1-2. Cosa maga injusticia kita posible experiencia?

 YA MENCIONA si Jesus con el un ilustracion acerca na un viuda quien ta continua pidi justicia na un juez. Asigurao, ya entende el maga dicipulo de Jesus si cosa ta sinti aquel viuda cay comon na diila tiempo el injusticia. (Luc. 18:1-5) Ansina tambien kita cay todo kita ya experiencia injusticia.

² Na mundo ahora, comon el maltratamiento y discriminacion poreso gendeh kita ta estraña si nuay kanaton trata enbuenamente el otro. (Ecl. 5:8) Pero posible, gendeh kita expecta que juzga kanaton el un hermano o hermana. Pero cay imperfecto sila, posible se sucede. Siempre, gendeh sila igual con aquellos quien ta persigui o tan contra kanaton. Manada kita cosa puede aprende na cosa ya hace si Jesus cuando ya experiencia le injusticia. Si paciencioso kita con aquellos quien tan contra kanaton, mas debe kita queda paciencioso na diaton maga hermano y hermana. Pero, cosa si Jehova ta sinti si gendeh kanaton ta trata enbuenamente el otro o aquellos na congregacion? Ta mira ba le si cosa ta sucede kanaton?

3. Ta nota ba si Jehova si ta maltrata kanaton? Explica.

³ Quierre si Jehova que trata kanaton enbuenamente el otro y ta nota le si ta experiencia kita maltratamiento. “Si Jehova ta ama con el justicia.” (Sal. 37:28) Gane, ya asigura kanaton si Jesus que si Jehova “ay dale . . . dayun justicia” na justo tiempo. (Luc. 18:7, 8) Y gendeh dura, hay quita le con  el sufrimiento que ta experiencia kita y con el todo clase de injusticia.—Sal. 72:1, 2.

4. Paquemodo si Jehova ta ayuda kanaton ahora?

⁴ Mientras ta espera kita con el tiempo que perde el todo problema, ta ayuda kanaton si Jehova para aguanta na injusticia. (2 Ped. 3:13) Ta enseña le kanaton si cosa kita debe evita hace si ya maltrata kanaton. Ya dale si Jehova kanaton el perfecto ejemplo de Jesus para sabe kita si cosa hace si experiencia kita injusticia. Y ya dale le kanaton practical consejo que puede kita aplica si nuay kanaton trata enbuenamente el otro.

CON CUIDAO NA COSA TU HACE SI TIENE INJUSTICIA

5. Porque kita debe queda con cuidao na cosa kita hace si experiencia kita injusticia?

⁵ Posible, sinti kita duele o triste si experiencia kita injusticia. (Ecl. 7:7) El maga fiel siervo, igual con Job y Habacuc, ya sinti tambien ansina. (Job 6:2, 3; Hab. 1:1-3) Maskin pa normal este maga sentido, debe kita queda con cuidao para gendeh kita hace un cosa que gendeh justo.

6. Cosa kita puede aprende na cosa ya hace si Absalom? (Mira tambien con el letrato.)

⁶ Si ta experiencia kita injusticia, posible pricura kita man balus. Pero si hace kita se, baka queda lang mas grabe el situacion. Considera con el ejemplo del anak de Rey David, si Absalom. Bien rabiao gayot le cuando yan rape el diila hermano na tata que si Amnon con el de suyu hermana que si Tamar. Asegun na Ley de Moises, conviene muri si Amnon na cosa le ya hace. (Lev. 20:17) Maskin pa razonable que rabia si Absalom, nuay le derecho para mata con Amnon.—2 Sam. 13:20-23, 28, 29.

7. Cosa ya sinti el salmista del primero cuando ya mira le injusticia?

⁷ Si nuay castiga con el un persona quien ya maltrata kanaton, posible pensa kita si tiene ba beneficio que hace si cosa el justo. Considera con el un salmista quien ya observa que dol bonito el vida del maga malo quien ta maltrata con el maga bueno. “El maga malo . . . pirmi enbuenamente el vida,” ya habla le. (Sal. 73:12) Bien triste tambien le por causa na injusticia y ya pensa le que no vale nada lang que sirvi con Jehova. Ele ya habla: “Cuando ya pricura yo entende con este, ya queda yo destorbao.” (Sal. 73:14, 16) Gane, ya admiti le: “Pero iyo, cerca ya yo perde na camino; cerca ya yo man landuk.” (Sal. 73:2)  Ansina el cosa ya sucede con el un hermano que si Alberto. a

8. Cosa el efecto del injusticia na un hermano?

⁸ Ya acusa con Alberto que ya ruba sen del congregacion. Como resulta, ya perde el de suyu maga privilegio y el respeto del manada na congregacion quien ya sabe acerca con ese. Pero, gendeh quel deverasan. “Bien rabiao gayot yo y desmayao,” ya habla le. Ya deja le que afecta con el de suyu espiritualidad el dolor que ya sinti le y gane ya queda le gendeh activo por cinco año. Este experiencia ta dale mira si cosa puede sucede kanaton si gendeh kita controla con el diaton rabia si tiene injusticia.

IMITA SI PAQUEMODO YA AGUANTA SI JESUS NA INJUSTICIA

9. Cosa maga injusticia ya experiencia si Jesus? (Mira tambien con el letrato.)

⁹ Ya dale mira perfecto ejemplo si Jesus si cosa hace si ta experiencia injusticia. Considera con el maltratamiento que ya experiencia le estaba na de suyu familia y na otro gente. El de suyu maga pariente ya habla que loco ya le, ya acusa el maga religioso lider que ta ayuda con ele el maga demonio y el maga Romano soldao ya gangguia con ele,  ya gulpia y gane ya mata pa con ele na uliji. (Mar. 3:21, 22; 14:55; 15:16-20, 35-37) Maskin pa ya experiencia si Jesus con ese todo injusticia, nuay gayot le man balus. Cosa kita puede aprende na de suyu ejemplo?

10. Cosa ya hace si Jesus cuando ya enfrenta le injusticia? (1 Pedro 2:21-23)

¹⁰ Le con el 1 Pedro 2:21-23. b Ya dale mira buen ejemplo si Jesus kanaton si cosa hace si ta experiencia kita injusticia. Sabe le si cuando esta silencio y si cuando converza. (Mat. 26:62-64) Cuando el otro ya habla maga imbusterias acerca con ele, tiene maga tiempo que nuay le contesta kanila. (Mat. 11:19) Pero si ta contesta le, gendeh le ta insulta o ta amenaza con aquellos quien tan contra con ele. Tiene si Jesus control na cuerpo cay “ya pone Le su esperanza con el Juez justo.” Sabe si Jesus que mas importante el mirada de Jehova. Ya confia le que hay quita si Jehova con el todo injusticia na justo tiempo.

11. Cosa kita hace para puede controla con el diaton palabra? (Mira tambien con el maga letrato.)

¹¹ Puede kita imita con Jesus si controla kita con el diaton palabra. El cuanto injusticia gendeh bien serioso y puede lang kita ignora. O puede kita esta silencio para evita habla un cosa que puede hace mas grabe con el situacion. (Ecl. 3:7; Sant. 1:19, 20) Pero tiene maga tiempo, posible necesita kita tiene cosa habla si tiene con quien ta maltrata o si necesita kita defende con el verdad. (Act. 6:1, 2) Pero si man cuento kita, debe kita pricura esta calmao y queda respetoso.—1 Ped. 3:15. c

12. Paquemodo kita “pone [diaton] esperanza con el Juez justo”?

 ¹² Puede tambien kita imita con Jesus si “pone [kita diaton] esperanza con el Juez justo.” Si juzga o maltrata kanaton el otro, ta confia kita que sabe si Jehova el verdad. Puede se ayuda kanaton para aguanta na maltratamiento cay sabe kita que hay corecta con ese si Jehova na justo tiempo. Si deja kita el problema na mano de Jehova, puede se ayuda kanaton para gendeh esta rabiao o man sentimiento. Ese maga negativo sentido puede causa kanaton para hace maga mal cosas, perde el diaton alegria y queda malo el diaton relacion con Jehova.—Sal. 37:8.

13. Cosa puede ayuda kanaton para puede aguanta na injusticia?

¹³ Siempre, gendeh kita puede completamente imita con el perfecto ejemplo de Jesus. Porque? Cay tiene vez, posible kita hace o habla maga cosas que arripinti kita na uliji. (Sant. 3:2) Y el cuanto maga injusticia que experiencia kita posible causa kanaton grabe dolor y tristeza que gendeh perde na este presente sistema. Si ese el cosa tu ta sinti, puede tu asigura que sabe si Jehova si cosa tu ta experiencia. Sabe tambien si Jesus si cosa tu ta sinti cay ya experiencia tambien le injusticia. (Heb. 4:15, 16) Puera na perfecto ejemplo de Jesus, ya dale kanaton si Jehova practical consejo que puede ayuda kanaton si experiencia kita injusticia. Considera kita dos versiculo na libro de Roma.

ESPERA CON JEHOVA

14. Cosa quierre decir que ‘deja na rabia del Dios’ el vengganza? (Roma 12:19)

¹⁴ Le con el Roma 12:19. Ya anima si apostol Pablo con el maga Cristiano que no vengga sino “deja se [na] Rabia del Dios.” Puede kita se hace si deja kita con Jehova decidi si cuando y si paquemodo le dale justicia. Despues experiencia injusticia el un hermano que si John, ele ya habla: “Necesita yo controla con el de mio rabia para gendeh yo hace maga cosas gendeh bueno. Gendeh quel facil pero el Roma 12:19 ya ayuda conmigo para espera con Jehova.”

15. Porque mas bueno que espera con Jehova que corecta con el injusticia?

¹⁵ Si kita lang mismo pricura solva con el injusticia, hay man stress lang kita y queda bien consumido. Poreso, beneficia kita si espera kita con Jehova que corecta con ese. Gane, quierre le ayuda kanaton. Dol ta habla le, ‘Iyo ya cuidao con el injusticia; no mas ya tu man lingasa.’ Si confia kita na promesa de Jehova que ele el vengga para kanaton, puede se ayuda para gendeh mas kita esta rabiao cay sabe kita que hay solva le con ese na de con todo buen manera. Ese el cosa ya ayuda con John que ya menciona enante. Ele ya habla, “Si espera yo con Jehova, sabe yo que mas puede le se solva contra conmigo.”

GANÁ CON EL MALDAD “POR MEDIO DEL MAGA COSA-COSA BUENO”

16-17. Paquemodo el rezo puede ayuda kanaton para ganá con el maldad? (Roma 12:21)

¹⁶ Le con el Roma 12:21. Ya anima tambien si Pablo con el maga Cristiano que ganá con el maldad “por medio del maga cosa-cosa bueno.” Cuando ya dale si Jesus de suyu Sermon na Monte, ya habla le: “Ama con el de ustedes maga contrario y reza para con aquellos quien ta persigui con ustedes.” (Mat. 5:44) Grabe el dolor, injusticia y verguenza que ya aguanta si Jesus cuando ya clava con ele na estaca el maga Romano soldao. Maskin pa ansina, ya aplica le con el cosa le ya habla.

¹⁷ En vez de pidi que castiga con el maga soldao, ya reza le: “Tata, perdona canila cay  no sabe sila si cosa sila ta hace.” (Luc. 23:34) Claro que nuay permiti si Jesus que ganá con ele el maldad. Na igual manera, si reza kita para con aquellos quien ya maltrata kanaton, puede se ayuda para menora el diaton rabia. Puede tambien se ayuda para cambia el diaton mirada kanila.

18. Paquemodo el rezo ya ayuda con Alberto y con John para aguanta na injusticia?

¹⁸ El rezo ya ayuda con el dos hermano que ya menciona enante para aguanta na injusticia que ya experiencia sila. Si Alberto ya habla: “Ya reza yo para con el maga hermano quien ya acusa conmigo. Manada beses yo ya pidi con Jehova que ayuda conmigo ulvida con ese injusticia.” Na uliji, alegre ya sirvi otravez si Alberto con Jehova. Si John ya habla: “Manada beses, ya reza yo para con el hermano quien ya hace sinti duele conmigo. Ese maga rezo ya puede ayuda conmigo para gendeh mas rabia y juzga con ele. Y aquel maga rezo ya dale tambien conmigo paz na pensamiento.”

19. Cosa kita debe hace hasta na fin de este sistema? (1 Pedro 3:8, 9)

¹⁹ Mientras nuay pa llega el fin de este sistema, posible kita enfrenta maga injusticia. Pero maskin cosa pa kita experiencia, debe kita continua reza para na ayuda de Jehova. Imita tambien kita si cosa ya hace si Jesus cuando ya maltrata con ele y continua aplica maga principio na Biblia. Si hace kita se, puede kita asigura que hay bendici kanaton si Jehova.—Le con el 1 Pedro 3:8, 9.