TA TORMENTA ba tu hace regular y maka-alegre con el de tuyu personal estudiada na Biblia? Posible, todo kita ta sinti ansina tiene vez. Pero pensa con el maga otro cosas que regular kita ta hace, igual na bañada. Ta necesita tiempo y esfuerzo para hace con ese. Pero, gendeh ba ta sinti kita refrescao despues baña? Ansina tambien si ta estudia con el Biblia. El Palabra del Dios igual na “agua” que puede refresca kanaton. (Ef. 5:26) Considera con el cuanto sugestion que puede ayuda.

• Hace un schedule. El personal estudiada na Biblia amo uno na “maga cosas que mas importante” que debe hace el un Cristiano. (Fil. 1:10, NWT) Para gendeh tu ulvida con el de tuyu schedule, puede tu pone con ese na un lugar que pirmi tu ta puede mira, igual na bulletin board o na puerta del de ustedes refrigerator. Baka puede tambien ayuda si man set tu alarm na de tuyu gadget cuanto minuto antes tu estudia.

• Iscuji tiempo que mas efectivo contigo. Cosa mas facil contigo, estudia por largo tiempo o corto tiempo lang pero manada beses? Etu sabe si cosa el mas efectivo contigo. Poreso, iscuji tiempo si cuando tu estudia. Si nuay tu gana si tiempo ya para estudia, pruba estudia maskin diez minuto lang. Maskin corto tiempo lang se, posible manada ya tu cosa ya puede aprende. Gane, baka quierre ya tu que continua pa.—Fil. 2:13.

• Pensa adelantao si cosa tu estudia. Si durante pa na de tuyu estudiada tu iscuji si cosa estudia, posible gendeh tu puede “usa el [de tuyu] tiempo embuenamente.” (Ef. 5:16) Puede contigo ayuda si hace tu lista del maga articulo o topico que quierre tu estudia. Por ejemplo, si tiene tu pregunta acerca na un cosa que gendeh pa tu ta entende, lista con ese. Cada vez acaba estudia, baka tiene pa tu otro maga idea que quierre tu estudia na sunod. Puede tu con ese omenta na de tuyu lista.

• Man adjust si necesita. Puede tu hace cambio na de tuyu schedule, igual si paquemodo de largo tu estudia o si cosa topico tu considera. El mas importante amo—gendeh si cuando, si paquemodo de tarda o si cosa tu estudia—sino si paquemodo de regular tu con ese ta hace.

Tiene gayot beneficio si regular kita ta estudia. Ta queda kita mas cerca con Jehova, ta puede kita hace maga justo decision y ta sinti kita refrescao.—Jos. 1:8.