1-2. (a) Cosa cerca ya proclama el maga lider del mundo? (b) Cosa maga pregunta kita necesita contesta?

IMAGINA que nuevo lang ya hace el maga lider del mundo con el declaracion de “paz y seguridad.” Posible, man hambug sila que tiene ya gayot seguridad el mundo. Quierre el maga lider que pensa kita que puede sila solva con el todo problema del mundo. Pero nuay gayot sila cosa puede hace na cosa sunod sucede! Porque man? Asegun na profecia na Biblia, “un tiro lang ay vene el calamidad de destroso. . . . Y no puede sila escapa.”​—1 Tes. 5:3, El Nuevo Testamento.

² Tiene maga importante pregunta que necesita contesta: Cosa sucede durante el “grande tribulacion”? Cosa hay expecta si Jehova que hace kita na ese tiempo? Y paquemodo kita puede prepara ahora para esta fiel durante el grande tribulacion?​—Mat. 24:21, NW.

3. Asegun na Revelacion 17:5, 15-18, paquemodo destroza el Dios con el “Grande Babilonia”?

³ Le con el Revelacion 17:5, 15-18. Hay destroza ya con el “Grande Babilonia”! Como ya menciona enante, nuay gayot cosa puede hace el maga lider del mundo na cosa sucede na ese tiempo. Porque? Cay “el Dios amo [hay] pone ese na diila  pensamiento para cumpli sila el disuyo mismo plano.” Cosa se plano? Para destroza con el imperio del falso religion, incluido ya el falso Cristianidad. * El Dios hay pone con el de suyu plano na pensamiento del “dies cuerno” del “Grande Animal colorao brillante.” El diez cuerno ta representa con el todo gobierno que ta suporta con el “Grande Animal”​—el United Nations. (Rev. 17:3, 11-13; 18:8) Si ese maga gobierno hay ataca con el falso religion, señal se que principia ya el grande tribulacion. Derepente y maka-miedo este suceso donde hay sale afectao el todo na tierra.

4. (a) Cosa posible el razon que dale el maga lider del mundo si porque sila ya ataca con el falso religion? (b) Cosa posible hace el maga miembro de este maga religion?

⁴ No sabe kita si cosa razon dale el maga lider del mundo si porque sila ya ataca con el Grande Babilonia. Posible, habla sila que el maga religion el razon si porque nuay paz entre na maga nacion y pirmi este ta entramete na politica. O baka habla sila que bien rico ya y manada propiedad este maga organizacion. (Rev. 18:3, 7) Si ataca el maga lider con el falso religion, posible gendeh sila destroza con todo miembro de este. Sino, hay destroza sila con el todo maga religioso organizacion. Si destrozao ya este maga organizacion, el maga miembro de este de antes puede realiza que nuay cosa ya puede hace el maga religioso lider y posible, hay sale sila con ese maga religion.

5. Cosa ya promete si Jehova acerca na grande tribulacion y porque?

⁵ Nuay habla el Biblia si paquemodo de tarda el destrozo del Grande Babilonia pero sabe kita que por corto tiempo lang este. (Rev. 18:10, 21) Ya promete si Jehova que “mengua Le esos maga dias” de tribulacion para salva con el “maga escujido” y con el verdadero religion. (Mar. 13:19, 20) Pero cosa expecta si Jehova que hace kita na principio del grande tribulacion hasta na guerra del Armagedon?

6. Porque gendeh bastante que separta lang na falso religion?

⁶ Como cosa ya discuti del ya pasa articulo, ta expecta si Jehova que aquellos ta adora con ele hay separta na Grande Babilonia. Pero, gendeh lang se el cosa kita debe hace. Debe tambien kita queda determinao sirvi con Jehova. Considera kita dos manera que puede kita hace.

7. (a) Paquemodo kita puede continua sigui con el maga justo principio de Jehova na moral? (b) Paquemodo el Maga Hebreo 10:24, 25 ta hace claro que bien importante man junto-junto na miting, especialmente na diaton tiempo ahora?

⁷ Una, debe kita continua sigui con el maga justo principio de Jehova na moral. Gendeh kita debe acepta con el imoral conducta del maga gente na mundo. Por ejemplo, gendeh aceptable kanaton el maskin cosa clase de sexual imoralidad, incluido ya el same-sex marriage y practica de homosexualidad. (Mat. 19:4, 5; Roma 1:26, 27) Ika-dos, debe kita continua adora junto con el diaton maga hermano y hermana na fe. Ta hace kita con este na Kingdom Hall, na maga privado casa o maskin escondido. Maskin cosa pa sucede, gendeh kita debe descanza anda na miting. Gane, mas necesita kita man junto-junto “cay ta mira [kita] que cerca ya el Dia.”​—Le con el Maga Hebreo 10:24, 25.

8. Paquemodo posible cambia el diaton mensaje na futuro?

⁸ Durante el grande tribulacion, posible cambia el mensaje que hay proclama kita. Ahora, ta predica kita acerca na buen noticia del Reino y ta pricura kita hace maga dicipulo. Pero llega ese tiempo, posible que bien franca ya el diaton mensaje. El Biblia ya compara con este na ulan de hielo. (Rev. 16:21) Posible, predica kita que bien cerca ya destroza con el mundo de Satanas. Llega el tiempo, sabe siempre kita si cosa ba gayot ese mensaje y si paquemodo se kita proclama. Usa ba kita siempre con el diaton manera de predicacion y enseñada que ta usa kita por mas de cien año ya? O usa kita otro manera? Necesita kita espera para sabe. Pero maskin paquemodo pa kita predica, asigurao tiene kita privilegio predica con coraje con el mensaje de juzgamiento de Jehova.​—Eze. 2:3-5.

9. Cosa posible el reaccion del maga lider del mundo na diaton mensaje, pero na cosa kita asigurao?

⁹ Grande el posibilidad que el diaton mensaje hay causa con el maga lider del mundo para pricura kanaton hace descanza. Igual si paquemodo kita ta depende na suporta de Jehova na diaton ministerio ahora, necesita tambien kita depende na de suyu suporta na futuro. Puede kita asigura que hay dale kanaton si Jehova el fuerza para puede cumpli con el de suyu proposito.​—Miq. 3:8.

10. Como ya predicta na Lucas 21:25-28, cosa el reaccion del mayoria del maga gente durante el grande tribulacion?

¹⁰ Le con el Lucas 21:25-28. Na grande tribulacion, hay espanta el maga gente mientras ta mira sila que principia perde el maga cosas que pensaba sila esta permanente. Hay experiencia sila “sufrimiento” y man lingasa que baka muri sila na este de con todo dificil tiempo na historia del gente. (Sof. 1:14, 15) Na ese tiempo, posible que mas queda dificil el vida maskin del maga siervo de Jehova. Cay gendeh kita parte del mundo, posible que experiencia kita maga dificultad. Posible que gendeh kita puede obtene el maga cosas que necesita kita.

11. (a) Porque el maga Testigo de Jehova queda centro de atencion del otro? (b) Porque gendeh kita debe tiene miedo na grande tribulacion?

 ¹¹ Llega el tiempo, rabia el otro maga gente cay ya destroza con el diila religion pero el maga Testigo de Jehova ta continua na diila adoranza. Asigurao que manda gayot sila sabe con otro si paquemodo sila de rabiao, por ejemplo na social media. El maga lider del mundo y si Satanas hay rabia gayot kanaton cay el diaton religion ya lang nuay destroza. Nuay sila puede cumpli con el diila plano que quita con el todo religion na mundo. Poreso, queda kita centro del diila atencion. Na este tiempo, el maga lider del mundo hay queda el Gog de Magog. * Hay queda sila unido y hace todo esfuerzo para ataca con el maga siervo de Jehova. (Eze. 38:2, 14-16) Baka man lingasa kita si cosa sucede durante el grande tribulacion, especialmente cay no sabe kita el exacto detalle. Pero, este kita asigurao: Gendeh kita debe tiene miedo na grande tribulacion. Hay dale instruccion si Jehova para salva kita. (Sal. 34:19) Puede kita “tene animo y levanta el [diaton] maga cabeza” cay sabe kita que el diaton “liberacion cerca ya.” *

12. Na cosa manera ta prepara kanaton el “fiel y sabio esclavo” si cosa sucede na futuro?

¹² El “fiel y sabio esclavo” ta prepara kanaton para esta kita fiel na grande tribulacion. (Mat. 24:45, NW) Ta hace se sila na manada manera. Pero considera kita un ejemplo: el maga programa na diaton asemblea de region del año 2016-2018. Na este maga programa, ya anima kanaton que hace fuerte con el maga calidad que necesita kita mientras ta queda cerca el dia de Jehova. Man repaso kita con el cuanto de ese maga calidad.

13. Paquemodo kita hace fuerte con el diaton lealtad con Jehova y porque kita se debe hace ahora?

¹³ Lealtad: El tema del 2016 asemblea de region amo “Remain Loyal to Jehovah!” Este programa ya enseña kanaton que si tiene kita fuerte relacion con Jehova, hay queda kita leal con ele. Ya hace este acorda kanaton que puede kita queda cerca con Jehova si sincero kita reza y estudia enbuenamente con el de suyu Palabra. Si hace kita se, tiene kita el fuerza para puede enfrenta maskin maga bien dificil probanza. Mientras ta queda cerca el fin del sistema de Satanas, puede kita expecta que mas pone na probanza con el diaton lealtad con Dios y na de suyu Reino. Posible que continua kanaton gangguia el maga gente. (2 Ped. 3:3, 4) Hay sucede se por causa na diaton neutralidad. Debe kita hace fuerte con el diaton lealtad ahora para puede kita esta leal na grande tribulacion.

14. (a) Cosa cambio hay sucede con el maga hermano quien ta guia con el maga siervo del Dios na tierra? (b) Porque kita necesita queda leal na ese tiempo?

¹⁴ Durante el grande tribulacion, tiene cambio hay sucede con el maga hermano quien ta guia con el maga siervo del Dios na tierra. Llega el tiempo, todo el maga iscujido que taqui pa na tierra hay lleva na cielo para participa na guerra de Armagedon. (Mat. 24:31; Rev. 2:26, 27) Quierre decir este que nuay mas ya el Cuerpo Gobernante aqui na tierra. Pero, el grande grupo hay esta siempre  organizao. El maga cualificao hermano que parte del otro maga carnero amo guia con el maga siervo del Dios. Puede kita dale mira que leal kita con Jehova si suporta kita con este maga hermano y sigui con el diila direccion que estaba con Dios. Necesita kita obedece kanila para salva.

15. Paquemodo kita puede hace fuerte el diaton abilidad aguanta y porque este importante ahora?

¹⁵ Continua aguanta: El tema del 2017 asemblea de region amo “Don’t Give Up!” Este programa ya ayuda hace fuerte con el diaton abilidad aguanta na maga probanza. Ya aprende kita que puede kita aguanta si confia kita con Jehova y gendeh este ta depende na diaton situacion. (Roma 12:12) Ojala acorda kita con el promesa de Jesus: “Si quien ay resisti hasta el fin, ay salva gayot.” (Mat. 24:13) Este promesa quierre decir que debe kita esta fiel maskin cosa dificultad pa kita experiencia. Si puede kita aguanta na todo diaton maga probanza ahora, hay queda mas fuerte el diaton fe antes principia el grande tribulacion.

16. Na onde ta depende el diaton coraje y paquemodo kita hace fuerte el diaton coraje ahora?

¹⁶ Coraje: El tema del 2018 asemblea de region amo “Tiene Coraje!” Este programa ya manda acorda kanaton que el diaton coraje gendeh ta depende na diaton personal abilidad. Igual si paquemodo kita necesita confia con Jehova para continua aguanta, necesita tambien kita confia con Jehova para tiene deverasan coraje. Paquemodo kita hace fuerte el diaton confianza con Jehova? Por medio de lehida del de suyu Palabra todo’l dia y medita si paquemodo si Jehova ya salva con el de suyu maga siervo de antes. (Sal. 68:20; 2 Ped. 2:9) Si el maga lider del mundo hay ataca kanaton durante el grande tribulacion, necesita kita tiene coraje y confia pa mas con Jehova. (Sal. 112:7, 8; Heb. 13:6) Si confia kita con Jehova ahora, hay tiene kita el coraje que necesita kita si ataca el Gog. *

17. Porque gendeh kita debe tiene miedo na Armagedon? (Mira con el letrato na cover.)

¹⁷ Como ya menciona del ya pasa articulo, mayoria kanaton ya nace y ya vivi durante del  ultimo maga dia. Pero, ta esperanza tambien kita que sobrevivi na grande tribulacion. El guerra de Armagedon amo el fin del sistema del maga cosas. Pero, gendeh kita debe tiene miedo. Porque? Cay guerra este del Dios. (Prov. 1:33; Eze. 38:18-20; Zac. 14:3) Na mandato de Jehova, si Jesucristo hay guia con el maga soldao del Dios na guerra. Junto con ele el bien manada angel y maga iscujido que ya resucita. Y todo sila hay man guerra contra con Satanas, con el de suyu maga demonio y con el maga contrario na tierra.​—Dan. 12:1; Rev. 6:2; 17:14.

18. (a) Cosa si Jehova ya asigura kanaton? (b) Paquemodo el Revelacion 7:9, 13-17 ta dale contigo razon para confia que salva tu na futuro?

¹⁸ Si Jehova ya asigura: “Maskin cosa armas hace contra contigo gendeh tiene buen exito.” (Isa. 54:17) El grande grupo del maga fiel siervo de Jehova amo el quien hay “sale victorioso na grande persecucion.” Sila hay continua sirvi con Jehova. (Le con el Revelacion 7:9, 13-17.) El Biblia ta dale kanaton manada razon para confia que salva kita na futuro! Sabe kita que “ta protege si Jehova con el maga fiel.” (Sal. 31:23) Todo quien ta ama y ta alaba con Jehova alegre mira que vindica le con el de suyu sagrao nombre.​—Eze. 38:23.

19. Cosa el bonito esperanza que hay experiencia kita na futuro?

¹⁹ Pensa si cosa posible habla el 2 Timoteo 3:2-5 acerca con el maga gente quien queda na nuevo mundo que gendeh bajo na influencia de Satanas. (Mira con el cajon “ El Custumbre del Maga Gente na Futuro.”) Si Hermano George Gangas, * quien ya sirvi como un miembro del Cuerpo Gobernante, ya habla: “El entero mundo hay queda un bien bonito lugar si todo ta adora con Jehova! Gendeh tarda, hay tiene ustedes privilegio vivi na nuevo sistema del maga cosas. Hay vivi kita hasta para cuando igual con Jehova.” Un bonito esperanza gayot este!