1. Cosa kita puede aprende na maga de edad?

 TODO kita necesita guia para puede hace maga justo decision. Y manada de ese puede kita saca na maga anciano y otro mature Cristiano. Si mas de edad sila que kanaton, gendeh kita debe pensa que de antes pa el diila maga consejo. Quierre si Jehova que aprende kita na maga de edad. Ya dura ya sila aqui na tierra poreso mas experienciao sila, mas sabio y tiene mas entendimiento.—Job 12:12.

2. Cosa kita hay discuti na este articulo?

² Na tiempo del Biblia, ya usa si Jehova con el maga fiel de edad hombre para anima y guia con el de suyu maga siervo. Considera por ejemplo con Moises, David y apostol Juan. Ya vivi sila na diferente tiempo y otro-otro el diila circumstancia. Cuando cerca ya sila muri, ya dale sila maga buen consejo na maga mas joven kanila. Este maga fiel de edad hombre ya hace claro que bien importante que queda obediente con Dios. Ya preserva si Jehova con el diila maga palabra para kanaton ahora. Joven man kita o de edad, puede kita beneficia si man repaso kita con el diila consejo. (Roma 15:4; 2 Tim. 3:16) Na este articulo, hay considera kita si cosa ya habla este tres de edad hombre y el maga leccion que puede kita aprende con ese.

“PUEDE USTEDES QUEDA POR LARGO TIEMPO NA TIERRA”

3. Cosa maga assignment ya dale si Jehova con Moises?

³ Ya sirvi si Moises con Jehova na de suyu entero vida. Ya sirvi le como un profeta, juez, comandante y escritor. Manada cosa ya experiencia si Moises. Ya usa con ele si Jehova para libra con el Israel na pagka-esclavo na Egipto y personal le ya  mira con el manada milagro de Jehova. Ya usa con ele si Jehova para escribi con el primer cinco libro del Biblia, con el Salmo 90 y posible, pati el Salmo 91. Posible, ele tambien el quien ya escribi con el libro de Job.

4. Con quien ya anima si Moises y porque?

⁴ Corto tiempo antes le muri, na edad de 120, yan cuento si Moises adelante del maga Israelita y ya hace acorda kanila el maga cosas que ya puede sila mira y ya experiencia. Manada año ya el ya pasa, ya puede mira el cuanto Israelita con el maga milagro que ya hace si Jehova y si paquemodo le ya castiga con el maga Egipcio. (Ex. 7:3, 4) Ya puede sila travesa na Colorao Mar y ya mira sila que ya destroza con el maga soldao del Faraon. (Ex. 14:29-31) Cuando na desierto sila, ya experiencia sila si paquemodo si Jehova ya protege y ya cuida kanila. (Deut. 8:3, 4) Cerca ya entra na Tierra Prometido el maga Israelita. Poreso antes muri si Moises, ya anima le kanila. a

5. Cosa asiguranza ya dale con el maga Israelita el maga palabra de Moises na Deuteronomio 30:19, 20?

⁵ Cosa ya habla si Moises? (Le con el Deuteronomio 30:19, 20.) Bien bonito el vida que ya promete si Jehova para con el nacion de Israel. Puede sila vivi por largo tiempo na lugar que hay dale le kanila. Y bien bonito y productivo ese tierra. Si Moises ya habla que puede incuntra alla ‘maga grande y bonito ciudad que nuay sila planta, maga casa que lleno de maga buen cosas que nuay sila cansa hace, maga lugar onde ta hace pondo agua que nuay sila grevata y maga pono de uvas y olivo que nuay sila siembra.’—Deut. 6:10, 11.

6. Porque ya permiti el Dios que perde el Israel na otro maga nacion?

⁶ Ya dale tambien un aviso si Moises con el maga Israelita. Para puede sila continua esta na diila bonito tierra, necesita sila obedece con el maga mandamiento de Jehova. Ya anima kanila si Moises que “iscuji con el vida” y puede se sila hace si oi sila con Jehova y si “esta [sila] fiel con ele.” Pero, nuay se sila hace. Poreso na uliji, ya permiti el Dios con el maga Asiriano y despues con el maga de Babilonia que ataca kanila y hace kanila cautivo.—2 Rey 17:6-8, 13, 14; 2 Cron. 36:15-17, 20.

7. Cosa kita puede aprende na cosa ya habla si Moises? (Mira tambien con el letrato.)

⁷ Cosa el leccion para kanaton ahora? Si obedece kita, hay salva kita. Igual con el maga Israelita quien cerca ya entra na Tierra Prometido, cerca ya tambien kita entra na nuevo mundo del Dios. Gendeh dura, hay queda otravez paraiso el tierra. (Isa. 35:1; Luc. 23:43) Hay perde ya el Diablo y el de suyu maga demonio. (Rev. 20:2, 3) Nuay mas falso religion quien enseña imbusterias acerca con Jehova. (Rev. 17:16) Nuay mas gobierno quien maltrata con el maga gente. (Rev. 19:19, 20) Nuay maskin quien rebelde el puede esta na paraiso. (Sal. 37:10, 11) El todo maga gente hay obedece con el maga ley de Jehova poreso tiene ya unidad y paz. El maga gente alla hay ama y confia con uno y otro. (Isa. 11:9) Bien bonito gayot ese esperanza! Gane, si obedece kita con Jehova, gendeh lang kita vivi na paraiso tierra por cuanto año sino hasta para cuando.—Sal. 37:29; Juan 3:16.

8. Paquemodo el promesa de vida hasta para cuando ya puede ayuda con el un misionario? (San Judas 20, 21)

 ⁸ Si pirmi kita pensa con el promesa del Dios de vida hasta para cuando, hay ayuda se kanaton para esta fiel con ele maskin cosa probanza man kita enfrenta. (Le con el San Judas 20, 21, El Nuevo Testamento.) Puede tambien se ayuda para resisti kita con el diaton mal inclinacion. El un hermano quien ya dura ya ta sirvi como un misionario na Africa y quien yan dificil resisti con el maga deseo de laman ya habla: “Cuando ya realiza yo que gendeh yo puede vivi hasta para cuando si continua este, ya queda yo mas determinao que resisti con este deseo de laman y suplica con Jehova. Na de suyu ayuda, ya puede yo resisti con este.”

“HAY TENE TU BUEN EXITO”

9. Cosa maga probanza ya experiencia si David?

⁹ Un buen rey si David. Puera con ese, un musiquero le, profeta, guerrero y ya hace maga poem. Ya experiencia tambien le manada probanza. Por manada año, necesita le esconde cay quierre con ele mata si Rey Saul. Despues le queda rey, ya escapa ya tambien le cay quierre con ele mata el de suyu anak que si Absalom para puede este saca con el de suyu posicion como rey. Maskin pa na manada dificultad que ya experiencia si David y na maga serioso culpa que ya comete le, ya puede le esta leal con Dios na de suyu entero vida. Gane ya habla si Jehova acerca con David: “Ya gusta gayot yo con ele.” Poreso, puede gayot ayuda kanaton el consejo de David.—Act. 13:22; 1 Rey 15:5.

10. Porque ya dale consejo si David con el de suyu anak que si Solomon?

¹⁰ Considera por ejemplo el consejo que ya dale si David con el de suyu anak que si Solomon antes este queda rey. Ya iscuji si Jehova con Solomon para construi un templo donde puede adora el maga gente con Dios. (1 Cron. 22:5) Maskin pa ansina, hay enfrenta maga dificultad si Solomon. Cosa con ele ya habla si David?

11. Asegun na 1 Rey 2:2, 3, cosa consejo ya dale si David con Solomon y cosa ya sucede cuando ya obedece si Solomon con ese? (Mira tambien con el letrato.)

¹¹ Cosa ya habla si David? (Le con el 1 Rey 2:2, 3.) Ya habla si David con el de suyu anak que si obedece le con Jehova, hay tene le buen exito. Por manada año, ese el cosa ya sucede con Solomon. (1 Cron. 29:23-25) Ya construi le un bien bonito templo y ya escribi cuanto libro na Biblia. Ya queda tambien le bien sabio y bien rico. (1 Rey 4:34) Pero como cosa ya habla si David, hay bendici lang con Solomon si obedece le con Dios Jehova. Maka-triste que cuando de edad ya si Solomon, ya adora le con el otro maga dios. Poreso, nuay mas con ele bendici si Jehova y nuay  mas ya tambien le el sabeduria que necesita le para rula con el maga gente na justo y amable manera.—1 Rey 11:9, 10; 12:4.

12. Cosa kita puede aprende na cosa ya habla si David?

¹² Cosa el leccion para kanaton ahora? Si obedece kita con Jehova, hay bendici le kanaton. (Sal. 1:1-3) Siempre, nuay promete si Jehova que hace le kanaton rico y prominente, igual na cosa le ya hace con Solomon. Pero si obedece kita con ele, hay dale le kanaton sabeduria para puede kita hace maga justo decision. (Prov. 2:6, 7; Sant. 1:5) El de suyu maga principio puede ayuda kanaton si ta hace maga decision acerca na trabajo, educacion, entretenimiento y sen. Si sigui kita con el de suyu consejo, puede kita mentena con el diaton buen relacion con ele y hay tene kita vida hasta para cuando. (Prov. 2:10, 11) Hay tene tambien kita maga deverasan amigo y amiga. Mas pa, hay tene kita alegre familia.

13. Cosa ya ayuda con Carmen para puede hace justo decision?

¹³ Ya pensa si Carmen, quien ta queda na Mozambique, que hay queda mas enbuenamente el de suyu vida si saca le alto educacion. Yan college le y ya saca architecture. “Ta gusta gayot yo con el cosa yo ta aprende,” ya escribi le. “Pero, necesita gayot quel grande tiempo y esfuerzo cay na escuela ya yo principia 7:30 del aga hasta 6:00 del noche. Tan dificil yo atende na maga miting y ya afecta se con el de mio espiritualidad. Sabe yo que ta sirvi yo na dos amo.” (Mat. 6:24) Ya reza le acerca na de suyu situacion y yan research na diaton maga publicacion. Mas pa, ya habla le: “Despues conmigo dale consejo el maga mature hermano y el de mio nana, ya decidi yo que descanza entra escuela para puede yo sirvi full-time con Jehova. Ya sinti yo que ya hace yo el de con todo buen decision na de mio vida y alegre gayot yo cay ya hace yo con ese.”

14. Cosa kita puede aprende na cosa ya habla si Moises y si David?

¹⁴ Ta ama si Moises y David con Jehova y sabe sila que bien importante que obedece con ele. Poreso, ya anima sila con otro que imita con el diila ejemplo y esta fiel con Jehova. Ya dale tambien sila aviso que aquellos  quien deja con Jehova gendeh mas tene el de suyu favor y bendicion. Aplicable kanaton el diila consejo. Cuanto siglo despues, ya menciona tambien el otro siervo de Jehova que bien importante que esta fiel con Dios.

“BIEN GRANDE EL DIMIO ALEGRIA”

15. Cosa ya puede experiencia si apostol Juan?

¹⁵ Si Juan amo un apostol y cerca amigo de Jesucristo. (Mat. 10:2; Juan 19:26) Ya sigui le con Jesus na de suyu ministerio, ya puede mira con el de suyu maga milagro y ya esta leal con ele maskin na maga dificultad. Talla le cuando ya muri si Jesus y ya puede le mira con Jesus despues con este resucita. Ya puede tambien le mira si paquemodo ya queda manada el maga Cristiano, principia na un diutay grupo hasta ya puede predica con el buen noticia na mas manada gente.—Col. 1:23.

16. Quien-quien el ya beneficia na maga carta de Juan?

¹⁶ Cuando bien de edad ya si Juan, ya tiene le el privilegio que escribi con el cuanto libro na Biblia. Ya escribi le con “el Revelacion que el Dios ya dale con Jesucristo.” (Rev. 1:1) Ya escribi tambien le con el uno del maga Evangelio. Mas pa, ya escribi le tres inspirao carta. Na de suyu ika-tres carta, ya escribi este ele para con Gayo, un fiel Cristiano con quien le ta ama como de suyu espiritual anak. (3 Juan 1) Durante ese tiempo, posible manada ya con quien ta trata si Juan como de suyu maga espiritual anak. El cosa ya escribi este fiel apostol ya puede gayot anima con el todo maga siguidores de Jesus hasta na diaton tiempo ahora.

17. Asegun na 3 San Juan 4, cosa ya dale grande alegria con apostol Juan?

¹⁷ Cosa ya escribi si Juan? (Le con el 3 San Juan 4.) Ya menciona si Juan que bien alegre le mira con el maga hermano y hermana que ta obedece con Dios. Cuando ya escribi le con el de suyu ika-tres carta, tiene ya cuanto persona quien ta hace calayat falso enseñanza y ta causa division na congregacion. Pero el otro ta continua “vivi comforme con el Verdad.” Ta obedece sila con Jehova y ta vivi ‘conforme con el de suyu maga mandamiento.’ (2 Juan 4, 6) Este maga fiel Cristiano ya hace alegre con Juan y con Jehova.—Prov. 27:11.

18. Cosa kita puede aprende na cosa ya habla si Juan?

¹⁸ Cosa el leccion para kanaton ahora? Si esta kita fiel, hay queda kita alegre y el otro. (1 Juan 5:3) Por ejemplo, alegre kita cay ta  puede kita hace alegre con Jehova. Alegre le si ta resisti kita con el maga tentacion y si ta obedece kita con el de suyu maga mandamiento. (Prov. 23:15) Alegre tambien el maga angel si ta hace kita se. (Luc. 15:10) Alegre tambien kita si ta esta fiel el maga hermano y hermana, maskin pa ta enfrenta sila maga probanza y tentacion. (2 Tes. 1:4) Y si na nuevo mundo ya kita, hay queda gayot kita alegre cay ya puede kita esta leal con Jehova.

19. Cosa ya sinti el un hermana acerca na privilegio que enseña con otro? (Mira tambien con el letrato.)

¹⁹ Ta queda gayot kita alegre si ta enseña kita el verdad con otro. Si Rachel, quien ta queda na Dominican Republic, ya sinti que un grande privilegio gayot que enseña con otro acerca con el diaton Dios. Ya puede le ayuda con el manada persona para guinda na verdad. Acerca kanila, ele ya habla: “Nuay yo onde puede compara con el alegria que ya sinti yo cay ya puede yo mira que ya queda mas hondo el diila amor con Jehova. Alegre tambien yo cay mas ya queda fuerte el diila confianza con ele y ya hace sila maga cambio para puede hace alegre con ele. Mas grande el de mio alegria contra na sacrificio que ya hace yo para enseña kanila.”

SIGUI CON EL CONSEJO DEL MAGA FIEL HOMBRE

20. Na cosa manera igual kita con kanda Moises, David y Juan?

²⁰ Bien diferente el circumstancia de Moises, David y Juan si compara kanaton. Maskin pa ansina, igual kita ta sirvi con el verdadero Dios. Ta reza tambien kita con Jehova, ta confia con ele y ta pidi de suyu guia. Y igual kanila, asigurao tambien kita que si obedece kita con Jehova, hay bendici le kanaton.

21. Cosa el resulta si sigui kita con el consejo de kanda Moises, David y Juan?

²¹ Ojala sigui kita con el consejo de Moises, David y Juan, y obedece con Jehova. Si hace kita se, hay tene kita buen exito na todo cosa kita hace. Hay vivi kita gendeh lang “por largo tiempo” sino hasta para cuando! (Deut. 30:20) Y alegre kita cay tiene kita buen relacion con el diaton amable Tata na cielo quien hay bendici kanaton mas pa na cosa kita ta puede imagina.—Ef. 3:20.