TA EXAMINA el weather forecaster con el letrato del un peligroso tifun que ya puede man detect el radar. Ese tifun paspas ta corre na un lugar que manada gente. Cay quierre le salva con el maga gente, ya hace le el todo para dale aviso kanila mientras gendeh pa atrasao.

Na igual manera, si Jehova ahora ta dale aviso con el todo maga gente acerca na un “tifun” que mas peligroso pa. Paquemodo se ele ta hace? Y porque kita asigurao que ta dale le bastante tiempo con el maga gente para responde? Para contesta con ese, considera kita una con el cuanto aviso que ya dale si Jehova del antes.

Na tiempo del Biblia, si Jehova ya dale aviso acerca na diferente “tifun” o acto de juzgamiento que hay hace le contra con aquellos quien intencional ta desobedece con el de suyu maga mandamiento. (Prov. 10:25; Jer. 30:23) Na cada situacion, ta dale le abante aviso con el maga desobediente y ya habla kanila si cosa sila debe hace para obedece con ele. (2 Rey 17:12-15; Neh. 9:29, 30) Para ayuda con el maga gente quien quierre hace el necesita cambio, ta usa le con el de suyu maga leal siervo para anuncia con el de suyu juzgamiento y hace entende con el maga gente que debe sila actua dayun.​—Amos 3:7.

Uno del maga leal siervo del Dios amo si Noe. Por cuanto año, con coraje le ya dale aviso con el maga imoral y violente gente acerca na Grande Avenida. (Gen. 6:9-13, 17) Ya habla tambien le si cosa sila necesita hace para salva. Ya hace le grande esfuerzo para predica poreso na uliji, ya llama con ele como el ta “conversa por causa del justicia.”​—2 Ped. 2:5.

Maskin pa na maga esfuerzo de Noe, ya ignora el maga gente con el mensaje del Dios. Ya dale sila mira que nuay sila fe. Como resulta, ya muri sila cuando “ya llega el avenida y ya man anud sila todo.” (Mat. 24:39; Heb. 11:7) Gendeh gayot sila puede habla que nuay kanila dale aviso el Dios.

Na otro situacion, si Jehova ya dale aviso cuando cerca ya llega el de suyu juzgamiento. Maskin pa ansina, ya asigura le que tiene sila bastante tiempo para responde. Por ejemplo, ya dale le abante aviso acerca na Diez Castigo que ya experiencia el maga gente de Egipto del antes. Como ejemplo, ya imbia si Jehova con Moises y Aaron para dale aviso con el Faraon y con el de suyu maga siervo acerca na ika-siete castigo, el peligroso ulan de hielo. Ciendo el ulan de hielo hay principia na siguiente dia, el Dios ba ya dale kanila bastante tiempo para man hulau y salva na peligro? El Biblia ya habla: “El maga siervo del Faraon que ya tiene miedo na cosa ya habla si Jehova ya lleva dayun con el diila maga siervo y maga animal na casa. Pero aquellos quien nuay creé na palabra de Jehova, ya deja con el diila maga siervo y maga animal na sementera.” (Ex. 9:18-21) Claro que si Jehova ya dale kanila bastante aviso, poreso aquellos quien ya actua dayun nuay sale bien afectao si compara con otro.

Na igual manera, ya dale tambien abante aviso con el Faraon y con el de suyu maga siervo acerca na ika-diez castigo. Pero, ya ignora gayot sila con ese. (Ex. 4:22, 23) Como resulta, ya muri el diila maga primer anak hombre. Maka-triste gayot! (Ex. 11:4-10; 12:29) Tiene ba sila tiempo para actua? Si! Ya dale dayun aviso si Moises acerca na ika-diez castigo y ya dale  kanila instruccion si paquemodo salva con el diila maga familia. (Ex. 12:21-28) Cuanto gente el ya obedece con el instruccion? Asegun con otro, tres millon gente incluido el maga Israelita y un grande grupo de maga gendeh Israelita y maga Egipcio el ya salva na juzgamiento del Dios y ya sale na Egipto.​—Ex. 12:38.

Base na maga ejemplo que ya puede kita mira, ta asigura pirmi si Jehova que tiene bastante tiempo el maga gente para sigui con el de suyu aviso. (Deut. 32:4) Porque se ta hace el Dios? Si apostol Pedro ya explica que quierre si Jehova que “noay ni uno quien ay perde, sino todo ay arripinti.” (2 Ped. 3:9) Si, ta ama el Dios con el maga gente. Quierre le que arripinti sila y hace maga necesita cambio antes llega el de suyu juzgamiento.​—Isa. 48:17, 18; Roma 2:4.

Ahora, todo maga gente debe tambien obedece con el un importante aviso que ta anuncia na entero mundo. Cuando taqui si Jesus na tierra, ya dale le aviso que este presente sistema del maga cosas hay destroza durante el “grande tribulacion.” (Mat. 24:21, NW) Ya dale le detallado profecia que ta explica si cosa mira y experiencia el de suyu maga siguidores mientras ta queda cerca ese tiempo. Ya discuti le maga importante suceso que ta sucede ahora na entero mundo.​—Mat. 24:3-12; Luc. 21:10-13.

Uyun na ese profecia, ta anima ahora si Jehova con todo para iscuji sirvi con ele y obedece con el de suyu mandamiento. Quierre le que el maga obediente gente tiene alegre vida ahora y ricibi bendicion na nuevo mundo na futuro. (2 Ped. 3:13) Quierre si Jehova ayuda con el maga gente tiene fe na de suyu maga promesa. Para ayuda kanila, si Jehova ya dale un mensaje que ta salva vida​—el “Buen Noticia acerca del Reino” que ya predicta si Jesus que “ay anuncia na entero mundo, para man testigo con todo el maga nacion.” (Mat. 24:14) Ya organiza el Dios con el de suyu deverasan siervo para predica con ese mensaje na maga 240 nacion. Quierre si Jehova que mas manada gente hay sigui con el aviso y puede salva na juzgamiento que cerca ya llega.​—Sof. 1:14, 15; 2:2, 3.

Entonces, gendeh ya kita pregunta si ta dale ba bastante tiempo si Jehova con el maga gente para responde na de suyu maga aviso. El evidencia ta dale mira que pirmi le se ta hace. El importante pregunta amo: Sigui ba el maga gente con el aviso del Dios mientras tiene pa tiempo? Ojala como maga mensajero del Dios, continua kita ayuda con el mas manada gente para salva na fin de este sistema del maga cosas.