EL UN Judio que si Mardoqueo tiene importante papel na maga suceso que puede le na libro de Ester na Biblia. Uno le na maga yan destierro y ya trabaja na palacio na Persia. Durante este na principio del ika-cinco siglo B.C.E., “na tiempo de [Rey] Asuero.” (Ahora, conocido con ese rey como si Xerxes I.) Ya ayuda si Mardoqueo para sangga con el plano que mata con el rey. Para rindi gracias con ele, ya hace manera el rey para honra con Mardoqueo na publico. Na uliji, despues del muerte de Haman, el enemigo de Mardoqueo y del otro maga Judio, ya dale el rey con Mardoqueo el posicion de primer ministro. Como primer ministro, ya puede hace si Mardoqueo un mandato para gendeh porsigui mata con el maga Judio na Imperio de Persia.​—Est. 1:1; 2:5, 21-23; 8:1, 2; 9:16.

El cuanto maga historian ya clama que gendeh deverasan el libro de Ester y que nuay existi si Mardoqueo. Pero del 1941, el maga arqueologo ya incuntra maga posible evidencia que ta suporta si cosa ta habla el Biblia acerca con Mardoqueo. Cosa sila ya puede incuntra?

El maga researcher ya discubri un cuneiform o maga escribida de Persia que ta menciona con el nombre del un hombre que si Marduka (na Chavacano, Mardoqueo). Ya trabaja le como un administrador, posible un accountant, na ciudad de Susan. Cuando ya discubri con este escribida, si Arthur Ungnad, quien experto na historia na aquel lugar, ya escribi que amo este el primer vez que ya menciona con Mardoqueo na un documento que gendeh parte del Biblia.

Desde el report de Ungnad, el maga scholar yan translate con el miles de maga escribida de Persia. Incluido na cosa sila yan translate amo el maga diutay tableta que hacido de lodo pandayan que ya puede incuntra na cosa ya queda na ciudad de Persepolis. Ya puede con este incuntra na lugar si onde el Treasury de antes que cerca na maga pader del ciudad. Ya hace con este maga tableta na tiempo del rulanza de Xerxes I. Escribido este na lengguaje del maga Elamita y ta contene este manada nombre que puede incuntra na libro de Ester. a

Manada tableta de Persepolis el ya menciona con el nombre Marduka, quien ya sirvi como secretario del rey na palacio de Susan durante el rulanza de Xerxes I. El un tableta ta refiri con Marduka como un translator. Tupao se na cosa ta menciona el Biblia acerca con Mardoqueo. Un oficial le quien ta sirvi na palacio de Rey Asuero (Xerxes I) y quien ta converza mas de un lengguaje. Pirmi ta sinta si Mardoqueo na grande puerta del palacio na Susan. (Est. 2:19, 21; 3:3) Este grande puerta amo un grande edificio donde ta trabaja el maga oficial del palacio.

Bien semejante si Marduka que ya menciona na maga tableta y si Mardoqueo que ya menciona na Biblia. Ya vivi sila na igual tiempo, na igual lugar, igual onde ta trabaja y igual sila tiene posicion na palacio. Este todo informacion posible ta indica que si Marduka y Mardoqueo un persona lang.