Ya nace yo na Netherlands del 1948. Pagka-sunod año, ya cambia el diamon familia na São Paulo, Brazil. Bien activo gayot el de mio mayores na iglesia y como un familia, regular kame ta le con el Biblia despues del cena. Ya cambia ya tambien kame del 1959 pero na este tiempo na United States, donde ya queda kame na Massachusetts.

Ta trabaja gayot el de mio tata para cuida con el diamon familia que tiene ocho miembro. Ta trabaja le como un salesman que ta viaja, un trabajador na construction de calzada y un sales representative na un international airline company. Alegre el todo na familia cuando ya trabaja le na ese compania cay ta puede kame viaja onde-onde.

Cuando high school yo, pirmi yo ta pensa, ‘Cosa yo hace si queda yo grande?’ El cuanto del de mio amigo ya anda na universidad y el otro ya decidi queda soldao. Pero para conmigo, no quierre yo queda soldao cay no quierre yo purpiajan y no quierre tambien yo peleajan. Ya decidi yo anda na universidad cay quierre yo evita queda soldao. Pero el deverasan, quierre yo ayuda con otro cay ta pensa yo, puede este dale deverasan proposito na de mio vida.

Na universidad, interesao yo na anthropology ciendo curioso yo acerca si onde ya origina el vida. Ya enseña kanamon evolucion y ta expecta kanamon que acepta que deverasan se. Pero para conmigo, el cuanto explanacion gendeh logical y ta manda conmigo creé con ese maskin nuay prueba.

Na maga clase que ya atende yo, nuay kanamon enseña maga buen principio acerca na moral. Sino, ya enseña kanamon que hace maskin cosa para tene buen resulta na universidad. Alegre yo man party junto na maga amigo y usa maga droga pero nuay dura ese alegria. Ya pensa yo, ‘Este ba gayot el vida que tiene proposito?’

Ya llega el tiempo, ya llega yo na ciudad de Boston y ya man enroll na un universidad alla. Para puede yo paga maga pagada na escuela, ya trabaja yo durante el vacacion y alla ya conoce yo un Testigo de Jehova por primer vez. El de mio uban na trabajo yan cuento conmigo acerca na profecia del “siete tiempo” que puede incuntra na Daniel capitulo 4 y ya explica le que ta vivi ya kita na tiempo del fin. (Dan. 4:13-17) Dayun yo ya realiza que si continua yo con el diamon istoria y hace serioso con ese, necesita yo cambia con el de mio manera de vida. Poreso, ya hace yo el todo para evita con ele.

Na universidad, ya saca yo curso que hay ayuda conmigo prepara man voluntario na South America. Ya pensa yo que si ayuda yo con otro quien ta necesita ayuda, hay dale este proposito con el de mio vida. Pero ya realiza yo que maskin este, nuay puede ayuda conmigo. Yan luya yo y ya descanza entra escuela na universidad na fin del semestre.

Del Mayo 1970, ya cambia yo na Amsterdam, na Netherlands, para trabaja na igual airline company onde ya trabaja el de mio tata. Por causa con ese trabajo, pirmi yo ta puede viaja y ya visita na maga nacion de Africa, America, Europe y Asia. Ya realiza yo que maskin onde yo nacion anda, todo sila ta enfrenta grande problema y dol nuay quien puede solva con ese. Quierre yo siempre hace un importante cosa na de mio vida poreso ya decidi yo que bira na United States y man enroll otravez na aquel mismo universidad na Boston.

Pero na escuela, ya realiza dayun yo que gendeh yo siempre ta incuntra con el maga contestacion na de mio maga pregunta acerca na vida. Cay no sabe mas yo cosa hace, ya pidi yo consejo con el de mio professor na anthropology. Ya espanta yo cuando ya habla le: “Porque pa man tu continua estudia? Mas bueno pa si descanza ya tu.” Ya sigui yo con ese consejo y nuay mas bira na universidad.

Cay dol nuay siempre proposito el de mio vida, ya entra yo na un grupo que gendeh ta sigui con el accion del mayoria y dol ta anima con el maga gente que tene paz y amor. Iyo y el cuanto maga amigo y amiga ya viaja na United States para na Acapulco, Mexico. Ya queda kame junto con el maga gente quien tiene otro manera de vida y dol nuay sila maga problema. Pero cuando ya queda yo junto kanila, ya discubri yo que nuay proposito el diila vida y gendeh deverasan el diila alegria. Sino, manada kanila el gendeh honesto y gendeh leal.

Durante aquel tiempo, ya principia yo pensa acerca con el un cosa que quierre yo hace cuando  bata yo. Quierre yo viaja na mar, gendeh como un marinero sino como un capitan. El solamente manera que puede yo hace con ese amo si tiene yo de mio mismo barco. Ciendo el de mio amigo que si Tom quierre tambien hace igual ansina, ya decidi kame dos que viaja junto na entero mundo pasando na mar. Quierre yo busca un bonito isla donde hay queda yo lejos na otro maga gente.

Iyo y si Tom ya viaja para na Arenys de Mar, cerca na Barcelona, Spain. Alla ya cumpra kame un diutay barco que el nombre Llygra que tiene grandor de 31 pies (9.4 m). Ya principia kame construi otravez con el diutay barco para puede kame viaja enbuenamente na mar. Ciendo gendeh kame apurao llega na diamon destinacion, ya quita kame con el maquina de este y ya usa con el lugar para reserva mas manada agua para toma. Para puede kame maneja con el barco na maga diutay pantalan, ya cumpra kame dos saguan que tiene largor de 16 pies (5 m). Despues de ese, ya principia kame viaja para na Seychelles, na Indian Ocean. El diamon plano amo que viaja pasando na costa oeste de Africa y palibut del Cape of Good Hope, na South Africa. Ya usa kame con el maga estrellas, cuanto mapa, libro y maga simple instrumento para ayuda kanamon viaja na justo direccion. Bilib gayot yo si paquemodo kame ya puede sabe con el diamon exacto posicion.

Pero, ya realiza kame que este diutay barco que hacido de palo gendeh gale puede viaja na mar. Maga seis galon (22 L) de agua el ta entra cada hora! Como cosa ya menciona na introduccion, durante el un tifun, ya tiene yo miedo y ya reza por primer vez na manada año. Ya promete yo con Dios que si sobrevivi kame, hay pricura yo conoce con ele. Ya descanza el tifun y ya cumpli yo con el de mio promesa.

Ya principia yo le con el de mio Biblia mientras na mar kame. Bien bale gayot mientras ta sinta yo na diamon diutay barco na Mediterranean Sea y ta puede yo mira con el maga flying fish, dolphin y si paquemodo de grande el mar alrededor kanamon. Llega el noche, bien bonito gayot mira con el Milky Way Galaxy y ya queda yo mas convincido que tiene un Dios quien interesao na maga gente.

Despues del cuanto semana na mar, ya llega kame na pantalan de Alicante, Spain, donde ya pricura kame vende con el diamon diutay barco para puede kame cumpra otro. Gendeh maka-estraña que dificil busca buyer para na un diutay barco que daan, nuay maquina y ta entra agua. Pero, un buen tiempo quel para le con el de mio Biblia.

Cuando mas ya le yo con el de mio Biblia, ya principia yo mira que este libro puede ayuda kanaton para tene buen exito na vida. Ya puede yo aprende que claro ta habla el Biblia que debe kita tene un vida que limpio na moral. Y ya pensa yo si porque bien manada gente—incluido iyo—el ta considera con el diamon mismo cuerpo como maga Cristiano pero ta ignora si cosa ta habla el Biblia.

Determinao yo que hace maga grande cambio para limpia con el de mio vida poreso ya descanza yo usa droga. Ya pensa yo que tiene maga gente quien ta vivi asegun na maga alto principio del Biblia na moral y quierre yo conoce kanila. Por segundo vez, ya reza yo y ya pidi con Dios que ayuda conmigo para incuntra kanila.

Para conmigo, justo lang que uno-uno examina con el cada religion hasta hay incuntra yo con el verdadero religion. Mientras ta camina yo na maga calle de Alicante, ya puede yo mira maga building del diferente religion. Pero ciendo mayoria de este tiene maga imagen, sabe dayun yo que gendeh este el verdadero religion.

Un Domingo tarde, talla yo na gulud enfrente del pantalan y ta le con el Santiago 2:1-5, donde ta habla que gendeh debe man afavor con el maga rico. Cuando pabirada yo na diamon diutay barco, ya pasa yo na un lugar que dol tiene ta hace religioso miting y tiene caratula arriba del puerta: “Kingdom Hall of Jehovah’s Witnesses.”

Ya pensa yo, ‘Pruba yo con este maga gente. Mira yo si paquemodo sila conmigo trata.’ Poreso, ya entra yo na Kingdom Hall que pies-pies, mabarbas y ta bisti roto-roto pantalon. El attendant ya lleva conmigo que sinta junto con el un de edad mujer quien amable ya ayuda conmigo busca maga texto que ya menciona el speaker. Despues del miting, ya espanta gayot yo na pagka-bueno que ya dale conmigo mira el todo quien yan greet conmigo. El un hombre ya invita conmigo na de suyu casa para discuti acerca na Biblia pero cay nuay pa yo acaba le con el Biblia, ya habla yo con ele, “Habla yo contigo si preparao ya yo.” Mientras tanto, ya principia yo atende con el todo maga miting.

Despues del cuanto semana, ya visita yo con el hombre na de suyu casa y ya contesta le con el de mio maga pregunta acerca na Biblia. Despues del un semana, ya dale le conmigo un bag que lleno de maga bien bonito ropa. Ya habla le conmigo que el dueño de ese maga ropa talla na preso cay ya obedece le con el mandamiento del Biblia que ama con uno y otro, y gendeh man guerra. (Isa. 2:4; Juan 13:34, 35) Ahora, asigurao ya yo que ya incuntra ya yo con el cosa yo ta busca—maga gente quien ta aplica el maga cosa ta habla el Biblia acerca na moralidad! Gendeh mas de mio goal que busca un isla que dol paraiso sino para estudia con el Biblia para entende gayot con ese. Poreso, ya bira yo na Netherlands.

Ya alcanza conmigo cuatro dia para llega na ciudad de Groningen, na Netherlands. Alla, necesita yo busca trabajo para suporta con el de mio mismo cuerpo. Na un shop de carpintero onde yo yan apply, tiene ta pregunta na form si cosa el de mio religion. Ya escribi yo, “Testigo de Jehova.” Cuando ya le se el dueño, ya nota yo que ya cambia el expresion del de suyu cara. Ya habla le, “Llama lang yo contigo.” Pero, nuay le llama.

 Na otro shop de carpintero, ya pregunta yo con el dueño si necesita le ayuda. Ya pidi le conmigo diploma y prueba del de mio trabajo de antes. Ya explica yo que yan repair yo un diutay barco de palo de antes. Ya espanta yo cuando ya habla le, “Puede ya tu principia luego tarde pero na un condicion. No quierre yo que causa tu problema aqui na de mio shop cay uno yo del maga Testigo de Jehova y ta vivi yo asegun na maga principio na Biblia.” Espantao yo ya mira con ele y ya contesta, “Iyo tambien!” Cay largo el de mio pelo y mabarbas, ya habla le, “Entonces, man Bible study kita!” Alegre yo acepta con ese. Ahora, claro ya conmigo si porque nuay conmigo llama el otro dueño del shop. Ya contesta si Jehova con el de mio maga rezo. (Sal. 37:4) Ya trabaja yo na shop de ese hermano por un año. Durante na ese tiempo, ya estudia yo con el Biblia junto con ele y ya bautiza del Enero 1974.

Un mes despues, ya principia yo man pioneer y ya dale gayot este grande alegria na de mio vida. Pagka-sunod mes, ya cambia yo na Amsterdam para suporta con el un Spanish-language group que nuevo lang ya establicia. Ya queda gayot yo alegre mientras ta conduci maga Bible study na lengguaje Spanish y Portuguese! Del Mayo 1975, ya ricibi yo el privilegio que sirvi como un special pioneer.

Un dia, el un special pioneer hermana que si Ineke ya atende na diamon miting na Spanish lengguaje para introduci kanamon el de suyu Bible study que de Bolivia. Iyo y si Ineke ya decidi que mas conoce pa con uno y otro por medio na carta y ya sabe kame que igual el diamon maga goal. Ya casa kame del 1976 y ya continua sirvi como maga special pioneer hasta del 1982 cuando ya invita kanamon para atende na ika-73 clase de Gilead. Bien espantao kame y alegre que yan assign kanamon na East Africa, donde ya sirvi kame por cinco año na Mombasa, Kenya! Del 1987, yan assign kanamon na Tanzania donde nuay mas prohibi con el trabajo predicacion. Ya esta kame alla por 26 año antes bira na Kenya.

Ya tiene deverasan proposito el diamon vida mientras ya ayuda kame con el maga humilde gente para aprende el verdad na Biblia. Por ejemplo, el de mio primer Bible study na Mombasa amo el un hombre con quien yo ya conoce mientras tan public witnessing. Despues yo con ele ofrece dos magasin, ya habla le, “Despues yo con este le, cosa yo hace?” Pagka-sunod semana, ya principia kame estudia con el Biblia usando el libro You Can Live Forever in Paradise on Earth que nuevo lang yan release na Swahili. Ya bautiza le despues del un año y ya queda un regular pioneer. Desde aquel tiempo, ele y el de suyu mujer ya puede ayuda con el cerca 100 gente para na dedicacion y bautismo.

Cuando ya puede yo entende con el proposito del vida, ya sinti yo que dol igual yo con el negociante que ta viaja quien ya discubri un especial perlas y no quierre con ese larga. (Mat. 13:45, 46) Quierre yo usa con el de mio vida para ayuda con otro para incuntra el deverasan proposito del vida. Junto con el de mio amable mujer, ya puede kame experiencia si paquemodo si Jehova ya ayuda con el de suyu maga siervo para tene un vida que tiene proposito.