Antes yo habla si cosa sunod ya sucede, relata anay yo si paquemodo yo ya principia sirvi full-time na ministerio.

Ya nace yo del 1942 na Curaçao, un bonito isla na Caribbean. De Suriname gayot el de mio tata pero ya cambia le na isla para trabaja. Cuanto año antes yo nace, ya queda le uno del maga primer Testigo de Jehova que ya bautiza na Curaçao. a Yan Bible study le kanamon man hermano y hermana cada semana, maskin pa gendeh quel facil para con ele cay nuay kame gana estudia. Cuando 14 año yo, ya decidi si Papang que bira el diamon familia na Suriname para cuida con el de suyu nana que de edad ya.

Na Suriname, ya principia yo man junto con el maga jovenes na congregacion quien activo ta sirvi con Jehova. Cuanto año sila mayor conmigo y ta sirvi como maga regular pioneer. Si tan cuento sila acerca na diila maga experiencia na ministerio, ta puede yo mira na diila cara el alegria. Despues del maga miting na congregacion, tan cuento tambien kame man amigo acerca na maga topico na Biblia​—tiene vez, mientras ta sinta apuera y ta mira con el maga estrellas. El de mio maga amigo ya ayuda conmigo para realiza si cosa yo quierre hace na de mio vida; quierre yo sirvi con Jehova. Poreso, ya bautiza yo cuando 16 año yo. Cuando ya queda yo 18, ya principia yo man regular pioneer.

Ya aprende yo manada leccion como un pioneer y ya puede este ayuda conmigo na de mio entero servicio con Jehova. Por ejemplo, el una que ya puede yo aprende amo que bien importante que man train con otro. Cuando ya principia yo man pioneer, ya dale conmigo mira personal interes el un misionario que si Hermano Willem van Seijl. b Ya enseña le si paquemodo  hace con el maga responsibilidad na congregacion. Na aquel tiempo, nuay yo realiza que puede gale gayot ayuda conmigo este training. Pagka-sunod año, ya iscuji conmigo que sirvi como un special pioneer y ya principia yo ayuda con el maga diutay grupo de maga hermano y hermana quien ta queda na monte de Suriname que lejos na otro maga congregacion. Ya aprecia gayot yo con el training que ya dale conmigo el maga hermano! Ya manda quel move conmigo para sigui con el diila ejemplo y dale tambien tiempo para man train con otro.

Ika-dos, ya puede tambien yo aprende que tiene ventaja si tiene simple vida y plaña enbuenamente. Na principio del cada mes, iyo y el de mio uban que special pioneer tambien ta plaña si cosa kame necesita na venedero maga semana. Despues, el uno kanamon hay viaja para na pueblo y cumpra si cosa kame necesita. Necesita kame pensa enbuenamente si paquemodo gasta con el sen que ta ricibi kame cada mes y asigura que el diamon supply hay alcanza un mes. Cay si ya falta este mientras na monte kame, nuay quien puede ayuda kanamon. Ya puede ayuda conmigo que esta focus na servicio con Jehova cay ya aprende yo vivi simple vida y plaña enbuenamente desde joven yo.

Ika-tres, ya puede tambien yo aprende que tiene beneficio si enseña con el maga gente na diila mismo lengguaje. Ya engranda yo que ta converza Dutch, English, Papiamento y Sranantongo (ta llama tambien Sranan), el lengguaje del mayoria del maga gente na Suriname. Pero na monte, ya puede yo mira que mas positivo el reaccion del maga gente si ta predica kanila na diila mismo lengguaje. Tan dificil yo na cuanto de este maga lengguaje, igual na Saramaccan. Pero, gendeh gayot sayang el de mio esfuerzo. Adentro na manada año, ya puede yo enseña con el verdad na mas manada gente cay ta puede yo converza con el diila lengguaje.

Siempre, tiene tambien yo maga experiencia que maka-huya. Por ejemplo, quierre yo pregunta si quetal el un Bible study que ta converza Saramaccan cay ta duele el de suyu barriga. Pero, el cosa gale yo ya puede pregunta con ele amo si priñada ba le. Nuay gayot le gusta con el de mio pregunta. Maskin pa ta puede yo hace maga kamali igual ansina, pirmi yo ta hace esfuerzo que converza na lengguaje del maga gente na de mio assignment.

Del 1970, ya queda yo un circuit overseer. Na ese año, ya presenta yo con el slide program “Visiting the World Headquarters of Jehovah’s Witnesses” na manada grupo na monte. Para alcanza kanila, yan junto yo con el un grupo de maga hermano para pasa na rio que ta munta con el largo bangca. Ta lleva tambien kame generator, tanque de gasolina, lampara que ta usa petroleo y slide projection equipment. Si llega kame na diamon destinacion, ta carga kame con ese todo gamit para na monte donde kame hace con el slide program. Pero, el cosa gayot yo ta acorda na ese maga viaje amo si paquemodo ya gusta el maga gente con ese maga programa. Alegre gayot yo ayuda con otro que aprende acerca con Jehova y con el de suyu organizacion aqui na tierra. El alegria que ya sinti yo cuando ya mira yo si  paquemodo sila ya queda cerca con Jehova mas pa na maskin cosa sacrificio que ya hace yo para hace el trabajo de Jehova.

Maskin pa tiene ventaja si single yo para puede hace de mio maga assignment, quierre siempre yo casa. Poreso, ya principia yo especifico reza para incuntra un mujer quien sirvi junto conmigo maskin pa na dificil assignment. Maga un año despues, ya principia yo enamora con Ethel, un special pioneer quien conforme hace sacrificio para sirvi con Jehova. Desde joven le, ta gusta gayot si Ethel con el ejemplo de apostol Pablo y quierre le hace el todo na ministerio igual con Pablo. Ya casa kame del Septiembre 1971 y ya principia sirvi na circuit work como man maridable.

Ya engranda si Ethel que nuay manada material cosas poreso ya puede le man adjust dayun na diamon assignment na monte. Por ejemplo, si ta prepara kame para visita na maga congregacion que bien lejos, gendeh kame ta lleva manada gamit. Ta laba kame ropa y ta baña na rio. Ta come tambien kame maskin cosa que ta dale kanamon el maga hermano y hermana—iguana, piranha o maskin cosa que ya cuji sila na monte o ya saca na rio. Si nuay plato, ta come kame na ojas de saging. Si nuay cuchara o tenedor, mano-mano kame ta come. Ya sinti kame de Ethel que el maga sacrificio que ya hace kame mientras ta sirvi con Jehova ya puede ayuda para queda kame cerca con uno y otro igual como tres amarro turcido. (Ecl. 4:12) Nuay gayot kame arripinti con el diamon decision!

Un dia, cuando pabolbida ya kame despues visita con el maga hermano y hermana, ya experiencia kame con el cosa yo ya relata na introduccion. Cuando el baroto ya llega na lugar donde tiene fuerte corentazo, ya sumi este unrato pero ya subi lang dayun na agua. Bueno ya lang cay ya visti kame life jacket y nuay cae na baroto. Pero, ya llena de agua el baroto. Ya buta kame na rio el laman del diamon maga caldero y despues  ya usa con ese maga caldero para quita el agua na baroto.

Ciendo ya buta kame con el diamon comida, ya principia kame pesca mientras ta pasa na rio. Pero, nuay kame cosa ya cuji. Poreso, ya reza kame con Jehova y ya pidi con ele que dale kanamon comida para na ese dia. Despues kame reza, el uno del maga hermano ya pesca de bingit y ya puede cuji un grande pescao que bastante para man busug kame cinco aquel noche.

Despues del cinco año na traveling work, kame de Ethel ya tiene un bendicion que nuay kame expecta—hay queda kame maga mayores. Alegre yo cuando ya sabe con ese pero tan lingasa yo si cosa sucede kanamon. Quierre kame de Ethel que continua sirvi full-time si posible. Del 1976, ya nace el diamon anak hombre que si Ethniël. Dos año y media despues, ya nace el diamon segundo anak hombre que si Giovanni.

Cay grande el necesidad na Suriname aquel tiempo, ya habla el branch office que continua yo sirvi como un circuit overseer mientras ta hace engranda con el diamon maga anak. Cuando bata pa el diamon maga anak, yan assign conmigo na maga circuito que poco lang el congregacion. Poreso, ta sirvi yo como un traveling overseer cuanto semana cada mes y na otro maga dia, ta sirvi yo como un pioneer na congregacion onde kanamon yan assign. Ta sigui conmigo si Ethel y el maga bata si ta visita yo na maga congregacion que cerca na diamon casa. Pero, solo-solo lang yo ta viaja si ta sirvi yo na maga congregacion y asemblea na monte.

Necesita yo plaña enbuenamente para puede yo cumpli con el todo de mio responsibilidad. Ta asigura yo que ta estudia kame con el Biblia como un familia cada semana. Si na monte yo para visita na maga congregacion, si Ethel el quien ta conduci con el estudiada na casa junto con el maga bata. Pero, ta hace kame esfuerzo para pirmi kame hace con el maga cosas como un familia. Tiene tambien kame regular recreacion de Ethel junto na maga bata—ta juga kame o ta pasea na maga lugar cerca kanamon. Bien denoche ya yo ta durmi para puede prepara con el de mio maga teocratico assignment. Y como un buen mujer que ya menciona na Proverbio 31:15, ta dispierta ya si Ethel madrogada pa lang para puede kame le con el texto del dia como un familia y almorza junto antes anda na escuela el diamon maga anak. Ta rindi gayot yo gracias cay tiene yo un mujer quien conforme hace maga  sacrificio y pirmi ta ayuda conmigo para cumpli el de mio maga responsibilidad!

Como maga mayores, ya hace gayot kame esfuerzo para ayuda con el diamon maga anak que ama con Jehova y con el ministerio. Quierre kame que sirvi sila full-time na ministerio pero gendeh cay amo se el cosa kame quierre para kanila sino cay amo se el diila decision. Pirmi kame ta habla kanila que hay queda gayot sila alegre si sirvi sila full-time. Maskin tiene maga dificultad, ya hace kame claro si paquemodo si Jehova ya ayuda y ya bendici kanamon como un familia. Ta asigura tambien kame que tan junto el diamon maga anak con el maga hermano y hermana quien ta hace una con Jehova na diila vida.

Ya dale si Jehova con el todo diamon maga necesidad mientras ta hace kame engranda con el diamon maga anak. Siempre, pirmi tambien yo ta pricura hace con el de mio obligacion. El de mio experiencia na monte cuando single pa yo y un special pioneer ya enseña conmigo que plaña enbuenamente acerca na diamon maga material necesidad. Pero tiene vez, maskin pa ya hace ya kame el diamon de con todo bueno, ta falta siempre kame. Na aquel maga tiempo, convincido yo que ya ayuda kanamon si Jehova. Por ejemplo, del 1986 hasta 1992, ya tiene guerra na Suriname. Na aquel maga año, bien dificil obtene maskin el maga bien simple cosas. Maskin pa ansina, ya dale kanamon si Jehova el diamon necesidad.—Mat. 6:32.

Na diamon entero vida, ya cuida gayot kanamon si Jehova y ya ayuda kanamon para queda alegre y contento. Un grande bendicion gayot para kanamon el diamon maga anak y un privilegio que hace engranda kanila para sirvi con Jehova. Alegre tambien kame cay ya iscuji sila que sirvi con Jehova full-time. Si Ethniël y Giovanni ya gradua na maga teocratico escuela y ta sirvi ahora na branch office na Suriname junto con el diila mujer.

De edad ya kame ahora de Ethel pero ocupao siempre kame ta sirvi con Jehova como maga special pioneer. Gane, bien ocupao kame poreso nuay siempre yo puede aprende nada! Pero, nuay yo cosa ya arripinti. Si ta pensa yo con el de mio pasada, convincido yo que el de mio decision cuando joven yo que sirvi full-time con Jehova amo el uno del maga de con todo buen decision que ya puede yo hace.