1. Cosa ya puede convinci kanaton que ta vivi ya kita na “ultimo maga dia”?

YA NACE ba tu despues del 1914? Si ansina, ya vivi tu durante del “ultimo maga dia” del presente sistema del maga cosas. (2 Tim. 3:1) Todo kita ya puede oi acerca na maga suceso que ya predicta si Jesus na este tiempo. Ta inclui este maga guerra, escasez de comida, temblor, enfermedad, grabe maldad y el persecucion na maga siervo de Jehova. (Mat. 24:3, 7-9, 12; Luc. 21:10-12) Ta puede tambien kita mira con el maga custumbre del maga gente como cosa ya predicta si apostol Pablo. (Mira con el cajon “ El Custumbre del Maga Gente Ahora.”) Como maga Testigo de Jehova, convincido kita que ta vivi ya kita “na ultimo parte del maga dia.”—Miq. 4:1.

2. Cosa maga pregunta kita necesita contesta?

² Ciendo largo tiempo ya el ya pasa desde 1914, ta vivi ya gayot kita na ultimo parte de este “ultimo maga dia.” Cay cerca ya el fin, necesita kita sabe con el contestacion na cuanto importante pregunta: Cosa hay sucede na fin del “ultimo maga dia”? Y cosa expecta si Jehova que hace kita mientras ta sucede se maga suceso?

3. Asegun na profecia na 1 Tesalonica 5:1-3, cosa hay anuncia el maga nacion?

³ Le con el 1 Tesalonica 5:1-3, El Nuevo Testamento. Ya menciona si Pablo con el “venida del Señor” o dia de Jehova. Na este texto, ta refiri este con el tiempo donde principia man  ataque con el “Grande Babilonia,” el imperio del falso religion y hay termina na Armagedon. (Rev. 16:14, 16; 17:5) Antes se principia, el maga nacion hay anuncia “paz y seguridad.” El maga lider del mundo tiene vez ta usa con este expresion si ta discuti si paquemodo mas tiene buen relacion entre na maga nacion. * Pero, diferente el declaracion de “paz y seguridad” que ta menciona na Biblia. Porque? Cay cuando sucede se, hay pensa el maga gente que el maga lider del mundo ya puede ya lleva deverasan seguridad na mundo. Pero el deverasan, hay principia el “grande tribulacion” y despues, na “un tiro lang ay vene el calamidad de destroso.”—Mat. 24:21, NW.

4. (a) Cosa kita no sabe acerca na declaracion de “paz y seguridad”? (b) Cosa ya kita sabe acerca con ese?

⁴ Tiene kita cosa sabe acerca na declaracion de “paz y seguridad.” Pero, tiene cuanto cosa que no sabe kita. No sabe kita si cosa causa con el maga lider para anuncia con ese declaracion o paquemodo se sila hace. Y no sabe kita si tiene ba manada declaracion o uno lang. Maskin cosa pa sucede, este el cosa kita sabe: Gendeh kita debe pensa que el maga lider del mundo puede lleva deverasan paz. Sino, debe kita pensa que este el cosa ya habla kanaton el Biblia que debe kita vicia. Señal este que principia ya el dia de Jehova!

5. Paquemodo el 1 Tesalonica 5:4-6 ayuda kanaton para queda kita preparao na dia de Jehova?

⁵ Le con el 1 Tesalonica 5:4-6. Ya habla kanaton si Pablo si cosa kita debe hace para queda preparao na dia de Jehova. “No kita durmi como ta hace el los demas” y “esta kita firmi alerto.” Por ejemplo, necesita kita esta neutral y gendeh participa na maga issue de politica. Cay si participa kita con ese, queda kita parte “del mundo.” (Juan 15:19) Sabe kita que el Reino del Dios amo el solamente esperanza para tiene paz el mundo.

6. Cosa kita quierre que hace el otro y porque?

⁶ Puera que esta kita alerto, quierre tambien kita ayuda con otro para aprende si cosa ta predicta el Biblia que sucede na mundo. Necesita kita hace con ese ahora cay si principia ya el grande tribulacion, atrasao ya para con el maga gente que sirvi con Jehova. Poreso, importante gayot que predica ahora! *

7. Cosa ta expecta si Jehova que hace kita ahora?

⁷ Na corto tiempo antes principia el dia de Jehova, ta expecta le que queda kita ocupao na trabajo predicacion. Necesita kita asigura que “hace mucho buen trabajo para con el Señor.” (1 Cor. 15:58, El Nuevo Testamento) Ya predicta si Jesus si cosa kita hace. Cuando ya discuti le acerca na maga importante cosas  que hay sucede durante na ultimo maga dia, ele ya omenta: “Cay necesita proclama una el Buen Noticia na todo maga nacion.” (Mar. 13:4, 8, 10; Mat. 24:14) Pensa con este: Cada vez tu anda na ministerio, ta ayuda tu cumpli con el profecia na Biblia.

8. Porque kita puede habla que ta progresa el trabajo predicacion?

⁸ Cosa kita puede habla acerca na progreso del trabajo predicacion? Cada año, mucho maga gente el quien ta oi con el buen noticia del Reino. Por ejemplo, pensa con el progreso del maga publisher na entero mundo durante na ultimo maga dia. Del 1914, tiene 5,155 publisher na 43 nacion. Ahora, tiene ya maga 8.5 millon publisher na 240 nacion! Pero nuay pa acaba el diaton trabajo. Debe kita continua predica que el Reino del Dios amo el solamente solucion na maga problema del maga gente.—Sal. 145:11-13.

9. Porque kita debe continua predica con el mensaje del Reino?

⁹ Termina lang el diaton trabajo si habla ya si Jehova que ya acaba ya este. Paquemodo de corto ya lang el tiempo ya queda para conoce el maga gente con Jehova y con Jesucristo? (Juan 17:3) No sabe kita. Pero, sabe kita que antes principia el grande tribulacion, “aquellos quien tiene justo condicion de corazon para obtene vida eterna” puede pa acepta con el buen noticia y iscuji sirvi con Jehova. (Act. 13:48, NW) Paquemodo kita puede ayuda con este maga gente mientras gendeh pa atrasao?

10. Cosa ayuda ta dale kanaton si Jehova para enseña con el maga gente el verdad?

¹⁰ Por medio na organizacion de Jehova, ta dale le kanaton el todo cosa kita necesita para enseña con el maga gente el verdad. Por ejemplo, ta ricibi kita training cada semana na diaton midweek miting. Este miting ta ayuda kanaton para sabe si cosa kita habla si ta predica y tan return visit. Y ta enseña este kanaton si paquemodo conduci maga Bible study. El organizacion de Jehova ta dale tambien kanaton maga tool na diaton Teaching Toolbox. Este maga tool ta ayuda kanaton para . . .

• principia predica,

• presenta con el mensaje na manera que tiene interes el maga gente,

• ayuda con el maga gente para queda mas interesao na Biblia,

•   enseña con el verdad na maga Bible study y

• invita con el maga interesao que visita con el diaton website y atende na Kingdom Hall.

Siempre, gendeh bastante que tiene lang kita ese maga tool. Debe kita usa con este. * Por ejemplo, si ya deja tu un tract o magasin con el un interesao despues tu predica con ele, tiene ele cosa le hasta puede ustedes man cuento otravez. Responsibilidad diaton que esta ocupao cada mes na trabajo predicacion.

11. Porque ya hace con el Online Bible Study Lessons?

¹¹ El otro ejemplo que si Jehova ta ayuda con el maga gente aprende el verdad amo por medio de Online Bible Study Lessons na jw.org^®. Porque ya hace con este maga leccion? Cada semana, bien manada gente na entero mundo ta busca maga leccion na Biblia na Internet. El maga leccion na diaton website puede ayuda con el maga gente aprende con el Palabra del Dios. El cuanto gente que ya predica tu posible tiene huya acepta Bible study junto con el un persona. Si ansina, dale mira kanila el seccion na diaton website o imbia con el link de este maga leccion. *

12. Cosa puede aprende el un persona na Online Bible Study Lessons?

¹² El diaton Online Bible Study Lessons ta discuti con este maga topico: “The Bible and Its Author,” “The Bible’s Main Characters” y “The Bible’s Message of Hope.” Mientras ta estudia con este maga leccion, el un persona hay aprende:

• Si paquemodo puede ayuda con ele el Biblia

• Si quien si Jehova, si Jesus y el maga angel

• Si porque ya crea el Dios con el maga gente

• Si porque tiene sufrimiento y maldad

El maga leccion ta discuti tambien si paquemodo si Jehova . . .

• termina con el sufrimiento y muerte,

• resucita con el maga muerto y

• cambia con el maga gobierno del gente por medio na Reino del Dios.

13. El maga online lesson ba ya cambia con el arreglamiento de Bible study junto con el un Testigo de Jehova? Explica.

¹³ El maga online lesson nuay cambia con el arreglamiento de Bible study junto con el un Testigo de Jehova. Ya dale si Jesus kanaton el privilegio que hace maga dicipulo. Ta esperanza kita que le el maga interesao con el maga online lesson, aprecia si cosa sila ta aprende y aprende pa mas. Posible acepta ya sila Bible study. Na fin del cada leccion, ta invita con el quien ta le que man submit request para na un Bible study junto con el un persona. Cada dia, el diaton organizacion ta ricibi mas de 230 Bible study request na entero mundo por medio na diaton website! Importante gayot que tiene quien ayuda con el interesao!

14. Asegun na instruccion de Jesus na Mateo 28:19, 20, cosa kita pricura hace y porque?

¹⁴ Le con el Mateo 28:19, 20. Si ta conduci kita maga Bible study, necesita kita hace el todo lo que puede para “hace maga dicipulo . . . y insina canila obedece todo el que ya manda [si Jesus].” Necesita kita ayuda con el maga gente para entende si paquemodo de importante que iscuji sila sirvi con Jehova y suporta con el de suyu Reino. Este quierre decir que pricura kita ayuda con el maga gente para aplica con el cosa sila ta aprende, dedica diila  vida con Jehova y queda bautizao. Amo lang se el solamente manera para puede sila salva na dia de Jehova.—1 Ped. 3:21.

15. Nuay kita tiempo na cosa y porque?

¹⁵ Como cosa ya menciona enante, bien corto ya lang el tiempo antes llega el fin de este sistema del maga cosas. Poreso, nuay kita tiempo para continua man Bible study con el maga gente que nuay intencion queda dicipulo del Cristo. (1 Cor. 9:26) Bien apuro el diaton trabajo! Bien manada gente pa el ta necesita oi con el mensaje del Reino mientras gendeh pa atrasao.

16. Asegun na Revelacion 18:2, 4, 5, 8, cosa kita todo debe hace? (Mira tambien con el footnote.)

¹⁶ Le con el Revelacion 18:2, 4, 5, 8. Este maga texto ta dale mira si cosa pa ta expecta si Jehova con aquellos quien ta adora con ele. Debe asigura el todo maga Cristiano que nuay gayot sila coneccion na maskin cosa parte del Grande Babilonia. Antes aprende el verdad, posible que el un estudiante del Biblia miembro de un falso religion. Posible ta atende y ta participa le na maga religioso actividad de este. O baka ta dale le donacion na ese organizacion. Para queda le cualificao como un unbaptized publisher, debe le asigura que nuay mas le coneccion na falso religion. Debe le escribi carta na de suyu religion de antes o na maskin cosa organizacion que conectao na falso religion para manda sabe que gendeh ya le miembro de ese. *

17. Cosa clase de secular trabajo debe evita el un Cristiano y porque?

¹⁷ Debe asigura el un deverasan Cristiano que el de suyu secular trabajo gendeh conectao na Grande Babilonia. (2 Cor. 6:14-17) Por ejemplo, gendeh le debe trabaja na un iglesia. Y gendeh tambien conforma el un Cristiano hace grande trabajo na un facilidad que ta suporta con el falso adoranza. Y si tiene le negocio, gendeh le saca o acepta trabajo que tiene coneccion na Grande Babilonia. Porque kita determinao hace con este? Cay no quierre kita tiene parte na maga falso enseñanza y na maga mal practica del falso religion que mabuling na ojos del Dios.—Isa. 52:11. *

18. Paquemodo el un hermano ya obedece con el principio del Biblia acerca na de suyu secular trabajo?

¹⁸ Cuanto año ya el ya pasa, ya pidi el un  contractor con el un carpintero anciano que hace un diutay trabajo na iglesia na lugar donde ta queda el hermano. Sabe el contractor que este hermano no quierre trabaja na iglesia. Pero na este tiempo, necesita ya gayot trabajante el contractor. Maskin pa ansina, determinao este hermano que aplica con el principio del Biblia y nuay acepta con el trabajo. Na siguiente semana, el un local newspaper ya dale mira letrato del un carpintero que ta pone cruz na iglesia. Si yan compromiso el hermano, el de suyu letrato era el talli na newspaper. Pensa con el posible efecto de este na de suyu reputacion na maga hermano! Pensa tambien si cosa gaha sinti si Jehova.

19-20. (a) Cosa kita ya aprende? (b) Cosa pa kita necesita aprende?

¹⁹ El Biblia ya habla que el siguiente importante profecia que cerca ya sucede amo el declaracion del maga lider del mundo de “paz y seguridad.” Cay ya enseña kanaton si Jehova, sabe kita que el maga nacion gendeh puede dale deverasan y permanente paz na mundo. Cosa kita debe hace antes se sucede y el derepente destrozo de este? Ta expecta si Jehova que esta kita ocupao predica con el mensaje del Reino y pricura hace mucho dicipulo. Y necesita kita esta separtao na todo falso religion. Incluido aqui que gendeh mas queda parte y no hace trabajo que tiene coneccion na Grande Babilonia.

²⁰ Tiene pa otro cosas que sucede na fin del “ultimo maga dia.” Tiene tambien otro cosas que ta expecta si Jehova que hace kita. Cosa este y paquemodo kita prepara con el diaton mismo cuerpo na maga cosas que sucede na futuro? Mira kita na siguiente articulo.