⁰ El maga maridable ahora puede hace centro diila vida na servicio con Jehova si hace sila todo para sirvi con ele. Puede sila hace mas fuerte con el diila confianza con Jehova si estudia sila junto con el maga profecia na Biblia  y mira si paquemodo este pirmi ta cumpli. * (Tito 1:2) Puede sila pensa si paquemodo sila participa na cumplimiento del cuanto maga profecia na Biblia. Por ejemplo, puede sila queda parte na cumplimiento del profecia de Jesus que el buen noticia hay predica na entero tierra antes llega el fin. (Mat. 24:14) Si mas asigurao el un maridable que ta cumpli el profecia na Biblia, hay queda sila mas determinao que hace el todo posible para con Jehova.

11. Cosa ya puede hace si Priscila y Aquila, y porque?

¹¹ El maga joven maridable puede aprende con Priscila y Aquila, un Judio maridable quien ta queda na ciudad de Roma. Ya oi sila el buen noticia acerca con Jesus y ya queda maga Cristiano. Asigurao, alegre ya sila na diila circumstancia. Pero, ya cambia el diila vida cuando si Emperador Claudio ya manda con el todo maga Judio que sale na Roma. Considera si cosa se quierre decir para con Aquila y Priscila. Necesita sila deja con el lugar que yan anad sila, planta nuevo casa y establicia con el diila negocio de hacida de tolda na un nuevo locacion. Este ba cosa ya pasa na diila vida hay causa kanila para gendeh hace una el interes del Reino? Posible, sabe ya tu el contestacion na ese pregunta. Na diila nuevo casa na Corinto, ya queda parte si Aquila y Priscila del un congregacion y ya trabaja junto con apostol Pablo para hace fuerte con el maga hermano alla. Nuay dura, ya cambia sila na otro maga lugar donde tiene grande necesidad de maga predicador. (Act. 18:18-21; Roma 16:3-5) Asigurao, ya tiene gayot sila un bonito y alegre vida!

12. Porque debe hace maga espiritual goal el un maridable?

¹² El maga maridable na moderno tiempo puede imita con Priscila y Aquila si hace sila una con el interes del Reino. El de con todo buen tiempo para na dos persona que discuti acerca na diila maga goal na vida amo mientras man novio y novia pa sila. Si el dos persona junto ta hace maga decision y ta pricura alcanza maga igual espiritual goal, mas manada sila oportunidad para mira si paquemodo  si Jehova ta guia con el diila vida. (Ecl. 4:9, 12) Considera con el experiencia de Russell y Elizabeth. Si Russell ya habla, “Cuando man novio y novia pa kame, especifico kame ya discuti con el diamon maga espiritual goal.” Si Elizabeth ya habla, “Ya discuti kame con ese para si llega el tiempo que necesita kame hace maga decision, puede kame asigura que el cosa kame ya decidi gendeh hay sangga kanamon para alcanza con ese maga goal.” El circumstancia de Russell y Elizabeth ya permiti kanila para cambia na Micronesia y sirvi donde tiene mas grande necesidad de maga publisher.

13. Asegun na Salmo 28:7, cosa el resulta si confia kita con Jehova?

¹³ Igual con Russell y Elizabeth, manada maridable el ya decidi que gendeh tiene otro responsibilidad para puede sila dale mas grande tiempo na trabajo predicacion y enseñada. Si el un maridable ta hace maga goal na servicio con Jehova y tan ayudajan para alcanza con ese, hay tene gayot se maga buen resulta. Hay mira sila si paquemodo si Jehova ta cuida kanila, mas queda grande el diila confianza con ele y hay queda sila deverasan alegre.—Le con el Salmo 28:7.

14. Paquemodo ya dale mira si apostol Pedro y de suyu mujer que ya confia sila con el promesa que puede mira na Mateo 6:25, 31-34?

¹⁴ Puede tambien aprende el maga maridable na ejemplo que ya dale si apostol Pedro y de suyu mujer. Maga seis meses para un año despues le conoce con Jesus, necesita hace un importante decision si apostol Pedro. Ta trabaja si Pedro como un pescador. Poreso cuando ya invita si Jesus con Pedro que sigui con ele full-time, necesita si Pedro considera con el situacion del de suyu familia. (Luc. 5:1-11) Ya iscuji si Pedro que sigui con Jesus na de suyu trabajo predicacion. Justo el cosa le ya iscuji! Y puede kita asigura que ya suporta el mujer de Pedro con el de suyu decision. El Biblia ta indica que despues del resureccion de Jesus, ya sigui viaja el mujer de Pedro junto con ele por cuanto tiempo. (1 Cor. 9:5) Sin duda, el de suyu ejemplo como un Cristiano mujer ya dale con Pedro limpio conciencia para escribi con el inspirao consejo para na maga Cristiano marido y mujer. (1 Ped. 3:1-7) Claro que si Pedro y de suyu mujer ya confia con el promesa de Jehova que hay dale Le el cosa sila necesita si hace sila una con el Reino na diila vida.—Le con el Mateo 6:25, 31-34.

15. Cosa tu ya aprende na experiencia de Tiago y Esther?

¹⁵ Si por cuanto año ya ustedes casao, paquemodo ustedes continua cultiva con el deseo que hace pa mas na de ustedes ministerio? El un manera amo si considera ustedes con el experiencia del otro maga maridable. Por ejemplo, puede ustedes le con el serie “They Offered Themselves Willingly.” El maga articulo igual ansina ya puede ayuda con Tiago y Esther, un maridable na Brazil, para tene el fuerte deseo que sirvi na lugar donde tiene grande necesidad. Si Tiago ya explica: “Mientras ta le kame maga experiencia si paquemodo si Jehova ya ayuda con el de suyu maga siervo na moderno tiempo, quierre tambien kame experiencia si paquemodo si Jehova guia y cuida kanamon.” Nuay dura, ya cambia sila na Paraguay donde ta sirvi sila desde 2014 na un lugar que ta usa el lengguaje Portuguese. Si Esther ya habla: “El un texto que quierre-quierre kame amo el Efeso 3:20. Manada beses kame ya puede mira que deverasan gayot ese maga palabra mientras ta sirvi kame con Jehova.” Na aquel carta para na maga de  Efeso, ya promete si Pablo que hay dale si Jehova mas pa na cosa kita ta pidi. Bien deverasan gayot ese promesa!

16. Con quien puede pidi consejo el maga joven maridable si ta pensa acerca na diila maga goal na vida?

¹⁶ El maga joven maridable ahora puede beneficia na experiencia del otro quien ya aprende confia con Jehova. El cuanto maridable posible por manada año ya ta sirvi full-time na ministerio. Porque gendeh pruba pidi consejo kanila si ta pensa ustedes acerca na de ustedes maga goal? Este el otro manera para dale mira que ta confia ustedes con Jehova. (Prov. 22:17, 19) Puede tambien ayuda el maga anciano con el maga joven maridable para hace y alcanza maga espiritual goal.

17. Cosa ya sucede con Klaus y Marisa, y cosa kita puede aprende na diila experiencia?

¹⁷ Pero tiene vez, el diaton decision que hace pa mas na diaton ministerio posible gendeh sucede asegun na cosa kita ta expecta. Este el cosa ya sucede con Klaus y Marisa que ya menciona enante. Despues del tres año de casao, ya sale sila na diila lugar y yan voluntario na construida na Finland branch. Pero, ya puede sila sabe que gendeh sila puede esta alla por mas de seis meses. Del una, yan triste sila. Pero nuay dura, despues de ese, ya invita kanila para atende na un Arabic language course. Y ahora, alegre sila ta sirvi na otro nacion que ta converza Arabic. Mientras ta pensa el diila pasada, si Marisa ya admiti: “Dificil deja con el un cosa que yan anad tu y confia completamente con Jehova. Pero, ya puede yo mira si paquemodo si Jehova pirmi ta ayuda kanamon na maga manera que gendeh kame ta expecta. Despues experiencia con ese, mas ya queda fuerte el de mio confianza con Jehova.” Como cosa ta dale mira na ese experiencia, puede ustedes asigura que pirmi con ustedes bendici si Jehova si confia ustedes con ele completamente.

18. Cosa puede hace el maga maridable para continua confia con Jehova?

¹⁸ El matrimonio amo un regalo estaba con Jehova. (Mat. 19:5, 6) Quierre le que hay queda alegre el man maridable con ese regalo. (Prov. 5:18) Maga joven maridable, porque gendeh examina si paquemodo ustedes ta usa con el de ustedes vida? Ta hace ba ustedes el todo para dale mira con Jehova si paquemodo ustedes ta aprecia con ese regalo que ya dale con ustedes? Man cuento con Jehova na rezo. Busca maga principio na de suyu Palabra que aplicable na de ustedes situacion. Despues, aplica con el consejo que ya dale con ustedes si Jehova. Puede ustedes asigura que hay tene ustedes un alegre y bonito vida si man centro ustedes el de ustedes vida na servicio con Jehova.