Ya nace yo del 1948 na un diutay barrio na southwest parte del Nigeria. Durante na aquel tiempo, ya bautiza como maga Testigo de Jehova con Angkol Moustapha, el hermano menor del de mio tata, y despues con Wahabi, el de con todo mayor hermano de mio. Cuando nueve año yo, ya muri el de mio tata. Dolorido gayot yo pero ya habla conmigo si Wahabi que puede kame mira otravez con Papang na resureccion. Ya motiva se conmigo para estudia con el Biblia. Ya bautiza yo del 1963. Despues, ya bautiza tambien el otro pa tres hermano de mio.

Del 1965, ya sigui yo con el de mio mayor hermano que si Wilson na Lagos y alegre yo yan junto na maga regular pioneer na Igbobi Congregation. El diila alegria y pagka-activo ya motiva conmigo poreso del Enero 1968, yan pioneer tambien yo.

Si Albert Olugbebi, un hermano quien ta sirvi na Bethel, ya organiza un especial miting junto kanamon maga jovenes. Ya habla le que tiene grande necesidad de maga special pioneer na norte parte del Nigeria. Ta acorda pa yo con el cosa ya habla si Hermano Olugbebi para anima kanamon: “Joven pa ustedes y puede ustedes usa con el de ustedes tiempo y fuerza para con Jehova. Tiene ustedes grande oportunidad!” Cay quierre  yo imita con profeta Isaias quien preparao man voluntario, yan submit yo un application.—Isa. 6:8.

Del Mayo 1968, yan assign conmigo como un special pioneer na ciudad de Kano, na norte parte del Nigeria. Durante se del Biafran War (1967-1970) que ya destroza con ese region antes guinda el gulu na parte este del Nigeria. Tiene un hermano quien ya pricura convinci conmigo que no anda alla. Pero ya habla yo con ele: “Gracias cay tan lingasa tu conmigo. Pero si quierre si Jehova que sirvi yo con ele na ese assignment, asigurao yo que man junto le conmigo.”

Bien maka-triste el condicion na Kano. Por causa na guerra civil, grabe gayot el destrozo na ciudad. Tiene vez na ministerio, ta puede kame mira maga muerto cuerpo de gente na camino quien ya muri durante el guerra. Maskin pa tiene cuanto congregacion na Kano, mayoria del maga hermano ya escapa para na otro lugar. Nuay llega 15 publisher el ya esta, y tiene sila miedo y tan luya. Alegre gayot sila cuando ya llega kame seis special pioneer. Bueno gayot el efecto kanila cuando ya anima kame kanila. Ya ayuda kame kanila para hace bira diila espiritual rutina y para imbia otravez field service report y literature order na branch.

Kame maga special pioneer ya principia aprende el lengguaje Hausa. Cay ya oi sila con el mensaje del Reino na diila mismo lengguaje, manada el quien ya oi kanamon. Pero, manada gente el tan contra con el diamon predicacion poreso necesita kame queda con cuidao. Gane na un ocasion, ya hace apas kanamon del de mio uban el un hombre que ta agarra cuchillo. Bueno ya lang, ya puede kame una corre y ya puede escapa! Maskin tiene maga peligro, ya dale kanamon seguridad si Jehova y ya principia queda manada el maga publisher. (Sal. 4:8) Ahora, tiene ya mas de 500 publisher quien ta sirvi na 11 congregacion na Kano.

Nuay dura, del Agosto 1968, despues sirvi na Kano por cuanto meses, ya imbia conmigo na Niamey, el centro del Republica de Niger, junto con  el otro dos special pioneer. Ya puede kame discubri que el Niger, na West Africa, amo el uno del de con todo caliente lugar na tierra. Puera que necesita kame aguanta con el calor, necesita kame aprende con el lengguaje French. Maskin pa na ese maga dificultad, ya pone kame el diamon confianza con Jehova y ya principia predica junto con el cuanto maga publisher alla. Adentro lang del cuanto tiempo, halos todo quien sabe le na Niamey ya puede ya ricibi un copia del libro The Truth That Leads to Eternal Life que ta usa na Bible study. Gane, tiene maga gente quien ta anda kanamon para puede tene un copia!

Nuay dura, ya puede kame sabe que el maga autoridad no quierre con el maga Testigo de Jehova. Del Julio 1969, ya hace kame por primer vez el asemblea de circuito na aquel nacion y maga 20 el ya atende. Alegre kame que tiene dos nuevo publisher el quien bautiza. Pero na primer dia del asemblea, tiene ya llega polis y ya manda descanza con el programa. Ya lleva sila con el maga special pioneer y con el circuit overseer na estacion de polis. Despues del interogacion, ya manda sila kanamon bira alamañana. Cay ta sinti kame que tiene cosa posible sucede, ya hace kame con el talk de bautismo na un privado casa y ya bautiza con el maga candidato na un rio.

Cuanto semana despues, ya manda bolbe kanamon seis maga special pioneer el Ministry of the Interior. Ya dale sila kanamon 48 hora para sale na nacion y kame mismo el busca manera. Ya hace kame con ese y ya anda kame derecho na branch office de Nigeria donde ya ricibi kame nuevo maga assignment.

Yan assign conmigo na barrio de Orisunbare, na Nigeria, donde manada gente el interesao y yan junto yo na un diutay grupo de maga publisher quien ta queda alla. Pero despues del seis meses, ya invita conmigo el branch office que bira na Niger solo-solo. Del primero, ya espanta yo y ta nervia pero excited yo mira otravez con el maga hermano y hermana na Niger!

Ya bira yo na Niamey. Pagka-sunod dia despues yo llega alla, ya conoce conmigo el un Nigerian negociante que un Testigo de Jehova yo y tiene le maga pregunta acerca na Biblia. Yan Bible study kame y despues le quita con el pumada y por demas de tomada, ya bautiza le. Nuay dura, ya tene yo el privilegio que puede contribui na progreso na ministerio na diferente lugar de Niger. Cuando primer vez yo ya llega alla, 31 publisher lang el tiene alla pero cuando ya sale yo, 69 ya sila.

Na fin del 1977, ya bira yo na Nigeria para ricibi training. Cuando cerca ya acaba el de mio tres semana training, el Branch Committee coordinator, si Malcolm Vigo, ya manda conmigo le un carta estaba na Sierra Leone branch. Ta busca sila un single pioneer hermano quien tiene buen salud,  quien sabe converza English y French para puede sirvi como un circuit overseer na Guinea. Ya informa conmigo si Hermano Vigo que tan train sila conmigo para na este assignment. Ya hace le claro conmigo que gendeh facil este assignment. “Pensa enbuenamente antes acepta con ese,” ya habla le. Ya contesta dayun yo con ele, “Ciendo si Jehova el quien ya imbia conmigo, anda yo.”

Ya anda yo na Sierra Leone y yan mirajan na maga hermano na branch office. El un miembro de Branch Committee ya habla conmigo, “No sabe kame el progreso del trabajo predicacion na Guinea.” Maskin pa el branch el ta mira con el trabajo predicacion na Guinea, nuay sila comunicacion na maga publisher alla por causa na gulu na politica. Y maskin cuanto beses ya sila ya pricura imbia maga hermano, nuay quien ta puede entra na aquel nacion. Poreso, ya pidi conmigo el branch para viaja na Conakry que amo el centro del Guinea.

Cuando ya llega yo na Conakry, ya anda yo na embassy del Nigeria y ya conoce con el ambassador. Ya habla yo con ele que quierre yo predica na Guinea. Pero, ya anima le conmigo que no esta cay baka arresta conmigo o tiene pa cosa mas grabe sucede. “Bira na Nigeria y alla predica,” ya habla le y ya contesta yo, “Gendeh, aqui lang yo.” Poreso, ya escribi le carta y ya pidi con el Guinean Minister of the Interior que ayuda conmigo y amo se el cosa ya hace el minister.

Corto tiempo despues, ya bira yo na branch office del Sierra Leone y ya informa con el maga hermano acerca el decision del minister. Bien alegre gayot el maga hermano cuando ya sabe sila si paquemodo ya bendici si Jehova con el de mio esfuerzo. Ya permiti el gobierno que esta yo na Guinea!

Del 1978 hasta 1989, ya sirvi yo na circuit work na Guinea, Sierra Leone y como un substitute circuit overseer na Liberia. Del primero, pirmi yo ta enferma. Ta sucede se tiene vez si talli yo na maga lugar que lejos na ciudad. Maskin pa ansina, ta hace el maga hermano el todo para lleva conmigo na hospital.

Na un ocasion, ya queda yo bien enfermo por causa na malaria y ya tiene yo maga gusano na barriga. Cuando ya queda yo bueno, ya puede yo sabe que ta discuti ya gale el maga hermano si onde entera conmigo. Maskin pa na ese maga grabe suceso, nuay gayot yo pensa que deja con el de mio maga assignment. Convincido yo que el Dios lang el quien puede dale deverasan seguridad cay puede le resucita con el maga muerto.

Del 1988, ya conoce yo con Dorcas, un pioneer hermana quien bien humilde y mature na espiritual. Ya casa kame y ya sirvi le junto conmigo na circuit work. Bien amable si Dorcas y preparao hace maga sacrificio. Tiene vez, ta camina kame maga 25 kilometro para visita na maga congregacion cargando el diamon maga bagaje. Na maga congregacion que mas lejos, ta munta kame maskin cosa transportacion que puede kame sigui mientras ta pasa na maga camino que malodo y manada agujero.

 Bien animosa si Dorcas. Por ejemplo, tiene maga tiempo que necesita kame cruza na maga rio que tiene maga cayuman. Un tiempo cuando ya viaja kame por cinco dia, necesita kame man bangca para cruza na rio cay quebrao el fuente. Cuando ya para si Dorcas para abaja na bangca, ya cae le na agua. Nuay ni uno kanamon el sabe nada y tiene maga cayuman na aquel rio. Bueno ya lang, tiene maga joven hombre el ya anda para salva con ele. Ya tiene kame maga mal sueño por cuanto tiempo por causa con ese pero ya continua kame na diamon assignment.

Na principio del 1992, bien espantao gayot kame cuando ya sabe que priñada si Dorcas. Necesita ba kame descanza na diamon assignment como maga special pioneer? Ya pensa kame, “Ya dale kanaton regalo si Jehova!” Poreso, ya decidi kame nombra con el diamon anak mujer Jahgift. Cuatro año despues nace si Jahgift, yan sunod con ele el de suyu hermano, si Eric. El diamon dos anak maga regalo gayot estaba con Jehova. Ya sirvi si Jahgift por cuanto tiempo na remote translation office na Conakry y si Eric un siervo ministerial ahora.

Maskin ya llega el tiempo que necesita descanza sirvi si Dorcas como special pioneer, ya continua le man regular pioneer mientras ta hace engranda con el diamon maga anak. Na ayuda de Jehova, ya continua yo sirvi como un special pioneer. Cuando grande ya el diamon maga anak, ya puede otravez sirvi si Dorcas como special pioneer. Ahora, dos kame ta sirvi como field missionary na Conakry.

Pirmi yo ta anda onde conmigo lleva si Jehova. Manada beses kame del de mio mujer ya sinti el de suyu proteccion y bendicion. Cay ya confia kame con Jehova, ya ayuda se kanamon para evita con el maga problema que ta experiencia aquellos quien ta confia na maga material cosas. Personal kame ya experiencia de Dorcas que el quien puede dale kanamon deverasan seguridad amo el “Dios del diamon salvacion,” si Jehova. (1 Cron. 16:35) Sabe gayot yo que “si Jehova hay guarda con el . . . vida” del todo aquellos quien ta confia con ele.—1 Sam. 25:29.