1. Cosa quierre decir que usa con el diaton abilidad para pensa? (2 Timoteo 4:5)

 SI TIENE kita maga problema, posible pone na probanza el diaton lealtad con Jehova y na de suyu organizacion. Paquemodo kita con este puede enfrenta? Necesita kita usa con el diaton abilidad para pensa, esta dispierto y queda bien asigurao na diaton fe. (Le con el 2 Timoteo 4:5, NWT.) Ta usa kita con el diaton abilidad para pensa si ta esta kita calmao, ta pensa enbuenamente y ta pricura mira con el maga cosas asegun na mirada de Jehova. Si hace kita con ese, el diaton pensamiento gendeh sigui na diaton emocion.

2. Cosa kita hay discuti na este articulo?

² Del ya pasa articulo, ya considera kita tres dificultad que posible kita enfrenta apuera del congregacion. Este articulo hay considera tres dificultad adentro na congregacion que posible pone na probanza con el diaton lealtad con Jehova. Este amo (1) si ya sinti kita que nuay kanaton trata enbuenamente el un hermano o hermana, (2) si ya ricibi kita disciplina y (3) si ta tormenta kita man adjust na maga cambio del organizacion. Paquemodo kita puede usa con el diaton abilidad para pensa y esta leal con Jehova y na de suyu organizacion si experiencia kita con este maga dificultad?

3. Cosa posible el diaton reaccion si dol nuay trata enbuenamente kanaton el un hermano o hermana?

³ Ya puede ya ba tu experiencia que dol nuay trata enbuenamente contigo el un hermano o hermana, o posible aquel  quien tiene responsibilidad na congregacion? Posible, gendeh intencion del hermano que hace sinti duele contigo. (Roma 3:23; Sant. 3:2) Pero, ya queda siempre tu triste na cosa le ya hace. Posible, ta tormenta tu durmi cay ta pensa tu acerca con ese. Baka puede tu pensa, ‘Si ansina ta actua el un hermano, organizacion ba gayot este del Dios?’ Ese el cosa quierre si Satanas que pensa kita. (2 Cor. 2:11) Ese clase de pensamiento puede causa kanaton para queda lejos con Jehova y na de suyu organizacion. Poreso si ta sinti kita que el un hermano o hermana nuay trata kanaton enbuenamente, paquemodo kita puede usa con el diaton abilidad para pensa y evita con este peligroso pensamiento?

4. Paquemodo ya usa si Jose con el de suyu abilidad para pensa y cosa maga leccion kita puede aprende na de suyu ejemplo? (Genesis 50:19-21)

⁴ No man sentimiento. Cuando teenager si Jose, el de suyu maga mayor hermano nuay trata enbuenamente con ele. Ya odia sila con ele y el cuanto kanila quierre pa gane mata con ele. (Gen. 37:4, 18-22) Na uliji, ya vende sila con ele para queda esclavo. Por causa con ese, ya experiencia grabe probanza si Jose que ya dura por maga 13 año. Puede era pensa si Jose si ta ama ba gayot con ele si Jehova y si ya abandona ba con ele si Jehova na tiempo que necesita le ayuda. Pero, nuay man sentimiento si Jose. Sino, ya usa le con el de suyu abilidad para pensa y ya esta calmao. Cuando tiene ya era le oportunidad para man balus con el de suyu maga hermano, nuay le hace con ese sino ya dale le mira amor kanila y ya perdona kanila. (Gen. 45:4, 5) Ya hace este si Jose cay ya puede le pensa enbuenamente. Nuay le man focus na de suyu mismo maga problema sino ya continua le pensa si cosa quierre si Jehova. (Le con el Genesis 50:19-21.) Cosa el leccion? Si nuay trata enbuenamente contigo, no man sentimiento con Jehova o pensa que ya abandona le contigo. Sino, medita si paquemodo le ya ayuda contigo para aguanta con el probanza. Omento pa, si nuay trata contigo enbuenamente el otro, pricura tapa con el diila maga kamali por medio na amor.​—1 Ped. 4:8.

5. Paquemodo si Miqueas ya usa con el de suyu abilidad para pensa cuando ya sinti le que nuay trata enbuenamente con ele?

⁵ Considera con el experiencia del un anciano estaba na South America que si Miqueas. b Ya acorda le el tiempo cuando ya sinti le que nuay trata enbuenamente con ele el cuanto maga hermano quien tiene responsibilidad na organizacion. Ele ya habla: “Nuay pa gayot yo experiencia aquel clase de stress de antes. Yan lingasa yo. Gendeh yo ta puede durmi y ta llura cay ta sinti yo que nuay yo cosa puede hace.” Maskin pa ansina, si Miqueas ya usa con el de suyu abilidad para pensa y ya pricura controla con el de suyu sentido. Pirmi le ta reza y ta pidi con Jehova que dale con ele sagrao espiritu y fuerza para aguanta. Yan research tambien le maga informacion na diaton maga publicacion que puede ayuda con ele. Cosa el leccion? Si ya sinti tu que nuay contigo trata enbuenamente el un hermano o hermana, esta calmao y pricura controla con el maskin cosa negativo sentido que tiene tu. Posible, no sabe tu si cosa el circumstancia que ya causa con aquel persona para converza o actua na aquel manera. Poreso, reza con Jehova y pidi con ele que ayuda contigo para mira con el maga cosas asegun na de suyu mirada. Si hace tu se, posible ayuda se contigo para pensa que gendeh intencion del hermano o hermana que hace sinti duele contigo y perdona con ele. (Prov. 19:11) Acorda, sabe si Jehova si cosa tu ta experiencia y hay dale le contigo el fuerza que necesita tu para aguanta.​—2 Cron. 16:9; Ecl. 5:8.

6. Porque importante que entende que ta corecta kanaton si Jehova cay ta ama le kanaton? (Maga Hebreo 12:5, 6, 11)

⁶ Duele el disciplina. Pero si man focus lang kita na dolencia, posible principia kita hace de menos con el disciplina y sinti que gendeh este justo o aplicable kanaton. Como resulta, puede este sangga kanaton para entende con el un bien importante cosa​—ta corecta kanaton si Jehova cay ta ama le kanaton. (Le con el Maga Hebreo 12:5, 6, 11.) Y si permiti kita que controla kanaton el diaton emocion, ta dale kita oportunidad con Satanas para ataca kanaton. Quierre le que gendeh kita acepta con el disciplina y hinay-hinay queda lejos con Jehova y na congregacion. Si ya disciplina contigo, paquemodo tu puede usa con el de tuyu abilidad para pensa?

7. (a) Como cosa ta dale mira na letrato, paquemodo si Jehova ya usa con Pedro despues le acepta disciplina? (b) Cosa tu puede aprende na ejemplo de Pedro?

⁷ Acepta disciplina y hace con el maga necesita cambio. Mas de un beses, si Jesus ya corecta con Pedro enfrente na otro maga apostoles. (Mar. 8:33; Luc. 22:31-34) Posible, yan huya gayot si Pedro por causa con aquel! Pero, ya esta le leal con Jesus. Ya acepta le con el disciplina y ya aprende na de suyu maga kamali. Na uliji, ya premia si Jehova con el lealtad de Pedro y ya dale con ele maga pesao responsibilidad na congregacion. (Juan 21:15-17; Act. 10:24-33; 1 Ped. 1:1) Cosa kita puede aprende na ejemplo de Pedro? Ta beneficia kita y el otro si gendeh kita tan focus na huya que ya sinti kita sino acepta con el coreccion y hace con el maga necesita cambio. Si hace kita con ese, hay queda kita mas usable con Jehova y na diaton maga hermano.

8-9. Despues del disciplina, cosa ya sinti si Bernardo del primero pero cosa con ele ya ayuda para corecta con el de suyu mirada?

⁸ Considera si cosa ya sucede con Bernardo, un hermano na Mozambique. Ya quita con el de suyu privilegio como anciano. Cosa ya sinti si Bernardo del primero? Ya habla le, “Yan sentimiento yo cay nuay yo gusta con el disciplina que ya ricibi yo.” Yan lingasa le acerca si cosa pensa con ele el otro na congregacion. Ele ya admiti, “Ya alcanza cuanto meses antes yo tene justo mirada na disciplina y confia otravez con Jehova y na de suyu organizacion.” Cosa ya ayuda con Bernardo para cambia el de suyu custumbre?

 ⁹ Ya corecta si Bernardo con el de suyu mirada. Ele ya explica: “Cuando ta sirvi yo como un anciano, ta usa yo con el Maga Hebreo 12:7 para ayuda con otro que tene justo mirada na disciplina de Jehova. Ahora, ya pregunta yo con el de mio mismo cuerpo, ‘Quien necesita aplica con este texto?’ El todo maga siervo de Jehova​—incluido ya yo.” Despues, tiene pa cosa ya hace si Bernardo para tene otravez confianza con Jehova y na de suyu organizacion. Mas ya le ele con el Biblia y mas ya dale tiempo para medita acerca na cosa ele ya le. Maskin yan lingasa le acerca na mirada del maga hermano y hermana con ele, yan junto le kanila na ministerio y ya participa na maga miting. Na uliji, ya queda otravez anciano si Bernardo. Si ya ricibi tu disciplina igual con Bernardo, no man focus na huya que ya sinti tu sino acepta con el consejo y hace maga necesita cambio. c (Prov. 8: 33; 22:4) Si hace tu se, puede tu asigura que hay premia contigo si Jehova na de tuyu lealtad con ele y na de suyu organizacion.

10. Cosa cambio el posible ya pone na probanza con el lealtad del cuanto maga Israelita hombre?

¹⁰ Puede pone na probanza con el diaton lealtad si tiene maga cambio el organizacion. Si gendeh kita con cuidao, puede pa gane este separta kanaton con Jehova. Por ejemplo, pensa acerca si paquemodo ya cambia el maga cosas para na maga Israelita. Cuando nuay pa dale si Jehova con el Ley, el maga cabeza del familia ta hace con el maga cosas que ta hace el maga sacerdote. Ta hace sila maga altar y ta sacrificia para con Jehova para na diila maga familia. (Gen. 8:20, 21; 12:7; 26:25; 35:1, 6, 7; Job 1:5) Pero cuando ya dale ya si Jehova el Ley, nuay mas permiti con el maga cabeza del familia que hace con ese maga cosas. Ya iscuji si Jehova con el maga sacerdote estaba na familia de Aaron para hace maga ofrecimiento. Desde aquel, si el un cabeza del familia quien gendeh uno na maga descendiente de Aaron ya principia actua como un sacerdote, puede con ele mata. d (Lev. 17:3-6, 8, 9) Posible gaha que uno se na maga razon si porque yan rebelde kanda Core, Datan, Abiram y el 250 jefe contra con Moises y Aaron? (Num. 16:1-3) Posible. Pero maskin cosa pa man el razon, si Core y el de suyu maga uban nuay puede esta leal con Jehova. Si ya pone na probanza con el de tuyu lealtad por causa na maga cambio del organizacion, cosa tu puede hace?

11. Cosa kita puede aprende na ejemplo del cuanto maga Kohatita?

¹¹ Suporta con el maskin cosa cambio del organizacion. Durante na diila viaje na desierto, el maga Kohatita tiene un bien especial assignment. Cada vez ta cambia campo el maga Israelita, el cuanto maga Kohatita ta carga con el arca de contrata adelante del todo maga gente. (Num. 3:29, 31; 10:33; Jos. 3:2-4) Un bonito privilegio gayot se! Pero, ya cambia se cuando el maga Israelita ya esta ya na Tierra Prometido. Gendeh mas pirmi necesita cambia lugar con el Arca. Poreso na tiempo de Rey Solomon, ya dale trabajo con el cuanto maga Kohatita que canta, vicia con el maga grande puerta y mira con el maga bodega. (1 Cron. 6:31-33; 26:1, 24) Nuay menciona na Biblia que el maga Kohatita ya reclama o ya pidi mas importante trabajo cay tiene sila especial assignment de antes. Cosa kita puede aprende? Con todo corazon suporta con el maga cambio que ta hace el organizacion de Jehova, incluido con el  maskin cosa que ta afecta con el de tuyu assignment. Queda alegre na maskin cosa assignment que ya dale contigo. Acorda que el de tuyu assignment gendeh ta determina con el de tuyu valor como un persona. Mas importante con Jehova el de tuyu obediencia contra na maskin cosa assignment.​—1 Sam. 15:22.

12. Cosa ya sinti si Zaina cuando yan reassign con ele estaba na Bethel?

¹² Considera con el ejemplo de Zaina, un hermana na Middle East, quien tiene bonito privilegio pero ya ricibi otro assignment. Yan reassign con ele na field despues sirvi na Bethel por mas de 23 año. Ele ya habla: “Ya espanta gayot yo cuando ya ricibi yo otro assignment. Ya sinti yo nuay valor y pirmi yo ta pregunta con el de mio mismo cuerpo, ‘Onde yo ya falla?’” Maka-triste, el cuanto maga hermano y hermana na congregacion ya omenta pa con el de suyu dolor cuando ya habla sila: “Si bueno tu, gendeh contigo manda sale na Bethel.” Por cuanto tiempo, ya sinti bien triste si Zaina poreso ta llura le cada noche. Pero, ele ya habla: “Nunca yo permiti con el de mio mismo cuerpo que man duda na organizacion o na amor de Jehova.” Paquemodo si Zaina ya puede usa con el de suyu abilidad para pensa?

13. Cosa ya hace si Zaina para enfrenta con el de suyu negativo sentido?

¹³ Ya puede enfrenta si Zaina con el de suyu negativo sentido. Paquemodo? Ya le ele maga articulo na diaton maga publicacion que ta discuti acerca con el cosa le ta experiencia. Ya ayuda gayot con ele el articulo “You Can Cope With Discouragement!” na Febrero 1, 2001, issue del The Watchtower. Aquel articulo ta explica si paquemodo el escritor del Biblia que si Marcos posible ya sinti tambien se cuando ya ricibi le otro assignment. Ya habla si Zaina, “El ejemplo de Marcos amo gayot el cosa yo necesita para gendeh mas queda triste.” Ya esta tambien cerca si Zaina na de suyu maga amigo y amiga. Nuay le hace lejos con el de suyu mismo cuerpo con otro y nuay le sinti que maka-lastima con ele. Ya puede le realiza que el sagrao espiritu ta guia con el maga decision del organizacion de Jehova y aquellos quien ta guia ta ama gayot con ele. Pero, ya puede tambien le realiza que el organizacion del Dios debe hace si cosa el mas bueno para cumpli el trabajo de Jehova.

14. Na cosa cambio del organizacion yan dificil man adjust si Vlado y cosa con ele ya ayuda?

¹⁴ Si Vlado, un 73 año anciano na Slovenia, yan dificil cuando el diila congregacion yan junto  na otro congregacion y ya cerra con el Kingdom Hall onde le ta atende de antes. Ele ya habla: “Gendeh yo ta entende si porque gendeh mas kame puede usa con el un bonito Kingdom Hall. Ya sinti yo duele cay nuevo lang kame yan renovate con el Kingdom Hall. Un carpintero yo y ya ayuda yo hace con el cuanto nuevo furniture. Y gendeh tambien pronto para kanamon maga de edad publisher que hace el maga cambio cuando ya hace kanamon junto na otro congregacion.” Cosa ya ayuda con Vlado para suporta con el direccion? Ele ya explica: “Pirmi tiene bendicion si man adjust kita na maga cambio que ya hace el organizacion de Jehova. Ta prepara este kanaton para na mas grande cambio na futuro.” Tan dificil ba tu man adjust cay ya hace junto con ustedes na otro congregacion o ya cambia el de tuyu assignment? Puede tu asigura que ta entende si Jehova si cosa tu ta sinti. Si suporta tu con ese maga cambio y esta leal con Jehova y na organizacion que ta usa le, hay bendici gayot le contigo.​—Sal. 18:25.

15. Paquemodo kita usa con el diaton abilidad para pensa si experiencia kita maga dificultad adentro na congregacion?

¹⁵ Mientras ta queda kita cerca na fin de este sistema de maga cosas, puede kita expecta maga dificultad adentro na congregacion. Este maga dificultad puede pone na probanza con el diaton lealtad con Jehova. Poreso, debe kita usa con el diaton abilidad para pensa. Si ya sinti tu que nuay trata enbuenamente contigo el un hermano o hermana, no man sentimiento. Si ya ricibi tu disciplina, no man focus na huya que ya sinti tu sino acepta con el consejo y hace con el maga necesita cambio. Y si ya sale tu afectao na maga cambio que ya hace el organizacion de Jehova, con todo corazon acepta con ese y obedece con el direccion.

16. Paquemodo tu puede mentena con el de tuyu confianza con Jehova y na de suyu organizacion?

¹⁶ Puede tu mentena con el de tuyu confianza con Jehova y na de suyu organizacion si ya pone na probanza el de tuyu lealtad. Pero para puede hace con ese, necesita tu usa con el de tuyu abilidad para pensa​—esta calmao, pensa enbuenamente y mira con el maga cosas asegun na mirada de Jehova. Estudia acerca na maga caracter na Biblia quien ya enfrenta maga semejante dificultad y medita con el diila maga ejemplo. Pidi el ayuda de Jehova na rezo. Y no hace lejos con el de tuyu mismo cuerpo na congregacion. Como resulta, maskin cosa man sucede, gendeh puede separta si Satanas contigo con Jehova o na De Suyu organizacion.​—Sant. 4:7.