ARTICULO 46
CANCION 49 Hace Alegre con Jehova
Maga Hermano—Ta Hace Ba Ustedes Esfuerzo Para Queda Siervo Ministerial?
“Mas grande el alegria de aquel quien ta dale contra con el quien ta recivi.”—ACT. 20:35.
SI COSA PUEDE APRENDE
Para anima con el maga bautizao hermano que hace esfuerzo para queda cualificao sirvi como siervo ministerial.
1. Cosa ta sinti si apostol Pablo acerca na maga siervo ministerial?
MANADA maga importante trabajo ta hace el maga siervo ministerial na congregacion. Ya aprecia gayot si apostol Pablo con este maga leal hombre. Por ejemplo, cuando ya escribi le carta con el maga Cristiano na Filipo, especifico le ya menciona con el maga siervo ministerial y con el maga anciano.—Fil. 1:1.
2. Cosa ta sinti el un hermano que si Luis acerca na de suyu assignment como un siervo ministerial?
2 Joven man o de edad, manada bautizao hermano el alegre sirvi como siervo ministerial. Por ejemplo, 18 año pa lang si Devan cuando ya tiene le ese assignment. Pero si Luis ya tiene ese assignment cuando mas de 50 ya le. Igual na cosa ta sinti el manada hermano, si Luis ya habla, “Un privilegio gayot que sirvi como un siervo ministerial, especialmente si ta pensa yo si paquemodo de grande el amor que ya dale mira conmigo el congregacion!”
3. Cosa maga pregunta kita hay considera?
3 Si un bautizao hermano tu y gendeh pa tu siervo ministerial, puede ba tu hace con ese como de tuyu goal? Cosa posible motiva contigo para hace se? Y cosa maga cualificacion que base na Biblia el necesita tu alcanza? Na este articulo, hay contesta kita con ese maga pregunta. Pero una, considera anay kita si cosa el papel del un siervo ministerial.
COSA EL PAPEL DEL UN SIERVO MINISTERIAL?
4. Cosa el papel del un siervo ministerial? (Mira tambien con el letrato.)
4 El un siervo ministerial amo un bautizao hermano con quien ya iscuji el sagrao espiritu para ayuda con el maga anciano hace con el maga importante trabajo na congregacion. El cuanto siervo ministerial ta asigura que tiene teritorio el maga hermano y hermana, y que tiene sila literatura para na ministerio. El otro ta ayuda limpia y mentena con el Kingdom Hall. Ta sirvi tambien sila como maga attendant y tan operate con el audio y video equipment durante na maga miting. Maskin pa ansina el mayoria del diila maga trabajo, maga espiritual persona el maga siervo ministerial. Ta ama sila con Jehova y ta sigui na de suyu maga principio. Tiene tambien sila hondo amor na maga hermano y hermana. (Mat. 22:37-39) Paquemodo el un bautizao hermano puede queda un siervo ministerial?
El maga siervo ministerial ta imita con el ejemplo de Jesus que sirvi con otro (Mira con el parapo 4)
5. Cosa debe hace el un hermano para queda un siervo ministerial?
5 El Biblia ta menciona con el maga cualificacion para queda un siervo ministerial. (1 Tim. 3:8-10, 12, 13) Puede tu tene este privilegio si estudia tu con ese maga cualificacion y hace esfuerzo para alcanza con ese. Pero una, necesita tu examina con el de tuyu motivo si porque tu quierre queda un siervo ministerial.
COSA DEBE MOTIVA CONTIGO PARA QUEDA UN SIERVO MINISTERIAL?
6. Cosa debe motiva contigo para sirvi con el maga hermano y hermana? (Mateo 20:28; mira tambien con el letrato.)
6 El de con todo buen ejemplo para kanaton amo si Jesucristo. Tiene le grande amor na de suyu Tata y na maga gente. Ese amor amo el ya motiva con ele para hace esfuerzo y sirvi con otro. (Le con el Mateo 20:28; Juan 13:5, 14, 15) Si amor el ta motiva contigo, hay bendici contigo si Jehova y ayuda le contigo que alcanza con el de tuyu goal que queda un siervo ministerial.—1 Cor. 16:14; 1 Ped. 5:5.
Por medio na de suyu ejemplo, ya enseña si Jesus con el maga apostoles que queda humilde y sirvi con otro en vez de pricura tene alto posicion (Mira con el parapo 6)
7. Cosa debe evita el un hermano y porque?
7 Para na maga gente na mundo, mas bueno si alto el mirada del otro con el un persona. Pero gendeh ansina na organizacion de Jehova. Si amor el ta motiva con el un hermano igual con Jesus, gendeh le desea que tene autoridad, queda mas alto con otro o queda importante. Si ese el motivo del un persona, baka gendeh le conforma que hace con el cuanto simple trabajo que necesita para cuida con el maga precioso carnero de Jehova. Baka pensa le que bien importante le y gendeh le conviene hace con aquel maga trabajo. (Juan 10:12) Gendeh bendici si Jehova con el esfuerzo del un persona si el de suyu motivo amo para queda lang importante na congregacion.—1 Cor. 10:24, 33; 13:4, 5.
8. Cosa consejo ya dale si Jesus con el de suyu maga apostoles?
8 De antes, el cuanto amigo de Jesus quierre tene maga privilegio pero gendeh bueno el diila motivo. Considera si cosa ya hace el dos apostoles de Jesus, si Santiago y Juan. Ya pidi sila con Jesus que dale kanila especial posicion na de suyu Reino. Nuay kanila comenda si Jesus cuando ya hace sila se. Sino, ya habla le na todo 12 apostoles: “Si quien de ustedes quiere queda importante, necesita queda de ustedes sirvidor. Y si quien quiere queda una entre con ustedes, necesita queda muchacho de todo.” (Mar. 10:35-37, 43, 44) El maga hermano quien tiene justo motivo que sirvi con otro hay queda gayot un bendicion para na congregacion.—1 Tes. 2:8.
HACE FUERTE DE TUYU DESEO QUE SIRVI
9. Paquemodo tu puede hace fuerte con el de tuyu deseo que sirvi con otro?
9 Asigurao, ta ama tu con Jehova y quierre sirvi con otro. Pero posible, falta el de tuyu deseo que hace con el maga trabajo que necesita hace el un siervo ministerial. Paquemodo tu puede hace fuerte con el de tuyu deseo que sirvi con otro? Pensa con el alegria que puede tu tene si sirvi tu con el maga hermano y hermana. Si Jesus ya habla: “Mas grande el alegria de aquel quien ta dale contra con el quien ta recivi.” (Act. 20:35) Ya aplica mismo si Jesus con este principio. Ya sirvi le con otro poreso ya sinti le deverasan alegria. Puede tambien tu se sinti.
10. Paquemodo ya dale mira si Jesus que alegre le sirvi con otro? (Marcos 6:31-34)
10 Considera con el un ejemplo si paquemodo ya dale mira si Jesus que alegre le sirvi con otro. (Le con el Marcos 6:31-34.) Na un ocasion, cansao si Jesus y el de suyu maga apostoles poreso ya anda sila na un silencio lugar para descanza. Pero, yan una kanila alla el un grupo de maga gente quien quierre oi con el enseñanza de Jesus. Puede era le gendeh enseña kanila cay “noay mas sila tiempo maskin para come.” Puede tambien era si Jesus enseña uno o dos verdad lang y despues manda ya sale con el maga gente. Pero por causa na de suyu amor, “ya principia Le insiña canila por largo tiempo” y ya continua le se hace hasta “bien tarde ya.” (Mar. 6:35) Ya hace le se, gendeh por causa cay obligao le. Sino, quierre le enseña kanila cay “ya tene Le lastima” y ta ama le kanila. Bien alegre si Jesus si ta sirvi le con otro.
11. Paquemodo si Jesus ya dale practical ayuda con el maga gente? (Mira tambien con el letrato.)
11 Nuay lang si Jesus basta enseña con aquel grupo de maga gente. Sino, ya dale tambien le el diila fisical necesidad. Ya dale le kanila comida y ya manda con el maga dicipulo que distribui con ese. (Mar. 6:41) Cuando ya hace le se, ya enseña le con el de suyu maga dicipulo si paquemodo sirvi con otro. Ya dale tambien le mira kanila que importante el maga practical ayuda que ta dale sila, igual na maga trabajo que ta hace el maga siervo ministerial. Imagina con el alegria del maga apostoles cuando ya ayuda sila con Jesus distribui comida na maga gente hasta “todo sila ya come y ya man busug”! (Mar. 6:42) Pero, gendeh lang este el tiempo donde ya hace una si Jesus el necesidad del otro. Na entero vida de suyu aqui na tierra, ya sirvi le con otro. (Mat. 4:23; 8:16) Bien alegre si Jesus enseña con otro y dale el diila necesidad. Asigurao, hay sinti tambien tu ese alegria si sirvi tu con otro como un siervo ministerial.
Si ta ama tu con Jehova y quierre sirvi con otro, hay motiva se contigo para ayuda na congregacion na maskin cosa manera (Mira con el parapo 11) a
12. Porque kita gendeh debe pensa que nuay kita cosa puede ayuda na congregacion?
12 No queda desmayao si ta sinti tu que nuay tu maga abilidad que usable na congregacion. Asigurao que tiene tu maga calidad que puede tu usa para ayuda con otro. Pensa acerca na cosa ya habla si Pablo na 1 Corinto 12:12-30. Ya hace claro si Pablo que igual na otro maga siervo de Jehova, tiene tu importante papel y necesita contigo na congregacion. Si gendeh pa tu cualificao ahora que sirvi como un siervo ministerial, no man luya. Sino, hace si cosa tu puede hace para sirvi con Jehova y con el maga hermano. Puede tu asigura que el maga anciano hay dale contigo maga assignment que puede tu hace.—Roma 12:4-8.
13. Porque gendeh dificil que queda un siervo ministerial?
13 Considera con el otro pa razon si porque tu puede queda un siervo ministerial: Mayoria del cualificacion para queda siervo ministerial amo para na todo Cristiano. Gane, el todo Cristiano debe queda cerca con Jehova, tene el deseo que sirvi con otro y vivi na manera que ta hace alegre con Dios. Poreso, posible tiene ya tu el maga importante calidad que necesita para queda un siervo ministerial. Cosa el maga especifico cualificacion para queda un siervo ministerial?
MAGA ESPECIFICO CUALIFICACION PARA QUEDA SIERVO MINISTERIAL
14. Cosa quierre decir que “queda serioso”? (1 Timoteo 3:8-10, 12)
14 Ahora, considera kita con el cuanto cualificacion que ya menciona na 1 Timoteo 3:8-10, 12, NWT. (Le.) El un siervo ministerial debe “queda serioso.” Puede tambien man translate con este expresion como “conviene ricibi honor y respeto.” Gendeh este quierre decir que gendeh tu puede re o man broma. (Ecl. 3:1, 4) Sino, debe tu queda serioso na de tuyu maga responsibilidad. Si pirmi tu ta cumpli enbuenamente con el de tuyu maga assignment, hay ganá tu el respeto del congregacion.
15. Cosa quierre decir que el un hermano “gendeh imbustero” y “gendeh ta toma ventaja con otro”?
15 “Gendeh imbustero.” Este quierre decir que sincero tu, honesto y puede contigo confia. Ta cumpli tu con el de tuyu promesa y gendeh tu ta hace loco con otro. (Prov. 3:32) El un persona quien “gendeh ta toma ventaja con otro” honesto na de suyu negocio y na usada de sen. Gendeh le usa con el de suyu maga amigo na congregacion para lang hace sen kanila.
16. (a) Cosa quierre decir que “gendeh fuerte toma vino”? (b) Cosa quierre decir que tiene “limpio conciencia” el un hermano?
16 “Gendeh fuerte toma vino.” Este quierre decir que gendeh tu ta toma por demas alcoholico tomada o conocido como un burrachon. Si tiene “limpio conciencia” el un hermano, quierre decir que ta vivi le asegun na maga principio de Jehova. Maskin pa ta puede le hace maga kamali, tiene le paz na pensamiento cay tiene le buen relacion con Dios.
17. Paquemodo puede dale mira el un hermano que cualificao le y puede con ele confia? (1 Timoteo 3:10; mira tambien con el letrato.)
17 ‘Ya pruba si cualificao.’ Este quierre decir que ya dale ya tu mira que puede contigo confia y puede contigo dale responsibilidad. Poreso, si ya dale assignment contigo el maga anciano, sigui enbuenamente con el diila maga instruccion y con el maga guia que ya dale el organizacion. Asigura que sabe tu si cosa tu debe hace y si cuando tu debe con ese acaba hace. Si cumpli tu enbuenamente con el cada assignment, el maga hermano y hermana na congregacion hay aprecia con el de tuyu progreso. Maga anciano, man train con el maga bautizao hermano. (Le con el 1 Timoteo 3:10, NWT.) Tiene ba maga bautizao hermano na de ustedes congregacion que 15 año el edad o mas joven pa? Tiene ba sila buen rutina de personal estudiada? Regular ba sila ta dale comento na maga miting y ta participa na ministerio? Si ansina, dale kanila maga assignment que propio na diila edad y circumstancia. Na este manera, puede pruba con este maga joven hermano si cualificao ba sila. Despues, si 17 para 19 año ya el diila edad, grande el posibilidad que queda ya sila cualificao sirvi como siervo ministerial.
Si dale assignment con el maga bautizao hermano, el maga anciano puede “pruba si cualificao ba sila” (Mira con el parapo 17)
18. Cosa quierre decir que “nuay acusacion” contra con el un persona?
18 “Nuay acusacion contra [con ele].” Este quierre decir que nuay tu hace serioso culpa que puede contigo acusa el otro. Siempre, posible que tene falso acusacion contra na maga Cristiano. Gane, maskin si Jesus ya experiencia con ese y ya habla le que experiencia tambien se el de suyu maga siguidores. (Juan 15:20) Pero si mentena tu de tuyu buen conducta, igual con Jesus, hay tene tu buen reputacion na congregacion.—Mat. 11:19.
19. Cosa quierre decir que “debe uno lang el mujer” del un hermano?
19 “Debe uno lang el mujer.” Si casao tu, debe ta sigui tu con el principio de Jehova na matrimonio que entre na un hombre y un mujer lang. (Mat. 19:3-9) El un Cristiano gendeh debe comete sexual imoralidad. (Heb. 13:4) Pero mas pa con ese, gendeh le debe dale romantico atencion na otro mujer para puede le esta leal na de suyu mujer.—Job 31:1.
20. Paquemodo el un hombre ta dale mira que ta encabeza le con el de suyu familia “na buen manera”?
20 “Ta encabeza le na buen manera con el de suyu maga anak y familia.” Si etu el cabeza del familia, debe ta hace gayot tu con el de tuyu maga responsibilidad. Regular hace con el de ustedes de familia adoranza. Si posible, pricura regular man junto con el cada miembro del de tuyu familia na ministerio. Ayuda con el de tuyu maga anak que tene personal relacion con Jehova. (Ef. 6:4) Si ta puede cuida enbuenamente el un hombre con el de suyu familia, ta dale se mira que puede tambien le encabeza na congregacion.—Compara na 1 Timoteo 3:5.
21. Si gendeh pa tu un siervo ministerial, cosa tu puede hace?
21 Si gendeh pa tu un siervo ministerial, pabor le enbuenamente con este articulo y reza con Jehova acerca na de tuyu situacion. Considera con el maga cualificacion y hace esfuerzo para alcanza con ese. Pensa si paquemodo de hondo el de tuyu amor para con Jehova y na maga hermano y hermana. Hace fuerte con el de tuyu deseo que sirvi kanila. (1 Ped. 4:8, 10) Hay experiencia tu alegria mientras ta sirvi tu con el de tuyu espiritual familia. Ojala hay bendici si Jehova con el de tuyu maga esfuerzo mientras ta pricura tu queda un siervo ministerial!—Fil. 2:13.
CANCION 17 ‘Quierre Yo’
a DETALLE DE LETRATO: Na izquierda, ta sirvi si Jesus con el de suyu maga dicipulo; na derecha, el un siervo ministerial ta asisti con el un de edad hermano na congregacion.
