Ese contrata ya establicia tambien un nuevo organizacion que ya llama League of Nations. El goal de este amo “para tiene cooperacion, paz y seguridad na entero mundo.” Manada religion quien ta clama Cristiano el ya suporta con ese organizacion. El Federal Council of the Churches of Christ in America ya llama con ese como “un organizacion de politica que ta representa con el Reino del Dios na tierra.” Este asosacion ya suporta con el League of Nations y ya imbia maga gente para na Paris Peace Conference. Uno del maga ya atende ya habla que el conferencia amo “el principio del nuevo tiempo na historia del mundo.”

Tiene nuevo cosa ya principia pero gendeh por medio del maga gente quien incluido na ese conferencia. Del 1919, si Jehova ya dale fuerza con el de suyu maga siervo para predica pa mas contra de antes. Pero antes se sucede, el maga Estudiante del Biblia necesita grande cambio na diila situacion.

El eleccion para na maga director del Watch Tower Bible and Tract Society que ta hace cada año yan schedule del Sabado, Enero 4, 1919. Na ese tiempo, si Joseph F. Rutherford quien ta guia con el maga siervo de Jehova, yan preso na Atlanta, Georgia, U.S.A. junto con el siete persona. El maga hermano debe decidi si iscuji otravez con el maga director quien yan preso o cambia kanila.

Cuando na preso, si Hermano Rutherford yan lingasa acerca na futuro del organizacion. Sabe le que el cuanto maga hermano ta pensa que mas bueno que iscuji otro persona para queda presidente. Por causa con ese, ya escribi le carta con el maga hermano y ya recomenda con Evander J. Coward para queda presidente. Si Hermano Rutherford ya habla que si Hermano Coward “calmao,” “con cuidao” y “leal con el Señor.” Pero, quierre el manada hermano que hace con el eleccion despues pa del seis mes.  Ya conforma el maga abogao del maga hermano quien yan preso. Cuando ta discuti sila si cosa hace, el cuanto hermano ya rabia.

Despues, asegun con Richard H. Barber tiene quien ya pricura solva con el problema. Uno del maga quien talla ya habla: “Gendeh yo experto si cosa necesita el ley pero sabe yo si cosa necesita para queda leal. Lealtad el cosa ta pidi el Dios. El de con todo buen manera para dale kita mira lealtad con Dios amo que hace con el eleccion y iscuji otravez con Hermano Rutherford para queda presidente.”​—Sal. 18:25.

Si A. H. Macmillan na uliji ya acorda que ala-mañana si Hermano Rutherford yan tuktuk na dindin del de suyu celda y ya habla, “Hace sale con el de tuyu mano.” Despues, si Hermano Rutherford ya dale con ele un telegrama. Si Macmillan ya mira con el corto mensaje y sabe dayun le si cosa se quierre decir. El mensaje ta habla: “RUTHERFORD WISE VAN BARBER ANDERSON BULLY Y SPILL DIRECTOR PRIMER TRES OFICIAL AMOR CON TODO.” Este quierre decir que ya iscuji otravez con el todo director y si Joseph Rutherford y si William Van Amburgh ya esta como maga oficial. Poreso, si Hermano Rutherford ya continua sirvi como presidente.

Cuando na preso el ocho hermano, el maga fiel Estudiante del Biblia ya manda firma un peticion para hace sale kanila na preso. Ese maga animoso hermano y hermana ya puede ajunta mas de 700,000 firma. Del Miercoles, Marzo 26, 1919, antes man submit con el peticion, ya libra con Hermano Rutherford y con el otro pa maga hermano.

Si Hermano Rutherford ya habla con aquellos quien yan welcome con ele: “Convincido yo que este todo cosa kita ya experiencia ta prepara kanaton para na mas dificil tiempo. . . . Ya hace ustedes esfuerzo gendeh para libra con el de ustedes maga hermano na preso. Gendeh se el deverasan proposito de este trabajo. . . . El esfuerzo que ta hace ustedes amo para dale gloria con Jehova y aquellos quien ya hace con este ya ricibi bonito bendicion.”

El maga suceso durante el caso del maga hermano ta dale mira que si Jehova ta guia kanila. Del Mayo 14, 1919, el corte donde ya apela sila ya hace sale un decision: “El maga acusao na este caso nuay tiene el. . . justo proceso que debe era sila tiene poreso ya cambia el decision del corte.” Ya declara con el maga hermano que ya comete maga serioso crimen y ese decision hay esta na diila record si dale lang kanila pardon o hace lang menos con el diila sentencia. Pero, ciendo ya cambia el decision del corte y nuay otro crimen que ya acusa contra kanila, ya quita con el diila criminal record. Como resulta, ya esta cualificao si Judge Rutherford para  defende con el maga siervo de Jehova na Corte Suprema del United States, que manada beses le ya hace despues con ele libra na preso.

“Gendeh kame sinta na urilla y espera ya lang con el Señor que lleva kanamon na cielo,” ya habla si Hermano Macmillan. “Ya realiza kame que debe tiene kame cosa hace para puede sabe si cosa el voluntad del Señor.”

Pero el maga hermano na headquarters nuay dayun puede hace con el diila trabajo que ta hace sila por cuanto año. Porque? Cay cuando na preso sila, ya destroza con el todo printing plate que ta usa sila para man print maga literatura. Maka-luya este y el cuanto maga hermano ta pensa que ya acaba ya el trabajo predicacion.

Tiene pa ba gaha interesao oi con el mensaje del Reino que ta predica el maga Estudiante del Biblia? Para contesta con este, ya decidi si Hermano Rutherford que dale un talk. Invitao el todo. “Si nuay quien hay atende con este miting,” ya habla si Hermano Macmillan, “ya acaba ya kita con el trabajo predicacion.”

Poreso, del Domingo, Mayo 4, 1919, maskin tiene grabe enfermedad, si Hermano Rutherford ya dale un talk que tiene titulo “The Hope for Distressed Humanity” na Los Angeles, California. Maga 3,500 el ya atende con este y mas de cien gente el ya sale cay nuay mas onde sinta. Del siguiente dia tiene otro 1,500 el ya atende. Tiene ya contestacion el maga hermano​—interesao el maga gente!

El cosa sunod ya hace el maga hermano tiene efecto si paquemodo ta hace el maga Testigo de Jehova con el diila trabajo predicacion hasta ahora.

El Agosto 1, 1919 issue del The Watch Tower ya anuncia que na primer parte del Septiembre, tiene convencion na Cedar Point, Ohio. “Ya sinti  el todo que debe sila atende con este,” ya habla si Clarence B. Beaty, un joven Estudiante del Biblia que ta queda na Missouri. Mas de 6,000 hermano y hermana ya atende con el convencion, mas pa na cosa sila ya expecta. Mas maka-alegre pa cay tiene mas de 200 el ya bautiza na Lake Erie.

Del Septiembre 5, 1919, el ika-cinco dia del convencion, si Hermano Rutherford ya anuncia durante na de suyu talk “Address to Co-laborers” que tiene nuevo magasin que ta llama The Golden Age. * Hay “discuti este maga nuevo y importante noticia y dale explanacion base na Escritura si porque este ta sucede.”

Ya anima con el todo Estudiante del Biblia que con animo predica usando este nuevo publicacion. El un carta que ta explica si paquemodo organiza con este trabajo ya habla: “Debe acorda el cada uno sagrao [bautizao] que un grande privilegio que sirvi y hace el todo lo que puede ahora para predica na entero mundo.” Manada gente el ya acepta con ese invitacion! Del Deciembre, el maga activo predicador del Reino ya puede obtene mas de 50,000 subscription na este nuevo magasin.

Na fin del 1919, ya organiza otravez y ya queda fuerte el maga siervo de Jehova. Mas pa, ya cumpli ya el cuanto importante profecia acerca na ultimo maga dia. Ya acaba ya el probanza y el limpiada na maga siervo del Dios que ya predicta na Malaquias 3:1-4, el maga siervo de Jehova gendeh ya esclavo na “Grande Babilonia” y si Jesus ya iscuji ya con el “fiel y sabio esclavo.” * (Rev. 18:2, 4; Mat. 24:45, NW) Ahora el maga Estudiante del Biblia preparao ya na trabajo que quierre si Jehova manda hace kanila.