1-2. Porque posible ta sinti kita que gendeh si Jehova ta contesta con el diaton maga rezo?

 “OBTENE grande alegria con Jehova y hay dale le el cosa que ta desea de tuyu corazon.” (Sal. 37:4) Que bien bonito promesa! Pero debe ba kita expecta que dale dayun kanaton si Jehova el todo cosa que ta pidi kita? Porque importante este pregunta? Considera con el siguiente situacion. El un single hermana ta reza que era puede le atende na School for Kingdom Evangelizers. Manada año ya el ya pasa pero nuay pa siempre con ele invita. El un joven hermano ta pidi con Jehova que cura con el de suyu enfermedad para puede le sirvi mas na congregacion. Pero nuay siempre le queda bueno. El un man maridable ta reza que ojala el diila anak hay esta na verdad pero el diila anak ya decidi que descanza sirvi con Jehova.

² Posible ya pidi tambien tu con Jehova un cosa pero nuay pa tu ricibi con ese. Como resulta, posible ya pensa tu que ta contesta si Jehova con el rezo del otro pero gendeh de tuyu. O posible pensa tu que tiene tu gendeh bueno cosa ya hace. El un hermana que si Janice b ya sinti ansina. Ele y el de suyu marido ya reza que quierre sila sirvi na Bethel. Ele ya habla: “Convincido gayot yo que hay llama dayun kanamon na Bethel.” Pero cuanto año ya el ya pasa, nuay pa siempre kanila invita. Si Janice ya habla: “Yan triste yo. Ya pensa yo, ‘Tiene ba yo cosa ya hace que nuay gusta si Jehova?’ Especifico gayot yo ya reza que quierre gayot yo anda na Bethel pero porque man le nuay contesta de mio rezo?”

3. Cosa kita hay discuti na este articulo?

 ³ Tiene vez, posible ta pensa kita si ta oi ba gayot si Jehova con el diaton maga rezo. Maskin el cuanto fiel hombre del antes ya sinti igual ansina. (Job 30:20; Sal. 22:2; Hab. 1:2) Cosa puede convinci contigo que hay contesta si Jehova con el de tuyu maga rezo? (Sal. 65:2) Para contesta con ese, sabe kita una con el contestacion del siguiente pregunta: (1) Cosa kita puede expecta con Jehova? (2) Cosa si Jehova ta expecta kanaton? (3) Porque posible necesita kita man adjust con el cuanto del diaton rezo?

4. Asegun na Jeremias 29:12, cosa si Jehova ya promete que hace?

⁴ Ya promete si Jehova que oi le con el diaton maga rezo. (Le con el Jeremias 29:12. c) El diaton Dios ta ama con el de suyu maga fiel siervo poreso nunca le ignora con el diila maga rezo. (Sal. 10:17; 37:28) Pero, gendeh este quierre decir que hay contesta le con el todo cosa kita ta pidi. Posible necesita kita espera hasta na nuevo mundo antes kita ricibi con el cuanto del maga cosas que ta pidi kita.

5. Cosa si Jehova ta considera si acerca na diaton maga rezo? Explica.

⁵ Ta mira si Jehova si uyun ba na de suyu proposito el cosa kita ta pidi. (Isa. 55:8, 9) El uno na de suyu maga proposito amo que llena con el tierra de maga gente quien alegre somete na de suyu rulanza. Pero ta clama si Satanas que mas bueno el resulta si el maga gente el ta rula na diila mismo cuerpo. (Gen. 3:1-5) Para dale prueba que gendeh se deverasan, ya permiti si Jehova con el maga gente que rula con el diila mismo cuerpo. Pero, puede kita mira que el rulanza del gente amo el causa del manada problema que ta enfrenta kita ahora. (Ecl. 8:9) Sabe kita que gendeh solva si Jehova con este todo maga problema ahora. Cay si hace le se, posible pensa el cuanto que tiene buen resulta el rulanza del gente y puede este solva con el problema na mundo.

6. Porque debe kita confia que pirmi justo y amable el maga manera de Jehova?

⁶ Posible contesta si Jehova con el semejante rezo na diferente manera. Por ejemplo, cuando bien enfermo si Rey Ezequias, ya pidi le con Jehova que queda le bueno y ya hace se si Jehova. (2 Rey 20:1-6) Pero cuando si apostol Pablo ya pidi con Jehova que quita con el de suyu “tunuk na pellejo,” posible un problema na salud, nuay se si Jehova hace. (2 Cor. 12:7-9, El Nuevo Testamento) Considera tambien con el ejemplo del maga apostoles que kanda Santiago y Pedro. Quierre mata kanila si Rey Herodes. Ya reza el congregacion para con Pedro y asigurao para con Santiago tambien. Ya salva si Pedro na milagroso manera pero si Santiago ya muri. (Act. 12:1-11) Posible pensa kita, ‘Porque ya salva si Jehova con Pedro pero con Santiago nuay?’ Nuay cosa ya habla el Biblia. d El cosa kita puede asigura amo que “nuay injusticia” na maga manera de Jehova. (Deut. 32:4) Y sabe kita que ta ama si Jehova con Pedro y Santiago. (Rev. 21:14) Tiene vez, gendeh si Jehova ta contesta con el diaton maga rezo na manera que ta expecta kita. Pero cay ta confia kita que pirmi amable y justo el maga manera de Jehova, gendeh kita ta cuestiona si paquemodo le contesta con el diaton maga rezo.​—Job 33:13.

7. Cosa kita debe evita y porque?

 ⁷ Ta pricura kita evita que compara con el diaton situacion na situacion del otro. Por ejemplo, posible tiene kita cosa especifico ta pidi con Jehova pero nuay le se dale. Na uliji, ya sabe kita que ya pidi tambien se el otro y dol ya contesta se si Jehova. Ansina el cosa ya experiencia el un hermana que si Anna. Ya reza le que ojala el de suyu marido que si Matthew hay queda bueno na de suyu cancer. Na ese tiempo, ta sufri tambien na cancer el dos de edad hermana. Ta reza gayot si Anna para con Matthew y para con el maga hermana. Ya queda bueno el maga hermana pero si Matthew ya muri. Del una, ya pensa si Anna que ya queda bueno aquel maga hermana cay ya ayuda kanila si Jehova. Si ya ayuda kanila si Jehova, porque nuay le contesta con el maga rezo de Anna que queda bueno el de suyu marido? Siempre, no sabe kita si porque ya queda bueno aquel dos hermana. Pero sabe kita que permanente quita si Jehova con el todo diaton sufrimiento y bien quierre le resucita con el de suyu maga amigo quien ya muri.​—Job 14:15.

8. (a) Asegun na Isaias 43:2, paquemodo si Jehova ta ayuda kanaton? (b) Paquemodo el rezo puede ayuda kanaton si ta enfrenta kita maga dificil probanza? (Mira con el video El Rezo Puede Ayuda Kanaton Para Aguanta.)

⁸ Pirmi si Jehova hay suporta kanaton. Como diaton amable Tata, no quierre mira si Jehova que ta sufri kita. (Isa. 63:9) Maskin pa ansina, gendeh le ta quita con el todo diaton maga problema que igual na maga rio o fuego. (Le con el Isaias 43:2. e) Pero, ya promete le que ayuda le kanaton que “travesa” con ese. Y gendeh le permiti que el maga problema hay sangga kanaton que gendeh mas kita puede sirvi con ele. Ya dale tambien kanaton si Jehova el de suyu poderoso sagrao espiritu para ayuda kanaton aguanta. (Luc. 11:13; Fil. 4:13) Como resulta, puede kita confia que pirmi le hay dale kanaton el cosa gayot kita necesita para aguanta y esta fiel con ele. f

9. Asegun na Santiago 1:6, 8, porque kita debe confia que hay ayuda kanaton si Jehova?

⁹ Ta expecta si Jehova que confia kita con ele. (Heb. 11:6) Tiene vez, dol nuay mas solucion el diaton maga problema. Gane, posible principia kita man duda si ayuda ba kanaton si Jehova. Pero el Biblia ya asigura kanaton que por medio na poder del Dios, puede kita “subi” con el maskin cosa “pader” de probanza. (Sal. 18:29) Poreso en vez de man duda, debe kita reza con confianza que contesta si Jehova con el diaton maga rezo.​—Le con el Santiago 1:6, 8.

10. Ilustra si paquemodo kita puede actua harmonia na diaton maga rezo.

¹⁰ Ta expecta si Jehova que actua kita harmonia na diaton maga rezo. Por ejemplo, el un hermano posible ta pidi con Jehova que ayuda con ele que puede man day off na de suyu trabajo para puede le atende na asemblea de region. Paquemodo posible si Jehova contesta con ese rezo? Posible dale le con el hermano el coraje que necesita para atraca con el de suyu amo. Pero necesita siempre el hermano anda y pidi permiso con el de suyu amo. Posible necesita le hace con ese manada beses. Gane, baka necesita le man cambiajan schedule na de suyu uban na trabajo. Y si necesita,  posible ofrece le que menggua ya lang con el de suyu sueldo.

11. Porque kita debe continua reza acerca na diaton maga lingasa?

¹¹ Ta expecta si Jehova que continua kita reza acerca na diaton maga lingasa. (1 Tes. 5:17) Ya dale mira si Jesus que posible gendeh dayun contesta con el cuanto del diaton maga rezo. (Luc. 11:9) Poreso sincero reza y no descanza! (Luc. 18:1-7) Si continua kita reza acerca na un cosa, ta dale kita mira con Jehova que serioso kita na cosa kita ta pidi con ele. Ta dale tambien kita mira que ta confia kita na de suyu abilidad para ayuda kanaton.

12. (a) Cosa un pregunta que debe kita considera si acerca na diaton maga rezo y porque? (b) Paquemodo kita puede asigura que el diaton maga rezo ta dale mira respeto con Jehova? (Mira con el cajon “ El De Mio Rezo Ba Ta Dale Mira Respeto con Jehova?”)

¹² Si nuay kita ricibi con el cosa kita ya pidi na rezo, puede kita considera con el tres pregunta. El una amo, ‘Justo ba el cosa yo ta reza?’ Mas mucho, ta pensa kita que sabe kita si cosa el bueno para kanaton. Pero na uliji, gendeh gale se para na diaton bien. Si ta reza kita acerca na un problema, posible tiene este mas buen solucion contra na cosa kita ta pidi. Y el cuanto cosas que ta pidi kita posible gendeh harmonia na voluntad de Jehova. (1 Juan 5:14) Por ejemplo, considera con el maga mayores que ya menciona enante. Ya pidi sila con Jehova que ayuda con el diila anak que esta na verdad. Dol justo el cosa sila ta pidi. Pero, gendeh ta forza si Jehova con el maskin quien kanaton que sirvi con ele. Quierre le que todo kita, incluido el diaton maga anak, hay iscuji adora con ele. (Deut. 10:12, 13; 30:19, 20) Poreso, puede pidi el mayores con Jehova que ayuda kanila alcanza el corazon del  diila anak para motiva con ele que ama y queda amigo de Jehova.​—Prov. 22:6; Ef. 6:4.

13. Asegun na Maga Hebreo 4:16, cuando kanaton ayuda si Jehova? Explica.

¹³ El ika-dos pregunta amo, ‘Este ba el tiempo de Jehova para contesta con el de mio rezo?’ Posible ta sinti kita que necesita ya dayun contesta con el diaton maga rezo. Pero el deverasan, sabe si Jehova cuando el justo tiempo para ayuda kanaton. (Le con el Maga Hebreo 4:16.) Si nuay kita ricibi dayun con el cosa que ta pidi kita, posible pensa kita que el contestacion de Jehova, ‘Gendeh.’ Pero posible el de suyu contestacion, ‘Gendeh anay.’ Por ejemplo, pensa con aquel joven hermano quien ya reza que queda le bueno na de suyu enfermedad. Si cura si Jehova con ele na milagroso manera, posible clama si Satanas que ta continua lang sirvi el hermano con Jehova cay ya cura con ele. (Job 1:9-11; 2:4) Mas pa, ya determina ya si Jehova si cuando le cura con el todo enfermedad. (Isa. 33:24; Rev. 21:3, 4) Y mientras nuay pa se tiempo, gendeh kita puede expecta que cura si Jehova kanaton na milagroso manera. Poreso el hermano puede pidi con Jehova que dale con ele el fuerza y paz na pensamiento para puede le aguanta na de suyu enfermedad y continua fiel sirvi con Dios.​—Sal. 29:11.

14. Cosa tu ya aprende na experiencia de Janice?

¹⁴ Acorda con el experiencia de Janice, quien quierre sirvi na Bethel. Cinco año pa el ya pasa antes le ya entende si paquemodo si Jehova ya contesta con el de suyu rezo. Ele ya habla: “Ya usa si Jehova aquel tiempo para enseña conmigo y ayuda conmigo para queda mas buen Cristiano. Necesita yo hace fuerte con el de mio confianza con ele. Necesita yo mejora con el de mio personal estudiada. Y necesita yo aprende queda alegre maskin  cosa pa el de mio circumstancia.” Na uliji, ya invita con Janice y de suyu marido que sirvi na circuit work. Acerca na cosa ya pasa, si Janice ya habla: “Ya contesta si Jehova con el de mio maga rezo na manera que nuay yo expecta. Nuay dayun yo puede mira que bonito gayot el manera si paquemodo le ya contesta con el de mio maga rezo pero ta rindi gayot yo gracias cay tiene yo el oportunidad que experiencia el de suyu amor y pagka-bueno.”

15. Porque tiene vez necesita queda gendeh bien especifico na diaton maga rezo? (Mira tambien con el maga letrato.)

¹⁵ El ika-tres pregunta amo, ‘Debe ba yo reza para na otro cosa?’ Maskin pa bueno que queda especifico na diaton rezo, tiene vez mas bueno que gendeh kita queda bien especifico para puede kita mira si cosa si Jehova quierre para kanaton. Considera con el ejemplo del single hermana quien ya reza que ojala puede le atende na School for Kingdom Evangelizers. Quierre le atende na ese escuela para puede le sirvi onde tiene mas grande necesidad. Mientras ta continua reza acerca con ese, puede tambien le pidi con Jehova que ayuda con ele mira el otro oportunidad para hace mas na de suyu ministerio. (Act. 16:9, 10) Despues, puede le actua harmonia na de suyu rezo si pregunta le con el diila circuit overseer si tiene ba cerca congregacion que ta necesita pioneer. O puede le escribi na branch office para pregunta si onde tiene grande necesidad. g

16. Na cosa kita puede asigura?

¹⁶ Como cosa kita ya aprende, puede kita queda asigurao que hay contesta si Jehova con el diaton maga rezo na amable y justo manera. (Sal. 4:3; Isa. 30:18) Tiene vez otro el contestacion na cosa kita ta expecta. Pero nunca si Jehova ignora con el diaton maga rezo. Ta ama gayot le kanaton. Y nunca le abandona kanaton. (Sal. 9:10) Poreso continua “confia . . . con ele na todo tiempo” y reza con ele con todo corazon.​—Sal. 62:8.