Paul: Bien excited gayot kame! Del Noviembre 1985, pa-andada ya kame na Liberia, na West Africa, na diamon primer assignment como maga misionario. Cuando ya llega kame na Senegal, ya habla si Anne, “Mas de un hora ya lang, llega ya kita na Liberia!” Pero, ya oi kame un anuncio: “El maga pasajero para na Liberia necesita abaja na eroplano. Tiene gulu na aquel lugar poreso gendeh kita puede anda alla.” Por diez dia, ya esta kame junto na maga misionario na Senegal. Ya oi kame maga noticia que bien manada el ya muri na Liberia y tiene curfew que debe sigui el maga gente para gendeh tira kanila.

Anne: Desde bata, manada el sabe que bien miedutin yo. Gane maskin travesa lang na camino, ta tiene gayot yo miedo! Poreso, pirmi kame bien con cuidao de Paul. Pero maskin delicao na Liberia, determinao kame anda alla.

Paul: Na oeste parte del England, ocho kilometro lang el distancia del lugar onde yo ya engranda na lugar onde ya engranda si Anne. Ya anima conmigo el de mio mayores que man pioneer y ansina tambien ya hace el nana de Anne. Poreso, igual kame de Anne yan pioneer despues gradua na high school. Alegre gayot sila cay quierre kame usa con el diamon vida para sirvi full-time. Cuando 19 año yo, ya invita conmigo que sirvi na Bethel y despues kame casa de Anne del 1982, yan junto le conmigo sirvi alla.

Anne: Ta gusta kame sirvi na Bethel pero quierre kame sirvi onde tiene grande necesidad desde antes. El buen ejemplo y maga experiencia del diamon maga uban na Bethel quien ya sirvi como maga misionario de antes ya puede tambien gayot anima kanamon. Por tres año, especifico kame ta reza acerca con ese cada noche. Poreso, bien alegre gayot kame cuando ya ricibi kame un invitacion que atende na ika-79 clase de Gilead del 1985. Despues del clase, yan assign kanamon na Liberia, West Africa.

Paul: Cuando tiene ya flight para na Liberia, ya viaja dayun kame. Maka-miedo el situacion alla y tiene siempre maga curfew. Maskin suena lang el un coche, tan panic dayun el maga gente. Para queda calmao, ta le kame con el Salmo cada noche.  Maskin pa ansina el situacion, ta ama gayot kame con el diamon assignment alla. Un misionario si Anne mientras iyo ta sirvi na Bethel junto con Hermano John Charuk. a Manada yo cosa ya aprende con ele cay ya dura ya le na Liberia y sabe gayot le el situacion del maga hermano y hermana.

Anne: Por causa na maga hermano y hermana, ya aprecia dayun kame con el diamon assignment na Liberia. Fiel sila y bien amable. Ya queda kame close kanila y ya queda sila dol familia diamon. El diila maga buen palabra ya anima kanamon na espiritual. Bien bonito gayot predica alla. No quierre el maga householder si unrato lang kame man cuento kanila! Pirmi tan cuento el maga gente acerca na Biblia maskin onde y pronto lang tu puede man cuento kanila. Mas pa, bien manada gayot kame Bible study y falta el diamon tiempo para man study kanila todo. Un bonito problema quel para kanamon!

Paul: Medio enbuenamente el situacion por cuatro año pero del 1989, bigla lang ya tiene grabe gulu na aquel nacion. Del Julio 2, 1990, ya queda teritorio del maga rebelde el lugar cerca na Bethel. Gendeh kame ta puede man contact con el diamon familia y con el headquarters por tres meses. Bien magulu el alrededor, escaso el comida y manada mujer con quien yan rape. Ya continua este situacion por 14 año na entero nacion.

Anne: El maga miembro del cuanto tribo ta mata con aquellos de otro tribo. Manada maga armao persona na camino y ta entra sila ruba maskin cosa sila quierre. Para kanila, si ta mata sila gente, dol ta mata lang sila manok. Ta mata tambien sila con aquellos quien ta pasa na maga checkpoint y gane ta sucede se cerca na Bethel. Tiene cuanto maga hermano y hermana con quien ya mata, incluido con el dos misionario.

Maskin pa delicao, ya esconde el maga Testigo con el maga hermano y hermana de otro tribo quien na peligro el vida. Ese tambien el cosa ya hace el maga misionario y Bethelite. Na Bethel, ya esconde el cuanto na basement mientras el otro ya esta na cuarto del maga Bethelite. Siete persona el junto kanamon na cuarto.

Paul: Cada dia, tiene maga armao persona quien ta pricura entra na Bethel para mira si tiene kame con quien ta esconde. Si ta sucede se, dos kanamon el ta anda na gate para man cuento kanila y dos tambien el ta vicia na bentana. Si na adelante el mano del dos que talla apuera, quierre decir nuay lang peligro. Pero si pone sila con el diila mano na  atras, quierre decir necesita kame esconde dayun con el maga hermano y hermana cay ta insisti entra el maga armao persona.

Anne: Un dia, forzao ya entra el un grupo de maga armao persona. Ya anda yo y el un hermana na CR donde tiene un cabinet que tiene compartment donde puede esconde. Ya esconde el hermana alla. Nuay dura, ya anda alla el maga armao persona. Bien rabiao sila yan tuktuk na puerta. Ya pricura si Paul sangga kanila para gendeh sila entra y ya habla, “Tan CR pa el de mio mujer.” Medio alboroto cuando ya tranca yo con el compartment onde yo ya esconde con el hermana. Ya dura pa yo puede pone otravez con el maga gamit na cabinet poreso yan duda ya sila si cosa yo ta hace alla. Ya tiene gayot yo miedo y ta tembla gayot yo. Necesita yo esta calmao antes yo abri con el puerta poreso ya reza yo con Jehova que ayuda conmigo. Cuando ya abri yo con el puerta, calmao yo ya puede man cuento kanila. El uno kanila dayun lang ya abri con el cabinet y ya hace calayat con el maga gamit. Espantao le cay nuay le cosa ya incuntra. Despues, ya busca le y el de suyu maga uban na otro pa maga cuarto y na quisame pero nuay siempre sila cosa ya puede incuntra.

Paul: Por cuanto meses, bien escaso gayot el comida. Pero, grande ayuda gayot kanamon el espiritual comida. El morning worship na Bethel amo el ya sirvi como “almuerzo” diamon. Ya dale este kanamon el fuerza para aguanta cada dia.

Si anda kame apuera para busca agua y comida, gendeh kame puede protege con aquellos quien ta esconde na Bethel. Poreso tiene vez, dol milagro si paquemodo si Jehova ta dale con el diamon necesidad na justo tiempo. Ya ayuda tambien le kanamon para esta calmao.

Ya queda mas grabe el situacion pero ya tiene kame esperanza por causa na verdad. Manada beses ya evacua el maga hermano y hermana para salva el diila vida pero ya esta siempre fuerte el diila fe. El cuanto ta habla que dol ta prepara ya sila para na grande tribulacion. Ya hace el maga anciano y el maga joven hermano el todo para ayuda con el maga hermano y hermana. El maga hermano y hermana quien ya evacua yan ayudajan y ya principia predica onde sila ya evacua. Ya usa sila con el maga cosas que ya incuntra sila na buuk para hace maga simple Kingdom Hall onde sila puede man miting. El maga miting y predicacion ya puede ayuda con el maga hermano y hermana para aguanta na aquel dificil situacion. Cuando ta distribui kame maga ayuda, manada del maga hermano y hermana el ya pidi bag para na predicacion en vez de maga camisa. Ya anima gayot quel kanamon! El maga gente quien ya sale afectao na guerra ta oi gayot con el buen noticia. Yan bilib gayot sila que alegre y positivo siempre el maga Testigo de Jehova que dol maga luz na iscuridad. (Mat. 5:14-16) Por causa na determinacion del maga hermano y hermana, ya queda pa gane siervo el cuanto del maga rebelde.

Paul: Tiene maga tiempo que necesita kame sale na Liberia. Tres beses kame ya sale alla unrato y dos beses kame nuay alla por un año. El cosa ya habla el un misionario hermana exacto gayot na cosa kame ta sinti. Ele ya habla: “Na Gilead, ya enseña kanaton que con todo corazon ama con el maga hermano y hermana na diaton assignment y ese el cosa kita ya hace. Poreso, maka-triste gayot cay necesita kita deja kanila na este dificil situacion.” Bueno ya lang, ta puede siempre kame asisti con el maga hermano y hermana, y con el trabajo predicacion na Liberia maskin na otro nacion kame.

Anne: Del Mayo 1996, cuatro kame yan viaje usando el un vehiculo del branch para anda na otro parte del ciudad que gendeh tanto delicao. Ese lugar 16 kilometro de lejos. Acabar, tiene kame maga importante documento ta lleva. Pero mientras tan viaje kame, bigla ya tiene gulu. El maga armao persona ya supla de tiro na aire y ya ataja kanamon. Forzao sila ya hala kanamon tres pa-apuera, ya munta na vehiculo y ya lleva corre con este mientras talla pa si Paul adentro. Bien espantao gayot kame y malingasa. Despues, bigla lang kame ya mira con Paul que ta camina que bien masangre el cabeza. Pensaba kame ya tira con ele. Pero ya pensa kame, si ansina, gendeh ya era le puede camina! Ya engancha gale con ele cuando ya rimpuja con ele pa-apuera na vehiculo. Bueno ya lang gendeh grabe el de suyu irida.

Tiene un vehiculo de militar cerca kanamon y lleno este de maga gente. Nuay mas lugar adentro poreso yan bitay ya lang kame apuera. Bien corre gayot ta maneja el driver y gane, cerca ya kame cae. Ya pidi kame con ele que para anay pero nuay le se hace cay tiene gayot le miedo. Maskin pa ansina, ya puede kame llega na diamon destinacion pero bien cansao gayot kame y ta tembla.

Paul: Bien mabuling y rompido el diamon maga camisa. Gendeh gayot maka-creé que vivo pa kame. Pagka-denoche, ya durmi kame apuera cerca na un helicopter cay lleva kanamon na Sierra Leone alamañana. Medio destrozao ya quel helicopter por causa na maga bala. Pero, enbuenamente siempre kame ya puede llega na Sierra Leone. Alegre kame cay vivo kame pero bien malingasa kame con el maga hermano y hermana na Liberia.

Anne: Enbuenamente kame ya llega na Bethel na Freetown, Sierra Leone y ya cuida gayot sila kanamon. Pero, ya principia entra na de mio pensamiento el maga mal cosas que ya sucede na Liberia. Si didia, pirmi yo ta tiene miedo y gendeh yo ta puede pensa enbuenamente. Si denoche, ta puede yo man tiplak que ta tembla y ta suda frio. Ta sinti yo que dol tiene gendeh buen cosa hay sucede. Ta tormenta yo resulla poreso ta abraza conmigo si Paul y ta reza junto conmigo. Ta canta kame maga Kingdom song hasta queda ya yo calmao. Ta sinti yo que dol queda ya yo loca y gendeh mas yo puede sirvi como un misionario.

Gendeh gayot yo ulvida con el cosa ya sucede despues. Aquel mismo semana, ya ricibi kame dos magasin. El uno amo el Awake! de Junio 8, 1996. Tiene este articulo que tiene tema “Coping With Panic Attacks.” Por causa con aquel, ya entende yo si cosa ta pasa conmigo. El ika-dos amo el The Watchtower de Mayo 15, 1996 que tiene articulo “Where Do They Get Their Strength?” Tiene alla letrato del un mariposa que destrozao el alas. El articulo ya explica que igual na un mariposa que ta puede siempre come y bula maskin pa destrozao el maga alas de este, na ayuda de Jehova puede tambien kita continua ayuda con otro maskin pa tiene mal cosas que ya sucede na diaton vida. Por medio na aquel maga articulo, ya sinti yo que ya dale gayot conmigo si Jehova el cosa yo necesita na justo tiempo. (Mat. 24:45) Ya busca yo otro maga articulo igual ansina y ya pone yo con aquel na un folder. Ya puede gayot quel ayuda conmigo. Despues del cuanto tiempo, hinay-hinay ya perde el de mio maga lingasa.

Paul: Alegre gayot kame si ta puede kame bira na Liberia. Del 2004, cerca 20 año ya kame na diamon assignment alla. Ya acaba ya el guerra y tiene maga plano de construida na branch. Pero, bigla lang kame ya ricibi nuevo assignment.

Bien dificil gayot quel para kanamon. Ya queda ya kame bien close na diamon espiritual familia alla y no quierre kame deja kanila. Pero, ya acorda kame si paquemodo ya bendici si Jehova kanamon cuando ya confia kame con ele y ya deja con el diamon maga  familia para anda na Gilead. Poreso, ya acepta kame con el nuevo assignment que anda na Ghana.

Anne: Ya llura gayot kame cuando pasalida ya kame na Liberia. Ya espanta kame cuando el un de edad hermano que si Frank ya habla: “Necesita ya ustedes ulvida kanamon!” Pero, ya explica le si cosa le quierre decir. Ele ya habla: “Sabe kame que gendeh ustedes kanamon ulvida pero necesita ustedes man focus na de ustedes nuevo assignment y ama con el maga hermano y hermana alla cay estaba se assignment con Jehova.” Ya hace quel fuerte kanamon para principia otravez na un nuevo lugar que gendeh kame familiar y un poco lang kame con quien conoce.

Paul: Pero, ya queda gayot kame close na diamon nuevo espiritual familia na Ghana. Bien manada maga hermano y hermana alla! Ya puede gayot anima kanamon el diila lealtad y fe. Despues kame sirvi na Ghana por 13 año, ya ricibi kame nuevo assignment. Ya invita kanamon que sirvi na East Africa branch na Kenya. Maskin pa tan miss gayot kame con el maga hermano y hermana donde kanamon yan assign de antes, ya tiene dayun kame maga nuevo amigo y amiga na Kenya. Y igual na Ghana y Liberia, grande tambien el necesidad na Kenya.

Anne: Por manada año, manada beses kame ya experiencia maga dificil situacion. Si ya enfrenta kita maga peligroso situacion, tiene se efecto na diaton emocion. Gendeh kita ta expecta que protege kanaton si Jehova na milagroso manera. Maskin ahora si ta oi yo tiro, dol quierre yo gumita y ta intumi el de mio maga mano. Pero, ya aprende yo que depende na ayuda que ta dale si Jehova y incluido alli el suporta del maga hermano y hermana. Y ya puede yo mira que si continua kita na diaton espiritual rutina, puede ayuda kanaton si Jehova que esta na diaton assignment.

Paul: Tiene vez tiene ta pregunta kanamon, “Cosa ustedes quierre na de ustedes assignment?” Deverasan bonito el maga lugar pero posible tambien que cambia y queda peligroso el situacion. Poreso, mas ta aprecia kame con el diamon maga hermano y hermana contra con el lugar. Maskin pa diferente el diamon maga background, igual kame ta ama con Jehova. Pensaba kame ya imbia kanamon para anima kanila pero el deverasan sila el ya hace fuerte kanamon.

Un milagro gayot estaba con Jehova que maskin onde kame anda, tiene kame maga familia cay parte kame del organizacion. Asigurao kame que si continua kame confia con Jehova, hay dale le kanamon el fuerza para aguanta na maskin cosa situacion.—Fil. 4:13.