1-2. (a) Porque ya habla si Pablo que el amor “el mas importante” calidad? (b) Cosa maga pregunta kita hay considera?

 CUANDO ya discuti si apostol Pablo acerca na fe, esperanza y amor, ya habla le que “el mas importante con todo amo el amor.” (1 Cor. 13:13) Porque se ya puede habla si Pablo? Na futuro, gendeh mas kita necesita tene fe na maga promesa del Dios acerca na nuevo mundo o esperanza que ese maga promesa hay sucede cay ya cumpli ya este. Pero necesita kita pirmi tene amor con Jehova y con el maga gente. Gane, el amor diaton para kanila hay continua queda mas fuerte hasta para cuando.

² Ciendo pirmi kita necesita demonstra amor, hay considera kita tres pregunta. Una, porque kita debe ama con uno y otro? Ika-dos, paquemodo kita dale mira amor con uno y otro? Ika-tres, paquemodo kita hace fuerte con el diaton amor con uno y otro?

3. Cosa el maga razon si porque kita debe ama con uno y otro?

³ Porque importante que ama kita con uno y otro? El un razon amo que el amor ta identifica kanaton como maga verdadero Cristiano. Si Jesus ya habla con el de suyu maga apostoles: “Ansina ay sabe todo el maga gente cay ustedes dimio maga dicipulo: Si tiene ustedes amor con uno y otro.” (Juan 13:35) Puera con ese, el amor ta ayuda kanaton para esta unido.  Si Pablo ya habla que el amor “ta dale unidad.” (Col. 3:14) Pero, tiene pa otro importante razon si porque debe kita ama con uno y otro. Si apostol Juan ya escribi na maga hermano y hermana: “Si quien ta ama con el Dios, necesita ama tamen con su hermano y hermana.” (1 Juan 4:21) Si ta dale kita mira amor con uno y otro, ta dale tambien kita mira amor con Dios.

4-5. Ilustra si paquemodo el diaton amor con Dios conectao na diaton amor con uno y otro.

⁴ Na cosa manera el diaton amor con Dios conectao na amor que ta dale kita mira na diaton maga hermano y hermana? Para ilustra, considera kita con el coneccion del diaton corazon na otro parte del diaton cuerpo. Si el un doctor ta chequia con el diaton pulso para mira si este ba mahina o fuerte, puede le sabe cuanto informacion acerca na condicion del diaton corazon. Paquemodo kita puede aplica este ejemplo na amor?

⁵ Igual con el un doctor quien ta puede saca cuanto informacion acerca na condicion del diaton corazon si ta chequia con el diaton pulso, puede tambien kita sabe si paquemodo de fuerte el diaton amor con Dios si chequia kita con el diaton amor para con otro. Si ya nota kita que ya queda mahina el diaton amor para na maga hermano y hermana, posible un indicacion este que ta queda tambien mahina el diaton amor con Dios. Pero si regular kita ta dale mira amor con el diaton maga hermano y hermana, un señal este que fuerte el diaton amor con Dios.

6. Si ta queda mahina el diaton amor para na maga hermano y hermana, porque un serioso problema este? (1 San Juan 4:7-9, 11)

⁶ Si ta queda mahina el diaton amor para na maga hermano y hermana, un serioso problema este. Porque? Cay ta dale este mira que na peligro el diaton espiritualidad. Ya hace este claro si apostol Juan cuando ya habla le: “Si gendeh [el un persona] ta ama con su hermano o hermana con quien le ta puede mira, no puede tamen le ama con el Dios, con quien le no puede mira.” (1 Juan 4:20) Cosa el leccion para kanaton? Hay queda lang alegre si Jehova kanaton si ta “ama [kita] con uno y otro.”​—Le con el 1 San Juan 4:7-9, 11.

7-8. Cosa el cuanto manera que puede kita dale mira el diaton amor con uno y otro?

⁷ Manada beses kita puede mira na Biblia el mandamiento que “ama . . . con uno y otro.” (Juan 15:12, 17; Roma 13:8; 1 Tes. 4:9; 1 Ped. 1:22; 1 Juan 4:11) Pero, el amor amo un sentido que talli adentro na diaton corazon y nuay gente el quien puede mira con este. Entonces, paquemodo kita dale mira el diaton amor con uno y otro? Por medio na diaton maga palabra y accion.

⁸ Manada manera donde puede kita dale mira el diaton amor na diaton maga hermano y hermana. Este el cuanto maga ejemplo: “Habla el verdad con uno y otro.” (Zac. 8:16) ‘Tene paz entre con uno y otro.’ (Mar. 9:50) “Man una . . . dale mira honor con uno y otro.” (Roma 12:10) ‘Acepta con uno y otro.’ (Roma 15:7) “Perdona con uno y otro.” (Col. 3:13) “Carga el maga problema de uno y otro.” (Gal. 6:2) “Continua . . . dale comforta con uno y otro.” (1 Tes. 4:18, NWT) “Man ayudajan para puede crici na fe.” (1 Tes. 5:11) ‘Reza para con uno y otro.’​—Sant. 5:16.

9. Porque el comforta un importante expresion de amor? (Mira tambien con el letrato.)

⁹ Considera kita un expresion de amor que ya menciona del ya pasa parapo. Examina  kita con el cosa ya habla si Pablo: “Continua . . . dale comforta con uno y otro.” Porque el comforta un importante expresion de amor? Asegun na un referencia na Biblia, el palabra que ya usa si Pablo para na “dale comforta” quierre decir que “para na costao del un persona para anima con ele si ta enfrenta le grabe problema.” Entonces, si ta dale kita comforta con el un hermano quien ta sufri, ta ayuda kita con ele para continua fiel sirvi con Jehova. Cada vez ta dale kita comforta con el diaton maga hermano y hermana, ta dale kita mira que ta ama kita kanila.​—2 Cor. 7:6, 7, 13.

10. Cosa el coneccion del compasion y comforta?

¹⁰ Tiene coneccion el compasion y el comforta. Si el un persona tiene compasion con otro, quierre le dale comforta con aquel persona y ayuda con ele. Entonces, una ta sinti kita compasion; despues, ta dale kita comforta. Nota si pakilaya si Pablo ya conecta con el compasion de Jehova na comforta que ta dale Le. Si Pablo ya menciona que si Jehova amo “el Tata de todo clase de lastima y el Dios de todo clase de consuelo.” (2 Cor. 1:3) Ya usa si Pablo aqui con el expresion “todo clase de lastima” para refiri con el sentido de compasion con otro. Entonces, ya llama con el Dios “el Tata o el Tuburan de todo clase de lastima por causa na de suyu grande compasion para na maga gente.” Y ese compasion ta manda move con ele para dale comforta kanaton “na todo [diaton] maga sufrimiento.” (2 Cor. 1:4) Igual si paquemodo el agua ta refresca con aquellos con sequia, si Jehova ta refresca y ta dale comforta con aquellos tan luya. Paquemodo kita puede imita con Jehova y sinti compasion con otro y dale comforta kanila? El un manera amo que cultiva maga calidad que puede ayuda kanaton para dale comforta con otro. Cosa el cuanto de este maga calidad?

11. Asegun na Colosa 3:12 y 1 Pedro 3:8, cosa maga calidad kita debe cultiva para puede kita ama y dale comforta con otro?

¹¹ Cosa puede ayuda kanaton para mentena con el amor que necesita kita para “continua . . . dale comforta con uno y otro” todo el dia? Necesita kita cultiva maga calidad igual na empatia, amor na maga hermano y pagka-bueno. (Le con el Colosa 3:12; 1 Pedro 3:8.) Paquemodo este maga calidad hay ayuda kanaton? Si ta sinti kita compasion y deverasan interesao na maga hermano, tiene kita el deseo para dale comforta kanila si ta sufri sila. Como cosa ya habla si Jesus, “el boca ta comversa lang si cosa ta sale na corazon. El gente bueno ta saca el maga cosa-cosa na disuyo reserva de maga cosa-cosa bueno.” (Mat. 12:34, 35) Deverasan gayot que el comforta amo un importante manera para dale mira el diaton amor na maga hermano y hermana.

12. (a) Porque necesita kita esta alerto? (b) Cosa pregunta kita hay considera?

¹² Todo kita quierre que continua “ama . . . con uno y otro.” (1 Juan 4:7) Pero, acorda kita que ya dale aviso si Jesus que “el amor ay queda frio na mayor parte del maga gente.” (Mat. 24:12) Nuay habla si Jesus que hay sucede este na mayoria del de suyu maga dicipulo. Maskin pa ansina, necesita kita esta alerto para gendeh queda influenciao na maga gente na mundo quien nuay amor. Para ayuda kanaton queda alerto, considera kita con este importante pregunta:  Tiene ba manera para sabe si fuerte el diaton amor para na maga hermano y hermana?

13. Cosa puede pone na probanza con el diaton amor?

¹³ El un manera que puede kita determina si paquemodo de fuerte el diaton amor amo si examina kita si paquemodo kita ta enfrenta con el cuanto situacion na vida. (2 Cor. 8:8) Ya menciona si apostol Pedro con el uno de ese maga situacion: “El mas importante con todo, ama gayot con uno y otro, cay el amor ta puede tapa con mucho maga pecado.” (1 Ped. 4:8) Entonces, el maga kamali y imperfeccion del otro puede pone na probanza con el diaton amor.

14. Asegun na 1 Pedro 4:8, cosa clase de amor el necesita kita tene? Ilustra.

¹⁴ Examina kita con el maga palabra de Pedro. El primer parte del versiculo 8 ta refiri con el manera si paquemodo kita ama​—“ama gayot.” El palabra que ya usa si Pedro para na “ama gayot” quierre decir “hace hitat.” El segundo parte del versiculo ta menciona con el efecto si ta ama gayot kita​—ta tapa este con el maga pecado del diaton maga hermano y hermana. Para ilustra: Ta agarra kita con el diaton  amor con dos mano que dol un tela y ta hace gayot kita con este hitat para tapa, gendeh lang uno o dos sino “mucho maga pecado.” El palabra “tapa” amo otro manera para habla que perdona. Igual na un tela que ta puede tapa con el mancha, el amor ta puede tapa con el maga kamali y imperfeccion del otro.

15. Si fuerte el diaton amor para na maga hermano y hermana, cosa kita ta puede hace? (Colosa 3:13)

¹⁵ El diaton amor para con otro necesita queda fuerte gayot que puede kita perdona con el diila imperfeccion maskin pa tiene vez bien dificil con ese hace. (Le con el Colosa 3:13.) Si ta perdona kita con otro, ta dale kita mira que fuerte el diaton amor y quierre kita hace alegre con Jehova. Cosa pa puede ayuda kanaton para ignora con el maga gendeh buen custumbre y kamali del otro?

16-17. Cosa pa el puede ayuda kanaton para ignora con el diutay kamali del otro? Ilustra. (Mira tambien con el letrato.)

¹⁶ Man focus na maga positivo custumbre del maga hermano y hermana, gendeh na negativo. Considera con este ejemplo. Imagina que talli tu na un gathering junto con el maga hermano y hermana. Alegre ustedes y na uliji, ya saca tu letrato junto kanila. Gane, ya letrata pa tu dos beses en caso gendeh bueno el sacada del primer letrato. Tiene ya tu tres letrato. Pero na un letrato, ya nota tu que gendeh tan smile el un hermano. Cosa tu hace con aquel letrato? Hay borra tu con aquel cay tiene  pa tu dos otro letrato que donde todo ta man smile, incluido aquel hermano.

¹⁷ Puede kita compara con aquel maga letrato na maga suceso que quierre-quierre kita acorda. Tiene kita maga bonito experiencia junto con el diaton maga hermano y hermana. Pero posible na uno de ese maga tiempo, el un hermano o hermana tiene cosa ya habla o ya hace que nuay kita gusta. Cosa kita hace con aquel experiencia? Ta pricura kita ulvida y borra con este igual si paquemodo ta borra kita con aquel letrato. (Prov. 19:11; Ef. 4:32) Puede kita ulvida con el diutay kamali del diaton hermano o hermana cay tiene kita manada bonito experiencia junto con ele. Ese el maga experiencia que quierre kita acorda.

18. Cosa maga importante punto acerca na amor el ya considera kita na este articulo?

¹⁸ Porque quierre kita continua hace fuerte con el diaton amor con uno y otro? Como cosa kita ya considera, si ta dale kita mira amor con el diaton maga hermano y hermana, ta dale tambien kita mira amor con Jehova. Paquemodo kita ta dale mira con el diaton amor na diaton maga hermano y hermana? El un manera amo si ta dale kita comforta kanila. Puede kita “continua . . . dale comforta con uno y otro” si tiene kita compasion. Paquemodo kita continua hace fuerte con el diaton amor con uno y otro? Si perdona kita con el maga kamali del diaton maga hermano y hermana maskin pa dificil con este hace.

19. Porque bien importante ahora que dale mira el diaton amor con uno y otro?

¹⁹ Porque bien importante ahora que dale mira el diaton amor con uno y otro? Nota con el razon que ya dale si Pedro: “Cerca ya el fin de todo el maga cosa-cosa. Poreso, . . . ama gayot con uno y otro.” (1 Ped. 4:7, 8) Mientras mas ta queda cerca el fin de este mal mundo, cosa kita puede expecta? Si Jesus ya habla na de suyu maga siguidores: “Todo el maga gente ay odia con ustedes por causa del dimio Nombre.” (Mat. 24:9) Para puede aguanta con ese, necesita kita esta unido. Si hace kita se, nunca si Satanas puede causa division kanaton cay tiene kita amor y “el amor ta dale unidad.”​—Col. 3:14; Fil. 2:1, 2.