1-2. (a) Cosa el semejante na diaton situacion y na situacion del maga Judio quien ya bira na Jerusalem? (b) Menciona con el cuanto dificultad del maga Judio. (Mira con el cajon “ El Tiempo de Haggeo, Zacarias y Esdras.”)

 TAN lingasa ba tu tiene vez acerca na futuro? Posible ya queda tu nuay trabajo y tan lingasa tu si paquemodo mantene con el de tuyu familia. Posible ta pensa tu acerca el seguridad del de tuyu familia por causa na gulu na politica, persecucion o oposicion na trabajo predicacion. Ta enfrenta ba tu uno na este maga problema? Si ansina, puede gayot tu beneficia si considera tu si paquemodo si Jehova ya ayuda con el maga Israelita quien ya enfrenta maga semejante problema.

² Necesita fe el maga Judio quien ta queda na Babilonia para deja con el diila comfortable vida y viaja na un nacion que mayoria kanila gendeh familiar. Nuay lang dura cuando ya llega sila alla, ya queda sila afectao por causa na maga problema na economia y politica, y na maga oposicion. Por causa con ese, tan dificil el cuanto que man focus na construida del templo de Jehova. Poreso, del maga 520 B.C.E., ya imbia si Jehova dos profeta​—con Haggeo y Zacarias​—para ayuda con el maga gente que queda activo otravez na trabajo de Jehova. (Hag. 1:1; Zac. 1:1) Como cosa kita hay mira, el cosa ya hace este maga profeta ya tene gayot buen resulta. Pero cerca 50 año despues, yan luya otravez el maga Judio. Poreso si Esdras, un experto na copiada del Ley, ya anda na Jerusalem estaba na Babilonia para anima con el maga siervo del Dios que hace prioridad con el verdadero adoranza.​—Esd. 7:1, 6.

3. Cosa maga pregunta kita hay considera? (Proverbio 22:19)

³ Igual si paquemodo el maga profecia de Haggeo y Zacarias ya puede ayuda con el maga siervo del Dios de antes para continua  confia con Jehova durante el oposicion, puede tambien se ayuda kanaton ahora para continua confia na suporta de Jehova maskin pa na maga dificultad que ta enfrenta kita. (Le con el Proverbio 22:19. b) Mientras hay considera kita con el mensaje del Dios que ya dale kanda Haggeo y Zacarias y examina con el ejemplo de Esdras, hay contesta kita con este maga pregunta: Paquemodo ya afecta con el maga Judio el maga dificultad que ya experiencia sila? Porque kita debe continua man focus na hacida del voluntad del Dios durante el maga dificil tiempo? Y paquemodo kita puede hace fuerte con el diaton confianza con Jehova durante el tiempo de dificultad?

4-5. Porque posible yan luya el maga Judio na construida del templo?

⁴ Cuando ya bira na Jerusalem el maga Judio, manada sila trabajo para hace. Dayun sila ya construi otravez con el altar de Jehova y ya planta el fundacion del templo. (Esd. 3:1-3, 10) Pero nuay dura yan luya sila. Porque? Puera con el construida del templo, necesita sila construi con el diila mismo casa, siembra y dale come con el diila maga familia. (Esd. 2:68, 70) Mas pa, ta enfrenta sila maga oposicion estaba na diila maga enemigo quien ta plaña que hace descanza con el construida.​—Esd. 4:1-5.

⁵ Ya queda tambien sila afectao por causa na problema na economia y politica. El diila nacion parte ya ahora na Imperio del Persia. Despues muri el rey de Persia que si Ciro del 530 B.C.E., el quien ya releva con ele que si Cambyses quierre ataca con el Egipto. Mientras ta viaja para na Egipto, posible que el de suyu maga soldao ya manda con el maga Israelita que dale kanila comida, agua y lugar onde esta. Y como resulta, ya causa se mas dificultad con el maga siervo del Dios. Cuando ya principia rula el sunod rey que si Dario I, manada siempre el problema, igual na maga rebellon y gulu na imperio del Persia. Este todo ya causa con el manada Judio para man lingasa si paquemodo sila puede mantene con el diila familia. Por causa con este maga dificultad, el cuanto maga Judio ya pensa que gendeh pa este el justo tiempo para construi otravez con el templo de Jehova.​—Hag. 1:2.

6. Cosa maga dificultad ya enfrenta el maga Judio y cosa ya asigura kanila si Zacarias? (Zacarias 4:6, 7)

⁶ Le con el Zacarias 4:6, 7. c Puera na problema na economia y gulu na politica, ta enfrenta tambien persecucion el maga Judio. Del 522 B.C.E., ya puede hace manera el diila maga enemigo para prohibi con el construida del templo de Jehova. Pero ya asigura si Zacarias con el maga Judio que hay usa si Jehova con el De Suyu poderoso espiritu para quita con el maskin cosa sanggadura. Del 520 B.C.E., ya permiti kanila si Rey Dario para continua construi con el templo y ya suporta kanila na financial. Puera con ese, ya manda tambien le con el maga gobernador que ayuda kanila.​—Esd. 6:1, 6-10.

7. Cuando ya hace prioridad el maga Judio con el hacida del voluntad del Dios, cosa maga bendicion sila ya ricibi?

 ⁷ Por medio con Haggeo y Zacarias, ya promete si Jehova con el de suyu maga siervo que hay suporta le kanila si hace sila prioridad con el construida del templo. (Hag. 1:8, 13, 14; Zac. 1:3, 16) Por causa na cosa ya habla el maga profeta, ya continua el maga Judio na construida del templo del 520 B.C.E. y ya completa con este nuay pa llega cinco año. Cay ya hace sila prioridad con el hacida del voluntad del Dios maskin  pa na maga dificultad, ya ricibi sila el suporta de Jehova gendeh lang na material sino pati na espiritual. Como resulta, ya adora sila con Jehova con alegria.​—Esd. 6:14-16, 22.

8. Paquemodo el maga palabra na Haggeo 2:4 puede ayuda kanaton para continua man focus na hacida del voluntad del Dios? (Mira tambien con el footnote.)

⁸ Mientras ta queda cerca el grande tribulacion, sabe kita que bien importante que obedece con el mandamiento que participa na trabajo predicacion. (Mar. 13:10) Pero, posible tan dificil kita man focus na diaton ministerio por causa na problema na financial o si ta enfrenta kita oposicion na diaton trabajo predicacion. Cosa puede ayuda kanaton para hace una con el interes del Reino? Confia que junto kanaton “si Jehova de maga soldao.” d Hay suporta le kanaton si continua kita hace una con el Reino en vez con el diaton mismo interes. Poreso, gendeh kita debe tene miedo.​—Le con el Haggeo 2:4. e

9-10. Paquemodo ya experiencia el un man maridable que deverasan el maga palabra de Jesus na Mateo 6:33?

⁹ Considera con el ejemplo de Oleg y Irina, f un man maridable quien ta sirvi como maga pioneer. Despues sila cambia na otro lugar para asisti na un congregacion, ya queda sila nuay trabajo por causa na problema na economia na diila nacion. Maskin pa cerca un año sila nuay pijo trabajo, pirmi sila ta sinti el amable suporta de Jehova y el ayuda estaba na maga hermano y hermana. Paquemodo sila ya enfrenta con el maga dificultad? Si Oleg, quien yan depress del una, ya habla, “Cay ya esta kame ocupao na ministerio, ya ayuda se kanamon para man focus na  cosa que mas importante.” Mientras ta continua busca trabajo, sila man maridable ya esta focus na diila ministerio.

¹⁰ Un dia cuando ya bolbe sila estaba na ministerio, ya puede sila sabe que el diila amigo ya viaja maga 160 kilometro para lleva kanila dos bag de grocery. Si Oleg ya habla: “Aquel dia, ya puede kame otravez sinti si paquemodo ta ama kanamon si Jehova y el congregacion. Convincido kame que nunca ulvida si Jehova con el de suyu maga siervo maskin pa dol nuay mas esperanza el diila situacion.”​—Mat. 6:33.

11. Cosa kita puede expecta si continua kita man focus na hacida del voluntad del Dios?

¹¹ Quierre si Jehova que man focus kita na trabajo que ta salva vida​—el hacida de dicipulo. Como ya menciona na  parapo 7, ya anima si Haggeo con el maga siervo de Jehova que construi otravez con el templo. Si hace sila se, ya promete si Jehova que ‘bendici le kanila.’ (Hag. 2:18, 19) Puede tambien kita asigura que hay bendici si Jehova con el diaton maga esfuerzo si hace kita prioridad con el trabajo que ya manda le kanaton.

12. Porque necesita fuerte fe si Esdras y el de suyu maga uban Judio?

¹² Del 468 B.C.E., ya viaja si Esdras junto con el segundo grupo de maga Judio estaba na Babilonia para na Jerusalem. Necesita sila fuerte fe para hace con ese viaje. Hay viaja sila na maga peligroso camino cargando el bien manada oro y plata que ya dona para na templo. Por causa con ese, posible kanila ataca el maga ladron. (Esd. 7:12-16; 8:31) Omento pa, gendeh protegido el Jerusalem. Poco lang el ta queda na ciudad y necesita pa compone con el maga pader y maga grande puerta de este. Cosa kita puede aprende con Esdras que puede ayuda kanaton para hace mas fuerte el diaton confianza con Jehova?

13. Paquemodo ya hace fuerte si Esdras con el de suyu confianza con Jehova? (Mira tambien con el footnote.)

¹³ Ya puede mira si Esdras si paquemodo si Jehova ya suporta con el De Suyu maga siervo na tiempo de dificultad. Del 484 B.C.E., posible talla na Babilonia si Esdras cuando ya hace pasa un mandato si Rey Asuero que mata con el todo Judio na entero Imperio del Persia. (Est. 3:7, 13-15) Na peligro si Esdras! Por causa con ese amenazo, yan ayuno y ya queda dolorido el maga Judio “na cada provincia” mientras ta pidi el guia de Jehova na rezo. (Est. 4:3) Imagina si cosa ya sinti si Esdras y el de suyu maga uban Judio cuando ya salva sila desde na mal plano del diila maga enemigo! (Est. 9:1, 2) El cosa ya experiencia si Esdras durante na aquel dificil tiempo posible ya prepara con ele para enfrenta con el maga probanza na futuro y asigurao ya hace quel fuerte con el de suyu confianza na abilidad de Jehova para protege con el De Suyu maga siervo. g

14. Cosa leccion ya aprende el un hermana cuando ya experiencia le el cuidada de Jehova durante el maga dificil tiempo?

¹⁴ Si ta experiencia kita el cuidada de Jehova durante na maga dificil tiempo, mas ta queda fuerte el diaton confianza con ele. Considera con el ejemplo de Anastasia, quien ta queda na Eastern Europe. Ya sale le na trabajo para mentena el de suyu neutralidad. Ele ya habla: “Nunca pa yo guinda na un situacion que ya queda yo nuay sen.” Despues ya continua le: “Ya deja yo el de mio lingasa con Jehova y ya mira si paquemodo le ya cuida conmigo. Si queda man yo nuay trabajo otravez, gendeh mas yo hay tene miedo. Si ta cuida conmigo ahora el de mio Tata na cielo, hay cuida tambien le conmigo mañana.”

15. Cosa ya ayuda con Esdras para mentena el de suyu confianza con Jehova? (Esdras 7:27, 28)

 ¹⁵ Ya puede mira si Esdras si paquemodo con ele ta ayuda si Jehova. Si ta pensa si Esdras con el maga tiempo que ya ayuda con ele si Jehova, asigurao ya ayuda quel con ele para mentena el de suyu confianza con Jehova. Nota con el expresion “ya ayuda conmigo si Jehova, el de mio Dios.” (Le con el Esdras 7:27, 28. h) Ya usa si Esdras seis beses con ese maga semejante palabra na libro que ya escribi le.​—Esd. 7:6, 9; 8:18, 22, 31.

16. Na cosa maga situacion kita mas claro puede mira el ayuda de Jehova? (Mira tambien con el letrato.)

¹⁶ Si Jehova puede ayuda kanaton si ta enfrenta kita probanza. Por ejemplo, si ta pidi kita day off na diaton amo para puede kita atende asemblea o si ta pidi kita que man adjust con el diaton schedule para puede atende na diaton maga miting, tiene kita el oportunidad para mira si paquemodo kanaton ta ayuda si Jehova. Posible kita espanta na buen resulta si hace kita se. El diaton confianza con Jehova hay queda mas fuerte.

17. Paquemodo ya dale mira humildad si Esdras durante el maga dificil tiempo? (Mira con el letrato na cover.)

¹⁷ Humilde si Esdras ya pidi ayuda con Jehova. Cada vez le ta sinti lingasa acerca na maga cosas que necesita le hace, humilde si Esdras ta pidi ayuda con Jehova na rezo. (Esd. 8:21-23; 9:3-5) Cay ya confia le con Jehova, ya manda se move con otro para suporta con ele y imita con el de suyu fe. (Esd. 10:1-4) Si tan lingasa kita acerca na diaton maga material necesidad o acerca na seguridad del diaton familia, debe kita pidi ayuda con Jehova na rezo.

18. Cosa puede ayuda para queda mas fuerte el diaton confianza con Jehova?

¹⁸ Si humilde kita pidi el ayuda de Jehova y acepta el suporta del diaton maga hermano y hermana, mas queda fuerte el diaton confianza con Dios. Si Erika, un nana quien tiene tres anak, ya mentena con el de suyu confianza con Jehova maskin pa na grabe tragedia que ya sucede con ele. Adentro lang del corto tiempo, ya muri el de suyu anak que nuay pa nace y el de suyu marido. Acerca na cosa ya sucede, ele ya habla: “No sabe tu si paquemodo contigo ayuda si Jehova y puede se llega na manera que gendeh tu ta expecta. Ya puede yo mira que ya contesta con el manada del de mio maga rezo por medio na maga palabra y accion del de mio maga amigo y amiga. Si habla yo el de mio  maga lingasa kanila, mas facil sila puede ayuda conmigo.”

19-20. Cosa kita puede aprende na maga Judio quien nuay puede bira na Jerusalem?

¹⁹ Puede tambien kita aprende un bonito leccion na maga Judio quien nuay puede bira na Jerusalem. El cuanto kanila posible limitao el cosa puede hace por causa na vejez, problema na salud o maga obligacion na familia. Maskin pa ansina, con todo corazon sila ya suporta con aquellos quien ya bira por medio na diila maga contribucion. (Esd. 1:5, 6) Ta sale que maga 19 año despues llega el primer grupo de maga Judio na Jerusalem, aquellos quien ya esta na Babilonia ta imbia siempre maga contribucion na Jerusalem.​—Zac. 6:10.

²⁰ Maskin limitao el cosa kita puede hace na servicio con Dios, puede kita asigura que ta aprecia si Jehova con el diaton con todo corazon esfuerzo para hace alegre con ele. Porque se kita puede habla? Na tiempo de Zacarias, ya pidi si Jehova con el De Suyu profeta que hace un corona estaba na oro y plata que ya imbia aquellos ya esta na Babilonia. (Zac. 6:11) Este “corona” hay sirvi como un “recuerdo” del diila pagka-bondadoso. (Zac. 6:14) Puede kita confia que nunca ulvida si Jehova con el diaton maga con todo corazon esfuerzo para sirvi con ele durante el maga dificil tiempo.​—Heb. 6:10.

21. Cosa hay ayuda kanaton para enfrenta con confianza con el futuro?

²¹ Asigurao hay continua kita enfrenta maga dificultad na este ultimo maga dia y posible hay queda mas grabe el condicion na futuro. (2 Tim. 3:1, 13) Pero, gendeh kita debe sobra man lingasa. Acorda con el cosa ya habla si Jehova na de suyu maga siervo na tiempo de Haggeo: “Junto yo con ustedes . . . No tene miedo.” (Hag. 2:4, 5) Puede tambien kita asigura que esta junto kanaton si Jehova si hace kita el todo para hace el de suyu voluntad. Si aplica kita con el cosa kita ya aprende na maga profecia de Haggeo y Zacarias y na ejemplo de Esdras, hay continua kita confia con Jehova maskin cosa man dificultad el posible kita experiencia na futuro.