1. Cosa el mensaje de profeta Isaias na de suyu maga uban Israelita?

 SI PROFETA Isaias ya habla que si Jehova amo el “Dios de verdad.” El palabra que yan translate “verdad” literal quierre decir “amen.” (Isa. 65:16, ftn.) El palabra “amen” quierre decir “sucede se” o “asigurao.” Mas mucho, ta usa con el palabra “amen” na Biblia para dale mira que deverasan el cosa ta habla o ta hace si Jehova o si Jesus. Poreso, este el mensaje de Isaias para na de suyu maga uban Israelita: Si habla si Jehova que sucede el un cosa, hay sucede gayot se. Gane, pirmi ta cumpli si Jehova con el de suyu maga promesa.

2. Porque kita puede confia con el maga promesa de Jehova acerca na diaton futuro y cosa maga pregunta kita hay considera?

² Puede ba tambien kita confia con el maga promesa de Jehova acerca na diaton futuro? Cerca 800 año despues el tiempo de Isaias, ya explica si apostol Pablo si porque kita pirmi puede confia con el maga promesa del Dios. Si Pablo ya habla: “No puede . . . el Dios habla imbusterias.” (Heb. 6:18) Igual si paquemodo el un tuburan de agua gendeh puede produci agua dulce y agua salao, si Jehova, el Tuburan de verdad, gendeh tambien puede habla imbusterias. Poreso, puede gayot kita confia con el todo cosa ta habla si Jehova, incluido el todo de suyu promesa acerca na diaton futuro. Na este articulo, hay considera kita con este maga pregunta: Cosa si Jehova ya promete que dale kanaton na futuro? Y cosa garantia le ya dale  que hay cumpli gayot el de suyu maga promesa?

3. (a) Cosa promesa el quierre-quierre el maga siervo del Dios? (Revelacion 21:3, 4) (b) Cosa el reaccion del cuanto si ta habla kita kanila acerca con este promesa?

³ El promesa que hay considera kita ahora amo un verdad que quierre-quierre gayot el maga siervo del Dios na entero mundo. (Le con el Revelacion 21:3, 4.) Ya promete si Jehova que llega el tiempo, “nunca mas ay tene muerte, ni dolor, ni tristeza.” Manada kanaton el ta usa con este bonito texto na Biblia si ta predica con otro acerca na vida na Paraiso. Cosa el reaccion del cuanto gente si ta habla kita kanila acerca con este promesa? Posible habla sila, “Bale se pero dol imposible se sucede.”

4. (a) Cosa sabe si Jehova? (b) Puera que ya hace promesa si Jehova, cosa pa le ya hace?

⁴ Cuando ya guia si Jehova con apostol Juan para escribi con este promesa acerca na Paraiso, sabe si Jehova que hay habla kita con otro acerca con este esperanza si ta predica kanila acerca na mensaje del Reino. Sabe tambien le que man dificil creé el manada con este promesa de “maga nuevo cosas.” (Isa. 42:9; 60:2; 2 Cor. 4:3, 4) Entonces, paquemodo kita asigura con otro y con el diaton mismo cuerpo que deverasan gayot el maga bendicion que ya menciona na Revelacion 21:3, 4? Puera que ya dale kanaton si Jehova este bonito promesa, ya dale tambien le kanaton maga evidencia si porque kita puede confia con ese. Cosa se maga evidencia?

5. Cosa el maga evidencia que puede kita confia con el promesa del Dios acerca na Paraiso y onde kita puede incuntra con ese?

⁵ Puede kita incuntra maga evidencia que puede kita confia con el promesa de Jehova acerca na Paraiso na maga siguiente versiculo. Alla puede kita le: “Ya habla conmigo Aquel sintao na trono: ‘Mira tu, ta hace yo nuevo todo el maga cosa-cosa.’ Y ya habla pa Le: ‘Escribi este: Deverasan y asigurao el cosa-cosa yo ta conversa.’ Ya habla tamen Ele conmigo: ‘Ya acaba ya. Yo amo el Alfa y el Omega, el Principio y el Fin.’”​—Rev. 21:5, 6a.

6. Porque el maga palabra na Revelacion 21:5, 6 ta hace fuerte con el diaton confianza na promesa del Dios?

⁶ Porque este maga palabra ta hace fuerte con el diaton confianza na promesa del Dios? Acerca na este maga versiculo, el libro Revelation Climax ta habla: “Dol aquel si Jehova mismo el ya firma con el garantia para asigura con el maga gente que hay cumpli le con el de suyu promesa.” b Puede le con el promesa del Dios na Revelacion 21:3, 4. Pero na versiculo 5 y 6, puede kita incuntra con el garantia que deverasan el promesa de Jehova que dol aquel ya firma le con ese. Ahora, examina kita con el maga palabra que ya usa si Jehova que ta dale kanaton garantia.

7. Quien yan cuento na versiculo 5 y porque este un importante detalle?

⁷ El versiculo 5 ya principia na maga palabra: “Ya habla conmigo Aquel sintao na trono.” (Rev. 21:5a) Este el primero na tres ocasion na libro de Revelacion donde si Jehova mismo el ta converza. Poreso, el ya dale con este garantia gendeh un poderoso angel o si Jesus, sino si Jehova mismo! Este detalle ta dale prueba que puede gayot kita confia con el cosa le sunod ya habla. Porque? Cay si Jehova “gendeh ta habla imbusterias.” (Tito 1:2) Entonces, puede gayot kita confia que hay sucede el cosa ya habla na Revelacion 21:5, 6.

8. Paquemodo ya hace claro si Jehova que hay sucede gayot el de suyu promesa? (Isaias 46:10)

⁸ Considera kita sunod con el maga palabra “Mira tu.” (Rev. 21:5) Manada beses ya usa con el Griego palabra que yan translate “mira tu” na libro de Revelacion. Ya habla el un referencia que ya usa con este expresion como “un manera para habla con el quien ta le que pone atencion na cosa sunod hay habla.” Cosa sunod ya habla el Dios? Ele ya habla: “Ta hace yo nuevo todo el maga cosa-cosa.” Deverasan, para na futuro pa este maga cambio. Pero para con Jehova, asigurao gayot sucede este maga promesa poreso ta converza le na manera que dol ta sucede ya este maga cambio.​—Le con el Isaias 46:10. c

9. (a) Na cosa dos actividad de Jehova ta refiri el frase “ta hace yo nuevo todo el maga cosa-cosa”? (b) Cosa hay sucede con el presente “cielo” y “mundo”?

⁹ Examina kita con el sunod frase que puede incuntra na Revelacion 21:5: “Ta hace yo nuevo todo el maga cosa-cosa.” Na este capitulo na Biblia, ese frase ta refiri na dos actividad que hay hace si Jehova​—replaza y restora. Una, cosa replaza si Jehova? Na Revelacion 21:1, puede kita le este: “El primer cielo y el primer mundo ya desaparece ya.” “El primer cielo” ta refiri con el maga gobierno del gente que bajo na influencia de Satanas y de suyu maga demonio. (Mat. 4:8, 9; 1 Juan 5:19) Na Biblia, el “mundo” puede refiri con el maga quien ta queda na tierra. (Gen. 11:1; Sal. 96:1) Entonces, “el primer mundo” ta refiri con el maga mal gente na diaton tiempo ahora. Gendeh lang basta compone si Jehova con el “cielo” y “mundo” que ta existi ahora; sino, hay destroza le y cambia con este completamente. Hay replaza le con el presente cielo y presente tierra con “un nuevo cielo y un nuevo mundo”​—quierre decir que un nuevo gobierno el rula na maga recto gente.

10. Cosa hace nuevo si Jehova?

¹⁰ Na Revelacion 21:5, puede kita sunod le si cosa ya habla si Jehova acerca na maga cosas que hay hace le nuevo. Nota que nuay habla si Jehova: “Ta hace yo maga nuevo cosas.” Sino, ya habla le: “Ta hace yo nuevo todo el maga cosa-cosa.” Hay hace nuevo si Jehova con el tierra y con el maga gente por medio que hace bira kanila na diila perfecto condicion. Como cosa ya predicta si Isaias, el entero tierra hay queda un bonito lugar que igual na jardin de Eden. El cada uno kanaton hay queda tambien nuevo o experiencia restoracion. Hay cura con el maga piang, bulak y apa, y maskin el maga muerto hay vivi otravez.​—Isa. 25:8; 35:1-7.

11. Cosa mandato y razon ya dale si Jehova con Juan?

¹¹ Cosa garantia pa ya dale el Dios? Si Jehova ya habla con Juan: “Escribi este: Deverasan y asigurao el cosa-cosa yo ta conversa.” (Rev. 21:5) Puera que ya manda si Jehova con Juan que “escribi,” ya habla tambien le si cosa el razon. Ya habla le: “Deverasan y asigurao el cosa-cosa yo ta conversa”​—quierre decir, puede confia con el maga palabra del Dios. Bueno ya lang, ya obedece si Juan con el mandato que “escribi.” Como resulta, ta puede kita le acerca na promesa del Dios acerca na Paraiso y ta puede kita medita con el maga bonito bendicion na futuro.

12. Porque puede habla si Jehova: “Ya acaba ya”?

¹² Cosa sunod ya habla el Dios? “Ya acaba  ya!” (Rev. 21:6) Ta converza si Jehova na manera que dol ya sucede ya el todo maga cosas que ya promete le acerca na Paraiso. Y justo lang se ciendo nuay maskin cosa el puede sangga con ele para cumpli con el de suyu proposito. Ya dale pa kanaton si Jehova otro garantia que hay sucede gayot el cosa le ya promete. Cosa le sunod ya habla?

13. Porque ya habla si Jehova: “Yo amo el Alfa y el Omega”?

¹³ Como ya menciona enante, tres beses ya converza si Jehova con Juan por medio na vision. (Rev. 1:8; 21:5, 6; 22:13) Na cada uno de ese maga ocasion, si Jehova ya habla: “Yo amo el Alfa y el Omega.” El alfa amo el primer letra na Griego alfabeto y omega el ultimo letra. Cuando ya habla si Jehova que ele “el Alfa y el Omega,” ta hace le claro kanaton que si ya principia ya le hace con el un cosa, hay hace le con ese acaba.

14. (a) Dale un ejemplo si cuando si Jehova dol ya habla “Alfa” y si cuando le dol hay habla “Omega.” (b) Cosa garantia kita puede mira na Genesis 2:1-3?

¹⁴ Despues crea si Jehova con Adan y Eva, ya habla Le si cosa el de suyu original proposito para na maga gente y para na tierra. El Biblia ta habla: “El Dios ya bendici kanila y ya habla: ‘Tene ustedes maga anak y queda manada, llena con el tierra y domina con este.’” (Gen. 1:28) Na aquel tiempo, dol ya habla si Jehova “Alfa.” Claro le ya habla si cosa el de suyu proposito: Llega el tiempo, el maga perfecto y obediente descendiente de Adan y Eva hay llena con el tierra y hace con este un paraiso. Si hay llega ya ese tiempo, dol hay habla si Jehova “Omega.” Despues acaba crea con “el cielo y el tierra y el todo cosas que tiene este,” ya dale si Jehova un garantia. Puede  con este mira na Genesis 2:1-3. d (Le.) Ya habla si Jehova que sagrao el ika-siete dia. Quierre decir, ya iscuji le con el ika-siete dia para cumpli con el de suyu proposito para na maga gente y para na tierra. Poreso cuando ya habla le que sagrao el ika-siete dia, dol ta habla le que hay cumpli completamente el de suyu proposito na fin del ika-siete dia.

15. Porque ta sale que ya puede sangga si Satanas con el proposito del Dios para na maga gente?

¹⁵ Despues man rebelde si Adan y Eva, ya queda sila imperfecto y ya hace pasa culpa y muerte na diila maga anak. (Roma 5:12) Como resulta, dol ya puede sangga si Satanas con el proposito del Dios que llena con el tierra de maga perfecto y obediente gente. Ta sale que dol gendeh puede habla si Jehova “Omega.” Posible ya pensa si Satanas que gendeh mas puede cumpli si Jehova con el de suyu proposito. Baka ya pensa tambien si Satanas que hay mata si Jehova con Adan y Eva y despues crea ya lang otro perfecto maridable para cumpli con el De Suyu proposito para na maga gente. Pero si hace se el Dios, puede con ele acusa el Diablo que imbustero le. Porque? Cay asegun na Genesis 1:28, ya habla si Jehova con Adan y Eva que el diila maga anak el llena con el tierra.

16. Porque posible ya pensa si Satanas que puede le acusa que ya falla si Jehova?

¹⁶ Cosa pa posible otro ya pensa si Satanas que hay hace el Dios? Posible ya pensa si Satanas que hay permiti si Jehova con Adan y Eva que tene maga anak que nunca queda perfecto. (Ecl. 7:20; Roma 3:23) Si hace se si Jehova, asigurao hay acusa con ele el Diablo que ya falla le. Porque? Cay gendeh cumpli el proposito del Dios que el maga perfecto y obediente anak de Adan y Eva el llena con el Paraiso tierra.

17. Paquemodo ya solva si Jehova con el rebellon de Satanas y del primer maridable y cosa el resulta na uliji? (Mira tambien con el letrato.)

¹⁷ Ya solva si Jehova con el rebellon de Satanas y del primer maridable na manera que asigurao nuay gayot expecta si Satanas. (Sal. 92:5) Ya permiti si Jehova que tene maga anak kanda Adan y Eva, y ya dale se prueba que gendeh Le imbustero. Ya dale prueba si  Jehova que si hay habla le con el un cosa, nuay maskin cosa el puede sangga con ele. Y para asigura que hay sucede el de suyu proposito, ya produci le un “descendiente” quien hay salva con el maga obediente anak de Adan y Eva. (Gen. 3:15; 22:18) Asigurao que nuay gayot puede pensa si Satanas que hay dale rescate si Jehova para salva con el maga gente! Porque? Cay base na amor el rescate. (Mat. 20:28; Juan 3:16) Nuay gayot ese calidad si Satanas! Poreso, cosa hay sucede por causa na rescate? Na fin del Milenio, el maga perfecto y obediente descendiente de Adan y Eva hay queda na un paraiso tierra, como el original proposito de Jehova. Na ese tiempo, dol puede habla si Jehova “Omega.”

18. Cosa el tres garantia que ya dale kanaton el Dios? (Mira tambien con el cajon “ Tres Razon Para Confia con el Promesa de Jehova.”)

¹⁸ Base na cosa kita ya considera, cosa kita habla con otro para asigura kanila que hay sucede gayot el promesa del Dios acerca na Paraiso? Una, si Jehova mismo el ya promete. El libro de Revelacion ya habla: “Ya habla conmigo Aquel sintao na trono: ‘Mira tu, ta hace yo nuevo todo el maga cosa-cosa.’” Tiene le el sabeduria, poder y deseo para cumpli con el de suyu promesa. Ika-dos, bien asigurao que cumpli ese promesa poreso na mirada de Jehova, ya sucede ya se. Poreso ele ya habla: “Deverasan y asigurao el cosa-cosa yo ta conversa. . . . Ya acaba ya!” Ika-tres, si principia si Jehova hace con el un cosa, hay hace gayot le acaba con ese. Poreso ya habla le: “Yo amo el Alfa y el Omega.” Hay dale prueba si Jehova que imbustero si Satanas y gendeh le puede sangga con Jehova para cumpli con el De Suyu proposito.

 19. Si tan duda el maga gente acerca na Paraiso que ya promete el Dios, cosa tu puede hace?

¹⁹ Acorda este: Cada vez ta habla tu con otro na ministerio acerca na garantia que ya dale el Dios, ta hace tu mismo fuerte con el de tuyu confianza na maga promesa de Jehova. Si puede tu le otravez con el bonito promesa acerca na Paraiso que ya menciona na Revelacion 21:4 y tiene quien habla, “Bale se pero dol imposible se sucede,” cosa tu hace? Porque gendeh le y explica con el versiculo 5 y 6? Dale mira si paquemodo si Jehova ya dale garantia que sucede gayot el de suyu promesa que dol ele mismo el ya firma con ese.​—Isa. 65:16.