1. Porque kita debe dale con Jehova el diaton exclusivo devocion?

DEBE kita dale el diaton exclusivo devocion con Jehova cay ya crea y ya dale le vida kanaton. (Rev. 4:11) Pero, ta enfrenta kita dificultad. Maskin pa ta ama y ta respeta kita con Jehova, posible que gendeh kita ta puede dale con ele el exclusivo devocion que debe para con ele. Necesita kita entende si paquemodo se sucede. Pero discuti kita una si cosa quierre decir que dale con Jehova exclusivo devocion.

2. Asegun na Exodo 34:14, cosa kita hace si ta dale kita exclusivo devocion con Jehova?

² Na Biblia, para tiene devocion con Dios necesita kita tiene grande amor para con ele. Si ta dale kita exclusivo devocion con Jehova, quierre decir se que con ele lang kita ta adora. Gendeh kita permiti que tiene maskin quien o maskin cosa que man una na diaton corazon.​—Le con el Exodo 34:14.

3. Porque kita tiene buen razon para ama con Jehova?

³ Tiene kita buen razon para ama con Jehova. Ciendo manada verdad kita ya aprende acerca con ele, ya puede kita aprecia con el de suyu maga buen calidad. Sabe y tan uyun kita na cosa le quierre y no quierre. Ta entende y ta suporta kita con el de suyu proposito para na maga gente. Ta considera kita como un honor que ya permiti le queda kita de suyu amigo. (Sal. 25:14) Mas ta queda kita cerca con el diaton Creador por causa na maga cosas que ta aprende kita acerca con ele.​—Sant. 4:8.

4. (a) Cosa ta usa el Diablo para gendeh exclusivo el diaton devocion con Jehova? (b) Cosa kita discuti na este articulo?

 ⁴ El Diablo amo el ta controla con este sistema de las cosas y ta usa le con este para mas dificil kita resisti con el maga mal deseo. (Ef. 2:1-3; 1 Juan 5:19) Quierre le que ama tambien kita con este maga cosas para gendeh mas exclusivo el diaton devocion con Jehova. Considera kita dos manera que ta usa el Diablo para hace este. Una, ta pricura le influencia kanaton para ama kita con el sen. Y el ika-dos, ta influencia le kanaton para gendeh kita iscuji buen entretenimiento.

5. Porque kita debe con cuidao que gendeh principia ama con el sen?

⁵ Todo kita quierre tiene bastante comida, ropa y casa onde puede queda. Pero, debe kita con cuidao que gendeh principia ama con el sen. Manada del maga quien parte del mundo de Satanas el tiene amor na sen y si cosa este ta puede cumpra. (2 Tim. 3:2) Sabe si Jesus que el de suyu maga siguidores posible tiene este clase de amor. Ele ya habla: “Noay gente quien puede sirvi con dos amo, cay ay odia le con el uno y ama con el otro, o ay respeta le con el uno y ay desprecia le con el otro: No puede ustedes sirvi con el Dios y con el sen.” (Mat. 6:24) El deverasan, si el un persona quien ta ama con Jehova ta dale grande tiempo y esfuerzo para pricura queda rico, ta sirvi le dos amo. Gendeh le puede dale exclusivo devocion con Jehova.

6. Cosa leccion kita puede aprende na cosa ya habla si Jesus na congregacion de Laodicea?

⁶ Del primer siglo C.E., el maga miembro del congregacion na ciudad de Laodicea ya habla: “Rico yo; mucho el maga riqueza que ya puede yo hace. Noay maga cosa-cosa yo necesita.” Pero na ojos de Jehova y de Jesus, sila ‘nuay por donde y maca-lastima. Pobre,  desnudo pati bulag.’ Ya dale kanila consejo si Jesus gendeh cay rico sila sino cay el diila amor na sen ta pone na peligro con el diila relacion con Jehova. (Rev. 3:14-17) Si ta puede kita nota que ta crici ya na diaton corazon el deseo queda rico, debe kita corecta dayun con el diaton pensamiento. (1 Tim. 6:7, 8) Cay si gendeh se kita hace, hay principia kita ama otro cosas y gendeh acepta si Jehova con el diaton adoranza. Ele “ta pidi exclusivo devocion.” (Deut. 4:24) Na cosa manera perde el diaton balance mirada na sen?

7-9. Cosa tu ya aprende na experiencia de David?

⁷ Considera con el ejemplo de David, un anciano na United States. Para con ele, un buen trabajador le. Yan promote con ele na compania que ta trabaja le y ya conoce pa gane con ele como uno de maga bien bueno na clase de trabajo que ta hace le. “Na aquel tiempo, ya pensa yo que este maga cosas amo maga bendicion estaba con Jehova,” ya habla si David. Pero, estaba ba gayot este con Jehova?

⁸ Hinay-hinay ya puede mira si David que tiene negativo efecto el de suyu trabajo na de suyu relacion con Jehova. “Na maga miting na congregacion y maskin na ministerio, ta pensa siempre yo con el problema na trabajo,” ya habla le. “Grande sen yo ta puede hace pero grabe el de mio stress y ya principia tiene problema el diamon matrimonio.”

⁹ Ya realiza si David que necesita le arregla de suyu maga prioridad. “Ya decidi yo hace cambio na de mio situacion,” ya habla le. Quierre si David cambia de suyu schedule de trabajo y ya habla le este con el de suyu amo. Cosa el resulta? Ya quita con ele na trabajo! Cosa le ya hace? “Ala-mañana, yan apply yo para sirvi como un auxiliary pioneer,” ele ya habla. Ya trabaja como janitor si David y de suyu mujer para puede suporta con el diila  necesidad. Despues del cuanto tiempo, ya sirvi si David como un regular pioneer y na uliji, yan pioneer tambien el de suyu mujer. Este man maridable ya iscuji un secular trabajo que no quierre hace el otro cay para kanila, gendeh importante si cosa el diila trabajo. Maskin pa bien diutay ya lang sila ta incuntra ahora compara de antes, gendeh sila ta falta na diila necesidad cada mes. Quierre sila hace prioridad con Jehova y ya puede sila experiencia que ta cuida le con aquellos quien ta hace una con el Reino.​—Mat. 6:31-33.

10. Paquemodo kita puede guarda con el diaton corazon?

¹⁰ Rico man kita o pobre, necesita kita guarda con el diaton corazon. Paquemodo? No principia ama con el sen. Y no permiti que queda mas importante contigo el de tuyu trabajo contra con el de tuyu servicio con Jehova. Paquemodo tu sabe si ta sucede ya se contigo? Puede tu pregunta na de tuyu mismo cuerpo: ‘Mucho beses ba yo ta pensa acerca na de mio trabajo si talli yo na miting o na ministerio? Pirmi ya lang ba yo tan lingasa si tiene yo bastante sen para na futuro? Ta tiene ba problema el diamon matrimonio por causa na sen y na material cosas? Conforme ba yo hace trabajo que no quierre hace el otro para puede yo mas dale grande tiempo na de mio servicio con Jehova?’ (1 Tim. 6:9-12) Mientras ta pensa kita con este maga pregunta, acorda kita que ta ama kanaton si Jehova y ta promete le con todo quien deverasan ta ama con ele: “Hende yo nunca ay deja ni abandona con ustedes.” Poreso, si apostol Pablo ya escribi: “No pone ya lang el di ustedes pensamiento con el cen.”​—Heb. 13:5, 6, El Nuevo Testamento.

11. Cosa puede hace el entretenimiento na un gente?

¹¹ Quierre si Jehova que queda kita alegre y el entretenimiento puede ayuda kanaton hace se. Gane, el Palabra del Dios ta habla que “nuay cosa pa mas bueno para na un gente contra come, toma y queda alegre na de suyu trabajo.” (Ecl. 2:24) Pero, manada del maga entretenimiento na mundo ahora puede tiene mal efecto kanaton. Ta hace este bajo con el moral principio del maga gente. Puede este causa con el maga gente para acepta o ama pa gane con el maga cosas que gendeh aceptable na Palabra del Dios.

12. Asegun na 1 Corinto 10:21, 22, porque kita debe iscuji enbuenamente con el diaton entretenimiento?

¹² Quierre kita dale exclusivo devocion con Jehova poreso gendeh kita puede come na  “mesa del Señor” y na “mesa del maga demonio.” (Le con el 1 Corinto 10:21, 22.) Si ta come kita junto na un persona, este ta dale mira que amigo le diaton. Si ta iscuji kita entretenimiento que ta dale mira violencia, espiritismo, imoralidad y otro pa mal deseo y custumbre, igual lang se como ta come kita con el comida que ya prepara el maga enemigo del Dios. Como resulta, ta pone kita na peligro el diaton vida y el diaton buen relacion con Jehova.

13-14. Base na Santiago 1:14, 15, porque kita debe con cuidao si cosa entretenimiento kita ta iscuji? Dale ejemplo.

¹³ Considera cuanto manera que el entretenimiento igual na comida. Si ta come kita, puede kita iscuji si cosa kita pone na diaton boca. Pero si ya traga ya kita con el comida, gendeh mas kita puede controla si paquemodo quel afecta na diaton cuerpo. El maga sustancioso comida puede kanaton dale buen salud pero si gendeh sustancioso el cosa kita ta come, tiene se mal efecto kanaton. Posible que gendeh kita dayun puede nota pero llega el tiempo, puede siempre kita mira el mal efecto de este.

¹⁴ Na igual manera, si ta iscuji kita entretenimiento, puede kita iscuji si cosa kita pone na diaton pensamiento. Despues de ese, gendeh mas kita puede controla si paquemodo este afecta na diaton pensamiento y corazon. Bueno el resulta del buen entretenimiento pero peligroso para kanaton el gendeh buen entretenimiento. (Le con el Santiago 1:14, 15.) Posible que gendeh kita dayun puede nota con el mal efecto del mal entretenimiento pero llega el tiempo, puede siempre kita experiencia con ese. Poreso, el Biblia ta dale kanaton aviso: “No engaña con el de ustedes mismo cuerpo: Noay quien ta puede hace loco con Dios. Cosa el gente ta siembra, ese tamen ele ay cosecha. Si quien ta siembra na maga deseo malo del cuerpo, ele ay cosecha maga fruta de muerte alli na disuyo mismo cuerpo.” (Gal. 6:7, 8) Bien importante gayot que evita con el todo entretenimiento que ta dale mira maga cosas que ta odia si Jehova!​—Sal. 97:10.

15. Cosa regalo kanaton ya dale si Jehova?

¹⁵ Manada del maga siervo de Jehova el quierre-quierre mira JW Broadcasting^®, el diaton Internet television station. Un hermana, si Marilyn, ya habla: “El JW Broadcasting ya ayuda conmigo queda mas positivo y gendeh yo necesita iscuji programa cay todo quel para na bien de mio. Si ta sinti yo triste o tan luya, ta busca yo talk o programa de Morning Worship que puede anima conmigo. Como resulta, ta sinti yo que mas cerca yo con Jehova y con el de suyu organizacion. Por causa na JW Broadcasting, ya cambia gayot de mio vida.” Ta beneficia ba tambien tu na este regalo de Jehova? Puera na nuevo programa cada mes, tiene tambien maga audio y video program y maga cancion na JW Broadcasting.

16-17. Porque kita debe controla con el tiempo que ta usa kita na entretenimiento y paquemodo se kita hace?

¹⁶ Debe con cuidao kita gendeh lang na clase del diaton entretenimiento sino na tiempo que ta usa kita aqui. Cay si gendeh kita controla con ese, baka mas grande tiempo ya kita ta usa na entretenimiento en vez na servicio con Jehova. Manada el tan dificil controla con el tiempo que ta usa sila na entretenimiento. Un 18 año hermana, si Abigail, ya habla: “Despues del entero dia, tan relax yo si ta mira yo TV. Pero si gendeh yo con cuidao, puede yo mira TV por cuanto hora.” Un joven hermano que si Samuel ya habla: “Tiene vez, ta mira yo manada corto video na Internet. Na primero, un video lang yo ta mira pero nuay yo puede nota que ya pasa ya gale tres o cuatro hora.”

 ¹⁷ Paquemodo tu puede controla de tuyu tiempo na entretenimiento? El primer cosa que hace tu amo sabe si cuanto hora tu ta usa na entretenimiento. Cosa gaha si hace tu record de un semana? Escribi na calendario si cuanto hora tu ya usa para mira TV, man internet y huga na de tuyu gadget. Si ta sinti tu que sobra ya el tiempo que ta usa tu para alli, hace schedule. Hace una si cosa el mas importante y despues, dale tiempo para na entretenimiento. Pidi con Jehova que ayuda contigo hace si cosa tu ya plaña. Si hace tu se, tiene tu tiempo y fuerza para na de tuyu personal estudiada, de familia adoranza, miting na congregacion y na trabajo predicacion y enseñada. Y posible, gendeh tu man conciencia na de tuyu tiempo na entretenimiento ciendo ya hace tu una el servicio con Jehova.

18-19. Paquemodo kita dale mira que ta dale kita diaton exclusivo devocion con Jehova?

¹⁸ Despues escribi si apostol Pedro acerca na fin del mundo de Satanas y el nuevo mundo que llega, ele ya habla: “Mi maga hermano y hermana, mientras ta espera pa ustedes con ese Promesa, precura ustedes vivi un vida santo [“sagrao,” NW] y noay culpa para ay puede Le encontra con ustedes con paz.” (2 Ped. 3:14) Si ta sigui kita con ese consejo y ta hace el todo para esta limpio na moral y espiritual, ta dale kita diaton exclusivo devocion con Jehova.

¹⁹ Si Satanas y el de suyu sistema hay continua influencia kanaton para cambia diaton prioridad. (Luc. 4:13) Pero maskin cosa dificultad pa kita enfrenta, gendeh kita permiti que tiene maskin quien o maskin cosa que man una na diaton corazon. Determinao kita dale con Jehova el cosa que solamente para con ele​—el diaton exclusivo devocion!