1-2. (a) Cosa maga pregunta kita hay considera? (b) Cosa ta dale mira que bien quierre si Jehova que ayuda kanaton?

 PUEDE kanaton ayuda si Jehova para enfrenta con el maga dificultad y esta alegre na diaton servicio. Paquemodo le kanaton ta ayuda? Y paquemodo kita mas beneficia na ayuda que ta dale si Jehova? Hay contesta con este maga pregunta na este articulo. Pero antes kita examina con el maga contestacion, considera kita una con este pregunta: Preparao ba gayot ayuda kanaton si Jehova?

² El maga palabra que ya usa si apostol Pablo na de suyu carta para na maga Hebreo puede kanaton ayuda para incuntra con el contestacion. Si Pablo ya escribi: “El Señor amo el quien ta ayuda conmigo. Gendeh yo ay tene miedo. Cosa man puede hace el gente conmigo?” (Heb. 13:6) Asegun na maga referencia de Biblia, na este versiculo el maga palabra “el quien ta ayuda” ta refiri con el un persona quien ta ayuda dayun con el persona quien ta pidi ayuda. Imagina con Jehova que ta apura para ayuda con el un persona quien ta sufri. Asigurao, hay man uyun tu que ta dale este mira que bien quierre si Jehova que ayuda kanaton. Na ayuda de Jehova, puede kita enfrenta con el diaton maga probanza con alegria.

3. Cosa el tres manera que ta ayuda kanaton si Jehova para enfrenta con el diaton maga probanza con alegria?

³ Cosa el cuanto manera que ta ayuda kanaton si Jehova para enfrenta con el diaton maga probanza con alegria? Para contesta con ese, le kita con el libro de Isaias. Porque? Manada del maga profecia que ya escribi si Isaias aplicable na maga siervo del Dios ahora. Omento pa, pirmi ta refiri si Isaias  con Jehova usando el maga palabra que facil lang kita entende. Mira por ejemplo con el Isaias capitulo 30. Na ese capitulo, ya usa si Isaias maga bonito ilustracion para dale mira si paquemodo si Jehova ta ayuda con el De Suyu maga siervo. Ya escribi le que si Jehova (1) ta oi kanaton enbuenamente y ta contesta con el diaton maga rezo, (2) ta dale kanaton guia y (3) ta bendici kanaton ahora y na futuro. Hay considera kita con este tres manera que ta ayuda kanaton si Jehova.

4. (a) Cosa ya habla si Jehova acerca na maga Judio na tiempo de Isaias y cosa Le ya permiti que experiencia sila? (b) Cosa esperanza ya dale si Jehova para con el maga fiel? (Isaias 30:18, 19)

⁴ Na principio del Isaias capitulo 30, si Jehova ya llama con el maga Judio como “maga anak que duro cabeza” quien ta “omenta pecado con el pecado.” Ya continua le habla: “Maga rebelloso gente sila, . . . que no quierre oi con el ley de Jehova.” (Isa. 30:1, 9) Cay no quierre oi el maga gente, si Isaias ya predicta que hay permiti si Jehova que sufri sila na calamidad. (Isa. 30:5, 17; Jer. 25:8-11) Y ese el cosa ya sucede cuando ya queda sila cautivo na Babilonia. Pero, tiene cuanto maga fiel Judio el junto kanila y si Isaias tiene un mensaje de esperanza para kanila. Ya habla le kanila que llega el tiempo, hay permiti si Jehova que bira sila otravez na Jerusalem. (Le con el Isaias 30:18, 19.) Y ese gayot el cosa ya sucede. Ya libra kanila si Jehova na Babilonia. Pero, nuay dayun quel sucede. El maga palabra “si Jehova con paciencia ta espera para dale mira favor con ustedes” ta dale mira que hay pasa pa cuanto tiempo antes libra con el maga fiel. Gane, yan destierro el maga Israelita na Babilonia por 70 año antes el cuanto kanila ya puede bira na Jerusalem. (Isa. 10:21; Jer. 29:10) Cuando ya bira sila na diila lugar, el luha de tristeza cuando cautivo sila ya queda luha de alegria.

5. Cosa asiguranza ta dale kanaton el Isaias 30:19?

⁵ Ahora, puede kanaton dale comforta este maga palabra: “Si pidi tu ayuda, hay dale gayot le mira favor contigo.” (Isa. 30:19) Ya asigura kanaton si Isaias que oi kanaton si Jehova si pidi kita con Ele ayuda y hay contesta dayun con el diaton maga suplicacion. Si Isaias ya omenta: “Na tiempo que oi le contigo, contesta le dayun contigo.” Este maga palabra ta hace acorda kanaton si paquemodo de preparao el diaton Tata para ayuda con aquellos quien ta pidi ayuda con ele. Y puede este ayuda kanaton para aguanta con alegria.

6. Paquemodo el maga palabra de Isaias ta dale mira que si Jehova ta oi con el rezo del cada uno del De Suyu maga siervo?

⁶ Cosa omento asiguranza acerca na diaton maga rezo el puede kita saca na este versiculo? Ta oi enbuenamente si Jehova con el rezo del cada uno kanaton. Porque kita se puede habla? Na primer parte del Isaias capitulo 30, ya usa con el palabra “ustedes” cay si Jehova ta refiri con el de suyu maga siervo como un grupo. Pero na versiculo 19, ya usa con el maga palabra “tu” y “contigo”; ta refiri este con el cada individual. Si Isaias ya escribi: “Gendeh mas tu llura”; “hay dale gayot le mira favor contigo”; “contesta le dayun contigo.” Como un amable Tata, gendeh ta habla si Jehova con el de suyu anak que yan luya, “Debe tu queda fuerte igual con el de tuyu hermano o hermana.” En vez, ta ama le con el cada uno kanaton y ta oi le enbuenamente con el diaton maga rezo.​—Sal. 116:1; Isa. 57:15.

7. Paquemodo si Isaias y Jesus ya hace claro que necesita kita continua reza?

⁷ Si ta habla kita con Dios acerca el diaton  maga problema, posible hay dale dayun kanaton si Jehova el fuerza para enfrenta con el situacion. Y si nuay perde el probanza na tiempo que ta expecta kita, posible necesita kita pidi con Jehova manada beses que dale kanaton fuerza para aguanta con ese. Ya habla le kanaton que hace se. Puede kita mira con ese na maga palabra de Isaias: “No ustedes manda descanza con [Jehova].” (Isa. 62:7) Cosa se quierre decir? Debe kita continua reza con Jehova que dol gendeh kita ta permiti que descanza le. El maga palabra de Isaias ta hace kanaton acorda con el ilustracion de Jesus acerca na rezo que puede le na Lucas 11:8-10, 13. Si Jesus ya anima kanaton que continua reza y continua pidi con el sagrao espiritu. Puede tambien kita pidi con Jehova que guia kanaton para puede kita hace maga justo decision.

8. Paquemodo ya cumpli na maga Judio el maga palabra na Isaias 30:20, 21?

⁸ Le con el Isaias 30:20, 21. Cuando yan palibut el maga soldao de Babilonia na Jerusalem por un año y media, el sufrimiento que ya experiencia el maga gente ya queda ya lang igual de comon na pan y agua. Pero asegun na versiculo 20 y 21, ya promete si Jehova con el maga Judio que si arripinti sila y cambia con el diila custumbre, hay salva le kanila. Ya llama si Isaias con Jehova como el diila “Grande Instructor” y ya promete le con el maga gente que enseña kanila si Jehova si paquemodo con Ele adora na aceptable manera. Ya cumpli aquel maga palabra cuando ya libra con el maga Judio na Babilonia. Ya queda si Jehova como el diila Grande Instructor y ya guia kanila para hace bira otravez con el puro adoranza. Alegre kita cay si Jehova el diaton Grande Instructor ahora.

9. Cosa el un manera que ta ricibi kita el guia de Jehova ahora?

⁹ Na este maga versiculo, si Isaias ya habla que dol igual kita na maga estudiante con quien ta enseña si Jehova na dos manera. Una, si Isaias ya habla: “El de tuyu mismo ojos puede mira con el de tuyu Grande Instructor.” Na este ilustracion, el Instructor ta para adelante del maga estudiante. Tiene kita el privilegio que beneficia na de suyu maga instruccion ahora. Paquemodo kanaton ta enseña si Jehova? Ta hace le se por medio na de suyu organizacion. Ta rindi kita gracias cay ta puede kita ricibi maga claro guia estaba na organizacion de Jehova! El maga instruccion que ta ricibi kita na maga miting,  asemblea, na maga publicacion, JW Broadcasting^® y na otro pa manera ta ayuda kanaton para aguanta na maga problema con alegria.

10. Na cosa manera ta oi kita “un voz na [diaton] atras”?

¹⁰ Si Isaias ya menciona con el ika-dos manera que si Jehova ta enseña kanaton: “Hay puede tu oi un voz na de tuyu atras.” El profeta ya refiri con Jehova aqui como un atentivo instructor quien ta camina atras del maga estudiante y ta guia kanila si cosa sila hace. Ahora, ta oi kita con el voz del Dios atras kanaton. Paquemodo? De antes pa escribido el maga inspirao palabra del Dios na Biblia. Poreso si ta le kita con el Biblia, dol aquel ta oi kita con el voz del Dios atras kanaton.​—Isa. 51:4.

11. Para aguanta con alegria, cosa kita necesita hace y porque?

¹¹ Paquemodo kita puede mas beneficia na guia que ta dale si Jehova por medio na de suyu organizacion y de suyu Palabra? Nota que ya habla si Isaias dos cosas. Una, “este el camino.” Ika-dos, “camina ustedes aqui.” (Isa. 30:21) Gendeh bastante que sabe lang kita “el camino.” Necesita tambien kita ‘camina aqui.’ El Palabra de Jehova y el maga explanacion estaba na de suyu organizacion ta enseña kanaton si cosa si Jehova ta pidi kanaton. Ta aprende tambien kita si paquemodo aplica con el cosa kita ta aprende. Para continua kita sirvi con Jehova con alegria, necesita kita hace con ese dos cosas. Ese lang el manera para bendici kanaton si Jehova.

12. Base na Isaias 30:23-26, paquemodo si Jehova ya bendici con el de suyu maga siervo?

¹² Le con el Isaias 30:23-26. Paquemodo este profecia ya cumpli na maga Judio quien ya bira na tierra de Israel despues queda cautivo na Babilonia? Ya ricibi sila manada bendicion—na fisical y na espiritual. Ya dale si Jehova con el de suyu maga siervo abundancia fisical comida. Pero el mas importante, ya dale le kanila abundancia espiritual comida mientras hinay-hinay ta restora con el puro adoranza. El maga siervo del Dios nuay pa experiencia ansina de manada espiritual bendicion de antes. Como cosa ya indica na versiculo 26, ya ayuda kanila si Jehova para mas entende con el de suyu Palabra. (Isa. 60:2) El maga bendicion de Jehova ya ayuda con el de suyu maga siervo para esta fuerte y sirvi con ele con alegria “por causa na diila buen condicion de corazon.”—Isa. 65:14.

13. Paquemodo ta cumpli el profecia de restoracion na diaton tiempo?

 ¹³ El profecia ba acerca na restoracion del puro adoranza aplicable na diaton tiempo ahora? Si! Na cosa manera? Desde 1919 C.E., millones de maga gente el gendeh mas cautivo del Grande Babilonia—el imperio del falso religion na entero mundo. Ya guia kanila na un lugar que mas bonito pa na Tierra Prometido na tiempo de Israel. Este amo el espiritual paraiso. (Isa. 51:3; 66:8) Cosa el espiritual paraiso?

14. Cosa el espiritual paraiso y quien ta experiencia con ese ahora? (Mira con el Si Cosa Quierre Decir.)

¹⁴ Desde 1919 C.E., el maga iscujido ta experiencia ya con el espiritual paraiso. b Mientras ta pasa el tiempo, aquellos quien tiene esperanza na tierra, el “otro maga carnero,” ya experiencia tambien con ese y con el abundancia bendicion de Jehova.​—Juan 10:16; Isa. 25:6; 65:13.

15. Onde el espiritual paraiso?

¹⁵ Onde el espiritual paraiso ahora? Puede incuntra con el maga siervo de Jehova na todo parte del tierra. Entonces, el espiritual paraiso ta existi tambien na entero mundo. Poreso maskin onde kita ta queda, puede kita queda parte del espiritual paraiso si activo kita ta continua suporta con el verdadero adoranza.

16. Paquemodo kita puede continua mira con el pagka-bonito del espiritual paraiso?

¹⁶ Para continua kita esta na espiritual paraiso, debe kita continua aprecia con el maga hermano y hermana na entero mundo. Paquemodo kita con ese puede hace? Si man focus kita con el diila maga buen calidad y gendeh na diila maga imperfeccion. (Juan 17:20, 21) Porque se bien importante? Pensa con este. Puede kita mira diferente pono na un bonito monte. Na igual manera, diferente el maga hermano y hermana na congregacion ahora. (Isa. 44:4; 61:3) Necesita kita asigura que ta continua kita man focus na pagka-bonito del “monte” y gendeh na imperfeccion  del maga “pono” que cerca kanaton. No permiti que el diaton mismo imperfeccion o el imperfeccion del otro na congregacion hay sangga kanaton para mira con el pagka-bonito del diaton unido organizacion.

17. Cosa puede hace el cada uno kanaton para mentena el unidad na congregacion?

¹⁷ Cosa puede hace el cada uno kanaton para mentena el unidad del congregacion? Pricura mentena paz. (Mat. 5:9; Roma 12:18) Cada vez ta hace kita manera para tene paz con otro na congregacion, ta ayuda kita para queda mas bonito el espiritual paraiso. Acorda kita que si Jehova el quien ya guia con el cada uno para na puro adoranza. (Juan 6:44) Imagina si paquemodo de alegre si Jehova si ta mira le kanaton que ta hace esfuerzo para tene paz y unidad con aquellos precioso con ele!​—Isa. 26:3; Hag. 2:7.

18. Cosa kita debe pirmi medita y porque?

¹⁸ Paquemodo kita mas puede beneficia na maga bendicion que ta ricibi kita como maga siervo del Dios? Puede kita pensa enbuenamente acerca con el cosa kita ta estudia na Palabra del Dios y na diaton maga publicacion que base na Biblia. Ese estudiada y meditacion hay ayuda kanaton para cultiva maga Cristiano calidad que manda move kanaton para “ama con uno y otro” na congregacion. (Roma 12:10) Si medita kita con el diaton maga presente bendicion, ta hace kita fuerte con el diaton relacion con Jehova. Y si medita kita con el maga bendicion que hay dale si Jehova na futuro, hay ayuda este para esta fuerte el diaton esperanza que sirvi con ele hasta para cuando. Todo este hay ayuda kanaton ahora para sirvi con Jehova con alegria.

19. (a) Asegun na Isaias 30:18, na cosa kita puede asigura? (b) Cosa hay ayuda kanaton para aguanta con alegria?

¹⁹ Si Jehova “hay levanta” para kanaton si hay destroza ya le con este mal mundo. (Isa. 30:18) Puede kita asigura que si Jehova​—el “Dios de justicia”—​gendeh permiti que existi pa el mundo de Satanas maskin un dia si gendeh mas necesita. (Isa. 25:9) Con paciencia kita ta espera junto con Jehova que llega ese dia. Mientras tanto, determinao kita que continua aprecia con el privilegio de rezo, estudia y aplica con el Palabra del Dios y medita con el diaton maga bendicion. Si hace kita se, hay ayuda kanaton si Jehova para aguanta con alegria mientras ta sirvi con ele.