ARTICULO 45
Ta Ayuda Kanaton si Jehova Para Cumpli con el Diaton Ministerio
“Hay sabe gayot sila que tiene profeta entre kanila.”—EZE. 2:5.
CANCION 67 “Preach the Word”
PREVIEW a
1. Cosa kita puede expecta pero cosa kita puede asigura?
PUEDE kita expecta que enfrenta kita oposicion mientras ta hace con el diaton trabajo predicacion. Posible que mas queda pa grabe ese oposicion na futuro. (Dan. 11:44; 2 Tim. 3:12; Rev. 16:21) Maskin pa ansina, puede kita asigura que hay dale kanaton si Jehova el ayuda que necesita kita. Porque? Pirmi si Jehova ta ayuda con el de suyu maga siervo para cumpli con el diila maga assignment—maskin paquemodo pa este de dificil. Para ilustra, considera kita con el cuanto suceso na vida de profeta Ezequiel quien ya predica con el maga Judio quien yan destierro na Babilonia.
2. Cosa ya habla si Jehova acerca na maga gente na teritorio de Ezequiel y cosa kita considera na este articulo? (Ezequiel 2:3-6)
2 Cosa clase de maga gente el tiene na teritorio de Ezequiel? Ya habla si Jehova que sila “agresivo,” “duro el corazon” y “rebelloso.” Igual sila de peligroso na tunuk y alacran. Amo se el razon si porque cuanto beses ya habla si Jehova con Ezequiel: “No tu tene miedo”! (Le con el Ezequiel 2:3-6.) Ya puede hace si Ezequiel con el de suyu trabajo predicacion cay (1) ya imbia con ele si Jehova, (2) ya dale con ele fuerza el espiritu del Dios y (3) ya queda le fuerte por causa na palabra del Dios. Paquemodo este tres cosas ya puede ayuda con Ezequiel? Y paquemodo este puede ayuda kanaton ahora?
YA IMBIA SI JEHOVA CON EZEQUIEL
3. Cosa maga palabra el posible ya hace fuerte con Ezequiel y paquemodo con ele ya asigura si Jehova que hay ayuda Le con ele?
3 Si Jehova ya habla con Ezequiel: “Hay imbia yo contigo.” (Eze. 2:3, 4) Ese maga palabra posible ya hace gayot fuerte con Ezequiel. Porque? Asigurao ya acorda le que ya usa si Jehova maga semejante palabra cuando ya iscuji Le con Moises y Isaias para queda De Suyu maga profeta. (Ex. 3:10; Isa. 6:8) Sabe tambien si Ezequiel si paquemodo si Jehova ya ayuda con aquel dos profeta para hace con el diila dificil assignment. Poreso, cuando dos beses ya habla si Jehova con Ezequiel: “Hay imbia yo contigo,” ya dale quel razon con el profeta para confia na suporta de Jehova. Mas pa, na libro de Ezequiel, manada beses kita puede le con este maga palabra: “Ya ricibi yo mensaje estaba con Jehova.” (Eze. 3:16) Omento pa, manada beses tambien puede le con el maga palabra “ya ricibi yo otravez mensaje estaba con Jehova.” (Eze. 6:1) Poreso, convincido si Ezequiel que ya imbia con ele si Jehova. Mas pa, cay anak le del un sacerdote, asigurao ya enseña con Ezequiel el de suyu tata si paquemodo si Jehova ya asigura con el De Suyu maga profeta que hay ayuda Le kanila. Por ejemplo, ya habla si Jehova con Isaac, Jacob y Jeremias: “Junto yo contigo.”—Gen. 26:24; 28:15; Jer. 1:8.
4. Cosa maga palabra el ya puede hace fuerte con Ezequiel?
4 Cosa el reaccion del mayoria del maga Israelita na predicacion de Ezequiel? Si Jehova ya habla: “Gendeh oi contigo el casa de Israel cay no quierre sila oi conmigo.” (Eze. 3:7) Cay nuay acepta el maga gente con Ezequiel, nuay sila acepta con Jehova. Aquel maga palabra ya asigura con Ezequiel que maskin pa nuay con ele oi el maga gente, gendeh quel quierre decir que ya falla le como un profeta. Ya asigura tambien si Jehova con Ezequiel que si hay sucede ya el cosa le ya habla, “hay sabe gayot [el maga gente] que tiene profeta entre kanila.” (Eze. 2:5; 33:33) Asigurao, ese maga palabra ya hace fuerte con Ezequiel para cumpli con el de suyu ministerio.
YA IMBIA KANATON SI JEHOVA AHORA
Igual na tiempo de Ezequiel, posible nuay interes y tan contra kanaton el maga gente pero sabe kita que junto kanaton si Jehova (Mira con el parapo 5-6)
5. Asegun na Isaias 44:8, porque kita puede queda fuerte?
5 Ta queda tambien kita fuerte ahora cay sabe kita que ya imbia kanaton si Jehova. Ya honra le kanaton y ya llama kanaton como de suyu “maga testigo.” (Isa. 43:10) Un grande privilegio gayot se! Igual si paquemodo ya habla si Jehova con Ezequiel: “No tu tene miedo,” ta habla tambien kanaton si Jehova: “No ustedes tene miedo.” Porque kita gendeh debe tene miedo con el maga quien tan contra kanaton? Igual con Ezequiel, ya imbia kanaton si Jehova y tiene kita el De Suyu suporta.—Le con el Isaias 44:8.
6. (a) Paquemodo kanaton ya asigura si Jehova que hay ayuda le kanaton? (b) Cosa kanaton ta dale fuerza y comforta?
6 Ta asigura kanaton si Jehova que hay ayuda le kanaton. Por ejemplo, antes habla si Jehova: “Ustedes el de mio maga testigo,” ele ya habla: “Si pasa tu na agua, man junto yo contigo, y si travesa tu na maga rio, gendeh tu man lumus. Si camina tu na fuego, gendeh tu hay quema, ni tene tu maskin poco quemadura.” (Isa. 43:2) Mientras ta hace kita con el diaton ministerio, tiene vez hay enfrenta kita maga sanggadura que dol igual na avenida y fuego. Maskin pa ansina, na ayuda de Jehova, puede kita continua predica. (Isa. 41:13) Igual na tiempo de Ezequiel, el mayoria del maga gente ahora gendeh ta acepta con el diaton mensaje. Pero, gendeh se quierre decir que ya falla kita como maga Testigo del Dios. Ta dale kanaton fuerza y comforta cay sabe kita que alegre si Jehova si ta continua kita declara con el de suyu mensaje. Si apostol Pablo ya habla: “Cada uno diila ay recivi el disuyo pago asegun con el disuyo trabajo.” (1 Cor. 3:8; 4:1, 2) El un hermana que largo tiempo ya pioneer ya habla: “Alegre yo cay sabe yo que hay premia si Jehova con el diaton esfuerzo.”
EL ESPIRITU DEL DIOS YA HACE FUERTE CON EZEQUIEL
Ya mira si Ezequiel un vision acerca na caro de Jehova na cielo y ya hace este fuerte con el de suyu conviccion que hay ayuda con ele si Jehova para cumpli con el de suyu ministerio (Mira con el parapo 7)
7. Cosa el efecto con Ezequiel cada vez ta pensa le con el vision que ya mira le? (Mira con el letrato na cover.)
7 Ya puede mira si Ezequiel si paquemodo de poderoso el espiritu del Dios. Na un vision, ya mira le que el sagrao espiritu ta ayuda con el maga poderoso angel y ta hace move con el maga bien grande rueda del carro del Dios na cielo. (Eze. 1:20, 21) Cosa el reaccion de Ezequiel? Ya escribi le si cosa ya sucede. “Cuando ya mira yo con este, yan hapa yo na tierra.” (Eze. 1:28) Por causa cay yan bilib gayot le na cosa le ya mira. Cada vez ta pensa si Ezequiel con ese bien bonito vision, asigurao ta hace este fuerte con el de suyu conviccion que puede le cumpli con el de suyu ministerio na ayuda del espiritu del Dios.
8-9. (a) Cosa ya manda si Jehova con Ezequiel? (b) Cosa pa ya hace si Jehova para hace fuerte con Ezequiel y para queda preparao na de suyu dificil teritorio?
8 Si Jehova ya manda con Ezequiel: “Anak del gente, levanta cay tiene yo cosa habla contigo.” Ese mandato y el ayuda del espiritu del Dios ya dale con Ezequiel el fuerza que necesita le para levanta na tierra. Si Ezequiel ya escribi: “Ya llena yo de espiritu y ya manda este conmigo levanta.” (Eze. 2:1, 2) Na entero ministerio de Ezequiel, ya guia con ele el “mano” o el sagrao espiritu del Dios. (Eze. 3:22; 8:1; 33:22; 37:1; 40:1) Ya hace este fuerte con Ezequiel para puede le hace con el de suyu assignment—que predica con el maga gente que “duro el cabeza y corazon” na de suyu teritorio. (Eze. 3:7) Si Jehova ya habla con Ezequiel: “Ya hace yo con el de tuyu cara igual de duro na diila cara y el de tuyu frente igual de duro na diila frente. Ya hace yo con el de tuyu frente igual como diamante que mas duro pa na piedra. No tene miedo kanila o na diila cara.” (Eze. 3:8, 9) Si Jehova dol ta habla con Ezequiel: ‘No man luya si duro cabeza el maga gente. Hace yo fuerte contigo.’
9 Despues, el espiritu del Dios ya lleva con Ezequiel na de suyu teritorio. “El mano de Jehova ya hace gayot fuerte conmigo,” ya escribi si Ezequiel. Ya alcanza un semana para puede gayot aprende y entende el profeta con el mensaje para puede le predica con conviccion. (Eze. 3:14, 15) Despues, ya manda con ele si Jehova que anda na un lugar donde “el espiritu ya entra [con ele].” (Eze. 3:23, 24) Preparao ya si Ezequiel para principia el de suyu ministerio.
EL ESPIRITU DEL DIOS TA HACE KANATON FUERTE AHORA
Igual con Ezequiel, cosa ta ayuda kanaton ahora para cumpli con el diaton ministerio? (Mira con el parapo 10)
10. Cosa ayuda kita necesita para puede hace con el diaton trabajo predicacion y porque?
10 Cosa ayuda kita necesita para puede hace con el diaton trabajo predicacion? Para contesta con ese, pensa con el cosa ya sucede con Ezequiel. Antes le principia predica, el espiritu del Dios ya dale con ele el fuerza que necesita le. Ahora, igual na cosa ya sucede con Ezequiel, puede lang kita hace con el diaton trabajo predicacion por causa na ayuda del espiritu del Dios. Porque? Cay tan contra kanaton si Satanas y ta hace le manera para descanza kita con el diaton predicacion. (Rev. 12:17) Na mirada del maga gente, dol gendeh kita puede ganá contra con Satanas. Pero por medio na diaton trabajo predicacion, ta puede kita hace con ese! (Rev. 12:9-11) Na cosa manera? Si ta participa kita na ministerio, ta dale kita mira que gendeh kita ta tiene miedo na maga amenazo de Satanas. Cada vez ta predica kita, ta ganá kita contra con ele. Entonces, cosa kita puede habla ciendo ta puede kita continua predica maskin pa tiene oposicion? Puede kita asigura que ta dale kanaton fuerza si Jehova por medio na de suyu sagrao espiritu y tiene kita el de suyu favor.—Mat. 5:10-12; 1 Ped. 4:14.
11. Cosa hace el espiritu del Dios para kanaton y cosa kita hace para continua ricibi con ese?
11 Cosa pa kita puede aprende cuando si Jehova ya hace duro na figurativo manera con el cara y frente de Ezequiel? El espiritu del Dios puede kanaton dale fuerza para puede enfrenta con el maskin cosa dificultad na diaton ministerio. (2 Cor. 4:7-9) Entonces, cosa kita puede hace para asigura que hay continua kita ricibi con el espiritu del Dios? Necesita kita continua pidi con ese na rezo y puede kita asigura que si Jehova hay oi kanaton. Ya enseña si Jesus con el de suyu maga dicipulo: “Pidi ustedes . . . , busca y . . . hace tuk-tuk.” Y si Jehova hay dale sagrao espiritu “con aquellos quien ta pidi con ele.”—Luc. 11:9, 13; Act. 1:14; 2:4.
YA QUEDA FUERTE SI EZEQUIEL POR CAUSA NA PALABRA DEL DIOS
12. Asegun na Ezequiel 2:9–3:3, onde estaba el rollo y cosa este ta contene?
12 Ya queda fuerte si Ezequiel gendeh lang por causa del espiritu del Dios sino por causa tambien del maga palabra del Dios. Na un vision, ya mira si Ezequiel un mano que ta agarra rollo. (Le con el Ezequiel 2:9–3:3.) Onde estaba el rollo y cosa este ta contene? Paquemodo este ya hace fuerte con Ezequiel? Mira kita. Estaba na trono del Dios el rollo. Posible, ya usa si Jehova con el uno del maga cuatro angel que ya mira si Ezequiel del una para dale con ele el rollo. (Eze. 1:8; 10:7, 20) El rollo ta contene el maga palabra del Dios—un largo mensaje de juzgamiento que necesita habla si Ezequiel con el maga rebelloso Judio quien yan destierro. (Eze. 2:7) Escribido ese mensaje adelante del rollo y na detras de este.
13. Cosa ya habla si Jehova que hace si Ezequiel con el rollo y porque este dulce?
13 Ya habla si Jehova con el de suyu profeta que come con el rollo y “llena [de suyu] barriga de este.” Ya obedece si Ezequiel y ya come completamente con el rollo. Cosa quierre decir de este parte del vision? Necesita entende enbuenamente si Ezequiel con el mensaje. Necesita le queda convincido con este para motiva este con ele que predica. Despues, tiene maka-interes cosa que ya sucede. Ya discubri si Ezequiel que el rollo “igual . . . de dulce na miel.” (Eze. 3:3) Porque? Para con Ezequiel, dulce o un bonito experiencia que representa con Jehova. (Sal. 19:8-11) Ya rindi le gracias cay ya aproba con ele si Jehova para sirvi como un profeta.
14. Cosa ya ayuda con Ezequiel para queda preparao na de suyu assignment?
14 Despues, ya habla si Jehova con Ezequiel: “Oi y pone na corazon con el todo palabra que ta habla yo contigo.” (Eze. 3:10) Por medio na aquel maga palabra, ya habla si Jehova con Ezequiel que memoria con el maga palabra que escribido na rollo y medita con ese. Cuando ya hace quel si Ezequiel, mas ya queda fuerte el de suyu fe. Mas pa, ese maga palabra amo tambien el cosa le hay habla con el maga gente. (Eze. 3:11) Cay ya entende gayot si Ezequiel y convincido na mensaje del Dios, ya ayuda quel con ele para queda preparao que hace el de suyu assignment y cumpli con ese.—Sal. 19:14.
TA HACE KANATON FUERTE AHORA EL PALABRA DEL DIOS
15. Para puede kita continua, cosa kita necesita “pone na corazon”?
15 Para puede kita continua na ministerio, necesita tambien kita con el maga palabra del Dios para hace fuerte con el diaton fe. Necesita kita “pone na corazon” con el todo cosa ta habla kanaton si Jehova. Ahora, tan cuento kanaton si Jehova por medio na de suyu Palabra, el Biblia. Paquemodo kita puede asigura que el Palabra del Dios ta continua afecta con el diaton pensamiento, sentido y motivo?
16. Cosa kita debe hace con el Palabra del Dios y paquemodo kita puede entende gayot con ese?
16 Igual si paquemodo ta queda fuerte el diaton cuerpo si ta come kita y tan digest con el comida, ta queda tambien kita fuerte na espiritual si ta estudia kita con el Palabra del Dios y ta medita con ese. Acorda kita con el leccion acerca con el rollo. Si acerca na Palabra del Dios, quierre si Jehova que “llena [kita diaton] barriga de este”—quierre decir, entende kita con este enbuenamente. Puede kita se hace si reza kita, le y medita. Una, ta reza kita para prepara con el diaton corazon para sabe el pensamiento del Dios. Despues, ta le kita con el Biblia. Acabar, ta dale kita tiempo para medita con el cosa kita ya le. Cosa el resulta si hace kita con ese? Si mas ta medita kita, mas ta puede kita entende con el Palabra del Dios y mas ta queda fuerte el diaton fe.
17. Porque bien importante que medita con el cosa kita ta le na Biblia?
17 Porque bien importante que le con el Biblia y medita con ese? Hay dale se kanaton el fuerza que necesita kita para predica con el mensaje del Reino ahora y para proclama con el mensaje de juzgamiento que posible kita predica na futuro. Mas pa, si ta medita kita con el maga bonito calidad de Jehova, ta queda mas fuerte el diaton relacion con ele. Como resulta, hay obtene kita un bonito cosa—paz y pagka-contento.—Sal. 119:103.
DETERMINAO AGUANTA
18. Cosa puede realiza el maga gente na diaton teritorio y porque?
18 Gendeh kita profeta igual con Ezequiel. Pero, determinao kita que continua declara con el mensaje de Jehova que ya preserva ele na de suyu Palabra hasta hay completa el trabajo predicacion. Si hay llega ya el tiempo de juzgamiento, nuay razon el maga gente na diaton teritorio para habla que nuay sila ricibi aviso o ya ignora kanila el Dios. (Eze. 3:19; 18:23) Sino, puede sila realiza que estaba con Dios el mensaje que ya predica kita.
19. Cosa kanaton puede hace fuerte para cumpli con el diaton ministerio?
19 Cosa kanaton puede hace fuerte para cumpli con el diaton ministerio? El tres cosas que ya hace fuerte con Ezequiel. Ta continua kita predica cay sabe kita que ya imbia kanaton si Jehova, ta dale kanaton fuerza el sagrao espiritu del Dios y ta queda kita fuerte por causa na Palabra del Dios. Na ayuda de Jehova, determinao kita que cumpli con el diaton ministerio y aguanta “hasta el fin.”—Mat. 24:13.
CANCION 65 Move Ahead!
a Na este articulo, hay considera kita tres cosas que ya ayuda con profeta Ezequiel para hace con el de suyu trabajo predicacion. Mientras tan repaso kita si paquemodo si Jehova ya ayuda con el de suyu profeta, hay hace este fuerte con el diaton confianza que hay ayuda kanaton si Jehova para cumpli el diaton ministerio.