SI YA visita tu con el diutay isla de Sangir Besar na Indonesia cuanto año ya el ya pasa, posible ya puede tu mira diaton tres hermana na aplaya. Conocido kanila na isla por causa na diila ministerio—ta ayuda sila con el maga gente entende con el Biblia. Pero na este ocasion, tiene sila otro trabajo ta hace.

Una, ta anda sila na mar, ta busca maga grande piedra y ta carga con este para na aplaya. El cuanto del maga piedra igual na grandor del bola de soccer. Sunod, ta sinta el maga mujer na maga banquito y ta usa martillo para machaca con el maga piedra para queda mas diutay pa na grandor del huevos de manok. Acabar, ta pone sila con el diila maga diutay piedra na diila maga balde y ta carga con este pa-arriba onde sila ta queda. Despues, ta pone sila con el maga piedra na maga grande saco que puede lleva el maga truck y usa na construida del maga calzada.

Uno de este maga hermana amo si Hulda. Por causa na de suyu circumstancia, mas grande tiempo le ta puede dale na este trabajo contra con otro. Ta usa le con el sen para na necesidad del de suyu familia. Pero ahora, quierre le ajunta sen para usa na otro cosa. Quierre le cumpra un electronic tablet para puede le man access con el JW Library^® app. Sabe si Hulda que el maga video y el otro material na app hay ayuda con ele na de suyu ministerio y para mas entende con el Biblia.

Ta trabaja si Hulda dos hora cada aga adentro del un mes y media. Ta machaca le maga piedra para llena con el diutay truck. Na uliji, ya tiene le bastante sen para cumpra con el tablet.

“Maskin pa bien cansao yo cay pirmi yo ta machaca piedra,” ya habla si Hulda, “ya ulvida yo dayun con el de mio maga dolencia cuando ya puede ya yo usa con el de mio nuevo tablet para ayuda conmigo queda mas efectivo na ministerio y para mas facil iyo prepara na maga miting.” Ya habla tambien le que el tablet bien grande ayuda con ele durante el tiempo del pandemic ciendo el todo maga actividad del congregacion ta hace online. Alegre kita cay ya puede si Hulda alcanza con el de suyu goal.