ARTICULO 47
No Permiti que Tiene Maskin Cosa que Separta Contigo con Jehova
“Ta confia yo contigo, O Jehova.”—SAL. 31:14.
CANCION 122 Be Steadfast, Immovable!
PREVIEW a
1. Porque kita sabe que quierre si Jehova que queda cerca kanaton?
QUIERRE si Jehova que queda kita cerca con ele. (Sant. 4:8) Quierre le queda diaton Dios, diaton Tata y diaton Amigo. Ta contesta le con el diaton maga rezo y ta ayuda kanaton durante el maga tiempo de dificultad. Y ta usa le con el de suyu organizacion para enseña y protege kanaton. Pero, cosa kita debe hace para queda cerca con Jehova?
2. Cosa kita hace para queda cerca con Jehova?
2 Puede kita queda cerca con Jehova si reza kita con ele y si le kita con el de suyu Palabra y medita con ese. Si hace kita se, mas ama y aprecia kita con ele. Manda este move kanaton para obedece y alaba con ele—maga cosas que conviene gayot le ricibi. (Rev. 4:11) Si mas conoce kita con Jehova, mas confia kita con ele y con el organizacion que ta usa le para ayuda kanaton.
3. Cosa ta hace el Diablo para hace separta kanaton con Jehova pero cosa ayuda kanaton para gendeh kita deja con el diaton Dios y con el de suyu organizacion? (Salmo 31:13, 14)
3 Pero, el Diablo ta pricura hace separta kanaton con Jehova, especialmente si ta enfrenta kita maga dificultad. Paquemodo le ta hace con ese? Hinay-hinay le ta pricura quita con el diaton confianza con Jehova y na De Suyu organizacion. Pero, puede kita resisti con el de suyu maga tactica. Si fuerte el diaton fe y confianza con Jehova, gendeh kita deja con el diaton Dios y con el de suyu organizacion.—Le con el Salmo 31:13, 14.
4. Cosa kita discuti na este articulo?
4 Na este articulo, hay discuti kita tres dificultad que posible estaba apuera del congregacion; el cada uno de este posible quita con el diaton confianza con Jehova y na de suyu organizacion. Paquemodo este maga dificultad puede hace separta kanaton con Jehova? Y cosa kita puede hace para resisti con el maga tactica de Satanas?
SI TA EXPERIENCIA KITA DIFICULTAD
5. Na cosa manera posible perde el diaton confianza con Jehova y na de suyu organizacion si ta experiencia kita maga dificultad?
5 Tiene vez, ta enfrenta kita maga dificultad igual na oposicion na familia o si ya perde el diaton trabajo. Paquemodo ese maga dificultad puede quita con el diaton confianza na organizacion de Jehova y hace kanaton separta con ele? Si ta experiencia kita maga problema por largo tiempo ya, posible perde el diaton esperanza y man luya kita. Ta usa si Satanas con ese maga oportunidad para manda kanaton pensa que gendeh kanaton ta ama si Jehova. Quierre el Diablo que pensa kita que si Jehova o el De Suyu organizacion el causa del diaton sufrimiento. Semejante con ese el cosa ya sucede na cuanto Israelita na Egipto. Del primero, ya creé sila que ya iscuji si Jehova con Moises y Aaron para libra kanila na pagka-esclavo. (Ex. 4:29-31) Pero cuando ya queda mas dificil el diila vida por causa con el Faraon, ya disculpa sila con Moises y Aaron, y ya habla: “Por causa con ustedes, ya rabia kanamon el Faraon y el de suyu maga siervo, y ya pone ustedes espada na diila mano para mata kanamon.” (Ex. 5:19-21) Maka-triste gayot cay ya disculpa sila con el maga leal siervo del Dios! Si largo tiempo ya tu ta experiencia maga dificultad, cosa tu puede hace para esta fuerte el de tuyu confianza con Jehova y na de suyu organizacion?
6. Cosa kita ya aprende con profeta Habacuc acerca si paquemodo enfrenta con el diaton maga dificultad? (Habacuc 3:17-19)
6 Habla con Jehova na rezo si cosa tu ta sinti y pidi ayuda con ele. Si profeta Habacuc ya enfrenta manada dificultad. Tiene tiempo que dol yan duda le si ta ama ba gayot con ele si Jehova. Poreso, ya habla le con Jehova na rezo si cosa le ta sinti. Ele ya habla: “O Jehova, hasta cuando yo pidi ayuda con uste y gendeh uste oi? . . . Porque uste ta permiti con el maltratamiento?” (Hab. 1:2, 3) Ya contesta si Jehova con el sincero rezo del de suyu leal siervo. (Hab. 2:2, 3) Despues medita si Habacuc si paquemodo si Jehova ya salva con el De Suyu maga siervo, ya queda le alegre otravez. Ya queda le convincido que si Jehova ta ama con ele y hay ayuda con ele aguanta con el maskin cosa probanza. (Le con el Habacuc 3:17-19.) Cosa el leccion para kanaton? Si ta enfrenta tu maga dificultad, reza con Jehova y habla con ele si cosa tu ta sinti. Despues, pidi con ele ayuda. Si hace tu se, puede tu asigura que hay dale contigo si Jehova el fuerza que necesita tu para aguanta. Y si ya sinti tu el de suyu ayuda, hay queda mas fuerte el de tuyu fe con ele.
7. Cosa el maga pariente de Shirley ta pricura convinci con ele y porque nuay perde el de suyu fe con Jehova?
7 Mentena con el de tuyu espiritual rutina. Considera si paquemodo se ya puede ayuda con Shirley, un hermana na Papua New Guinea, cuando ya enfrenta le maga dificultad. b Pobre lang el familia de Shirley y tiene vez, tan dificil sila tene bastante comida. El de suyu pariente ya pricura hace perde el de suyu confianza con Jehova. Ele ya habla: “Ta habla tu que el sagrao espiritu del Dios ta ayuda contigo pero onde man se ayuda? Pobre siempre el de tuyu familia. Sayang lang el de tuyu tiempo predica.” Si Shirley ya admiti: “Ya puede yo pensa: ‘Ta cuida ba gayot kanamon el Dios o gendeh?’ Poreso, ya reza yo dayun con Jehova y ya habla con ele el cosa yo ta pensa. Ya continua yo le con el Biblia y con el diaton maga publicacion, ya predica y ya atende maga miting.” Despues, ya puede le realiza que ta cuida si Jehova con el de suyu familia. Nuay sila falta comida y alegre sila. Si Shirley ya habla: “Ya sinti yo que si Jehova ta contesta con el de mio maga rezo.” (1 Tim. 6:6-8) Si mentena tu con el de tuyu espiritual rutina, el maga dificultad o duda gendeh puede hace separta contigo con Jehova.
SI TA MALTRATA CON EL MAGA HERMANO QUIEN TA GUIA NA ORGANIZACION
8. Cosa posible sucede con el maga hermano quien ta guia na organizacion de Jehova?
8 Por medio na maga noticia y social media, el diaton maga enemigo ta hace calayat maga imbusterias o gendeh justo informacion acerca con el maga hermano quien ta guia na organizacion de Jehova. (Sal. 31:13) Ya arresta y ya acusa como maga criminal con el cuanto hermano. El maga Cristiano del primer siglo ya enfrenta semejante situacion cuando falso ya acusa y ya arresta con apostol Pablo. Cosa sila ya hace?
9. Cosa ya hace el cuanto Cristiano cuando ya hace preso con apostol Pablo?
9 El cuanto maga Cristiano del primer siglo ya descanza suporta con apostol Pablo cuando yan preso le na Roma. (2 Tim. 1:8, 15) Porque? Ya tiene ba sila huya cay ya mira el maga gente con Pablo como un criminal? (2 Tim. 2:8, 9) O ya tiene ba sila miedo que baka persigui tambien kanila? Maskin cosa pa el diila razon, imagina si cosa posible ya sinti si Pablo. Ya experiencia le manada dificultad y ya pone pa gane na peligro el de suyu vida para kanila. (Act. 20:18-21; 2 Cor. 1:8) Ojala gendeh kita queda igual con aquellos quien ya abandona con Pablo na tiempo que bien necesita le kanila! Cosa kita debe acorda si ta persigui con el maga hermano quien ta guia na organizacion?
10. Cosa kita debe acorda si ta persigui con el maga hermano quien ta guia kanaton y porque?
10 Acorda si porque kanaton ta persigui y si quien el causa de ese. El 2 Timoteo 3:12 ta habla: “Todo aquellos quien quiere vivi un vida religioso unido con Cristo Jesus, ay sufri gayot maga persecucion.” Poreso, gendeh mas kita debe espanta si porque si Satanas ta ataca con el maga hermano quien ta guia kanaton. Ta hace le este para el maga hermano gendeh mas esta fiel con Jehova y para hace miedo kanaton.—1 Ped. 5:8.
Maskin pa na preso si Pablo, con coraje con ele ya suporta si Onesiforo. Ahora, el maga siervo del Dios ta suporta con el maga hermano y hermana quien yan preso, como cosa ta dale mira na este reenactment (Mira con el parapo 11-12)
11. Cosa kita puede aprende na ejemplo de Onesiforo? (2 Timoteo 1:16-18)
11 Continua suporta con el de tuyu maga hermano y esta leal kanila. (Le con el 2 Timoteo 1:16-18.) Otro el reaccion del un Cristiano del primer siglo que si Onesiforo cuando ya hace preso con Pablo. Si Pablo ya habla: “Noay le man huya por causa del dimio maga cadena.” Sino, ya busca si Onesiforo con Pablo y cuando ya incuntra le con este, ya hace le manera para ayuda con Pablo. Para puede hace con ese, ya pone na peligro si Onesiforo con el de suyu mismo vida. Cosa el leccion para kanaton? Gendeh kita debe permiti con el miedo na gente que sangga kanaton para suporta con el diaton maga hermano con quien ta persigui. En vez, defende y ayuda kita kanila. (Prov. 17:17) Necesita sila con el diaton amor y suporta.
12. Cosa kita puede aprende na diaton maga hermano y hermana na Russia?
12 Considera si paquemodo el maga Testigo de Jehova na Russia ya ayuda con el diila maga hermano y hermana quien yan preso alla. Manada maga hermano y hermana el ya anda na corte para suporta kanila. Cosa el leccion para kanaton? No tene miedo si falso ya acusa, ya arresta o ya persigui con el maga hermano quien ta guia na organizacion. Reza para kanila, cuida con el diila familia y busca otro manera para puede dale mira el de tuyu suporta.—Act. 12:5; 2 Cor. 1:10, 11.
SI TA GANGGUIA KANATON
13. Na cosa manera puede perde el diaton confianza con Jehova y na de suyu organizacion si ta gangguia kanaton el otro?
13 Posible kanaton gangguia el diaton maga pariente que gendeh siervo de Jehova y el diaton maga uban na trabajo o na escuela cay ta predica kita o cay ta sigui kita con el maga alto principio de Jehova na moral. (1 Ped. 4:4) Posible sila habla: “Bueno man tu pero sobra de istricto y de antes el de tuyu religion.” El cuanto baka gendeh ta gusta kanaton por causa na manera si paquemodo kita ta trata con el maga yan disfellow y ta habla: “Gendeh se ta hace el maga amable gente.” Si ta oi kita ansina, posible se causa kanaton para man duda. Baka puede kita pensa: ‘Sobra ba el cosa ta expecta si Jehova conmigo? Bien istricto ba el de suyu organizacion?’ Si ta enfrenta tu situacion igual ansina, cosa tu puede hace para esta cerca con Jehova y con el de suyu organizacion?
Nuay creé si Job na maga imbusterias del de suyu maga falso amigo quien ya gangguia con ele. Sino, ya mentena le con el de suyu integridad con Jehova (Mira con el parapo 14)
14. Cosa kita debe hace si ta gangguia kanaton el otro cay ta sigui kita con el maga principio de Jehova? (Salmo 119:50-52)
14 Queda determinao que sigui con el maga principio de Jehova. Ya sigui si Job con el maga principio de Jehova maskin pa ya gangguia con ele el maga gente. El uno del maga falso amigo de Job ya pricura pa gane convinci con ele que gendeh importante con Dios si sigui ba si Job con el De Suyu maga principio o gendeh. (Job 4:17, 18; 22:3) Pero, nuay creé si Job con ese maga imbusterias. Sabe le que justo el maga principio de Jehova acerca si cosa el justo y mali, y determinao le que sigui con ese. Nuay le permiti con otro que quita con el de suyu integridad. (Job 27:5, 6) Cosa el leccion para kanaton? No permiti con el gangguiada del maga gente que causa contigo para man duda con el maga principio de Jehova. Pensa con el de tuyu mismo pasada. Gendeh ba ya experiencia tu que pirmi justo el maga principio de Jehova y ya beneficia tu cay ya sigui tu con ese? Queda determinao que suporta con el organizacion que ta sigui con ese maga principio. Como resulta, gendeh tu separta con Jehova maskin paquemodo pa contigo gangguia el maga gente.—Le con el Salmo 119:50-52.
15. Porque ya gangguia con Brizit?
15 Considera con el experiencia de Brizit, un hermana na India. Ya gangguia con ele el de suyu familia por causa na de suyu fe. Corto tiempo despues del de suyu bautismo del 1997, ya perde el trabajo del de suyu marido que gendeh Testigo. Poreso, el marido ya decidi que ele, si Brizit y el diila maga anak mujer hay queda junto con el de suyu mayores quien ta queda na otro ciudad. Pero por causa con ese, ya enfrenta si Brizit mas tormento dificultad. Cay nuay trabajo el de suyu marido, necesita le trabaja full-time para suporta con el de suyu familia. Mas pa, maga 350 kilometro el distancia del diila casa na de con todo cerca congregacion. Maka-triste cay yan contra con ele el familia del de suyu marido por causa na de suyu fe. Ya queda pa gane bien grabe el situacion poreso necesita ya tambien cambia lugar el familia de Brizit. Despues, bigla lang ya muri el de suyu marido. Despues del cuanto tiempo, ya muri tambien el uno del de suyu maga anak mujer na cancer na edad lang de 12 año. Y maka-triste cay ya disculpa con Brizit el de suyu maga pariente na todo cosa ya sucede. Ya habla sila que si nuay le queda uno del maga Testigo de Jehova, gendeh era quel sucede maga tragedia. Maskin pa ansina, ya continua le confia con Jehova y ya esta cerca na de suyu organizacion.
16. Paquemodo ya bendici con Brizit cay ya esta le cerca con Jehova y con el De Suyu organizacion?
16 Ciendo bien lejos el casa de Brizit na congregacion, ya anima con ele el circuit overseer que predica na diila lugar y conduci maga miting na de suyu casa. Del primero, ya sinti le que bien dificil con ese hace. Pero, ya sigui le con el direccion. Ya predica le con el buen noticia con otro, ya conduci maga miting na de suyu casa y ya dale tiempo para na de familia adoranza junto con el de suyu maga anak mujer. Cosa el resulta? Ya puede le conduci manada Bible study y manada del de suyu maga estudiante el ya bautiza. Del 2005, ya principia le sirvi como un regular pioneer. Ya bendici gayot con ele cay ya confia le con Jehova y ya esta leal na De Suyu organizacion. El de suyu maga anak mujer fiel ta sirvi con Jehova y tiene ya ahora dos congregacion na ese lugar! Convincido si Brizit que ya dale con ele fuerza si Jehova para enfrenta con el de suyu maga dificultad y para puede aguanta maskin pa ta gangguia con ele el de suyu familia.
ESTA LEAL CON JEHOVA Y CON EL DE SUYU ORGANIZACION
17. Cosa kita debe determinao hace?
17 Quierre si Satanas que pensa kita que hay abandona kanaton si Jehova si ta enfrenta kita maga dificultad y que hay queda lang mas dificil el diaton vida si suporta kita con el organizacion de Jehova. Quierre si Satanas que tene kita miedo si falso ya acusa, ya persigui o ya hace preso con el maga hermano quien ta guia con el organizacion. Y si ta gangguia kanaton el maga gente, quierre le que perde el diaton confianza na maga principio de Jehova y na De Suyu organizacion. Pero, bien sabe kita acerca con el de suyu maga tactica. (2 Cor. 2:11) Queda determinao que gendeh creé con el maga imbusterias de Satanas y esta leal con Jehova y con el De Suyu organizacion. Acorda que nunca contigo abandona si Jehova. (Sal. 28:7) Poreso, no permiti que tiene maskin cosa que separta contigo con Jehova!—Roma 8:35-39.
18. Cosa kita discuti na siguiente articulo?
18 Na este articulo, ya discuti kita maga dificultad que posible kita enfrenta apuera del congregacion. Pero, puede tambien pone na probanza con el diaton confianza con Jehova y na de suyu organizacion si ta enfrenta kita maga dificultad adentro del congregacion. Cosa kita hace para puede enfrenta con ese maga dificultad? Discuti kita con ese na siguiente articulo.
CANCION 118 “Give Us More Faith”
a Para puede kita aguanta y esta fiel na este ultimo maga dia, debe kita continua confia con Jehova y con el de suyu organizacion. El Diablo ta pricura usa maga probanza para destroza con ese confianza. Este articulo hay discuti tres cosas que ta hace el Diablo y si cosa kita puede hace para resisti con ele.
b Ya cambia con el cuanto nombre.